തിരുവനന്തപുരം.വയനാടുണ്ടായ പ്രകൃതിദുരന്തത്തിന്റെ പശ്ചാത്തലത്തിൽ പൊലീസ് ആസ്ഥാനത്ത് പ്രത്യേക കൺട്രോൾ റൂം പ്രവർത്തനമാരംഭിച്ചു. 24 മണിക്കൂറും പ്രവർത്തിക്കുന്ന കൺട്രോൾ റൂമിലേയ്ക്ക് പൊതുജനങ്ങൾക്ക് വിവരങ്ങൾ നൽകാം. സംസ്ഥാന പൊലീസ് മേധാവിയുടെ നേരിട്ടുള്ള നിയന്ത്രണത്തിലാണ് കൺട്രോൾ റൂം പ്രവർത്തിക്കുന്നത്. ഫോൺ : 9497900402, 0471 2721566.

ദുരിതാശ്വാസ പ്രവർത്തനങ്ങൾക്ക് നേതൃത്വം നൽകുന്നതിന് ഉത്തരമേഖല ഐജിയും കണ്ണൂർ ഡിഐജിയും വയനാട് എത്തും. പ്രവർത്തനങ്ങൾ ഏകോപിപ്പിക്കാൻ ക്രമസമാധാനവിഭാഗം എഡിജിപിക്ക് സംസ്ഥാന പൊലീസ് മേധാവി നിർദ്ദേശം നൽകി. കേരള ആംഡ് പൊലീസ് നാല്, അഞ്ച് ബറ്റാലിയനുകൾ, മലബാർ സ്‌പെഷ്യൽ പൊലീസ് എന്നിവിടങ്ങളിൽ നിന്ന് പൊലീസ് ഉദ്യോഗസ്ഥർ വയനാട്ടേയ്ക്ക് തിരിച്ചുകഴിഞ്ഞു. ദുരന്തനിവാരണ പ്രവർത്തനങ്ങളിൽ പ്രത്യേക പരിശീലനം ലഭിച്ച ഉദ്യോഗസ്ഥരും ഇക്കൂട്ടത്തിലുണ്ട്. മലപ്പുറം ജില്ലയിലെ രക്ഷാപ്രവർത്തനങ്ങൾക്കായും പ്രത്യേക പൊലീസ് സംഘത്തെ നിയോഗിച്ചിട്ടുണ്ട്.

പൊലീസ് ആസ്ഥാനത്തെ കൺട്രോൾ റൂമിൽ ലഭിക്കുന്ന വിവരങ്ങൾ അപ്പപ്പോൾ ദുരിതബാധിത പ്രദേശത്തെ തിരച്ചിൽ സംഘങ്ങൾക്ക് കൈമാറുന്നതിന് ആവശ്യമായ നടപടികൾ സ്വീകരിച്ചിട്ടുണ്ട്. ഇതിനായി കൺട്രോൾ റൂമിൽ ആവശ്യത്തിന് പൊലീസുകാരെയും വിന്യസിച്ചു

വയനാട്. കേരളത്തെ നടുക്കി വയനാട് മുണ്ടക്കൈ, ചൂരല്‍മല ഭാഗത്ത് നടന്ന ഉരുള്‍പൊട്ടലില്‍ ആറ് മണി വരെ പുറത്ത് വന്ന വിവരം അനുസരിച്ച് 126 പേരുടെ മരണം സ്ഥിരീകരിച്ചു. ഇതില്‍ 58 പേരുടെ മൃതദേഹം മാത്രമാണ് തിരിച്ചറിഞ്ഞത്.

മൃതദേഹത്തില്‍ ചിലത് ചിന്നിച്ചിതറിയ നിലയിലാണ്. അപകടം ഉണ്ടായ സ്ഥലത്ത് നിന്ന് കിലോ മീറ്റുകള്‍ അകലെ നിലമ്പൂര്‍ പോത്തുകല്ല് ഭാഗത്ത് ചാലിയാര്‍ പുഴയിലൂടെ മൃതദേഹം ഒഴുകിയെത്തിയ അവസ്ഥയും ഉണ്ടായി. നിലമ്പൂര്‍ ജില്ലാ ആശുപത്രി മോര്‍ച്ചറിയില്‍ 42 മൃതദേഹമാണുള്ളത്. ഇതില്‍ 16 എണ്ണം ശരീരഭാഗമാണ്. 96 പേരെ കാണാതായി. 196 പേര്‍ വിവിധ ആശുപത്രികളില്‍ ചികിത്സയിലാണ്.

കല്‍പ്പറ്റ: ഉരുള്‍പൊട്ടല്‍ ദുരന്തമുണ്ടായ മേപ്പാടി ചൂരല്‍മല, മുണ്ടക്കൈ പ്രദേശങ്ങളില്‍ സ്ഥിതിഗതികള്‍ നിസഹായാവസ്ഥയില്‍. രക്ഷാപ്രവര്‍ത്തനത്തിന് വേണ്ടി എത്തിയ വിവിധ സംഘടനാ-രാഷ്ട്രീയ പാര്‍ട്ടി പ്രവര്‍ത്തകരും സന്നദ്ധ സേവകരും മുണ്ടക്കൈ മേഖലയിലേക്ക് കടക്കാന്‍ സാധിക്കാതെ നില്‍ക്കുന്നു. സൈന്യമെത്തി താല്‍ക്കാലിക പാലം നിര്‍മിക്കാന്‍ തുടങ്ങിയതോടെ നേരിയ ആശ്വാസമായിട്ടുണ്ട്. ഇവിടെയുണ്ടായിരുന്ന പാലം വെള്ളപ്പാച്ചിലില്‍ തകര്‍ന്നതാണ് രക്ഷാപ്രവര്‍ത്തനം ദുഷ്‌കരമാക്കിയത്. രാത്രിയായതോടെ മുണ്ടക്കൈ വീണ്ടും ഒറ്റപ്പെട്ടു. ഇവിടെ വൈദ്യുതിബന്ധം തകര്‍ന്ന നിലയിലാണ്.

രക്ഷാപ്രവര്‍ത്തനത്തിന് തയ്യാറായി നിരവധി യുവാക്കളാണ് ദുരന്തമേഖലയില്‍ എത്തിയിട്ടുള്ളത്. എന്നാല്‍ ഇവര്‍ക്ക് നേതൃത്വം നല്‍കാന്‍ വിദഗ്ധ പരിശീലനം നേടിയ ഉദ്യോഗസ്ഥര്‍ ആവശ്യമാണ്. മാത്രമല്ല, തകര്‍ന്ന വീടുകളുടെ അവശിഷ്ടങ്ങള്‍ക്കടിയില്‍ ആളുകള്‍ ജീവനോടെയുണ്ടെന്ന് രക്ഷാപ്രവര്‍ത്തനത്തിന് എത്തിയവര്‍ പറയുന്നു. അവരുടെ നിലവിളി കേട്ടുവെന്നും ഇവര്‍ മാധ്യമങ്ങളോട് വെളിപ്പെടുത്തി

മുണ്ടക്കൈ മേഖലയിലേക്ക് കടക്കണമെങ്കില്‍ താല്‍ക്കാലിക പാലം ആവശ്യമാണ്. അല്ലെങ്കില്‍ ഹെലികോപ്റ്ററില്‍ എയര്‍ലിഫിറ്റിങ് വേണം. പുഴയുടെ അപ്പുറത്ത് നിരവധി പേര്‍ രക്ഷിക്കണമെന്ന് ആവശ്യപ്പെട്ട് നില്‍ക്കുന്ന വീഡിയോകളും പുറത്തുവന്നു. സൈന്യം നിര്‍മിക്കുന്ന താല്‍ക്കാലിക പാലമാണ് ഇനി പ്രതീക്ഷ. ഇതുവഴി മുണ്ടക്കൈയില്‍ കുടുങ്ങിക്കിടക്കുന്നവരെ രക്ഷപ്പെടുത്താമെന്ന് സന്നദ്ധ പ്രവര്‍ത്തകര്‍ പറഞ്ഞു. ഇരുട്ടുംമുമ്പ് സാധിച്ചില്ലെങ്കില്‍ മരണസംഖ്യ കൂടിയേക്കും. മാത്രമല്ല, കോണ്‍ഗ്രീറ്റ് സ്ലാബുകള്‍ പൊട്ടിക്കാന്‍ ശേഷിയുള്ള മെഷീനുകളും വേണം. സ്ലാബുകള്‍ക്കടിയില്‍ നിന്ന് നിലവിളി കേട്ടുവെന്നും അവരെ രക്ഷിക്കണമെങ്കില്‍ സ്ലാബുകള്‍ മുറിച്ച് മാറ്റേണ്ടതുണ്ടെന്നും സന്നദ്ധ പ്രവര്‍ത്തകര്‍ പ്രതികരിച്ചു.

മേപ്പാടി: വയനാട്ടിലെ ഉരുള്‍പ്പൊട്ടലില്‍ പ്രദേശത്തെ സ്‌കൂളിലെ 22 കുട്ടികളെ കുറിച്ച് യാതൊരു വിവരുമില്ലെന്ന് പ്രിന്‍സിപ്പല്‍ ഭവ്യ. വള്ളര്‍മല വിഎച്ച്എസ്സിയിലെ പ്രിന്‍സിപ്പാളാണ് ഭവ്യ. സ്‌കൂളില്‍ ഒന്ന് മുതല്‍ 12 വരെ ക്ലാസുകളിലായി 582 കുട്ടികളാണ് ഉള്ളത്. അതില്‍ 22 കുട്ടികളെയാണ് ഇപ്പോള്‍ വിളിച്ചിട്ട് കിട്ടുന്നില്ലെന്ന് ഭവ്യ ടീച്ചര്‍ പറയുന്നത്. ഏഷ്യാനെറ്റ് ന്യൂസിനോടായിരുന്നു ഭവ്യയുടെ പ്രതികരണം

വളരെ ദയനീയമായ അവസ്ഥയാണ് ഇപ്പോഴുള്ളത്. പുലര്‍ച്ചെ മൂന്ന് മണിക്കാണ് കാര്യങ്ങള്‍ അറിഞ്ഞത്. മൂന്നര മുതല്‍ എല്ലാവരെയും വിളിക്കാന്‍ ശ്രമിക്കുന്നുണ്ടായിരുന്നു. അതില്‍ 22 കുട്ടികളെയാണ് വിളിച്ചിട്ട് കിട്ടാത്തത്. ബാക്കിയെല്ലാവരും സുരക്ഷിതമാണെന്ന് അധ്യാപിക പറയുന്നു.

ഇവിടെയൊന്നും വൈദ്യുതിയില്ല. ഒരുപക്ഷേ ഫോണ്‍ ഓഫായി പോയതായിരിക്കും. പല ആളുകളും പല സ്ഥലത്തേക്കും ഓടിരക്ഷപ്പെട്ടതായിരിക്കും. അതിനിടയില്‍ ഫോണ്‍ നഷ്ടപ്പെട്ടിട്ടുണ്ടാവും. അതുകൊണ്ടെല്ലാം വിളിച്ചിട്ട് കിട്ടാതിരിക്കാമെന്ന് ഭവ്യ ടീച്ചര്‍ പറയുന്നു. കുട്ടികളെ ക്ലാസ് ടീച്ചേഴ്സ് നിരന്തരം വിളിച്ച് കൊണ്ടിരിക്കുകയാണെന്നും അവര്‍ പറഞ്ഞു.

വെള്ളര്‍മല സ്‌കൂളില്‍ പതിനഞ്ച് വര്‍ഷമായി അധ്യാപികയാണ് ഭവ്യ ടീച്ചര്‍. ഈ 22 കുട്ടികളും ദുരന്തമുണ്ടായ പ്രദേശങ്ങളില്‍ താമസിക്കുന്നവരാണെന്നും ടീച്ചര്‍ വ്യക്തമാക്കി. ഇന്നലെ സ്‌കൂളില്‍ ദുരിതാശ്വാസ ക്യാമ്പുണ്ടായിരുന്നു. 13 പേരാണ് അവിടെ ഉണ്ടായിരുന്നത്. അവരെ പിന്നീട് മറ്റൊരു ക്യാമ്പിലേക്ക് മാറ്റുകയായിരുന്നു. അതേസമയം അവിടെ താമസിച്ച് പഠിപ്പിക്കുന്ന അധ്യാപകരെല്ലാം സുരക്ഷിതരാണെന്നും അധ്യാപിക പറഞ്ഞു.

എത്ര പേര്‍ സുരക്ഷിതരാണെന്ന് ഇപ്പോഴും അറിയില്ല. പത്ത് വര്‍ഷം ഞാന്‍ താമസിച്ചിരുന്ന ഒരു വീട് ഇപ്പോള്‍ അവിടെയില്ല. അയല്‍വാസികളും പരിചയക്കാരുമെല്ലാം ഉണ്ടായിരുന്നു. അവരെല്ലാം മരിച്ചുവെന്ന വിവരമാണ് ലഭിക്കുന്നത്. ഇന്നലെ സ്‌കൂളിന് പ്രാദേശിക അവധി നല്‍കിയിരുന്നു. അതുകൊണ്ട് പല അധ്യാപകരും എത്തിയിട്ടില്ലായിരുന്നു.