കുന്നത്തൂർ:കൊട്ടാരക്കര – കരുനാഗപ്പള്ളി റൂട്ടിൽ കുന്നത്തൂർ ഫാക്ടറി ജംഗ്ഷനും ആറ്റുകടവിനും ഇടയ്ക്കുള്ള കൊടും വളവ് വാഹന യാത്രികർക്ക് പേടിസ്വപ്നമായി മാറുന്നു.കണ്ണൊന്ന് തെറ്റിയാൽ അപകടം ഉറപ്പ് എന്നതാണ് ഇവിടുത്തെ പ്രത്യേകത.സദാ സമയവും തിരക്കേറിയ ഈ പാതയിൽ അടുത്തടുത്തായി രണ്ട് വലിയ വളവുകളാണുള്ളത്.ഇതിൽ കൊക്കാംകാവ് ക്ഷേത്രത്തിലേക്ക് ഇറങ്ങുന്ന ഭാഗത്ത് പ്രീ-മെട്രിക്
ഹോസ്റ്റലിനോട് ചേർന്നുള്ള വളവാണ് ഏറ്റവും അപകടകാരിയായി മാറുന്നത്.ഭരണിക്കാവ് ഭാഗത്ത് നിന്നും എത്തുന്ന വാഹനങ്ങൾ അപകടത്തിൽപ്പെടാനുള്ള സാധ്യത ഏറെയാണ്.കൊക്കാംകാവ് ക്ഷേത്രത്തിലേക്ക് ഇറങ്ങുന്ന റോഡും പ്രധാന പാതയും തമ്മിലുള്ള ഉയരവ്യത്യാസമാണ് ഇതിനു കാരണം.പാതയോരം നന്നേ കുറവായ ഇവിടെ താഴ്ചയിലേക്ക് വാഹനങ്ങൾ പതിക്കാനുള്ള സാധ്യത കൂടുതലാണ്.പലപ്പോഴും വലിയ വാഹനങ്ങൾ ഉൾപ്പെടെ തലനാരിഴയ്ക്കാണ് അപകടത്തിൽ നിന്നും രക്ഷപ്പെടുന്നത്.ഇരുചക്ര വാഹനങ്ങൾ പലപ്പോഴും താഴേക്ക് പതിക്കാറുണ്ടെന്ന് നാട്ടുകാർ പറയുന്നു.വളവു തിരിഞ്ഞ് നേർക്കു നേർ എത്തുന്ന വാഹനങ്ങൾ മിക്കപ്പോഴും കൂട്ടിയിടിക്കുന്നത് പതിവാണ്. വർഷങ്ങൾക്ക് മുമ്പ് കണ്ടെയ്നർ ലോറി ഹോസ്റ്റൽ കെട്ടിടത്തിന് മുകളിലേക്ക് മറിഞ്ഞ് അപകടമുണ്ടായിരുന്നു.സ്വകാര്യ ബസിടിച്ച് പ്രദേശവാസിയായ ഒരാളും മരണപ്പെട്ടിരുന്നു.ഈ ഭാഗത്ത് പതിവായി റോഡ് തകരുന്നതും അപകടങ്ങൾക്ക് കാരണമാകുന്നു.കൊടും വളവാണെങ്കിലും അമിത വേഗതയിലാണ് സ്വകാര്യ ബസുകൾ ഉൾപ്പെടെ ചീറി പായുന്നത്.കാൽനട യാത്രികരും ഭയന്നാണ് ഇതുവഴി സഞ്ചരിക്കുന്നത്.ആധുനിക രീതിയിലുള്ള നവീകരണം നടത്താൻ പൊതുമരാമത്ത് വകുപ്പ് തയ്യാറാകാത്തതാണ് ഇതിനുള്ള കാരണമെന്ന് നാട്ടുകാർ പറയുന്നു.വളവ് നിവർത്തിയെടുക്കുകയും സൈഡ് വാൾ കെട്ടി റോഡിൻ്റെ വീതി കൂട്ടുകയും വശങ്ങളിൽ സ്റ്റമ്പ് പാകണമെന്നും സുരക്ഷാ മുൻകരുതൽ ബോർഡുകൾ സ്ഥാപിക്കുകയും ചെയ്താൽ ഒരു പരിധിവരെ അപകടങ്ങൾ തടയാൻ കഴിയുമെന്നാണ് വിലയിരുത്തൽ.

ശാസ്താംകോട്ട:ഏറെ നാളത്തെ കാത്തിരിപ്പിനും സമ്മർദ്ദങ്ങൾക്കും ഒടുവിൽ കാരാളിമുക്ക് -ശാസ്താംകോട്ട റെയിൽവേ സ്റ്റേഷൻ – കുറ്റിയിൽ മുക്ക് റോഡ് നിർമ്മാണത്തിന് 2 കോടി രൂപ അനുവദിച്ച് ടെൻഡർ നടപടിയിൽ എത്തിയിട്ടും റോഡ് നിർമ്മാണത്തിൻ്റെ കരാർ എടുക്കാൻ ആളില്ലാത്തതിനാൽ നിർമ്മാണം പ്രതിസന്ധിയിലായി. വർഷങ്ങളായി തകർന്ന് കിടന്ന് യാത്ര ദുഷ്കരമായ റോഡ് പുനർനിർമ്മിക്കണമെന്ന് ആവശ്യപ്പെട്ട്  റെയിൽ സിറ്റി അടക്കമുള്ള സംഘടകളും വിവിധ രാഷ്ട്രീയ പാർട്ടികളും യാത്രക്കാരും നിരന്തര സമ്മർദ്ദം ചെലുത്തിയതിനെ തുടർന്ന് കോവൂർ കുഞ്ഞുമോൻ എം.എൽ എ മുഖ്യമന്ത്രിയുടെ ജനസമ്പർക്ക പരിപാടിയിൽ നൽകിയ അപേക്ഷയുടെ അടിസ്ഥാനത്തിലാണ് റോഡ് നിർമ്മാണത്തിന് 2 കോടി രൂപ അനുവദിച്ചത്. റോഡിൻ്റെ വീതി കുറവും കാരാളിമുക്കിലെ കുത്തനെയുള്ള കയറ്റം പരിഹരിച്ചും 6 മീറ്റർ വീതിയിൽ ബി.എം. ബി. സി യിൽ റോഡ് നിർമ്മിക്കാൻ പി.ഡബ്ലു. ഡി അധികൃതർ എസ്റ്റിമേറ്റ് തയ്യാറാക്കുകയും  ടെൻഡർ വിളിക്കുകയും ചെയ്തിട്ട് കരാർ എടുക്കാൻ ആളുണ്ടായില്ല. പിന്നീട് 2 തവണ കൂടി ടെൻഡൻ വിളിച്ചിട്ടും കരാർ ആയിട്ടില്ല.
നൂറ് കണക്കിന് ആളുകളും വാഹനങ്ങളും നിത്യവും കടന്ന് വരുന്ന കാരാളിമുക്ക് – ശസ്താംകോട്ട റെയിൽവേ സ്റ്റേഷൻ – കുറ്റിയിൽ മുക്ക് റോഡ് കാൽ നടയായി പോലും പോകാൻ കഴിയാത്ത അവസ്ഥയിലാണ്. റോഡ് നിർമ്മാണത്തോടെ ഇതിന് പരിഹാരമാകും എന്ന് പ്രതീക്ഷിച്ചിരുന്ന യാത്രക്കാർക്കും പ്രദേശവാസികൾക്കും കടുത്ത തിരിച്ചടി ആയിരിക്കുകയാണ് കരാർ എടുക്കാൻ ആളില്ലാത്ത സാഹചര്യം.