ശൂരനാട് തെക്ക്.ദേശീയ ഹാൻഡ്‌ബോൾ ടീമിലേക്ക് സെലെക്ഷൻ കിട്ടിയ പതാരം smhss ലെ പുണ്യയെ സ്കൂൾ മാനേജർ നന്ദകുമാർ
മൊമെന്റോ നൽകി ആദരിച്ചു

കുന്നത്തൂർ . കുന്നത്തൂർ ഗ്രാമ പഞ്ചായത്തിലെ രോഗികൾക്ക് ഏക ആശ്രയം ആണ്
പുത്തനമ്പലത്തിൽ സ്ഥിതി ചെയ്യുന്ന പഞ്ചായത്ത് ഹെൽത്ത് സെന്റർ. മാസങ്ങളായി പ്രാഥമിക ആരോഗ്യ കേന്ദ്രത്തിലേക്കുള്ള റോഡിൻ്റെ മുക്കാൽ ഭാഗവും തകർന്നിരിക്കുകയാണ്. രോഗികളെ കൊണ്ട് ആശുപത്രിയിലേക്ക് പോകുന്ന വാഹനങ്ങൾക്കും ഇരുചക്ര വാഹനങ്ങൾക്കും കടന്നു പോകാൻ പറ്റാത്ത അവസ്ഥ ആണ് നിലവിൽ കാൽ നട ആയി പോകാൻ പറ്റാത്ത രീതിയിൽ തകർന്നിരിക്കുന്നു. ഈ റോഡിൻ്റെ ദയനീയാവസ്ഥ പരിഹരിക്കണമെന്ന് ആവശ്യപ്പെട്ട് കൊണ്ട് കോൺഗ്രസ്സ് കുന്നത്തൂർ മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത് സെക്രട്ടറിയെ ഉപരോധിച്ചു .

ആശുപത്രിയിലേക്ക് ഉള്ള റോഡിൻ്റെ പണി പൂർത്തിക്കരിച്ച് യാത്രാ ക്ലേശം ഉടൻ പരിഹരിച്ചില്ലെങ്കിൽ സമര പരിപാടിയുമായി മുന്നോട്ട് പോകാൻ കോൺഗ്രസ്സ് കുന്നത്തൂർ മണ്ഡലം കമ്മിറ്റി തീരുമാനിച്ചു. മണ്ഡലം പ്രസിഡന്റ് ശശിധരൻ, കുന്നത്തൂർ പ്രസാദ്, റ്റി.എ സുരേഷ് കുമാർ, ജോൺ , സാംകുട്ടി, ഷിജാ രാധാകൃഷ്ണൻ, കുന്നത്തൂർ മനോഹരൻ എന്നിവർ നേതൃത്യം നൽകി. എത്രയുംപ്പെട്ടന്ന് റോഡിൻ്റെ യാത്രാക്ലേശം പരിഹരിക്കുന്നതിനുള്ള നടപടികൾ ആരംഭിക്കുമെന്ന് പഞ്ചായത്ത് സെക്രട്ടറി വിനോദ് കുമാറിൻ്റെ ഉറപ്പിനെ തുടർന്ന് ഉപരോധം അവസാനിപ്പിച്ചു.

കുന്നത്തൂർ. കൊട്ടാരക്കര -കരുനാഗപ്പള്ളി റൂട്ടിൽ കുന്നത്തൂർ ആറ്റുകടവ് ജംഗ്ഷന് സമീപം കൊടുംവളവിൽ റോഡിൻ്റെ മധ്യഭാഗത്ത് രൂപപ്പെട്ട കുഴി അപകട ഭീഷണിയാകുന്നു. ഇരുചക്രവാഹനങ്ങൾ കുഴിയിൽ വീണ് യാത്രികർ തെറിച്ചു പോകുന്നതും പരിക്കേൽക്കുന്നതും പതിവാണ്.തിരക്കേറിയ പാതയായതിനാൽ പലപ്പോഴും ദുരന്തങ്ങൾ വഴി മാറുന്നത് തലനാരിഴയ്ക്കാണ്.മഴ പെയ്താൽ കുഴിയിൽ വെള്ളം കെട്ടിക്കിടക്കുന്നതും ഭീഷണിയാണ്.മാസങ്ങൾക്കു മുമ്പ് രാത്രികാലങ്ങളിൽ ബൈക്ക് അപകടങ്ങൾ പതിവായതോടെ പ്രദേശവാസികൾ ചേർന്ന് കുഴി അടച്ചിരുന്നു.കഴിഞ്ഞ ഓണക്കാലത്ത് പൊതുമരാമത്ത് വകുപ്പിൻ്റെ നേതൃത്വത്തിൽ റോഡിൽ ‘ഓട്ടയടപ്പ്’ നടത്തിയെങ്കിലും പഴയ പടിയിലേക്ക് മാറാൻ അധികനാൾ വേണ്ടി വന്നില്ല.കൊടുംവളവ് തുടങ്ങുന്ന വർക്ഷോപ്പ് ഭാഗം മുതൽ പാൽസൊസൈറ്റി വരെ ടാറിംഗ് നടത്തിയ റോഡ് പൂർണമായും പൊട്ടിപ്പൊളിഞ്ഞ് ചെറുതും വലുതുമായ നിരവധി കുഴികളാണ് രൂപപ്പെട്ടിരിക്കുന്നത്.

ശാസ്താംകോട്ട:പോരുവഴി പരവട്ടത്ത് അടഞ്ഞു കിടക്കുന്ന കശുവണ്ടി ഫാക്ടറിയിൽ മോഷണം നടത്തിയ സംഭവത്തിൽ നാട്ടുകാർ പിടികൂടി പൊലീസിനു കൈമാറിയ പ്രതികളെ കോടതിയിൽ ഹാജരാക്കി റിമാൻ്റ് ചെയ്തു.ശൂരനാട് വടക്ക് കുന്നിരാടം കോട്ടയ്ക്കാട്ട് ചേരിയിൽ ജിജു (37), നടുവിലേമുറി നെല്ലിവിളയിൽ അനീഷ്(40) എന്നിവരെയാണ് റിമാൻ്റ് ചെയ്തത്.ചൊവ്വാഴ്ച രാത്രി എട്ടോടെയാണ് സംഭവം.ഫാക്ടറിക്ക് സമീപം ഇരുചക്രവാഹനങ്ങൾ വച്ചിരിക്കുന്നത് കണ്ട് സംശയം തോന്നിയവർ നടത്തിയ പരിശോധനയിലാണ് മോഷ്ടാക്കൾ കുടുങ്ങിയത്.പാത്രങ്ങളും മറ്റ് വിലപിടിപ്പുള്ള സാധനങ്ങളും കവരുകയായിരുന്ന മോഷ്ടാക്കളെ തടഞ്ഞുവച്ച് ശൂരനാട് പൊലീസിൽ വിവരം അറിയിച്ചു.ഇതിനിടയിൽ അനീഷ് ഓടി രക്ഷപ്പെട്ടിരുന്നു.പിന്നീട് മോഷണം അറിഞ്ഞെത്തിയ ആളെന്ന നിലയിൽ അവിടേക്ക് എത്തിയ അനീഷിനെ സംശയത്തെ തുടർന്ന് നാട്ടുകാർ പിടികൂടി പൊലീസിൽ കൈമാറുകയായിരുന്നു.