​ശാസ്താംകോട്ട : ലോകകപ്പ് ഫുട്ബോൾ ആവേശത്തോടനുബന്ധിച്ച് ക്യാമ്പസുകളിൽ വർദ്ധിച്ചുവരുന്ന ലഹരി ഉപയോഗത്തിനെതിരെ വേറിട്ട പ്രതിരോധവുമായി വിദ്യാരംഭം സെൻട്രൽ സ്കൂൾ. സ്കൂൾ മാനേജ്‌മെന്റിന്റെയും കായിക വിഭാഗത്തിന്റെയും സംയുക്ത ആഭിമുഖ്യത്തിൽ ‘ലഹരിക്കെതിരെ 2026 ഷൂട്ട്‌ ഔട്ട്‌’ എന്ന പേരിൽ മെഗാ പെനാൽറ്റി ഷൂട്ട് ഔട്ട് മത്സരം സംഘടിപ്പിച്ചു.
​ സ്കൂൾ മാനേജർ വിദ്യാരംഭം ജയകുമാർ പരിപാടി ഔദ്യോഗികമായി ഉദ്ഘാടനം ചെയ്തു. ലഹരി എന്ന വിപത്തിനെ സമൂഹത്തിൽ നിന്നും തുടച്ചുനീക്കാൻ കായിക വിനോദങ്ങൾക്കും ഇത്തരം കൂട്ടായ്മകൾക്കും വലിയ പങ്കുവഹിക്കാൻ കഴിയുമെന്ന് അദ്ദേഹം ഉദ്ഘാടന പ്രസംഗത്തിൽ ഓർമ്മിപ്പിച്ചു. ലഹരിക്ക് എതിരെ പ്രതീകാത്മകമായി ഗോൾ പോസ്റ്റിലേക്ക് പന്തടിച്ചു കയറ്റിക്കൊണ്ടാണ് അദ്ദേഹം ഉദ്ഘാടന കർമ്മം നിർവ്വഹിച്ചത്.

​ലഹരിക്കെതിരെയുള്ള പോരാട്ടത്തിൽ ക്യാമ്പസ് ഒന്നടങ്കം അണിനിരന്നപ്പോൾ അതൊരു ചരിത്ര നിമിഷമായി മാറി.
​തുടർന്ന് സ്കൂളിലെ അധ്യാപകരും ജീവനക്കാരുമടങ്ങുന്ന നൂറ്റമ്പതോളം വരുന്ന സ്റ്റാഫും, രണ്ടായിരത്തോളം വരുന്ന വിദ്യാർത്ഥികളും ലഹരിവിരുദ്ധ സന്ദേശമുയർത്തിപ്പിടിച്ച് ആവേശത്തോടെ ഗോൾ പോസ്റ്റിലേക്ക് പന്തടിച്ചു കയറ്റി. കുട്ടികളുടെയും അധ്യാപകരുടെയും പങ്കാളിത്തം കൊണ്ട് പരിപാടി ഏറെ ശ്രദ്ധേയമായി.
​സ്കൂളിലെ പി.ടി അധ്യാപകരായ സന്ദീപ് വി ആചാര്യ, റാം കൃഷ്ണൻ എന്നിവരാണ് ഈ പരിപാടിക്ക് നേതൃത്വം നൽകിയത്. ലോകകപ്പിന്റെ ലഹരിയിൽ മയങ്ങുന്ന ലോകത്തിന് മുന്നിൽ, യഥാർത്ഥ ലഹരി കായികരംഗമാണെന്ന വലിയൊരു സന്ദേശം നൽകാൻ ഈ പരിപാടിയിലൂടെ സാധിച്ചതായി സ്കൂൾ അധികൃതർ അറിയിച്ചു.

കുന്നത്തൂർ:കുന്നത്തൂരിൽ ആളില്ലാത്ത രണ്ട് വീടുകളിൽ മുൻ വശത്തെ കതക് തകർത്ത് മോഷണം.ഐവർകാല പുത്തനമ്പലം കരയോഗം ജംഗ്ഷനു സമീപം റോയി ഭവനിൽ റെജി,ഉഷസിൽ തോമസ് എന്നിവരുടെ വീടുകളിലാണ് മോഷണം നടന്നത്.റെജിയും കുടുംബവും വിദേശത്തും തോമസും കുടുംബവും അയൽ സംസ്ഥാനത്തുമാണ്.

റെജിയുടെ വീട്ടിൽ ജോലിക്ക് എത്തുന്ന സ്ത്രീയാണ് കതക് തകർത്ത് മോഷണം നടന്നതായി അറിയിച്ചത്.ഇവിടെ നിന്നും നാല് ഗ്രാം സ്വർണവും 10000 രൂപയും കവർന്നതായാണ് പ്രാഥമിക നിഗമനം.അടുത്ത ദിവസമാണ് തോമസിൻ്റെ വീട്ടിൽ കതക് തകർത്ത് മോഷ്ടാക്കൾ കയറിയതായി ശ്രദ്ധയിൽപ്പെട്ടത്.വിവരമറിഞ്ഞ്
ശാസ്‌താംകോട്ട പൊലീസ് സ്ഥലത്തെത്തി പ്രാഥമികാന്വേഷണം നടത്തി.ഫിംഗർപ്രിൻ്റ് വിദഗ്ധരും സ്ഥലത്തെത്തി തെളിവുകൾ ശേഖരിച്ചു.

ശാസ്താംകോട്ട:പഞ്ചായത്ത് ഓഫീസിലെ ലക്ഷങ്ങളുടെ അഴിമതിയിൽ സിപിഎമ്മിലെ ഉന്നതരുടെ പങ്ക് അന്യേഷിക്കുക,നിലവിലെ പഞ്ചായത്ത്
ഭരണസമിതി പിരിച്ചു വിടുക,തട്ടിപ്പുമായി ബന്ധപ്പെട്ട് മുൻ പഞ്ചായത്ത് പ്രസിഡന്റിന്റെ പങ്ക് അന്വേഷിക്കുക തുടങ്ങിയ ആവശ്യങ്ങൾ ഉന്നയിച്ച് ആർഎസ്പി ലോക്കൽ കമ്മിറ്റിയുടെ നേതൃത്വത്തിൽ ശാസ്‌താംകോട്ട പഞ്ചായത്ത് ഓഫീസിലേക്ക് മാർച്ചും
ധർണയും നടത്തി.സംസ്ഥാന സെക്രട്ടറിയേറ്റ് അംഗം ഇടവനശ്ശേരി സുരേന്ദ്രൻ ഉദ്ഘാടനം ചെയ്തു.സംസ്ഥാന കമ്മിറ്റി അംഗം കെ.ജി വിജയദേവൻപിള്ള അധ്യക്ഷത വഹിച്ചു.

ലോക്കൽ സെക്രട്ടറി പി.ജി സുധാകരൻ പിള്ള സ്വാഗതം പറഞ്ഞു.പാങ്ങോട് സുരേഷ്,തുണ്ടിൽ നിസ്സാർ,വിജയചന്ദ്രൻ നായർ,വേണുഗോപാൽ,ബഷീർ പനപ്പെട്ടി,സുജിത് പവിത്രേശ്വരം,ഡി.അലക്സ് കുട്ടി,കല്ലട റാഫേൽ,പിന്നാട്ട് ബാബു എന്നിവർ സംസാരിച്ചു.പോസ്റ്റാഫീസ് ജംഗ്ഷനിൽ നിന്നും ആരംഭിച്ച പ്രകടനത്തിന് ചന്ദ്രബാബു,ലാസർ,ജയകുമാർ,ആനന്ദൻ, നവാസ് ചേമത്തറ,നാസർ,ബദർ,സുമ, ചന്ദ്രശേഖരൻ ഉണ്ണിത്താൻ,ജയചന്ദ്രൻ എന്നിവർ നേതൃത്വം നൽകി.

കുന്നത്തൂർ:നിർമ്മാണം നടക്കുന്ന വീട്ടിൽ നിന്നും കാർപ്പെൻ്ററി ജോലിക്കായി ഉപയോഗിക്കുന്ന മെഷീനുകൾ ഉൾപ്പെടെ മോഷ്ടിച്ചതായി പരാതി.കുന്നത്തൂർ കിഴക്ക് തെരിയിൽ സുധീഷ് കുമാറിൻ്റെ വീട്ടിലാണ് മോഷണം നടന്നത്.കഴിഞ്ഞ 28ന് രാത്രിയിലാണ് സംഭവം.

വീടിൻ്റെ കാർപെൻ്ററി വർക്കുകൾ നടത്തുന്ന കരിന്തോട്ടുവ സ്വദേശി സദാശിവൻ ആചാരിയുടെ 5 മെഷീനുകൾ,മറ്റ് കാർപെൻ്ററി ഉപകരണങ്ങൾ എന്നിവയാണ് മോഷണം പോയത്.30000 രൂപയുടെ നഷ്‌ടമാണ് കണക്കാക്കുന്നത്.അതിനിടെ ശാസ്താംകോട്ട പോലീസിൽ പരാതി നൽകിയെങ്കിലും അന്വേഷണം ഇഴഞ്ഞു നീങ്ങുകയാണെന്ന് ആക്ഷേപമുണ്ട്.