ശൂരനാട്:വായനശാല ജംഗ്ഷനിൽ പ്രവർത്തിക്കുന്ന സ്വാശ്രയ കർഷക വിപണിയിൽ എത്തിയ യുവ കർഷകനെ മദ്യപസംഘം ആക്രമിച്ച് പരിക്കേൽപ്പിച്ചിട്ടും പോലിസ് നടപടിയെടുക്കുന്നില്ലെന്ന് പരാതി.മകന് കരൾ ദാനം ചെയ്ത കർഷകൻ കക്കാക്കുന്ന് ഇഞ്ചക്കാട് ഇടയിലെ വീട്ടിൽ അഭിലാഷിനാണ് മർദ്ദനമേറ്റത്.ജൂലൈ രണ്ടിന് വൈകിട്ട് 6 മണിക്ക് ഉൽപ്പന്നങ്ങളുമായി അഭിലാഷ് എത്തുമ്പോൾ അവിടെയിരുന്ന് മദ്യപിക്കുകയായിരുന്ന
6 അംഗസംഘം യാതൊരു പ്രകോപനവും കൂടാതെ
മാരകായുധങ്ങളുമായി
ആക്രമിക്കുകയായിരുന്നു.തലയിൽ രക്തം കട്ടപിടിക്കുകയും കർണ്ണപുടം പൊട്ടുകയും ചെയ്ത അഭിലാഷ്
ആലപ്പുഴ മെഡിക്കൽ കോളേജിൽ തീവ്ര പരിചരണ വിഭാഗത്തിൽ ചികിത്സയിലാണ്.മകന് കരൾ ദാനം ചെയ്തിട്ട് അധിക നാളുകളായിട്ടില്ല.മുറിവിനേറ്റ മർദ്ദനവും യുവാവിന്റെ നില ഗുരുതരമാക്കി.ആശുപത്രിയിലെത്തി അഭിലാഷിന്റെ മൊഴി ശൂരനാട് പോലിസ് എടുത്തതല്ലാതെ മറ്റ് യാതൊരു നടപടിയും
സ്വീകരിച്ചില്ലെന്ന് ബന്ധുക്കൾ പരാതിപ്പെടുന്നു.പരാതി നൽകി ദിവസങ്ങൾ പിന്നിട്ടിട്ടും പ്രതികളെ അറസ്റ്റ് ചെയ്യുന്നതിനൊ, തുടർനടപടികൾ സ്വീകരിക്കുന്നതിനോ ശൂരനാട് പോലിസ് തയ്യാറായിട്ടില്ലെന്ന ആക്ഷേപം ശക്തമാണ്.

ശാസ്താംകോട്ട:മഴ ശക്തമായാൽ ഭരണിക്കാവ് ബസ് സ്റ്റാൻഡും മുസ്‌ലിയാർ ഫാമും വെള്ളക്കെട്ടിലാകുന്ന ദുരവസ്ഥയ്ക്ക് ശാശ്വത പരിഹാരം കാണണമെന്ന്
:യൂത്ത് കോൺഗ്രസ് കുന്നത്തൂർ നിയോജകമണ്ഡലം കമ്മിറ്റി ആവശ്യപ്പെട്ടു.മഴയിൽ
മുസ്ലിയാർ ഫാമിലെ വീടുകളിൽ വെള്ളം കയറുകയും താമസിക്കുവാൻ അനുയോജ്യമല്ലാതാവുകയും ചെയ്യും.ബസ് സ്റ്റാൻഡ് പരിസരങ്ങളിൽ മുട്ടറ്റം വരെ വെള്ളം കയറുന്ന സാഹചര്യത്തിൽ വാഹന യാത്ര പോലും ദുരിതപൂർണമാണ്.വെള്ളക്കെട്ടിന് പരിഹാരം കാണണമെന്ന് ആവശ്യപ്പെട്ട് യൂത്ത് കോൺഗ്രസ് പ്രവർത്തകർ ശാസ്താംകോട്ട ഗ്രാമപഞ്ചായത്ത് സെക്രട്ടറിക്ക് നിവേദനം നൽകി.സ്റ്റാൻഡിന്റെ വശത്തൂടെയുള്ള ഓട വൃത്തിയാക്കി വെള്ളമൊഴുക്ക് സുഗമമാക്കുകയും വെള്ളക്കെട്ടിന് പരിഹാരം കാണണമെന്നും നിവേദനത്തിൽ ആവശ്യപ്പെട്ടു.നേതാക്കളായ റിയാസ് പറമ്പിൽ,സുഹൈൽ അൻസാരി, ബിജു മനക്കര,ലോജു ലോറൻസ്, നാദിർഷ കാരൂർക്കടവ്,സന്ദീപ് ശൂരനാട്,അനന്തു ആനയടി,സിയാദ്,ആനന്ദ്,ആകാശ്, അഖിൽനാഥ് ഐക്കര തുടങ്ങിയവർ നേതൃത്വം നൽകി.

പോരുവഴി:കമ്പലടിയിൽ ആളൊഴിഞ്ഞ പുരയിടത്തിലെ കിണറ്റിൽ വീണ്
ഗൃഹനാഥൻ മരിച്ചു.പോരുവഴി കമ്പലടി രമ്യാ ഭവനത്തിൽ രാധാകൃഷ്ണപിള്ളയാണ് (65) മരിച്ചത്.കമ്പലടി കളീക്കവടക്കതിൽ ജംഗ്ഷന് സമീപമുള്ള ആളൊഴിഞ്ഞ പുരയിടത്തിലെ കിണറ്റിൽ വീണാണ് മരണം സംഭവിച്ചത്.രാധാകൃഷ്ണപിള്ള
ഉപയോഗിച്ചിരുന്ന ഊന്നുവടി കിണറിനു സമീപം ഇരിക്കുന്നത് കണ്ട് പരിശോധന നടത്തിയപ്പോഴാണ് മൃതദേഹം കണ്ടത്.തുടർന്ന് ശാസ്താംകോട്ടയിൽ നിന്നെത്തിയ ഫയർഫോഴ്സിന്റെ നേതൃത്വത്തിലാണ് മൃതദേഹം പുറത്തെടുത്തത്.മൃതദേഹം ശാസ്താംകോട്ട താലൂക്ക് ആശുപത്രി മോർച്ചറിയിലേക്ക് മാറ്റി.ശൂരനാട് പോലീസിന്റെ നേതൃത്വത്തിലാണ് പ്രാഥമിക നടപടികൾ സ്വീകരിച്ചത്.

ശാസ്താംകോട്ട:ദുബായിൽ മോഷണത്തിനിടെ പാക് പൗരന്റെ ആക്രമണത്തിൽ
മരിച്ച ശൂരനാട് വടക്ക് ആനയടി വയ്യാങ്കര ചന്ദ്രാലയത്തിൽ ചന്ദ്രൻ പിള്ളയുടെയും രാജലക്ഷ്മിയുടേയും മകൻ പ്രദീപിന്റെ (43,ഹരിക്കുട്ടൻ) മൃതദേഹം നാട്ടിലെത്തിച്ച് സംസ്ക്കരിച്ചു.ഒ.ഐ.സി.സി ഉൾപ്പെടെ ദുബായിൽ പ്രവർത്തിക്കുന്ന വിവിധ ഇന്ത്യൻ സംഘടനകളുടെ ഇടപെടലും പരിശ്രമവും കൊണ്ടാണ് ദുബായിലെ ആശുപത്രി മോർച്ചറിയിൽ സൂക്ഷിച്ചിരുന്ന മൃതദേഹം ഒന്നര ആഴ്ചയ്ക്ക് ശേഷം നാട്ടിലെത്തിക്കാൻ കഴിഞ്ഞത്.ബുധനാഴ്ച പുലർച്ചെ തിരുവനന്തപുരം വിമാനതാവളത്തിൽ എത്തിച്ച മൃതദേഹം ബന്ധുക്കൾ ഏറ്റുവാങ്ങി.ആനയടിയിലെ വീട്ടിൽ പൊതുദർശനത്തിനു ശേഷം ഉച്ചയ്ക്ക് രണ്ടിന് വീട്ടുവളപ്പിൽ സംസ്ക്കരിച്ചു.

ജനപ്രതിനിധികൾ അടക്കം വൻ ജനാവലി അന്ത്യാജ്ഞലി അർപ്പിക്കാൻ എത്തിയിരുന്നു.മാതാപിതാക്കളെയും ഭാര്യ രശ്മി,മക്കളായ കാർത്തിക്,ആദി എന്നിവരെ ആശ്വസിപ്പിക്കാൻ ബന്ധുക്കൾ ഏറെ പാടുപെട്ടു.മൂന്ന് മാസം മുമ്പാണ് പ്രദീപ് അവസാനമായി നാട്ടിലെത്തി മടങ്ങിയത്.കഴിഞ്ഞ മാസം അവസാനം മോഷണത്തിനിടെ പാക്
സ്വദേശിയുടെ ആക്രമണത്തിലാണ് പ്രദീപ് കൊല്ലപ്പെട്ടതെന്നാണ് നാട്ടിൽ ലഭിച്ച വിവരം.പ്രദീപിന്റെ കഴുത്തിൽ കിടന്ന സ്വർണമാല തട്ടിയെടുക്കാൻ പാകിസ്ഥാനി ശ്രമിക്കുകയും ഇത് ചെറുത്തതിനെ തുടർന്ന് ആയുധം ഉപയോഗിച്ച് ആക്രമിച്ച് കൊലപ്പെടുത്തുകയുമായിരുന്നു.പിറ്റേ ദിവസം ദുബായ് പൊലീസ് കസ്റ്റഡിലെടുത്ത പാകിസ്ഥാനി റിമാൻഡിലാണ്.ദുബായ് അൽ ക്വാസി ഇൻഡസ്ട്രിയൽ ഏരിയയിൽ ന്യൂ ഇവല്യൂഷൻ ഇന്റീരിയർ ഡക്കറേഷൻ എന്ന കമ്പനിയിൽ അലുമിനിയം ഫാബ്രിക്കേറ്ററായി ജോലി ചെയ്ത് വരികയായിരുന്നു.