വായുകോപം അഥവാ ഗ്യാസ് പലരേയും അലട്ടുന്ന പ്രശ്നമാണ്. ഇതിന് പരിഹാരമായി ചെയ്യാവുന്ന ചില ആയുര്വേദ പാനീയങ്ങളുമുണ്ട്. ഇവയേതെല്ലാം എന്നറിയാം.
വായുകോപം മാറാന് ആയുര്വേദ പാനീയങ്ങള്
വായുകോപം അഥവാ ഗ്യാസ്, അസിഡിറ്റി പ്രശ്നങ്ങള് പലരേയും അലട്ടുന്ന ഒന്നാണ്. ഇതിന് കാരണങ്ങള് പലതാണ്. നാം കഴിയ്ക്കുന്ന ചില ഭക്ഷണങ്ങള്, വ്യായാമക്കുറവ്, ചില മരുന്നുകള്, ചിലതരം രോഗങ്ങള് എന്നിവയെല്ലാം ഇതിന് പുറകിലുണ്ട്. ഗ്യാസ് ചില പ്രത്യേക കാരണങ്ങള് ചിലപ്പോള് മാത്രം വരുന്നതാണ്. എന്നാല് ചിലര്ക്കിത് സ്ഥിരം പ്രശ്നമാണ്. ഇതെത്തുടര്ന്ന് വയര് വന്നു വീര്ക്കുന്നതുള്പ്പെടെ പല പ്രശ്നങ്ങളും ഉണ്ടാകും. ഛര്ദിയും വയറിന് അസ്വസ്ഥതയും ഉണ്ടാകും. ആയുര്വേദത്തില് ഇതിന് പരിഹാരമായി പറയുന്ന ചില പാനീയങ്ങളുണ്ട്. ഇവ പരീക്ഷിച്ച് നോക്കുന്നത് ഏറെ ഗുണം നല്കും.
പെരുഞ്ചീരകം, ജീരകം
പെരുഞ്ചീരകം, ജീരകം എന്നിവ പല കറികളിലും നാം ഉപയോഗിയ്ക്കുന്ന ഒന്നാണ്. എന്നാല് ഇവ മസാല രൂപത്തില് മാത്രമല്ല, മരുന്നായും ഉപയോഗിയ്ക്കാവുന്ന ഒന്നാണ്. ഇത് ഗ്യാസ്, അസിഡിറ്റി പ്രശ്നങ്ങള്ക്കുള്ള നല്ലൊരു മരുന്നാണ്. പെരുഞ്ചീരകം കാല് ടീസ്പൂണ്, സാധാരണ ജീരകം എന്നിവ വീതം കാല് ടീസ്പൂണ് എടുക്കാം. ഇവ രണ്ടും ചേര്ത്ത് വറുക്കുക. ഇത് അര ഗ്ലാസ് ചൂടുവെള്ളത്തില് കലക്കി കുടിയ്ക്കുന്നത ഏറെ നല്ലതാണ്. ധന്വന്തരം ഗുളിക ചെറുചൂടുള്ള ജീരകവെള്ളത്തില് ചേര്ത്ത് കഴിയ്ക്കുന്നത് നല്ലതാണ്. ജീരകം പൊതുവേ വെള്ളത്തില് ഇട്ട് തിളപ്പിച്ച് കുടിയ്ക്കുന്നത് ഗ്യാസ് , അസിഡിററി പ്രശ്നങ്ങള്ക്ക് നല്ല പരിഹാരമാകാറുമുണ്ട്.
ഇഞ്ചി
ഇഞ്ചി നീര് നല്ലതാണ്. ഇഞ്ചിക്ക് ദഹനശേഷിയുണ്ട്. വയറ്റിലെ പല അസ്വസ്ഥതകള്ക്കും ഇത് നല്ല മരുന്നുമാണ്. ആവണക്കെണ്ണ ശോധനക്കുറവിന് പൊതുവേ ഉപയോഗിച്ച് വരുന്ന ഒന്നാണ്. അരടീസ്പൂണ് ഇഞ്ചിനീര്, അര ടീസ്പൂണ് ചെറുചൂടുവെള്ളം, 3 തുള്ളി ആവണക്കെണ്ണ എന്നിവ ചേര്ത്തളക്കി കുടിയ്ക്കുന്നതും ഏറെ നല്ലത്. ആവണക്കെണ്ണയും ഇഞ്ചിയും അധികം കൂടുതല് ഉപയോഗിയ്ക്കരുത്. ഇത് വയറിന് പ്രശ്നങ്ങളുണ്ടാക്കും.
ആപ്പിള് സിഡെര് വിനെഗര്
ആപ്പിള് സിഡെര് വിനെഗര് വായുകോപത്തിന് ഏറെ നല്ലതാണ്. അര ടീസ്പൂണ് ആപ്പിള് സിഡെര് വിനെഗര് നാലഞ്ച് ടീസ്പൂണ് ചെറുചൂടുവെള്ളത്തില് കലക്കി കുടിയ്ക്കുന്നതും ഏറെ നല്ലതാണ്. ഇതുപോലെ ഇന്തുപ്പും മഞ്ഞള്പ്പൊടിയും രണ്ട് നുള്ള് വീതം ചെറുചൂടുവെള്ളത്തില് ചേര്ത്ത് കഴിയ്ക്കുന്നതും നല്ലതാണ്. പുതിന ചായ കുടിയ്ക്കുന്നതും ഏറെ നല്ലതാണ്.
ഗ്യാസ് കുറയ്ക്കാന്
ഭക്ഷണക്കാര്യത്തില് ഇത്തരക്കാര് ശ്രദ്ധിയ്ക്കുക. കൃത്യസമയത്ത് ഭക്ഷണം കഴിയ്ക്കുക, വലിയ അളവില് കഴിയ്ക്കുന്നതിന് പകരം ചെറിയ അളവുകളില് പല തവണയായി കഴിയ്ക്കുക. ധാരാളം വെള്ളം കുടിയ്ക്കുക. ഇളംചൂടുവെള്ളം കുടിയ്ക്കാന് ശ്രദ്ധിയ്ക്കുക. തണുത്തവ ഒഴിവാക്കുക. ഇതുപോലെ പഴകിയ ഭക്ഷണം കഴിയ്ക്കാതിരിയ്ക്കുക. ഭക്ഷണത്തില് ഗ്യാസ് കുറയ്ക്കാന് സഹായിക്കുന്ന ചേരുവകള് ചേര്ത്ത് തയ്യാറാക്കാം. ഇഞ്ചി, വെളുത്തുള്ളി, ജീരകം, പെരുഞ്ചീരകം എന്നിവയെല്ലാം നല്ലതാണ്.
