ഇടുക്കി. മറയൂരിൽ മധ്യവയസ്‌കനെ മരിച്ച നിലയിൽ കണ്ടെത്തി. ചുരക്കുളം ഉന്നതിയിൽ മുരുകൻ (55) ആണ് മരിച്ചത്. മുരുകന്റെ മരണം കാട്ടാന ആക്രമണത്തെ തുടർന്നാണെന്നാണ് നാട്ടുകാരുടെ ആരോപണം. സംഭവത്തെ തുടർന്ന് പ്രദേശത്ത് നാട്ടുകാർ പ്രതിഷേധവുമായി രംഗത്ത് എത്തി.
അതേസമയം, സംഭവസ്ഥലത്ത് കാട്ടാനയുടെ സാന്നിധ്യം കണ്ടെത്തിയിട്ടില്ലെന്നാണ് വനം വകുപ്പ് പറയുന്നത്. പോസ്റ്റ്മോർട്ടം റിപ്പോർട്ട് ലഭിച്ച ശേഷമേ മരണകാരണം സ്ഥിരീകരിക്കാൻ കഴിയൂവെന്നും അധികൃതർ വ്യക്തമാക്കി. അസ്വാഭാവിക മരണത്തിന് കേസെടുത്ത് പൊലീസ് അന്വേഷണം ആരംഭിച്ചിട്ടുണ്ട്. കാട്ടാന ആക്രമണമാണ് മരണത്തിന് കാരണമെന്ന് ആരോപിച്ച് മൃതദേഹം സൂക്ഷിച്ചിരിക്കുന്ന ആശുപത്രിക്ക് മുന്നിൽ നാട്ടുകാർ പ്രതിഷേധിച്ചു.
തിരുവനന്തപുരം: പരവൂർ കോടതിയിലെ അസിസ്റ്റൻറ് പബ്ലിക് പ്രോസിക്യൂട്ടറായിരുന്ന അനീഷ്യ ആത്മഹത്യ ചെയ്ത സംഭവത്തിൽ പ്രധാന പ്രതിക്ക് സ്വന്തം നാട്ടിലേക്ക് സ്ഥലംമാറ്റം. അസിസ്റ്റൻറ് പബ്ലിക് പ്രോസിക്യൂട്ടർ കെ.ആർ. ശ്യാംകൃഷ്ണയ്ക്കാണ് വയനാട്ടിൽ നിന്നും ആറ്റിങ്ങൽ കോടതിയിലേക്ക് സ്ഥലംമാറ്റം നൽകിയത്. അന്വേഷണം പ്രത്യേക സംഘത്തെ ഏൽപ്പിക്കണമെന്നാവശ്യപ്പെട്ട് മുഖ്യമന്ത്രി വി.ഡി. സതീശനെ കുടുംബം സന്ദർശിച്ചിരുന്നു. കുടുംബത്തിന്റെ ആവശ്യം പരിഗണിക്കുമെന്ന് മുഖ്യമന്ത്രി കുടുംബത്തിന് ഉറപ്പും നൽകി. എന്നാൽ, പിന്നാലെയാണ് പ്രധാന പ്രതിക്ക് സ്വന്തം നാട്ടിലേക്ക് സ്ഥലം മാറ്റം നൽകിയത്. 2024 ജനുവരി 21നാണ് അനീഷ്യയെ പരവൂരിലെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്. സഹപ്രവർത്തകരിൽ നിന്നും മേലുദ്യോഗസ്ഥരിൽ നിന്നും മാനസിക പീഡനം നേരിട്ടുവെന്നായിരുന്നു കുടുംബത്തിന്റെ ആരോപണം.
സഹപ്രവർത്തകരുടെ മാനസിക പീഡനം മൂലമാണ് അസി. പ്രോസിക്യൂട്ടറായിരുന്ന് അനീഷ്യ ആത്മഹത്യ ചെയ്തുവെന്നാണ് ക്രൈം ബ്രാഞ്ച് കേസ്. കൊല്ലം ഡെപ്യൂട്ടി ഡയറക്ടർ ഓഫ് പ്രോസിക്യൂഷൻ അബ്ദുള്‍ ജലീല്‍, പ്രോസിക്യൂട്ടറായ ശ്യാം കൃഷ്ണ എന്നിവരായിരുന്നു കേസിലെ പ്രതികള്. അനീഷ്യയെക്കെതിരെ പ്രതികള് നിരന്തരമായി മോശം പ്രചാരണം നടത്തിയെന്നാരോപണം ഉയർന്നിരുന്നു. മരിക്കുന്നതിന് തലേദിവസം ശ്യാം കൃഷ്ണ ഐഫോണിൽ അനീഷ്യയുടെ ഓഫീസ് അടഞ്ഞു കിടക്കുന്നതിന്‍റെ ചിത്രവും ശബ്ദ സന്ദേശങ്ങളും മറ്റ് ചിലർക്ക് അയച്ചിരുന്നുവെന്നും പൊലീസ് കണ്ടെത്തി. ഇവ തൊണ്ടി മുതലായ ഫോണിൽ നിന്നും വീണ്ടെടുക്കാൻ ഫോൺ ശാസ്ത്രീയ പരിശോധനക്കയച്ചിരുന്നു.
കണ്ണൂർ: കണ്ണൂർ പാനൂരിൽ ജീവനൊടുക്കാൻ ശ്രമിച്ച 28കാരി ചികിത്സയിലിരിക്കെ മരിച്ചു. പാനൂർ വള്ളങ്ങാട് അനിൽ കുമാർ -ഉദയ ദമ്പതികളുടെ മകൾ ആദിത്യ അനിൽകുമാർ (28) ആണ് മരിച്ചത്. കഴിഞ്ഞ ഞായറാഴ്ചയായിരുന്നു സംഭവം. ആൺ സുഹൃത്തിൻ്റെ മർദ്ദനത്തിൽ മനം നൊന്താണ് ജീവനൊടുക്കാന്‍ ശ്രമിച്ചതെന്ന് ബന്ധുക്കൾ ആരോപിച്ചിരുന്നു. കുടുംബത്തിന്റെ പരാതിയിൽ പാനൂർ പൊലീസ് കേസ് എടുത്തു.
തിരുവനന്തപുരം: ആര്‍ ശങ്കറിനും ഉമ്മന്‍ചാണ്ടിക്കുംശേഷം ധനവകുപ്പ് കൈകാര്യം ചെയ്ത് ബജറ്റ് അവതരിപ്പിക്കുന്ന കോൺഗ്രസ് മുഖ്യമന്ത്രിയായി വിഡി സതീശൻ നാളെ ചരിത്രം കുറിക്കും. കേരളം ഉറ്റുനോക്കുന്നത് കടുത്ത സാമ്പത്തിക അച്ചടക്കത്തിലേക്കുള്ള സംസ്ഥാനത്തിന്റെ ചുവടുവെപ്പുകളാണ്. സംസ്ഥാനത്തിന്റെ സാമ്പത്തിക നില അതീവ ഗുരുതരമെന്ന് വിലയിരുത്തി ധനവകുപ്പ് ധവളപത്രം പുറത്തിറക്കിയതിന് തൊട്ടുപിന്നാലെയാണ് ഈ ആദ്യ ബജറ്റ് വരുന്നത്. അതുകൊണ്ടുതന്നെ, നികുതി-നികുതിയേതര വരുമാനങ്ങൾ വർദ്ധിപ്പിക്കുന്നതിനൊപ്പം കേന്ദ്ര വിഹിതങ്ങൾ കൃത്യമായി വാങ്ങിയെടുക്കാനുള്ള തന്ത്രപരമായ പ്രഖ്യാപനങ്ങളും നാളത്തെ ബജറ്റിൽ പ്രതീക്ഷിക്കുന്നുണ്ട്.
സംസ്ഥാനത്തിന്റെ പ്രധാന വരുമാനസ്രോതസ്സുകളായ സ്വന്തം നികുതി, നികുതിയേതര വരുമാനം, കേന്ദ്ര വിഹിതം എന്നിവയിൽ കൃത്യമായ പുനഃക്രമീകരണം ബജറ്റിലുണ്ടാകും. ജിഎസ്ടി വിഹിതം കഴിഞ്ഞാൽ സംസ്ഥാനത്തിന് സ്വന്തമായി നികുതി കണ്ടെത്താൻ ചുരുങ്ങിയ മേഖലകൾ മാത്രമാണുള്ളത്. ഇന്ധന നികുതി, ഭൂനികുതി, മദ്യവില, വൈദ്യുതി നിരക്ക് എന്നിവ നിലവിൽ തന്നെ സാധാരണക്കാർക്ക് താങ്ങാൻ കഴിയുന്നതിലും അപ്പുറമായതിനാൽ ജനങ്ങൾക്ക് മേൽ കൂടുതൽ ഭാരം ഏൽപ്പിക്കാത്ത പ്രഖ്യാപനങ്ങളായിരിക്കും നാളെയുണ്ടാവുക. എന്നാൽ, ഖജനാവിന്റെ അവസ്ഥ കണക്കിലെടുത്ത് ജനപ്രിയ പ്രഖ്യാപനങ്ങൾ ഏറെ ഉണ്ടാകാനും സാധ്യതയില്ല.
കിഫ്ബി പൊളിച്ചുപണിയും
വിഡി സതീശൻ സർക്കാരിന്റെ ആദ്യ ബജറ്റിൽ സാമ്പത്തിക ലോകം ഏറ്റവും വലിയ മാറ്റം പ്രതീക്ഷിക്കുന്നത് കിഫ്ബിയുടെ ഘടനയിലാണ്. സ്വതന്ത്ര ധനസമാഹരണ ഏജൻസിയിൽ തുടങ്ങി സംസ്ഥാന വികസനത്തിന്റെ ഒറ്റമൂലി വരെയുള്ള പരമാധികാര പദവികളിൽ പ്രവർത്തിച്ചിരുന്ന കിഫ്ബിയെ കെട്ടിലും മട്ടിലും പൂർണ്ണമായി ഉടച്ചുവാർക്കുമെന്നാണ് സൂചനകൾ. കിഫ്ബിയെ ഒരു ധനസമാഹരണ മോഡലാക്കി മാറ്റുന്നതിനൊപ്പം അതിന്റെ പൂർണ്ണ നിയന്ത്രണം ധനവകുപ്പിന് കീഴിലാക്കാനും നടപടിയുണ്ടാകുമെന്നാണ് സൂചന.
അധികാരത്തിലെത്തിയ ഉടൻ സംസ്ഥാന ധനസ്ഥിതിയെക്കുറിച്ച് പഠിക്കാൻ സർക്കാർ നിയോഗിച്ച വിദഗ്ദ്ധ സമിതിയുടെ നിർദ്ദേശങ്ങളിൽ ഊന്നിയായിരിക്കും ഈ പുനഃസംഘടന. കിഫ്ബിയുടെ പ്രൊജക്ട് മാനേജ്മെന്റ് സംവിധാനവും ഗുണനിലവാര നിയന്ത്രണവും മികച്ചതാണെന്ന് വിദഗ്ദ്ധ സമിതി വിലയിരുത്തിയിട്ടുണ്ട്. ഈ നല്ല വശങ്ങൾ സ്വീകരിച്ച് മറ്റ് സർക്കാർ വകുപ്പുകളിലേക്കും വ്യാപിപ്പിക്കാൻ നിർദ്ദേശമുണ്ട്. എന്നാൽ അതിനപ്പുറം, കിഫ്ബിയുടെ സാമ്പത്തിക സമാഹരണത്തിലും വിനിയോഗത്തിലും ധനവകുപ്പിന് പൂർണ്ണ നിയന്ത്രണം കൊണ്ടുവന്നേക്കാനുള്ള സാധ്യതയിലേക്കാണ് ധനകാര്യ വിദഗ്‌ധർ വിരൽചൂണ്ടുന്നത്. കിഫ്ബിയുടെ വരവുചെലവുകൾ സംസ്ഥാന ബജറ്റിൽ തന്നെ ഉൾപ്പെടുത്തുന്ന വിധത്തിൽ നിലവിലുള്ള നിയമത്തിൽ വലിയ ഭേദഗതികൾ വരുത്താനുള്ള സാധ്യതയും എഴുതിതള്ളാനാകില്ലെന്നാണ് വിലയിരുത്തൽ.
കൊല്ലം .ടീച്ചർ എലിജിബിലിറ്റി ടെസ്റ്റ് (TET) യോഗ്യത സംബന്ധിച്ച് നിയമ ഭേദഗതി ആവശ്യപ്പെട്ട് പ്രധാനമന്ത്രിക്കുള്ള നിവേദനം കൊല്ലം ജില്ലാ കളക്ടർക്ക് നൽകി. ദേശീയ അധ്യാപക പരിഷത്ത് ജില്ലാ നേതൃത്വമാണ് കേരളത്തിലെ മുഴുവൻ ജില്ലകളിലെയും കലക്ടർമാർ മുഖേന നിവേദനം നൽകിയത്. സംസ്ഥാനതലത്തിൽ നടന്ന പരിപാടിയുടെ ഭാഗമായി കൊല്ലം ജില്ലാ കളക്ടർക്ക് NTU ജില്ലാ പ്രസിഡന്റ് എസ്. കെ ദിലീപ് കുമാറിൻ്റെ നേതൃത്വത്തിലാണ് നിവേദനം നൽകിയത്.
ABRSM ദക്ഷിണ ക്ഷേത്രീയ പ്രമുഖും കേരള സർവകലാശാല സിൻഡിക്കേറ്റംഗം പി എസ് ഗോപകുമാർ, അർക്കന്നൂർ രാജേഷ് , ആർ . ഹരികുമാർ , ധനലക്ഷ്മി വിരികറഴികത്ത് തുടങ്ങിയവർ പങ്കെടുത്തു.
കോതമംഗലം. ക്വാറിയിലെ കംപ്രസര്‍ വാഹനം മറിഞ്ഞ് തൊഴിലാളിക്ക് ദാരുണാന്ത്യം. മീരാന്‍ സിറ്റി സ്വദേശി നറുക്കിയില്‍ ബെന്നിയാണ് മരിച്ചത്. അപകടമറിഞ്ഞ് സ്ഥലതെത്തിയ നാട്ടുകാരെയും മാധ്യമപ്രവര്‍ത്തകരെയും ക്വാറിയുടെ നടത്തിപ്പുകാര്‍ തടഞ്ഞു.
മൈലാടുംപാറയില്‍ പ്രവര്‍ത്തിക്കുന്ന ഫോര്‍സ്റ്റാര്‍ ഗ്രാനൈറ്റ്‌സില്‍ ഉച്ചയോടെയാണ് അപകടം. പാറപൊട്ടിക്കാനായി ഉപയോഗിക്കുന്ന കംപ്രസര്‍ ഘടിപ്പിച്ച വാഹനം താഴെയ്ക്ക് വീണാണ് അപകടം. ക്വാറിയില്‍ ജോലിചെയ്തിരുന്ന ബെന്നിയുടെ ശരീരത്തിലേക്ക് വാഹനം വീണത്. സംഭവസ്ഥലത്ത് തന്നെ ബെന്നി മരിച്ചു. വാഹനവും തകര്‍ന്നു. അപകടം അതീവ രഹസ്യമാക്കി വെയ്ക്കാനായിരുന്നു ക്വാറിക്കാരുടെ ശ്രമം. എന്നാല്‍ വിവരമറിഞ് നാട്ടുകാര്‍ സ്ഥലതെത്തി. ഗെയ്റ്റ് അടച്ചപൂട്ടിയ ക്വാറിയുടെ ചുമതലക്കാര്‍ ആക്രമിക്കാനും ശ്രമിച്ചു.
ബെന്നിയുടെ മൃതദേഹം ആശുപത്രിയിലേക്ക് മാറ്റി. ക്വാറിയുടെ പ്രവര്‍ത്തനം സംബന്ധിച്ച് വ്യാപക പരാതി നാട്ടുകാര്‍ക്കുണ്ട്. അനധികൃത പാറഖനനത്തിനെതിരെ ജില്ലാ കലക്ടര്‍ക്കടക്കം പരാതി നല്‍കിയിട്ടും നടപടിയുണ്ടായിട്ടില്ല. ജിയോളജി വകുപ്പിന്റെയും പ്രാദേശിക ഭരണകൂടത്തിന്റെയും അനുമതിയില്ലാതെയാണ് ക്വാറിയുടെ പ്രവര്‍ത്തനമെന്നും നാട്ടുകാര്‍ ചൂണ്ടിക്കാട്ടുന്നു. നിയമം അനുശാസിക്കുന്ന യാതൊരുവിധ സുരക്ഷാ ക്രമീകരണങ്ങളും ജീവനക്കാര്‍ക്കോ തൊഴിലാളികള്‍ക്കോ ക്വാറി മാനേജ്മെന്റ് നല്‍കിയിരുന്നില്ല. ബെന്നിയുടെ മരണത്തിലേക്ക് നയിച്ചതും ഈ സുരക്ഷാവീഴ്ചയാണെന്നും നാട്ടുകാര്‍ ആരോപിക്കുന്നു. അപകടത്തിന്റെ പശ്ചാത്തലത്തില്‍ ക്വാറി അടച്ചുപൂട്ടണമെന്നാണ് നാട്ടുകാരുടെ ആവശ്യം.
കോഴിക്കോട്. നഗരത്തില് വീണ്ടും കഞ്ചാവ് വേട്ട. കെഎസ്ആർടിസി ബസില് കടത്തുകയായിരുന്ന നാല് കിലോ കഞ്ചാവ് പിടികൂടി. ഒഡീഷ സ്വദേശികളായ രണ്ടുപേരെ പൊലീസ അറസ്റ്റ് ചെയ്തു. പെരുമ്പാവൂരില് നിന്ന് കൊണ്ടുവന്ന കഞ്ചാവ് കോഴിക്കോട് വില്പന നടത്താനാണെന്ന് പ്രതികള് മൊഴി നല്കി. അന്വേഷണം പെരുമ്പാവൂരിലേക്കും വ്യാപിപ്പിക്കും. ഓപ്പറേഷൻ തൂഫാന്റെ ഭാഗമായാണ് അറസ്റ്റ്.
ദീർഘദൂര കെഎസ്ആർടിസി ബസുകൾ വഴി ലഹരിവസ്തു കടത്ത് വ്യാപകമാണെന്ന സംശയത്തിന്റെ അടിസ്ഥാനത്തിൽ നടത്തിയ പരിശോധനയിൽ നാല് കിലോ കഞ്ചാവുമായി രണ്ട് അതിഥി തൊഴിലാളികൾ പിടിയിലായി. കോഴിക്കോട് സിറ്റി ഡാൻസാഫ് സംഘവും നടക്കാവ് പോലീസും സംയുക്തമായി നടത്തിയ പരിശോധനയിലാണ് കഞ്ചാവ് പിടികൂടിയത്. ഇന്ന് പുലർച്ചെ പെരുമ്പാവൂരിൽ നിന്ന് കെഎസ്ആർടിസി ബസിൽ കോഴിക്കോട് എത്തിയ രണ്ട് പേരെ സംശയത്തെ തുടർന്ന് പരിശോധിച്ചപ്പോഴാണ് രണ്ട് വലിയ പാക്കറ്റുകളിലായി സൂക്ഷിച്ചിരുന്ന കഞ്ചാവ് കണ്ടെത്തിയതയത്. ഒഡിഷ സ്വദേശികളായ ശശാങ്ക് സിംഗ്, നിതിൻ ഡിങ്കൽ എന്നിവരെയാണ് പോലീസ് അറസ്റ്റ് ചെയ്തത്.
ആവശ്യക്കാർക്ക് ചെറിയ പാക്കറ്റുകളിലാക്കി വിൽപ്പന നടത്തുകയാണ് ഇവരുടെ പ്രധാന രീതി. അതിഥി തൊഴിലാളികളും കോളേജ് വിദ്യാർത്ഥികളും ഉൾപ്പെടെയുള്ളവരാണ് പ്രധാന ഉപഭോക്താക്കള്. പ്രതികളെ വിശദമായി ചോദ്യം ചെയ്ത് കഞ്ചാവ് എത്തിച്ച ഉറവിടം, വിതരണ ശൃംഖല, ഇതിന് പിന്നിൽ പ്രവർത്തിക്കുന്ന മറ്റ് ആളുകൾ എന്നിവയെക്കുറിച്ച് അന്വേഷണം പുരോഗമിക്കുകയാണെന്ന് പോലീസ് അറിയിച്ചു. ഓപ്പറേഷൻ തൂഫാന്റെ ഭാഗമായി നഗരത്തിൽ പരിശോധനകൾ കൂടുതൽ ഊർജിതമാക്കാനാണ് തീരുമാനം. വരും ദിവസങ്ങളിലും ലഹരിവസ്തു കടത്ത് തടയുന്നതിനും വിതരണ ശൃംഖല തകർക്കുന്നതിനുമായി വ്യാപക പരിശോധനകളും തുടരുമെന്ന് പോലീസ് അറിയിച്ചു.
പെരുമ്പാവൂര്‍. മുക്കുപണ്ടം പണയംവച്ച് ആറ് ലക്ഷം രൂപ തട്ടിയെടുത്ത ബാങ്ക് അപ്രൈസറും സുഹൃത്തുക്കളും അറസ്റ്റില്‍. പെരുമ്പാവൂര്‍ എഎം റോഡിലെ ഫെഡറല്‍ ബാങ്ക് ശാഖയിലെ അപ്രൈസര്‍ ജഗദീഷാണ് അറസ്റ്റിലായത്. ഇയാളുടെ സുഹൃത്തുക്കള്‍കൊണ്ടുവന്ന മുക്കുപണ്ടം സ്വര്‍ണമെന്ന് രേഖപ്പെടുത്തിയാണ് പണം തട്ടിയത്.
കോതമംഗലം സ്വദേശികളായ ജഗദീഷ്, രാജേഷ് തോമസ്, രാജേഷ് വിജയന്‍ എന്നിവരാണ് പെരുമ്പാവൂര്‍ പൊലീസിന്റെ പിടിയിലായത്. മെയ് മാസം ഇരുപതിനായിരുന്നു കൃത്യമായ ഗൂഡാലോചനയോടെയുള്ള തട്ടിപ്പ്. പെരുമ്പാവൂര്‍ എഎം റോഡിലെ ബാങ്കില്‍ രാജേഷ് തോമസും, രാജേഷ് വിജയനും ചേര്‍ന്നാണ് ആഭരണങ്ങളുമായെത്തിയത്. സംശയത്തിന് ഇടനില്‍കാത്ത പെരുമാറ്റം. കൊണ്ടുവന്ന ആഭരണങ്ങള്‍ ബാങ്ക് അധികൃതരെ ഏല്‍പ്പിച്ചു. തൂക്കം നോക്കിയപ്പോള്‍ ഒന്‍പത് പവന്‍. ബാങ്കിലെ താത്കാലി അപ്രൈസറായ ജഗദീഷ് ആഭരണങ്ങള്‍ പരിശോധിച്ചു. അസല്‍ സ്വര്‍ണമെന്ന് സാക്ഷ്യപ്പെടുത്തിയതോടെ ഡീല്‍ ഒകെ. ജഗദീഷിന്റെ വാക്ക് വിശ്വസിച്ച് 72 ഗ്രാമിന് ആറ് ലക്ഷത്തി മുപ്പതിനായിരം രൂപ ബാങ്കില്‍ നിന്ന് നല്കി. ഓപ്പറേഷന്‍ വിജയംകണ്ടതിന്റെ ആത്മവിശ്വാസത്തിലിരിക്കെയാണ് അപ്രതീക്ഷിത ട്വിസ്റ്റ്.
ലോക്കറിലുള്ള സ്വര്‍ണാഭരണങള്‍ പരിശോധിച്ചപ്പോള്‍ ബാങ്ക് അധികൃതര്‍ക്ക് സംശയം തോന്നി. വിശദമായ പരിശോധനയില്‍ പണയംവെച്ച ഒന്‍പത് പവനും മുക്കാണെന്ന്് തെളിഞ്ഞു. വിഷയം അതീവ രഹസ്യമായി കൈകാര്യം ചെയ്ത ബാങ്ക് അധികൃതര്‍ മറ്റൊരു വിഷയത്തില്‍ സംശയം തീര്‍ക്കാനായി ജഗദീഷിനെ ബാങ്കിലേക്ക് വിളിപ്പിച്ചു. ജഗദീഷിനെകൊണ്ട് മുക്കുപണ്ടം പണയംവെച്ച മറ്റ് രണ്ട് സുഹൃത്തുക്കളെയും വിളിച്ചുവരുത്തി. മൂവരും ബാങ്കിലെത്തിയതിന് പിന്നാലെ പൊലീസുമെത്തി. പെരുമ്പാവൂര്‍ പോലീസ് എത്തി നടത്തിയ പരിശോധനയില്‍ മുക്കുപണ്ടമെന്ന ഉറപ്പിച്ചതോടെ മൂന്നുപേരെയും അറസ്റ്റ് ചെയ്തു. ജഗദീഷും മറ്റു രണ്ടു പ്രതികളും സുഹൃത്തുക്കളാണ്. ഇവര്‍ സമാനമായ തട്ടിപ്പുകള്‍ നടത്തിയതായുള്ള സംശയവും പൊലീസിനുണ്ട്. മൂവരെയും അടുത്ത ദിവസം കസ്റ്റഡിയില്‍ വിശദമായി ചോദ്യം ചെയ്യാനാണ് തീരുമാനം.
കൊട്ടാരക്കര : തേവലപ്പുറം താഴെപുളിയത്തറ വീട്ടിൽ പരേതനനായ തങ്കച്ചന്റെയും ഗ്രേസി തങ്കച്ചൻ്റെയും മകനും വെണ്ടാർ ആയുരാസ്ത ക്ലീനിക്ക് ഉടമയുമായ ഡോ. സൈമൺ റ്റി (56) ( സന്തോഷ് ) അന്തരിച്ചു. സംസ്കാരം നാളെ (വെള്ളി) രാവിലെ 10 ന് തേവലപ്പുറം സൽവേഷൻ ആർമി സഭ സെമിത്തേരിയിൽ. ഭാര്യ.സ്നേഹലത സന്തോഷ് , മകൾ. ദിയ സന്തോഷ് (എംബിബിഎസ് വിദ്യാർത്ഥി)
ന്യൂഡല്‍ഹി: മധ്യപൂര്‍വേഷ്യയില്‍ സമാധാന ശ്രമങ്ങള്‍ പുരോഗമിക്കുമ്പോഴും ലെബനനില്‍ സൈനിക നടപടികള്‍ തുടരുമെന്ന് ഇസ്രയേല്‍ ഉപവിദേശകാര്യ മന്ത്രി ഷാരന്‍ ഹാസ്‌കല്‍. അമേരിക്കയും ഇറാനും തമ്മില്‍ പുതിയ ധാരണാപത്രം ഒപ്പിടുന്നതിനുള്ള നീക്കങ്ങള്‍ നടക്കുന്നതിനിടെയാണ് ഇസ്രയേലിന്റെ നിലപാട് പ്രതിസന്ധി സൃഷ്ടിക്കുന്നത്.
എന്‍ഡിടിവിക്ക് നല്‍കിയ പ്രത്യേക അഭിമുഖത്തിലാണ് ഹാസ്‌കല്‍ ഇസ്രയേലിന്റെ നിലപാട് വിശദീകരിച്ചത്. ഈ ആഴ്ച മാത്രം ഹിസ്ബുള്ള ഇസ്രായേലിനെതിരെ രണ്ട് ആക്രമണങ്ങള്‍ നടത്തിയെന്നും അതിന്റെ ഉത്തരവാദിത്വം സംഘടന തന്നെ സാമൂഹികമാധ്യമങ്ങളിലൂടെ ഏറ്റെടുത്തിരുന്നുവെന്നും ഇസ്രയേല്‍ പറഞ്ഞു. ഇത്തരത്തില്‍ ആക്രമണം തുടരുന്ന സാഹചര്യത്തില്‍ രാജ്യത്തെ പൗരന്മാരെ സംരക്ഷിക്കാനുള്ള ബാധ്യത ഇസ്രായേലിനുണ്ടെന്നും ഹാസ്‌കല്‍ കൂട്ടിച്ചേര്‍ത്തു.
അമേരിക്കയും ഇറാനും തമ്മില്‍ ജനീവയില്‍ നടക്കാനിരിക്കുന്ന ചര്‍ച്ചകളെ കുറിച്ചും ഹാസ്‌കല്‍ പ്രതികരിച്ചു. ഇത് ഒരു സമാധാന കരാറല്ലെന്നും മറിച്ച് ഭാവിയിലെ ചര്‍ച്ചകള്‍ക്കുള്ള ഒരു ചട്ടക്കൂട് മാത്രമാണെന്നും ഹാസ്‌കല്‍ വ്യക്തമാക്കി. ഇറാന്റെ ആണവ പദ്ധതി, ബാലിസ്റ്റിക് മിസൈല്‍ ശേഷി, യുറേനിയം സമ്പുഷ്ടീകരണം തുടങ്ങിയ വിഷയങ്ങളാണ് പ്രധാനമായും ചര്‍ച്ചയാകുകയെന്ന് അവർ പ്രതികരിച്ചു.
ചര്‍ച്ചകള്‍ക്കിടയില്‍ ഹിസ്ബുള്ള ആക്രമണം നടത്തിയാല്‍ ഇസ്രായേല്‍ ശക്തമായി തിരിച്ചടിക്കുമെന്നും ഹാസ്‌കല്‍ മുന്നറിയിപ്പ് നല്കി. ‘മുംബൈയെയോ ന്യൂഡല്‍ഹിയെയോ ഒരു ഭീകരസംഘടന ആക്രമിച്ചാല്‍ ഇന്ത്യ പ്രതികരിക്കില്ലേ? സ്വന്തം ജനങ്ങളെയും വീടുകളെയും സംരക്ഷിക്കാന്‍ ഏതൊരു ഉത്തരവാദിത്തപ്പെട്ട സര്‍ക്കാരും ചെയ്യേണ്ടത് തന്നെയാണ് ഇസ്രയേലും ചെയ്യുന്നത്’ എന്നാണ് ഇസ്രയേല്‍ മന്ത്രിയുടെ പ്രതികരണം.
‘ഇന്ത്യയും വളരെയധികം ജാഗരൂഗരായിരിക്കണം. ഇറാന്റെ ബാലിസ്റ്റിക് മിസൈലുകള്‍ ഇസ്രായേലില്‍ മാത്രമല്ല എത്തുന്നത്. അവയ്ക്ക് ലണ്ടന്‍, മുംബൈ, ന്യൂഡല്‍ഹി തുടങ്ങി യുഎസില്‍ പോലും എത്താന്‍ കഴിയും. അയല്‍രാജ്യങ്ങള്‍ക്കു നേരെയും ചില സഖ്യകക്ഷികള്‍ക്കും നേരെയും ഉള്‍പ്പെടെ മേഖലയിലുടനീളം ഇറാന്‍ വര്‍ഷങ്ങളായി ബാലിസ്റ്റിക് മിസൈലുകള്‍ ഉപയോഗിച്ചിട്ടുണ്ടെന്നും ഹാസ്‌കല്‍ പറഞ്ഞു.
ലെബനനിലെ സാഹചര്യം ഇപ്പോഴും അതീവ സംഘര്‍ഷഭരിതമാണ്. അമേരിക്കയുടെ മധ്യസ്ഥതയില്‍ നേരത്തെ പ്രഖ്യാപിച്ച വെടിനിര്‍ത്തല്‍ ശ്രമങ്ങള്‍ പൂര്‍ണ വിജയത്തിലെത്തിയിട്ടില്ല. ഹിസ്ബുള്ള ആക്രമണം അവസാനിപ്പിക്കാതെ സൈനിക നടപടി നിര്‍ത്തില്ലെന്ന നിലപാടിലാണ് ഇസ്രായേല്‍. ലെബനന്റെ തെക്കന്‍ മേഖലയില്‍ സുരക്ഷാ മേഖല നിലനിര്‍ത്തുമെന്നും ആവശ്യമെങ്കില്‍ കൂടുതല്‍ ആക്രമണങ്ങള്‍ നടത്തുമെന്നും ഇസ്രായേല്‍ പ്രതിരോധമന്ത്രി ഇസ്രയേല്‍ കാറ്റ്സും വ്യക്തമാക്കിയിരുന്നു.
എന്നാല്‍ ലെബനനിലെ പല രാഷ്ട്രീയ നേതാക്കളും അന്താരാഷ്ട്ര സംഘടനകളും സമാധാന ശ്രമങ്ങള്‍ ശക്തിപ്പെടുത്തണമെന്ന് ആവശ്യപ്പെടുന്നുണ്ട്. എന്നാല്‍ ഹിസ്ബുള്ളയുടെ ആയുധപ്രവര്‍ത്തനങ്ങളും അതിര്‍ത്തി ആക്രമണങ്ങളും തുടരുന്ന സാഹചര്യത്തില്‍ സ്ഥിരമായ വെടിനിര്‍ത്തല്‍ കരാര്‍ യാഥാര്‍ഥ്യമാകുമോയെന്ന ആശങ്കയും നിലനില്‍ക്കുന്നുണ്ട്.
ഇറാന്‍-അമേരിക്ക ചര്‍ച്ചകള്‍ പുരോഗമിക്കുന്ന സാഹചര്യത്തില്‍ മധ്യപൂര്‍വേഷ്യയിലെ സംഘര്‍ഷം കുറയുമെന്ന പ്രതീക്ഷയുണ്ടെങ്കിലും, ലെബനന്‍ വിഷയത്തില്‍ ഇസ്രായേലും ഹിസ്ബുള്ളയും തമ്മിലുള്ള ഏറ്റുമുട്ടല്‍ അവസാനിക്കാനുള്ള സാധ്യത ഇപ്പോള്‍ കുറവാണെന്നാണ് വിദഗ്ധരുടെ വിലയിരുത്തല്‍.
