അഞ്ചല്‍: സീരിയല്‍ നടന് ബാര്‍ ജീവനക്കാരുടെ ക്രൂര മര്‍ദനമേറ്റു. സീരിയല്‍ നടനും കോട്ടുക്കലില്‍ ഓണ്‍ലൈന്‍ സെന്റര്‍ നടത്തിപ്പുകാരനുമായ അഞ്ചല്‍ കോട്ടുക്കല്‍ സ്വദേശി സലീലിനാണ് മര്‍ദനമേറ്റത്. മര്‍ദനത്തില്‍ സലീലിന്റെ ഗുരുതമായി പരുക്കേറ്റു. ഇക്കഴിഞ്ഞ അഞ്ചിന്‌ രാത്രി 10ഓടെയാണ് സംഭവം നടന്നത്. അഞ്ചലിലെ ബാറില്‍ സുഹൃത്തുമായി എത്തിയ സലീലിന് ബാര്‍ ജീവനക്കാരില്‍നിന്നും ക്രൂര മര്‍ദനമേറ്റത്. കണ്ടാലറിയാവുന്ന അഞ്ചോളം ബാര്‍ ജീവനക്കാരാണ് തന്നെ മര്‍ദ്ദിച്ചതെന്നും സിമന്റ് കട്ട കൊണ്ട് തലക്കടിക്കുകയും കമ്പി വടി ഉപയോഗിച്ച് ദേഹത്ത് അടിക്കുകയും നിലത്ത് ഇട്ട് ചവിട്ടുകയും ചെയ്തു എന്ന് സലീല്‍ പറഞ്ഞു.
അഞ്ചല്‍ ഗവ. ആശുപത്രിയില്‍ പ്രാഥമിക ചികിത്സയ്ക്കുശേഷം വെഞ്ഞാറമൂട് സ്വകാര്യ മെഡിക്കല്‍ കോളജിലും തുടര്‍ന്ന് പാരിപ്പള്ളി മെഡിക്കല്‍ കോളജിലും ചികിത്സയില്‍ കഴിയുകയാണ് സലീല്‍. സംഭവത്തില്‍ സലീലിന്റെ ഭാര്യ രാജി കൃഷ്ണാ അഞ്ചല്‍ പൊലിസില്‍ പരാതി നല്‍കി. സലീലിന്റെ മൊഴി രേഖപ്പെടുത്തിയ ശേഷം കേസെടുത്ത അഞ്ചല്‍ പൊലിസ് അന്വേഷണം ആരംഭിച്ചു.

ഓയൂര്‍: അമ്പലംകുന്നില്‍ ആരാധനാലയങ്ങളുടെ വഞ്ചികള്‍ കുത്തിത്തുറന്ന് മോഷ്ടാക്കള്‍ പണം അപഹരിച്ചു. കഴിഞ്ഞ ദിവസം രാത്രിയായിരുന്നു സംഭവം. അമ്പലംകുന്ന് ജങ്ഷനില്‍ സ്ഥാപിച്ചിരുന്ന നെട്ടയം ഇണ്ടളയപ്പന്‍ ക്ഷേത്രത്തിന്റേയും അമ്പലംകുന്ന് മുസ് ലിം ജമാഅത്ത് പള്ളിയുടേയും വഞ്ചികളില്‍ നിന്നാണ് പണം അപഹരിച്ചത്. പൂയപ്പള്ളി പൊലിസ് അന്വേഷണം ആരംഭിച്ചു.

കൊട്ടാരക്കര: കിടപ്പു രോഗിയായ വയോധികയുടെ മൂന്നു വർഷത്തെ പെൻഷൻ തട്ടിയെടുത്ത ബാങ്കിലെ താൽകാലിക ജീവനക്കാരി അറസ്റ്റിൽ. ബാങ്ക് മാനേജരുടെയും വയോധികയുടെ ബന്ധുക്കളുടെയും പരാതിയെ തുടർന്നു നടത്തിയ അന്വേഷണത്തിലാണ് കൊട്ടാരക്കര പുലമൺ ഇടക്കുന്നിൽ രജനി(35)യെ കൊട്ടാരക്കര പൊലിസ് അറസ്റ്റ് ചെയ്തത്. പുലമൺ സ്വദേശിയായ വയോധികയുടെ പേരിൽ ദേശസാൽകൃത ബാങ്കിലുള്ള സേവിങ്സ് അക്കൗണ്ടിൽ നിന്നും 2021 മുതൽ 2024 മാർച്ച് വരെ കാലത്ത് 28 തവണകളായി 2,40,000 രൂപ തട്ടിയെടുത്തതായി കണ്ടെത്തി. വയോധികയുടേതെന്ന പേരിൽ വ്യാജ വിരലടയാളം പതിച്ചായിരുന്നു തട്ടിപ്പ്. ഏറെ വർഷങ്ങളായി ബാങ്കിൽ താത്കാലിക ജീവനക്കാരിയായി പ്രവർത്തിച്ചിരുന്ന രജനി എല്ലാവരുടെയും വിശ്വാസ്യത നേടിയെടുത്തിരുന്നു. പണം പിൻവലിക്കൽ ഫോം കൊണ്ടുപോയി സ്വന്തം വിരലടയാളം പതിച്ചു നൽകുകയുമായിരുന്നു. വയോധികയുടെ ബന്ധു ബാങ്ക് അക്കൗണ്ട് പരിശോധിച്ചപ്പോഴാണ് പണം പിൻവലിച്ചിരിക്കുന്നതായി കണ്ടെത്തിയതും പരാതി നൽകിയതും. എസ്.ഐ ജോൺസന്റെ നേതൃത്വത്തിലുള്ള സംഘമാണ് രജനിയെ അറസ്റ്റ് ചെയ്തത് ഇവരെ കോടതിയിൽ ഹാജരാക്കി റിമാൻഡ് ചെയ്തു.