കൃഷ്ണകുമാറിന്റെ കുടുംബത്തിലെ വിശേഷങ്ങളെല്ലാം സോഷ്യല്‍മീഡിയയില്‍ ചര്‍ച്ചയാവാറുണ്ട്. രാഷ്ട്രീയത്തിലെ കാര്യങ്ങളെക്കുറിച്ചാണ് അച്ഛന്റെ പോസ്‌റ്റെങ്കില്‍ അമ്മയും മക്കളും ഫാമിലിയിലെ വിശേഷങ്ങളാണ് പങ്കുവെക്കുന്നത്. ദിയ കൃഷ്ണയൊഴികെ മറ്റുള്ളവരെല്ലാം ഇതിനകം സിനിമയില്‍ മുഖം കാണിച്ചവരാണ്. അഭിനയ മേഖലയില്‍ നിന്ന് അവസരങ്ങള്‍ തേടിയെത്തിയെങ്കിലും ദിയ അത് സ്വീകരിച്ചിരുന്നില്ല. റീല്‍സിലൂടെയായി അഭിനയവും ഡാന്‍സും വഴങ്ങുമെന്ന് ദിയ തെളിയിച്ചതാണ്. ഓണ്‍ലൈന്‍ ബിസിനസിലാണ് ഇപ്പോള്‍ ദിയ ശ്രദ്ധ കേന്ദ്രീകരിച്ചിട്ടുള്ളത്.

വീട്ടിലെ പരീക്ഷണ വസ്തു താനായിരുന്നുവെന്ന് അഹാന കൃഷ്ണ പറഞ്ഞിരുന്നു. ആദ്യത്തെ കുഞ്ഞായിരുന്നതിനാല്‍ അച്ഛനും അമ്മയും എല്ലാം പരീക്ഷിച്ച് നോക്കിയിരുന്നത് എന്നിലായിരുന്നു. അത് അമ്മു പറയുന്നത് കൃത്യമാണെന്ന് കൃഷ്ണകുമാറും സിന്ധുവും പറഞ്ഞിരുന്നു. അഹാന ഒത്തിരി സംസാരിക്കുമായിരുന്നു ചെറുപ്പത്തില്‍. അതുപോലെ ഭക്ഷണപ്രിയ ആയിരുന്നു. ആരെന്ത് കൊടുത്താലും കഴിക്കുമായിരുന്നു. ഭക്ഷണ കാര്യങ്ങളില്‍ അങ്ങനെ നിര്‍ബന്ധങ്ങളൊന്നുമില്ല. ഇന്നും ആ ശീലം അതേപോലെയുണ്ട്. തനിക്ക് വേണ്ടത് കൃത്യമായി തന്നെ അമ്മു കഴിച്ചോളുമെന്ന് സിന്ധു പറഞ്ഞിരുന്നു.

ഇപ്പോഴിതാ കുട്ടിക്കാലത്തെ മനോഹരമായൊരു ഫോട്ടോ പങ്കുവെച്ചെത്തിയിരിക്കുകയാണ് അഹാന കൃഷ്ണ. ഒരു ഫാമിലി ഫ്രണ്ട് അയച്ച് തന്ന ഫോട്ടോയാണ്. 2005 ഏപ്രില്‍ മാസത്തില്‍ എടുത്ത ഫോട്ടോയാണ്. അന്ന് അമ്മയുടെ വയറ്റിലാണ് ഹന്‍സു. നാല് മാസമാണെന്ന് തോന്നുന്നു. ഈ ദിവസത്തെക്കുറിച്ച് എനിക്കങ്ങനെ ഓര്‍മ്മയില്ല. പക്ഷേ, പുറത്ത് ഫംഗക്ഷന് പോവാനും രുചികരമായ ഭക്ഷണം കഴിക്കാനും ഞങ്ങള്‍ക്കെല്ലാം ഇഷ്ടമായിരുന്നു. ഗര്‍ഭിണിയായിരുന്നതിനാല്‍ അമ്മ ഈ ഭക്ഷണമൊന്നും അത്ര ആസ്വദിക്കാന്‍ സാധ്യതയില്ല.

ആ സമയത്ത് ഞങ്ങള്‍ക്കുണ്ടായിരുന്നതില്‍ നല്ല ഡ്രസും ചെരിപ്പുമാണ് ഇട്ടിട്ടുള്ളത്. മിക്കതും ചെന്നൈയില്‍ നിന്നും വാങ്ങിക്കുന്നതാണ്. അന്ന് ഞങ്ങള്‍ക്ക് എല്ലാം ലിമിറ്റഡായിരുന്നു. മൂന്നോ നാലോ ജോഡി നല്ല ഡ്രസും ചെരിപ്പുകളും ഉണ്ടാവും. പോവുന്നിടത്തെല്ലാം അത് തന്നെ ഇട്ടിട്ട് പോവും. വീണ്ടും ഇടുന്നതിലൊന്നും പ്രശ്‌നങ്ങളുണ്ടായിരുന്നില്ല. ഇന്നത്തെ കാലത്ത് വാര്‍ഡ്രോബില്‍ ഇഷ്ടം പോലെ സ്ഥലമുണ്ട്. അതുപോലെ എവിടെയെങ്കിലും പോവുമ്പോള്‍ ഏത് ഇടണമെന്ന കണ്‍ഫ്യൂഷനും വരാറുണ്ട്. ഏറ്റവും മികച്ചത് തന്നെ ധരിക്കാനായി ശ്രദ്ധിക്കും.

അതുപോലെ അന്ന് അമ്മ എങ്ങനെയാണോ മുടി കെട്ടിത്തരുന്നത് അത് വെച്ച് അങ്ങ് പോവും. മനോഹരമായൊരു കാലഘട്ടത്തിലെ മധുരമുള്ള ഓര്‍മ്മകളാണ് ഇതൊക്കെ. ഈ ഫോട്ടോ എടുക്കുന്ന സമയത്ത് ഞങ്ങളാരും അറിഞ്ഞിരുന്നില്ല. എല്ലാവരും ഭക്ഷണം കഴിക്കുന്നതില്‍ ശ്രദ്ധിക്കുകയായിരുന്നു. അക്കാലത്ത് അമ്മയുടെ ഫോണിലുണ്ടായിരുന്ന റിംഗ് ടോണാണ് ഈ പാട്ട്. ഞങ്ങള്‍ക്കെല്ലാം ഒരുപാട് ഇഷ്ടമായിരുന്നു ഈ പാട്ട് എന്നുമായിരുന്നു അഹാന കുറിച്ചത്. നിരവധി പേരാണ് അഹാനയുടെ പോസ്റ്റിന് താഴെയായി സ്‌നേഹം അറിയിച്ച് എത്തിയിട്ടുള്ളത്. എത്ര മനോഹരമായാണ് അഹാന കുട്ടിക്കാലത്തെ വരച്ച് കാട്ടിയതെന്നായിരുന്നു ആരാധകരും പറഞ്ഞത്. ഇതിനകം തന്നെ പോസ്റ്റും ചിത്രങ്ങളും വൈറലായിക്കഴിഞ്ഞിട്ടുണ്ട്.