ആലപ്പുഴ: പോക്സോ കേസ് പ്രതിക്ക് 20 വര്‍ഷം തടവും 50,000 രൂപ പിഴയും ശിക്ഷ. കൊട്ടാരക്കര വിളക്കുടി കുന്നിക്കോട് മാണിക്കംവിള വീട്ടില്‍ മുഹമ്മദ് ആഷിക്കി (29) നെയാണ് ആലപ്പുഴ അഡീഷണല്‍ ഡിസ്ട്രിക്ട് ആന്റ് സെഷന്‍സ് കോടതി 1 (സ്പെഷ്യല്‍ പോക്സോ കോടതി) കുറ്റക്കാരനാണെന്ന് കണ്ടെത്തി ശിക്ഷ വിധിച്ചത്. പിഴ തുക അടച്ചില്ലെങ്കില്‍ മൂന്നു മാസം അധിക തടവ് അനുഭവിക്കണം.

കൊല്ലം: ദേശീയപാതാ നിര്‍മാണ പ്രവര്‍ത്തനങ്ങള്‍ക്ക് എത്തിച്ച ജെസിബിയുടെ യന്ത്രഭാഗങ്ങള്‍ മോഷ്ടിച്ച സംഭവത്തില്‍ ഒളിവിലായിരുന്ന മുഖ്യപ്രതി പോലീസ് പിടിയിലായി. കൊല്ലം ആശ്രാമം കാവടിപ്പുറത്ത് പുത്തന്‍വീട്ടില്‍ നിന്ന് പനയം നടുവിലക്കര കണ്ടച്ചിറ ആയക്കുന്ന് പടിഞ്ഞാറ്റതില്‍ വീട്ടില്‍ താമസിക്കുന്ന പ്രിന്‍സ് (34) ആണ് ചവറ പോലീസിന്റെ പിടിയിലായത്.
കഴിഞ്ഞ മാസം 18ന് നീണ്ടകര ചീലാന്തിമുക്കിന് സമീപം അറ്റകുറ്റ പണക്കായി ഊരിവച്ചിരുന്ന ജെസിബിയുടെ 40,000 രൂപയോളം വിലവരുന്ന മണ്ണ് കോരുന്ന ഇരുമ്പ് ബക്കറ്റാണ് പ്രതിമോഷണം നടത്തിയത്.
ചവറ പോലീസ് നടത്തിയ അന്വേഷണത്തില്‍ പ്രതിയെ കുറിച്ച് സൂചന ലഭിക്കുകയും മോഷണ മുതല്‍ വാങ്ങിയ മുന്ന് പ്രതികളെ അറസ്റ്റ് ചെയ്തിരുന്നു. ഒളിവില്‍ പോയ പ്രിന്‍സിനെ കുറിച്ച് കൊല്ലംസിറ്റി പോലീസ് മേധാവി ചൈത്രാ തെരേസാ ജോണിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ പ്രതിയെ പിടികൂടുകയായിരുന്നു.
ചവറ ഇന്‍സ്‌പെക്ടര്‍ സി.ആര്‍ ബിജുവിന്റെ നേതൃത്വത്തില്‍എസ്‌ഐ അനീഷ് എസ്, സിപിഒമാരായ സീനു, മനു എന്നിവര്‍ ചേര്‍ന്നാണ് പ്രതിയെ പിടികൂടിയത്.

കൊട്ടാരക്കര: മഹാഗണപതി ക്ഷേത്രത്തില്‍ വിനായക ചതുര്‍ഥി ആഘോഷങ്ങള്‍ക്ക് തുടക്കമായി. കേരള ക്ഷേത്ര സംരക്ഷണ സമിതിയും മഹാഗണപതിക്ഷേത്രം ഉപദേശക സമിതിയും ചേര്‍ന്നു നടത്തുന്ന ആഘോഷത്തിന്റെ ഭാഗമായി ഡോ.നാരായണന്‍ ഭട്ടതിരിപ്പാട് ആചാര്യനായുള്ള ഗണേശ പുരാണ യജ്ഞവും ഇന്ന് തുടങ്ങി.
തുടര്‍ന്ന് വിദ്യാര്‍ഥികളുടെ ചിത്രരചനാ മത്സരം കൊട്ടാരക്കര ഡിവൈഎസ്പി കെ. ബൈജുകുമാര്‍ ഉദ്ഘാടനം ചെയ്തു. വൈകിട്ട് 5.30ന് ഗണേശ പുരാണയജ്ഞം തിരുവിതാംകൂര്‍ ദേവസ്വംബോര്‍ഡ് അംഗം ജി.സുന്ദരേശന്‍ ഉദ്ഘാടനം ചെയ്യും. രാത്രി ഏഴിന് ഗണേശ മാഹാത്മ്യ പ്രഭാഷണം.
അഞ്ചിന് വൈകിട്ട് അഞ്ചിന് ഹൈന്ദവ സമ്മേളനം സ്വാമി ദയാനന്ദ സരസ്വതി ഉദ്ഘാടനം ചെയ്യും. ആറിന് രാവിലെ ആറിന് തന്ത്രി ഗോവിന്ദന്‍ നമ്പൂതിരിപ്പാടിന്റെ കാര്‍മികത്വത്തില്‍ മഹാമൃത്യുഞ്ജയഹോമം, വൈകിട്ട് അഞ്ചിന് സാംസ്‌കാരിക സമ്മേളനം സ്വാഗതസംഘം പ്രസിഡന്റ് വിനായക എസ്.അജിത് കുമാറിന്റെ അധ്യക്ഷതയില്‍ മുന്‍ ജില്ലാ കളക്ടര്‍ എന്‍.പ്രശാന്ത് ഉദ്ഘാടനം ചെയ്യും. തിരക്കഥാകൃത്ത് അഭിലാഷ് പിള്ള, ചലച്ചിത്ര താരങ്ങളായ ഭാമ, അതിഥി രവി, ദേവനന്ദ തുടങ്ങിയവര്‍ പങ്കെടുക്കും.
ഏഴിന് രാവിലെ അഞ്ചിന് 1008 നാളികേര കൂട്ടിന്റെ അഷ്ടദ്രവ്യ മഹാഗണപതിഹോമം, എട്ടിന് ഗജപൂജയ്ക്ക് തിരുവിതാംകൂര്‍ ദേവസ്വംബോര്‍ഡ് പ്രസിഡന്റ് പി.എസ്. പ്രശാന്ത് ദീപം തെളിയിക്കും. 9.30ന് മാതൃസമ്മേളനം ഡോ.സി.എന്‍. വിജയകുമാരി ഉദ്ഘാടനം ചെയ്യും. മാതൃസമിതി സംസ്ഥാന സെക്രട്ടറി വി.വി. ലക്ഷ്മി പ്രിയ പ്രഭാഷണം നടത്തും.
10.15ന് കളഭാഭിഷേകം, വൈകിട്ട് അഞ്ചിന് പടിഞ്ഞാറ്റിന്‍കര മഹാദേവര്‍ ക്ഷേത്രത്തില്‍ നിന്നാരംഭിക്കുന്ന ശ്രീഗണേശ മഹാഘോഷയാത്രയില്‍ ഗജവീരന്മാരും, ഗണപതിവേഷങ്ങളും വാദ്യമേളങ്ങളും നിരക്കും. രാത്രി 7.45-ന് മഹാഗണപതി എഴുന്നള്ളത്തും നടക്കും.

കൊട്ടാരക്കര: ഭൂരിഭാഗം കുഴികളും അടയ്ക്കാതെ ചെറിയൊരു ഭാഗം ടൈല്‍ പാകി ഉദ്ഘാടനം ചെയ്ത കൊട്ടാരക്കര-പുത്തൂര്‍ റോഡിലെ യാത്ര ദുസ്സഹമാകുന്നു. റെയില്‍വെ മേല്‍ പാലം മുതല്‍ മാസങ്ങളായി കുണ്ടും കുഴിയും നിറഞ്ഞ് വാഹന ഗതാഗതം താറുമാറായി. അപകടം പതിവായതോടെ വീട്ടമ്മ ധനകാര്യമന്ത്രിയുടെ കാറിനു മുന്‍പില്‍ പ്രതിഷേധിച്ചു. പ്രതിഷേധങ്ങള്‍ സ്ഥലം എംഎല്‍എയും ധനകാര്യ മന്ത്രികൂടിയായ കെ.എന്‍. ബാലഗോപാലിനും സര്‍ക്കാരിനും നാണകേടുണ്ടായതോടെയാണ് റോഡില്‍ അറ്റകുറ്റപ്പണികള്‍ നടത്താന്‍ തീരുമാനിച്ചത്. 12 ലക്ഷം രൂപയ്ക്ക് കെആര്‍എഫ്ബിക്കായിരുന്നു നിര്‍മാണ ചുമതല. ഒന്‍പത് ദിവസം അടച്ചിട്ടാണ് റോഡ് നിര്‍മിച്ചത്. ഇതിനു ശേഷം നഗരസഭ ചെയര്‍മാന്‍ ഉദ്ഘാടനവും ചെയ്തു.
ശേഷം തുറന്ന റോഡ് കണ്ട് നാട്ടുകാര്‍ ഞെട്ടി. തുടക്കത്തില്‍ കുറച്ചു ടൈല്‍സ് നിരത്തി ബാക്കിഭാഗത്തെ കുഴികള്‍ മുഴുവന്‍ അതേപോലെയുണ്ട്. റോഡ് നിര്‍മാണത്തിന്റെ പേരില്‍ അധികൃതര്‍ക്കെതിരെ സാമൂഹ്യമാധ്യങ്ങളില്‍ അടക്കം വിമര്‍ശനം ഉയര്‍ന്നിട്ടുണ്ട്.