മൈനാഗപ്പള്ളിയിൽ നിരവധി പേർക്കും വളർത്തുമൃഗങ്ങൾക്കും തെരുവ് നായയുടെ കടിയേറ്റു

September 2, 2024

മൈനാഗപ്പള്ളി:തെരുവ് നായയുടെ ആക്രമണത്തിൽ മൈനാഗപ്പള്ളിയിൽ നിരവധി പേർക്ക് കടിയേറ്റു.കഴിഞ്ഞ ദിവസം വൈകിട്ട് ആറോടെ മൈനാഗപ്പള്ളി പുത്തൻചന്തയ്ക്ക് സമീപമാണ് നായയുടെ ആക്രമണ ഉണ്ടായത്.മൈനാഗപ്പള്ളി കടപ്പ വേളൂർ വീട്ടിൽ രാധാകൃഷ്ണൻ നായർ (59),കടപ്പ പാലതുണ്ടിൽ ഗൗതംകൃഷ്ണ(19) എന്നിവരോടൊപ്പം മറ്റ് മൂന്നിലധികം പേർക്കും നായയുടെ കടിയേറ്റു.കടിയേറ്റവർ ശാസ്താംകോട്ട താലൂക്ക് ആശുപത്രിയിൽ എത്തി ചികിത്സ തേടി.ആളുകളെ കടിച്ചത് കൂടാതെ മറ്റ് നിരവധി വളർത്തു നായ്ക്കളെയും നായ കടിച്ചത് പ്രദേശത്ത് ആശങ്ക പരത്തിയിട്ടുണ്ട്.മൈനാഗപ്പള്ളി പഞ്ചായത്തിലെ വിവിധ മേഖലകളിൽ തെരുവ് നായശല്യം അതിരൂക്ഷമാണ്.

മുഖക്കുരുവോ; വിഷമിക്കേണ്ട അകറ്റാൻ ഇതാ ഒരു വീട്ട് വഴി

September 2, 2024

മുഖക്കുരുവിൻ്റെ പ്രശ്നങ്ങളെ ശരിയായ പരിചരിച്ചില്ലെങ്കിൽ ഒരുപക്ഷെ മുഖത്ത് മുഴുവൻ പടരാനുള്ള സാധ്യത വളരെ കൂടുതലാണ്. ചെറിയ മുഖക്കുരുവിനെ വീട്ടിൽ തന്നെ ഹോം റെമഡീസ് ഉപയോഗിച്ച് പരിഹരിക്കാവുന്നതാണ്. ഒരുപാട് മുഖക്കുരു ഉള്ളവർ ഡോക്ടറുടെ സഹായം തേടാൻ മറക്കരുത്.

മുഖക്കുരു മാറ്റാൻ ഒരു നാച്യുറൽ ഐസ് ക്യൂബ് ഉണ്ടാക്കാം
മുഖത്ത് വലിയ വലുപ്പത്തിൽ മുഖക്കുരു ഉണ്ടാകുന്നത് പലരെയും വിഷമിപ്പിക്കുന്ന കാര്യമാണ്. കണ്ണാടി നോക്കുമ്പോൾ തന്നെ ഇത് പറഞ്ഞ് സങ്കടപ്പെടാറുണ്ട് പലരും. പല കാരണങ്ങൾ കൊണ്ട് മുഖക്കുരു ഉണ്ടാകാം. ഹോർമോൺ വ്യതിയാനം, അമിതമായ എണ്ണ ഉപയോഗം, ഭക്ഷണശൈലി, ജീവിതശൈലി എന്നിവയൊക്കെ മുഖത്ത് കുരു വരാനുള്ള പ്രധാന കാരണങ്ങളിൽ ചിലതാണ്. ശരിയായ പരിചരണം നൽകിയില്ലെങ്കിൽ പലപ്പോഴും ഈ കുരു വലിയ രീതിയിലുള്ള പ്രശ്നങ്ങൾ ഉണ്ടാക്കാറുണ്ട്. മുഖക്കുരുവിനെ ചൊറിഞ്ഞ് പൊട്ടിക്കാതിരിക്കാൻ പ്രത്യേകം ശ്രദ്ധിക്കണം. സുഷിരങ്ങളിൽ എണ്ണ അടിഞ്ഞ് കൂടിയാണ് മുഖക്കുരു ഉണ്ടാകുന്നത്. ടീനേജേഴ്സാണ് പൊതുവെ ഈ പ്രശ്നം നേരിടുന്നത്.

കടലമാവ്

ചർമ്മത്തിൽ നല്ലൊരു എക്സ്ഫോളിയേറ്ററായി പ്രവർത്തിക്കാൻ കടലമാവിന് കഴിയാറുണ്ട്. ചർമ്മത്തെ ആഴത്തിൽ ക്ലെൻസ് ചെയ്ത് മൃതകോശങ്ങളെ പുറന്തള്ളാൻ ഇത് ഏറെ സഹായിക്കും. അമിതമായ എണ്ണമയം കളയാനും മൊത്തത്തിലുള്ള ചർമ്മത്തിൻ്റെ ആരോഗ്യത്തെ വീണ്ടെടുക്കാനും കടലമാവ് ഏറെ സഹായിക്കാറുണ്ട്. ചർമ്മത്തെ എക്സ്ഫോളിയേറ്റ് ചെയ്ത് തിളക്കം കൂട്ടാൻ കടലമാവ് വളരെയധികം സഹായിക്കും. കാലങ്ങളായി ഉണ്ടാകുന്ന കറുത്ത പാടുകൾ മാറ്റാനും കടലമാവ് നല്ലതാണ്. ചർമ്മത്തിൽ മുഴുവൻ ഒരേ നിറം നൽകാനും ഭംഗി കൂട്ടാനും കടലമാവ് വളരെ മികച്ചതാണ്.

റോസ് വാട്ടർ

ചർമ്മത്തിൽ നല്ലൊരു ക്ലെൻസറായി പ്രവർത്തിക്കാൻ റോസ് വാട്ടറിന് കഴിയും. ഏത് ചർമ്മകാർക്കും അനുയോജ്യമാണ് റോസ് വാട്ടർ. പ്രായമാകുന്നതിൻ്റെ ലക്ഷണങ്ങളെ എളുപ്പത്തിൽ തടയാൻ ഇത് സഹായിക്കാറുണ്ട്. ചർമ്മത്തെ ടൈറ്റ് ചെയ്ത് അയഞ്ഞ് തൂങ്ങി പോകാതിരിക്കാൻ നല്ലതാണ് റോസ് വാട്ടർ. സുഷിരങ്ങളിലെയും മറ്റും അഴുക്കിനെ പുറന്തള്ളാൻ വളരെ മികച്ചതാണ് റോസ് വാട്ടർ. ഇതിലൂടെ മുഖക്കുരു പ്രശ്നം തടയാനും റോസ് വാട്ടർ സഹായിക്കാറുണ്ട്.

ഓറഞ്ച് തൊലി

ചർമ്മത്തിൽ പല തരത്തിലുള്ള ഗുണങ്ങൾ നൽകാൻ ഓറഞ്ച് തൊലിയ്ക്ക് കഴിയാറുണ്ട്. ചർമ്മത്തിന് തിളക്കവും ഭംഗിയും കൂട്ടാൻ ഏറെ മികച്ചതാണ് ഓറഞ്ച് തൊലി. ഇതിൽ അടങ്ങിയിരിക്കുന്ന വൈറ്റമിൻ സി ചർമ്മത്തിൽ മുഖക്കുരു, ചർമ്മത്തിലെ പാടുകൾ, നിറ വ്യത്യാസം എന്നിവയൊക്കെ മാറ്റാൻ നല്ലതാണ്. സുഷിരങ്ങളെ വ്യത്തിയാക്കി മുഖക്കുരുവിനെ കാരണമാകുന്ന ബാക്ടീരിയകളെ പാടെ ഇല്ലാതാക്കാൻ ഓറഞ്ച് തൊലിയ്ക്ക് കഴിയാറുണ്ട്. പ്രായമാകുന്നതിൻ്റെ ലക്ഷണങ്ങളെ ഇല്ലാതാക്കാനും ഇത് വളരെ നല്ലതാണ്.

ഐസ് ക്യൂബ് തയാറാക്കാൻ

ഇതിനായി ഒരു ചെറിയ പാത്രത്തിൽ കടലമാവ്, ഓറഞ്ച് തൊലിയുടെ പൊടി അൽപ്പം മഞ്ഞൾ, കുറച്ച് റോസ് വാട്ടർ എന്നിവ ചേർത്ത് നന്നായി യോജിപ്പിക്കുക. കട്ടകൾ ഒന്നുമില്ലാതെ യോജിപ്പിച്ച ശേഷം ഈ മിശ്രിതം ഐസ് ക്യൂബ് ഉണ്ടാക്കുന്ന ട്രേയിലേക്ക് മാറ്റി വയ്ക്കുക. ഇനി ഇത് ഫ്രിഡ്ജിൽ വച്ച് നന്നായി തണുപ്പിക്കുക. റോസ് വാട്ടർ ഇല്ലാത്തവർക്ക് സാധാരണ വെള്ളം ഉപയോഗിച്ചും ഇത് തയാറാക്കാവുന്നതാണ്. എന്നും രാവിലെ ഇത് മുഖത്ത് തേച്ച് പിടിപ്പിച്ച ശേഷം 10 മിനിറ്റ് കഴിഞ്ഞ് കഴുകി വ്യത്തിയാക്കാം. പരീക്ഷിക്കുന്നതിന് മുൻപ് പാച്ച് ടെസ്റ്റ് ചെയ്യാൻ മറക്കരുത്.

മുറിവാലന്റെ ശരീരത്തിൽ 20 പെല്ലറ്റുകൾ

September 2, 2024

ഇടുക്കി. മുറിവാലന്റെ ശരീരത്തിൽ 20 പെല്ലറ്റുകൾ. ഇടുക്കി ചിന്നക്കനാലിൽ ചരിഞ്ഞ മുറിവാലൻ കൊമ്പന്റെ ശരീരത്തിൽ നിന്ന് 20 പെല്ലറ്റുകൾ കണ്ടെത്തി.ആനയുടെ ജഡം പോസ്റ്റുമോർട്ടം ചെയ്തപ്പോഴാണ് പെല്ലറ്റുകൾ കണ്ടെത്തിയത്.19 ചെറിയ പെല്ലറ്റും ഒരു വലിയ പെല്ലറ്റുമായിരുന്നു ആനയുടെ ശരീരത്തുണ്ടായിരുന്നത്.ചക്കകൊമ്പന്റെ ആക്രമണത്തിൽ മുറിവേറ്റ ആന ഇന്നലെ പുലർച്ചെയാണ് ചരിഞ്ഞത്. ചക്കകൊമ്പനുമായിട്ടുള്ള ഏറ്റുമുട്ടലിൽ ശ്വാസകോശത്തിനേറ്റ ആഘാതമാണ് മരണകാരണം

പുളിമാന കൃതികളുടെ പ്രകാശനവും സെമിനാറും

September 2, 2024

ചവറ. കേരളസാഹിത്യ അക്കാദമി നേതൃത്വത്തില്‍ പുളിമാന കൃതികളുടെ പ്രകാശനവും സെമിനാറും. ഹ്രസ്വമായ ജീവിതകാലം കൊണ്ട് മലയാള സാഹിത്യത്തിനും നാടകവേദിക്കും മഹത്തായ സംഭാവനകൾ നൽകിയ പ്രതിഭയാണ് പുളിമാന പരമേശ്വരൻപിള്ള, മലയാളത്തിലെ ആദ്യത്തെ എക്‌സ്പ്രഷനിസ്റ്റ് നാടകമെന്നു വിശേഷിപ്പിക്കപ്പെടുന്ന സമത്വവാദിക്കു പുറമേ ചെറുകഥകളും കവിതകളും നിരൂപണ പ്രബന്ധങ്ങളും രചിച്ചു.

മനുഷ്യസ്നേഹത്തിൻ്റെയും പുരോഗമനാത്മകവുമായ കാഴ്‌ചപ്പാടും അദ്ദേഹ ത്തിന്റെ രചനകളെ സവിശേഷമാക്കി. ഭാഷയെ സമ്പന്നമാക്കിയ ചവറയിൽ ജനിച്ച ആ സർഗ്ഗധനന്റെ സാഹിത്യസംഭാവനകളെ സമാദരിക്കുന്നതിനായി കേരള സാഹിത്യ അക്കാദമി ചവറയിലെ വികാസ് കലാസാംസ്ക്കാരിക സമിതിയുടെ സഹകരണത്തോടെ സാഹിത്യ സെമിനാറും പുളിമാനകൃതികൾ പ്രകാശനം ചെയ്യുന്ന ചടങ്ങും സെപ്റ്റംബർ 6 വെളളിയാഴ്‌ച ചവറ വികാസ് ആഡിറ്റോറിയത്തിൽ സംഘടിപ്പി ച്ചിരിക്കുന്നു.

3 മണിക്ക് സെമിനാറിൻ്റെ ഉദ്ഘാടനം ഡോ.കെ.എസ് രവികുമാർ നിർവഹിക്കുകയും ‘പുളിമാന ആധുനികതയുടെ മുന്നോടി എന്ന വിഷയത്തിലും വി.എസ് ബിന്ദു ‘സമത്വവാദിയും മലയാള നാടകവും’ എന്ന വിഷയത്തിലും പ്രബന്ധങ്ങൾ അവതരിപ്പിക്കും.

വൈകിട്ടു 4.30 പുളിമാന പരമേശ്വരൻപിള്ളയുടെ സമത്വവാദിയും മറ്റ് കൃതികളും എന്ന പുസ്‌തകം കേരള സാഹിത്യ അക്കാദമി പ്രസിഡൻ്റ് സച്ചിദാനന്ദൻ നിർവഹിക്കും. ചവറ കെ.എസ് പിളള പുസ്‌തകം സ്വീകരിക്കും. ഡോ.സുജിത വിജയൻപിളള എം.എൽ.എ അദ്ധ്യക്ഷത വഹിക്കുന്നു. അക്കാദമി സെക്രട്ടറി സി.പി. അബൂബേക്കറും പങ്കെടുക്കും. സെമിനാറിൽ പങ്കെടുക്കുന്ന വിദ്യാർത്ഥികൾക്കു അക്കാദമി സർട്ടിഫിക്കറ്റും നൽകും.

വിശദവിവരങ്ങൾക്ക് – 94 95 70 12 83

ഉന്നത ഐപിഎസ് ഉദ്യോഗസ്ഥന്‍റെ മകൾ ഹോസ്റ്റൽ മുറിയിൽ മരിച്ച നിലയിൽ, കണ്ടത് നിലത്ത് അബോധാവസ്ഥയിൽ

September 2, 2024

ലഖ്‌നൗ: ഉന്നത ഐപിഎസ് ഉദ്യോഗസ്ഥന്‍റെ മകളെ ഹോസ്റ്റൽ മുറിയിൽ മരിച്ച നിലയിൽ കണ്ടെത്തി. ഉത്തർപ്രദേശിലെ ലഖ്‌നൗവിൽ റാം മനോഹർ ലോഹ്യ നാഷണൽ ലോ യൂണിവേഴ്‌സിറ്റിയിലെ വിദ്യാർഥിനിയായ അനിക രസ്തോഗി (19) ആണ് മരിച്ചത്. ദേശീയ അന്വേഷണ ഏജൻസിയിൽ (എൻഐഎ) ഇൻസ്പെക്ടർ ജനറലായ സഞ്ജയ് രസ്തോഗിയുടെ മകളാണ് മൂന്നാം വർഷ ബിഎ എൽഎൽബി വിദ്യാർഥിനിയായ അനിക. ശനിയാഴ്ചയാണ് രാത്രിയാണ് അനികയെ ഹോസ്റ്റൽ മുറിയിൽ അബോധാവസ്ഥയിൽ കണ്ടെത്തിയത്.

അനികയെ ഉടൻ തന്നെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. ഹൃദയാഘാതമാണ് അനികയുടെ മരണകാരണമെന്ന് ആശുപത്രി അധികൃതർ അറിയിച്ചു. രാത്രി പത്ത് മണിയോടെയാണ് അനികയെ ഹോസ്റ്റൽ മുറിയിൽ അബോധാവസ്ഥയിൽ കണ്ടെത്തിയത്. നിലത്ത് വീണ് കിടക്കുന്ന നിലയിലായിരുന്നു അനിക. ഹോസ്റ്റൽ മുറി അകത്തുനിന്നു പൂട്ടിയിരിക്കുകയായിരുന്നെന്നും സംശയാസ്പദമായി ഒന്നും കണ്ടെത്താനായില്ലെന്നും പൊലീസ് പറഞ്ഞു.

അനികയുടെ ശരീരത്തിൽ മുറിവുകളൊന്നും ഉണ്ടായിരുന്നില്ലെന്നും വസ്ത്രങ്ങള്‍ക്ക് ഉലച്ചിൽ സംഭവിച്ചിട്ടില്ലെന്നും പൊലീസ് വ്യക്തമാക്കി. പോസ്റ്റ്മോർട്ടം റിപ്പോർട്ട് വന്നതിന് ശേഷം തുടർ നടപടികൾ സ്വീകരിക്കുമെന്നും അനികയുടെ കുടുംബം ഇതുവരെ പരാതി നൽകിയിട്ടില്ലെന്നും പൊലീസ് വ്യക്തമാക്കി. അനികയുടെ മരണത്തിൽ അതീവ ദുഖം രേഖപ്പെടുത്തുന്നതായി റാം മനോഹർ ലോഹ്യ നാഷണൽ ലോ യൂണിവേഴ്‌സിറ്റി വാർത്താ കുറിപ്പിൽ പറഞ്ഞു. അനികയുടെ വിയോഗം അപ്രതീക്ഷിതമാണെന്നും കുടുംബത്തിന്‍റെ വേദനയിൽ പങ്കുചേരുന്നതായും യൂണിവേഴസ്റ്റി അധികൃതർ പറഞ്ഞു.

ഓപ്പറേഷൻ പി.ഹണ്ടിൽ ആലുവ റൂറൽ പോലീസ് പരിധിയിൽ പതിനഞ്ച് മൊബൈൽ ഫോണുകൾ പിടികൂടി

September 2, 2024

ആലുവ.ഓപ്പറേഷൻ പി.ഹണ്ടിൽ ആലുവ റൂറൽ പോലീസ് പരിധിയിൽ പതിനഞ്ച് മൊബൈൽ ഫോണുകൾ പിടികൂടി. കുട്ടികളുടെ അശ്ലീല ചിത്രങ്ങളും വീഡിയോകളും വിവിധ പോൺ സൈറ്റുകളിൽ നിന്നും ഡൗൺലോഡ് ചെയ്തു കാണുകയും, സൂക്ഷിക്കുകയും, പ്രചരിപ്പിക്കുകയും ചെയ്ത ഫോണുകളാണ് പോലീസ് കസ്റ്റഡിയിലെടുത്തത്. റൂറൽ പരിധിയിലെ അഞ്ച് സബ്ഡിവിഷനുകളിലായി, 50 ഇടങ്ങളിൽ പരിശോധന നടന്നു.പിടിച്ചെടുത്ത ഫോണുകൾ ഫോറൻസിക് പരിശോധനയ്ക്ക് അയക്കുമെന്ന് പോലീസ് അറിയിച്ചു.കുട്ടികളുടെ അശ്ലീല ദൃശ്യങ്ങൾ സൂക്ഷിച്ച ഫോണുകളുടെ ഉടമകൾക്കെതിരെ നിയമനടപടികൾ ഉണ്ടാകുമെന്നും പോലീസ് അറിയിച്ചു

വിദ്യാർഥിനികൾക്കു നേരെ കൂട്ട ലൈംഗികാതിക്രമം; വാൽപ്പാറ സർക്കാർ കോളജിലെ 4 ജീവനക്കാർ അറസ്റ്റിൽ

September 2, 2024

കോയമ്പത്തൂർ: വാൽപ്പാറയിലെ സർക്കാർ ആർട്‌സ് ആന്റ് സയൻസ് കോളജിലെ ആറ് വിദ്യാർഥിനികളെ ലൈംഗികമായി പീഡിപ്പിച്ച സംഭവത്തിൽ അധ്യാപകർ ഉൾപ്പെടെ നാല് പേരെ പൊലീസ് അറസ്റ്റ് ചെയ്തു. ശനിയാഴ്ച വൈകിട്ടോടെയാണ് പ്രതികളെ വാൽപ്പാറ പൊലീസ് അറസ്റ്റ് ചെയ്തത്.

കൊമേഴ്സ് വിഭാഗത്തിലെ അസിസ്റ്റന്റ് പ്രഫസർമാരായ എസ്. സതീഷ്കുമാർ (39), എം. മുരളിരാജ് (33), ലാബ് ടെക്‌നീഷ്യൻ അൻബരസു (37), നൈപുണ്യ കോഴ്‌സ് പരിശീലകൻ എൻ. രാജപാണ്ടി (35) എന്നിവരെയാണ് ജില്ലാ സാമൂഹ്യക്ഷേമ ഓഫിസർ ആർ. അംബികയുടെ പരാതിയുടെ അടിസ്ഥാനത്തിൽ പൊലീസ് അറസ്റ്റ് ചെയ്തിരിക്കുന്നത്.

വാട്‌സാപ്പിൽ അശ്ലീല സന്ദേശങ്ങൾ അയച്ചുവെന്നും ക്ലാസിലും ലാബിലും വച്ച് തങ്ങളെ ശല്യപ്പെടുത്തിയെന്നും മോശം രീതിയിൽ സ്പർശിച്ചുവെന്നും പെൺകുട്ടികൾ സംസ്ഥാന വനിതാ കമ്മിഷനിൽ നിവേദനം നൽകിയിരുന്നു. പിന്നാലെ ജില്ലാ സാമൂഹികക്ഷേമ ഓഫിസർ ആർ. അംബികയും കോളജിയേറ്റ് എജ്യൂക്കേഷൻ റീജനൽ ജോ. ഡയറക്ടർ വി. കലൈസെൽവിയും വെള്ളിയാഴ്ച കോളജിൽ നേരിട്ടെത്തി അന്വേഷണം നടത്തി. പിന്നാലെ ജില്ലാ സാമൂഹ്യക്ഷേമ ഓഫിസർ നൽകിയ പരാതിയുടെ അടിസ്ഥാനത്തിൽ പൊലീസ് കേസെടുക്കുകയും പ്രതികളെ അറസ്റ്റ് ചെയ്യുകയുമായിരുന്നു. വിദ്യാർഥിനികൾ തങ്ങൾക്ക് നേരിട്ട ദുരനുഭവം കോളജിൽ അന്വേഷണത്തിനെത്തിയ സംഘത്തോട് വിവരിച്ചിരുന്നു.

നാലു പേർക്കെതിരെയും ഭാരതീയ ന്യായ സംഹിതയിലെ സെക്‌ഷൻ 75 (1) (ലൈംഗിക പീഡനം), തമിഴ്‌നാട് സ്ത്രീ പീഡന നിരോധന നിയമത്തിലെ സെക്‌ഷൻ 4 (സ്ത്രീകളെ ഉപദ്രവിക്കുന്നതിനുള്ള പിഴ) എന്നിവ പ്രകാരമാണ് കേസെടുത്തിരിക്കുന്നത്. ഇൻസ്പെക്ടർ എം.മെനേഗയുടെ നേതൃത്വത്തിലുള്ള സംഘമാണ് കേസന്വേഷിക്കുന്നത്. അറസ്റ്റിലായ പ്രതികളെ കോടതി റിമാൻഡ് ചെയ്തിട്ടുണ്ട്.

ശാസ്താംകോട്ടയിലെ വൈദ്യുതി മുടക്കം;ലീഗൽ സർവ്വിസ് അതോറിറ്റി നവംബർ 9ന് കേസ് വീണ്ടും പരിഗണിക്കും

September 2, 2024

ശാസ്താംകോട്ട:ശാസ്താംകോട്ട കെഎസ്ഇബി സെക്ഷൻ പരിധിയിലെ വൈദ്യുതി പ്രശ്നങ്ങൾ പരിഹരിക്കുന്നതിന് ലീഗൽ സർവ്വിസ് അതോറിറ്റിയിൽ നൽകിയ പരാതി തുടർവാദം കേൾക്കുന്നതിനാൽ നവംബർ 9 ന് വീണ്ടും പരിഗണിക്കും.ഡെപ്യൂട്ടി ചീഫ് എൻജിനീയർ,ട്രാൻസ്മിഷൻ സർക്കിൾ ഓഫീസ് കൊട്ടാരക്കര,എക്സിക്യൂട്ടീവ് എൻജിനീയർ പ്രോജക്ട് മാനേജ്മെന്റ് കൊല്ലം എന്നിവരെ കൂടി കക്ഷിയാക്കുവാനും നിർദ്ദേശിച്ചു.കോൺഗ്രസ് മുൻ ബ്ലോക്ക് പ്രസിഡന്റും ബ്ലോക്ക് പഞ്ചായത്ത് അംഗവുമായ തുണ്ടിൽ നൗഷാദാണ് പരാതിക്കാരൻ.രൂക്ഷമായ വോൾട്ടേജക്ഷാമം,110 കെ.വി സബ് സ്റ്റേഷൻ 220 കെ.വി നിലവാരത്തിലേക്ക് ഉയർത്തുക,കാരാളിമുക്ക് കേന്ദ്രീകരിച് പുതിയ സെക്ഷൻ ഓഫിസ് തുടങ്ങുക,ശാസ്താംകോട്ടയിൽ പുതിയ 110 കെ.വി ഫീഡർ സ്ഥാപിക്കുക,ശാസ്താംകോട്ട
കെഎസ്ഇബി സെക്ഷൻ ഓഫീസിൽ കണക്ഷൻ എണ്ണത്തിന്റെ അടിസ്ഥാനത്തിൽ സ്റ്റാഫ് പാറ്റേൺ അനുവദിക്കുക തുടങ്ങിയ ആവശ്യങ്ങൾ ഉന്നയിച്ചാണ് ലീഗൽ സർവ്വിസ് അതോറിറ്റിയെ സമീപിച്ചത്.വോൾട്ടേജ് ക്ഷാമം പരിഹരിക്കുവാൻ കണ്ണമ്പള്ളിക്കാവ്,പള്ളിശ്ശേരിക്കൽ, പനപ്പെട്ടി തെറ്റിക്കുഴി,കണത്താർകുന്നം എന്നിവിടങ്ങളിൽ അടിയന്തിരമായി ട്രാൻസ്ഫോമറുകൾ സ്ഥാപിക്കാമെന്നും കൂടാതെ 4 എണ്ണത്തിന് റിക്വസ്റ്റ് കൊടുക്കാമെന്നും
കെഎസ്ഇബി സെക്രട്ടറിക്ക് കൂടി
അതോറിറ്റിയിൽ ഹാജരായ അഡീഷണൽ എക്സിക്യൂട്ടീവ് എൻജിനീയർ അറിയിച്ചു.മറ്റു പ്രശ്നങ്ങൾക്ക് പരിഹാരം കാണുവാൻ സമയം ചോദിച്ചു.കെഎസ്ഇബിയുടെ ഭാഗത്ത് നിന്നും മേൽ വിഷയങ്ങളിൽ സമയബന്ധിതമായി നടപ്പാക്കുവാൻ അഫഡഫിറ്റ് നൽകുവാനും
നിർദ്ദേശിമുണ്ടായി.നിരവധി പരാതികൾ സമർപ്പിച്ചിട്ടും സമരങ്ങൾ നടത്തിയിട്ടും വൈദ്യുതി സംബന്ധമായ പ്രശ്നങ്ങൾ പരിഹരിക്കുവാൻ കെഎസ്ഇബി തയ്യാറാകാതിരുന്നതിനെ തുടർന്നാണ് ലീഗൽ സർവ്വീസ് അതോറിറ്റിയെ സമീപിച്ചതെന്ന് തുണ്ടിൽ നൗഷാദ് പറഞ്ഞു.

കോർപ്പറേഷൻ ഫാക്ടറിയുടെ മതിൽ പൊളിച്ചു നീക്കിയ ഭാഗത്ത് സ്ഥാപിച്ച കമ്പിവേലി തകർത്ത് പാറ ഇറക്കി;ഭരണിക്കാവിൽ തൊഴിലാളികൾ ദേശീയപാതഉപരോധിച്ചു

September 2, 2024

ശാസ്താംകോട്ട:കാഷ്യൂ കോർപ്പറേഷന്റെ ഉടമസ്ഥതയിൽ ഭരണിക്കാവിൽ പ്രവർത്തിക്കുന്ന 14-ാം നമ്പർ ഫാക്ടറിയുടെ മതിൽ അനധീകൃതമായി പൊളിച്ചു നീക്കിയ ഭാഗത്ത് സ്ഥാപിച്ച കമ്പിവേലി തകർത്ത് പാറ ഇറക്കിയ സംഭവത്തിൽ പ്രതിഷേധിച്ച്
ഭരണിക്കാവിൽ തൊഴിലാളികൾ ദേശീയപാത ഉപരോധിച്ചു.തിങ്കളാഴ്ച രാവിലെ 10 ഓടെയാണ് സംഭവം.റോഡ് ഉപരോധം അടൂർ,കൊട്ടാരക്കര ഭാഗത്തുള്ള ഗതാഗതത്തെ സാരമായി ബാധിച്ചു.പാറ ഇറക്കിയ ലോറിയും തൊഴിലാളികൾ തടഞ്ഞിട്ടു.പൊലീസ് എത്തിയാണ് ഭാഗികമായി ഗതാഗതം പുന:സ്ഥാപിച്ചത്.കഴിഞ്ഞ ജൂലായ് 24ന് അർദ്ധരാത്രിയിലാണ് മണ്ണുമാന്തി യന്തം ഉപയോഗിച്ച് ഫാക്ടറി പരിസരത്തെ മതിൽ സ്വകാര്യ വ്യക്തികളുടെ നേതൃത്വത്തിൽ നിരപ്പാക്കിയത്.

പ്രതിഷേധം ശക്തമായതോടെ കോർപ്പറേഷൻ അധികൃതർ മതിൽ പൊളിച്ച ഭാഗത്ത് കമ്പിവേലി സ്ഥാപിച്ചിരുന്നു.കോടതിയെ സമീപിച്ചാണ് കോർപ്പറേഷൻ ഇതിനുള്ള ഉത്തരവ് വാങ്ങിയത്.ഈ ഭാഗത്ത് സ്വകാര്യ വ്യക്തികൾ പ്രവേശിക്കരുതെന്നും ഉത്തരവിൽ വ്യക്തമാക്കിയിരുന്നു.എന്നാൽ
കോടതി ഉത്തരവിന് വിരുദ്ധമായി വേലി
തകർത്താണ് ലോറിയിൽ എത്തിച്ച് പാറ ഇറക്കിയത്.ഫാക്ടറി സ്ഥിതി
ചെയ്യുന്ന വസ്തുവിന്റെ ഉടമസ്ഥാവകാശം സംബന്ധിച്ച് സ്വകാര്യ വ്യക്തിയും കോർപ്പറേഷനും തമ്മിൽ സിവിൽ കേസ് നിലനിൽക്കുന്നുണ്ട്.അതിനിടെ കോടതി നിയോഗിച്ച അഭിഭാഷക കമ്മീഷൻ തിങ്കൾ വൈകിട്ടോടെ സ്ഥലത്തെത്തി തെളിവെടുപ്പ് നടത്തി.

വിറ്റതല്ല, നവജാത ശിശുവിനെ ശ്വാസംമുട്ടിച്ചു കൊന്നു കുഴിച്ചുമൂടി: അമ്മയും ആൺസുഹൃത്തും അറസ്റ്റിൽ

September 2, 2024

ആലപ്പുഴ: ചേർത്തലയിൽ കാണാതായ നവജാത ശിശുവിനെ ശ്വാസംമുട്ടിച്ചു കൊലപ്പെടുത്തിയെന്ന് പൊലീസ്. സംഭവത്തിൽ കുഞ്ഞിന്റെ മാതാവ് പള്ളിപ്പുറം പഞ്ചായത്ത് 17ാം വാർഡ് കായിപ്പുറം ആശ (35), പുരുഷ സുഹൃത്ത് പള്ളിപ്പുറം പഞ്ചായത്ത് 17ാം വാർഡ് രാജേഷ് ഭവനത്തിൽ രതീഷ് (38) എന്നിവരെ അറസ്റ്റ് ചെയ്തു. ശ്വാസം മുട്ടിച്ചു കൊലപ്പെടുത്തിയ കുഞ്ഞിനെ രതീഷിന്റെ വീട്ടിലെ ശുചിമുറിയിൽ കുഴിച്ചുമൂടിയെന്നാണു മൊഴി. പൊലീസ് ഇവിടെ കുഴിച്ചു പരിശോധിക്കുന്നു.

കുഞ്ഞിനെ തൃപ്പൂണിത്തുറയിലെ ദമ്പതികൾക്കു കൈമാറിയെന്നാണ് ആശ ആദ്യം പറഞ്ഞത്. എറണാകുളത്തെ അമ്മത്തൊട്ടിലിൽ ഉപേക്ഷിച്ചെന്നു പിന്നീടു പറഞ്ഞു. ഇതു രണ്ടും കളവാണെന്ന് അന്വേഷണത്തിൽ കണ്ടെത്തി. വിശദമായ ചോദ്യം ചെയ്യലിലാണു കൊലപാതകം വെളിപ്പെട്ടത്.

ചേർത്തലയിലെ പള്ളിപ്പുറം സ്വദേശിനിയുടെ നവജാത ശിശുവിനെ കാണാനില്ലെന്ന് ആശാ വർക്കറാണ് പൊലീസിൽ‌ പരാതിപ്പെടുന്നത്. ചേർത്തലയിലെ സ്വകാര്യ ആശുപത്രിയിൽ ആൺകുഞ്ഞിനെ പ്രസവിച്ച യുവതി ശനിയാഴ്ച കുഞ്ഞുമായി വീട്ടിലേക്കു പോയിരുന്നു. ആശപ്രവർത്തകർ വീട്ടിൽ ചെന്നപ്പോൾ കുഞ്ഞിനെ കണ്ടില്ല. കുഞ്ഞിനെ കുറിച്ചു തിരക്കിയപ്പോൾ തൃപ്പൂണിത്തുറയിലെ മക്കളില്ലാത്ത ദമ്പതികൾക്കു നൽകിയെന്നായിരുന്നു യുവതിയുടെ മറുപടി. പിന്നീട് ആശാപ്രവർത്തകർ അറിയച്ചതു പ്രകാരം പൊലീസ് കേസെടുത്തു.

തുടർന്ന് പൊലീസ് നടത്തിയ അന്വേഷണത്തിലാണ് കുട്ടിയെ കൊലപ്പെടുത്തിയെന്ന നിഗമനത്തിൽ എത്തുന്നത്. കുഞ്ഞിന്റെ അമ്മയിൽ നിന്നും മൊഴിയെടുത്ത പൊലീസ് സുഹൃത്ത് രതീഷിനെയും കസ്റ്റഡിയിൽ എടുക്കുകയായിരുന്നു. തുടർന്ന് നടത്തിയ ചോദ്യം ചെയ്യലിൽ ഇയാൾ കുറ്റസമ്മതം നടത്തി.

കഴിഞ്ഞ 25ന് ആണു യുവതിയെ ആശുപത്രിയിൽ പ്രവേശിപ്പിച്ചത്. 26നു ശസ്ത്രക്രിയയിലൂടെ കുഞ്ഞിനെ പുറത്തെടുത്തു. 30നു ഡിസ്ചാർജ് ചെയ്തെങ്കിലും പണമില്ലാത്തതിനാൽ അന്നു പോയില്ല. 31നാണ് ആശുപത്രി വിട്ടത്. യുവതി പ്രസവത്തിനായി ആശുപത്രിയിൽ കഴിഞ്ഞപ്പോൾ ഭർത്താവ് അവിടെ പോയിരുന്നില്ലെന്നും പരിചരിക്കാൻ മറ്റൊരാളെയാണ് നിർത്തിയിരുന്നതെന്നും വിവരമുണ്ട്. യുവതിക്കു മറ്റു രണ്ടു മക്കളുണ്ട്.