ഹൈദാരാബാദ്: തെലങ്കാനയിലെ വിദ്യാർത്ഥികൾ നേരിടുന്ന ഫീസ് പ്രതിസന്ധിയിൽ കോൺഗ്രസ് നേതാവ് രാഹുൽ ഗാന്ധിക്ക് ഇറ്റാലിയൻ ഭാഷയിൽ കത്തയച്ച് ബിജെപി സംസ്ഥാന അധ്യക്ഷൻ ബന്ദി സഞ്ജയ് കുമാർ. രാഹുൽ ഗാന്ധിയുടെ ‘മാതൃഭാഷ’ എന്ന് പരിഹസിച്ചാണ് കരിംനഗർ എംപി കൂടിയായ സഞ്ജയ് കുമാർ കത്ത് പുറത്തുവിട്ടത്. സംസ്ഥാന സർക്കാരിന്റെ കെടുകാര്യസ്ഥതക്കെതിരെ പ്രതികരിക്കാൻ കോൺഗ്രസ് പരാജയപ്പെട്ടെന്നും അദ്ദേഹം കുറ്റപ്പെടുത്തി.
കഴിഞ്ഞ രണ്ടുവർഷമായി തെലങ്കാന സർക്കാർ വിദ്യാർത്ഥികളുടെ ഫീസ് റീഇംബേഴ്സ്മെന്റ്, സ്കോളർഷിപ്പ് എന്നിവയ്ക്കുള്ള ഫണ്ട് നൽകുന്നില്ലെന്നാണ് പ്രധാന ആരോപണം. ഏകദേശം 4,000 കോടി രൂപയുടെ കുടിശ്ശികയാണ് സർക്കാരിന് വീട്ടാനുള്ളത്. ഇത് സംസ്ഥാനത്തെ 14 ലക്ഷത്തോളം വിദ്യാർത്ഥികളുടെ ഭാവിയാണ് പ്രതിസന്ധിയിലാക്കിയിരിക്കുന്നത്.
പട്ടികജാതി, പട്ടികവർഗ, പിന്നാക്ക, സാമ്പത്തികമായി പിന്നാക്കം നിൽക്കുന്ന വിഭാഗങ്ങളിലെ വിദ്യാർത്ഥികളാണ് ഏറെയും ദുരിതത്തിലായത്. ഫീസ് അടയ്ക്കാൻ കഴിയാത്തതിനാൽ പലർക്കും പഠനം തുടരാനോ കോഴ്സ് പൂർത്തിയാക്കിയ സർട്ടിഫിക്കറ്റുകൾ വാങ്ങാനോ സാധിക്കുന്നില്ല. പാവപ്പെട്ട വിദ്യാർത്ഥികളെ വിദ്യാഭ്യാസത്തിൽ നിന്ന് അകറ്റാനാണ് സർക്കാർ ശ്രമിക്കുന്നതെന്നും സഞ്ജയ് കുമാർ ആരോപിച്ചു.
‘തെലുങ്കിൽ പറഞ്ഞാൽ കേൾക്കില്ല, ഇറ്റാലിയനെങ്കിലും ഫലം കാണുമോ?’
തെലുങ്കിൽ പലതവണ ആവശ്യപ്പെട്ടിട്ടും സംസ്ഥാന സർക്കാരോ കോൺഗ്രസോ വിഷയം ശ്രദ്ധിക്കുന്നില്ലെന്ന് സഞ്ജയ് കുമാർ കത്തിൽ പറയുന്നു. അതുകൊണ്ടാണ് രാഹുൽ ഗാന്ധിയുടെ ‘മാതൃഭാഷ’യായ ഇറ്റാലിയനിൽ കത്തെഴുതാൻ തീരുമാനിച്ചതെന്നും, എങ്കിലെങ്കിലും ഒരു പ്രതികരണമുണ്ടാകുമെന്ന് പ്രതീക്ഷിക്കുന്നതായും അദ്ദേഹം പരിഹസിച്ചു. വിഷയം രാഷ്ട്രീയമായി ആളിക്കത്തിക്കാനാണ് ബിജെപിയുടെ ഈ നീക്കമെന്ന് വ്യക്തം.
വിദ്യാർത്ഥികളുടെ ഭാവിക്കുവേണ്ടി പോരാടാൻ തെലങ്കാനയിലെ കോൺഗ്രസ് ഘടകത്തിന് നിർദേശം നൽകണമെന്ന് സഞ്ജയ് കുമാർ രാഹുൽ ഗാന്ധിയോട് ആവശ്യപ്പെട്ടു. ഉത്തരവാദിത്തത്തോടെ പ്രവർത്തിക്കുന്നതിൽ കോൺഗ്രസ് പൂർണമായും പരാജയപ്പെട്ടെന്നും അദ്ദേഹം കുറ്റപ്പെടുത്തി. ഫീസ് കുടിശ്ശികയായ 4,000 കോടി രൂപ സർക്കാർ ഉടൻ അനുവദിക്കണമെന്നും വിദ്യാർത്ഥികളുടെ പ്രതിസന്ധിക്ക് പരിഹാരം കാണണമെന്നും അദ്ദേഹം ആവശ്യപ്പെട്ടു. ഈ വിഷയത്തിൽ ശക്തമായ പ്രക്ഷോഭം സംഘടിപ്പിക്കാൻ കോൺഗ്രസ് തയ്യാറാകണമെന്നും ബിജെപി നേതാവ് വെല്ലുവിളിച്ചു.