ബംഗളൂരു: കർണാടക മുൻ മുഖ്യമന്ത്രിയും മുതിർന്ന കോൺഗ്രസ് നേതാവുമായ സിദ്ധരാമയ്യ തെരഞ്ഞെടുപ്പ് രാഷ്ട്രീയത്തിൽ നിന്ന് വിരമിക്കുന്നതായി പ്രഖ്യാപിച്ചു. 2028ലെ കർണാടക നിയമസഭാ തെരഞ്ഞെടുപ്പിൽ മത്സരിക്കില്ലെന്നും പ്രായം, ആരോഗ്യസ്ഥിതി, ഇന്നത്തെ രാഷ്ട്രീയ സാഹചര്യങ്ങൾ എന്നിവയാണ് തീരുമാനത്തിന് കാരണമെന്നും അദ്ദേഹം വ്യക്തമാക്കി.

സമൂഹമാധ്യമമായ എക്സിലൂടെ നടത്തിയ കുറിപ്പിലൂടെയാണ് സിദ്ധരാമയ്യ ഇക്കാര്യം അറിയിച്ചത്. മാണ്ഡ്യ ജില്ലയിലെ ഒരു പരിപാടിയിൽ നടത്തിയ പ്രസംഗത്തിലെ കാര്യങ്ങളാണ് അദ്ദേഹം പങ്കുവെച്ചത്. എന്നാൽ സജീവ രാഷ്ട്രീയം പൂർണമായും വിടില്ലെന്നും പാർട്ടിക്ക് ആവശ്യമായ മാർഗനിർദേശങ്ങൾ നൽകുന്നത് തുടരുമെന്നും അദ്ദേഹം വ്യക്തമാക്കി.

നിലവിൽ 79 വയസുള്ള തനിക്ക് 2028ൽ 81-82 വയസ്സാകുമെന്നും അന്നത്തെ സാഹചര്യത്തിൽ മുമ്പത്തെ അതേ ഊർജത്തോടെ തെരഞ്ഞെടുപ്പ് രംഗത്ത് പ്രവർത്തിക്കാൻ കഴിയില്ലെന്നുമാണ് സിദ്ധരാമയ്യയുടെ വിലയിരുത്തൽ.

മുഖ്യമന്ത്രി പദവി ഡി.കെ. ശിവകുമാറിന് കൈമാറി മാസങ്ങൾക്കുശേഷമാണ് അദ്ദേഹത്തിന്റെ പ്രഖ്യാപനം. വീണ്ടും മത്സരിക്കണമെന്ന് വരുണ മണ്ഡലത്തിലെ ജനങ്ങൾ ആവശ്യപ്പെടുന്നുണ്ടെങ്കിലും ഇനി ഒരു തെരഞ്ഞെടുപ്പിലും മത്സരിക്കേണ്ടതില്ലെന്ന തീരുമാനം അന്തിമമാണെന്ന് അദ്ദേഹം പറഞ്ഞു. മുമ്പ് ജനങ്ങൾ സാമ്പത്തികമായി പിന്തുണച്ച് വിജയിപ്പിച്ചിരുന്ന സാഹചര്യം ഇന്നില്ലെന്നും അദ്ദേഹം കൂട്ടിച്ചേർത്തു.

1978ൽ താലൂക്ക് ബോർഡ് അംഗമായാണ് പൊതുജീവിതം ആരംഭിച്ചതെന്നും 2028ഓടെ അമ്പത് വർഷത്തെ പൊതുപ്രവർത്തനം പൂർത്തിയാകുമെന്നും സിദ്ധരാമയ്യ ഓർമിപ്പിച്ചു. വിജയങ്ങളും പരാജയങ്ങളും നേരിട്ടിട്ടുണ്ടെങ്കിലും താൻ വിശ്വസിച്ച തത്വങ്ങളിൽ നിന്ന് ഒരിക്കലും വഴിമാറിയിട്ടില്ലെന്നും മനസ്സാക്ഷിയെ വഞ്ചിച്ചിട്ടില്ലെന്ന സംതൃപ്തിയോടെയാണ് തെരഞ്ഞെടുപ്പ് രാഷ്ട്രീയത്തോട് വിടപറയുന്നതെന്നും അദ്ദേഹം പറഞ്ഞു. അഞ്ച് പതിറ്റാണ്ടിലേറെയായി തനിക്കൊപ്പം നിന്ന കർണാടകയിലെ ജനങ്ങളോട് അദ്ദേഹം നന്ദിയും രേഖപ്പെടുത്തി.

ഗ്ലാസ്‌ഗോ: 2026 കോമൺവെൽത്ത് ഗെയിംസിലെ വെയ്റ്റ്‌ലിഫ്റ്റിങ്ങിൽ പുതിയ കോമൺവെൽത്ത് ഗെയിംസ് റെക്കോഡ് സ്വന്തമാക്കി ഇന്ത്യൻ താരം റിഷികാന്ത് സിങ് ഇന്ത്യയ്ക്ക് രണ്ടാം മെഡൽ സമ്മാനിച്ചു. പുരുഷന്മാരുടെ 60 കിലോഗ്രാം വിഭാഗത്തിൽ ആകെ 264 കിലോഗ്രാം ഉയർത്തിയാണ് റിഷികാന്ത് വെള്ളി മെഡൽ നേടിയത്.

സ്നാച്ച് വിഭാഗത്തിൽ മൂന്നാം ശ്രമത്തിൽ 121 കിലോഗ്രാം ഭാരം ഉയർത്തിയാണ് റിഷികാന്ത് പുതിയ കോമൺവെൽത്ത് ഗെയിംസ് റെക്കോഡ് കുറിച്ചത്. തുടർന്ന് ക്ലീൻ ആൻഡ് ജെർക്കിൽ വിജയകരമായ ഏക ശ്രമത്തിൽ 143 കിലോഗ്രാം ഉയർത്തി ആകെ 264 കിലോഗ്രാമെന്ന മികച്ച പ്രകടനമാണ് താരം പുറത്തെടുത്തത്.

2022ലെ ബെർമിങ്ഹാം കോമൺവെൽത്ത് ഗെയിംസിൽ 55 കിലോഗ്രാം വിഭാഗത്തിൽ മത്സരിച്ചെങ്കിലും മെഡൽ നഷ്ടമായിരുന്നു. നാല് വർഷത്തിന് ശേഷം റെക്കോഡും വെള്ളി മെഡലുമായി തിരിച്ചെത്തിയ റിഷികാന്തിന്റെ നേട്ടം ഇന്ത്യൻ സംഘത്തിന് വലിയ ആത്മവിശ്വാസമാണ് നൽകുന്നത്.

മത്സരത്തിൽ മലേഷ്യയുടെ മുഹമ്മദ് അനീഖ് ബിൻ കസ്ദാൻ ആകെ 273 കിലോഗ്രാം ഉയർത്തി സ്വർണ മെഡൽ സ്വന്തമാക്കിയപ്പോൾ, കെനിയയുടെ ജോഷ്വ അമുങ്ക എംബോയ 260 കിലോഗ്രാമുമായി വെങ്കല മെഡൽ നേടി.

തിരുവനന്തപുരം: വഞ്ചിയൂര്‍ പാല്‍ക്കുളങ്ങരയില്‍ പട്ടാപ്പകല്‍ യുവാവിനെ കുത്തിക്കൊന്നു. ചമ്പക്കട സ്വദേശി വിശാഖ് ആണ് കൊല്ലപ്പെട്ടത്. അയല്‍വാസിയായ പ്രദീപ് ആണ് ആക്രമണം നടത്തിയത്.
ഇന്ന് ഉച്ചയോടെയാണ് സംഭവം. ഇരുവരും തമ്മില്‍ നേരത്തെ നിലനിന്നിരുന്ന വ്യക്തിവൈരാഗ്യമാണ് കൊലപാതകത്തില്‍ കലാശിച്ചത് എന്നാണ് പൊലീസ് പറയുന്നത്. പ്രദീപിനെ ആക്രമിച്ച കേസില്‍ മുന്‍പ് വിശാഖിനെ പൊലീസ് അറസ്റ്റ് ചെയ്തിരുന്നു. തുടര്‍ന്ന് ജയിലില്‍ കഴിഞ്ഞിരുന്ന ഇയാള്‍ അടുത്തിടെയാണ് പുറത്തിറങ്ങിയത്.
ഇതിനുശേഷവും ഇരുവരും തമ്മില്‍ പ്രശ്നങ്ങള്‍ നിലനിന്നിരുന്നു. സംഭവത്തിന് രണ്ട് ദിവസം മുന്‍പും ഇവര്‍ തമ്മില്‍ വാക്കേറ്റവും തര്‍ക്കവും ഉണ്ടായിരുന്നതായും പൊലീസ് വ്യക്തമാക്കി. പാല്‍ക്കുളങ്ങരയില്‍ വച്ചാണ് പ്രദീപ് വിശാഖിനെ ആക്രമിച്ചത്. ഗുരുതരമായി പരിക്കേറ്റ വിശാഖിനെ പിന്നീട് പൊലീസെത്തിയാണ് ആശുപത്രിയില്‍ എത്തിച്ചത്. എന്നാല്‍ ജീവന്‍ രക്ഷിക്കാനായില്ല.
കൊല്ലപ്പെട്ട വിശാഖും ആക്രമണം നടത്തിയ പ്രദീപും ക്രിമിനല്‍ പശ്ചാത്തലമുള്ളവരാണെന്നും പൊലീസ് സ്ഥിരീകരിച്ചു. സംഭവത്തിന് ശേഷം ഒളിവില്‍ പോയ പ്രതിക്കായി വഞ്ചിയൂര്‍ പൊലീസ് അന്വേഷണം ഊര്‍ജിതമാക്കി. ആക്രമണം നടത്തിയ പ്രദീപിന് ഒപ്പം മൂന്ന് പേര്‍ ഉണ്ടായിരുന്നതായി പൊലീസ് പറയുന്നു. ഇവര്‍ ഒരു കാറിലാണ് സംഭവ സ്ഥലത്ത് എത്തിയത്. കൊലയ്ക്ക് പിന്നില്‍ ഗൂഢാലോചന ഉള്ളതായും പൊലീസ് സംശയിക്കുന്നു.