ഭക്ഷണം പാചകം ചെയ്യുമ്പോള്‍ ഇടയ്ക്കൊക്കെ ഉപ്പ് കൂടിപ്പോകുന്നത് സംഭവിക്കാവുന്ന കാര്യമാണ്. ഉപ്പ് കൂടിയാല്‍ എത്ര രുചിയുളള ഭക്ഷണവും കഴിക്കാതെ പറ്റാതെയാകും. അത്തരത്തില്‍ ഉപ്പ് കൂടിയാല്‍ ഇക്കാര്യങ്ങള്‍ പരീക്ഷിച്ചു നോക്കാം.
കറികളില്‍ ഉപ്പ് കൂടിയാല്‍ എളുപ്പം ചെയ്യാവുന്ന കാര്യമാണ് ഉരുഴക്കിഴങ്ങ് മുറിച്ചിട്ട് ഒന്ന് വേവിക്കുകയെന്നത്. ഉരുളക്കിഴങ്ങ് കറികളിലെ അധികമുള്ള ഉപ്പ് വലിച്ചെടുക്കുകയും കറിയുടെ സ്വാഭാവികരുചി തിരികെക്കിട്ടാന്‍ സഹായിക്കുകയും ചെയ്യും. കറികളില്‍ ഉപ്പ് കുറയ്ക്കാന്‍ ഗോതമ്പുമാവ് ഉരുളകളാക്കി കറിയില്‍ ഇടുന്നതും നല്ലതാണ്. കുറച്ചുസമയത്തിന് ശേഷം ഈ ഉരുളകള്‍ എടുത്തുമാറ്റാം.

കറികളില്‍ ഉപ്പ് കൂടിയാല്‍ ചെയ്യാവുന്ന മറ്റൊരു കാര്യമാണ് ഫ്രഷ് ക്രീം ചേര്‍ക്കല്‍. ഫ്രഷ് ക്രീം കറിയിലെ ഉപ്പ് ബാലന്‍സ് ചെയ്യാന്‍ സഹായിക്കും. മോര് പോലെയുള്ള പുളിയുള്ള കറികളില്‍ ഉപ്പു കൂടിയാല്‍ പാലോ പുളിയില്ലാത്ത തൈരോ ചേര്‍ത്ത് കൊടുക്കുന്നത് ഗുണം ചെയ്യും.
അതുപോലെ ചോറ് കിഴി കെട്ടി കറി തിളക്കുമ്പോള്‍ ചേര്‍ക്കാം. ഉപ്പ് മുഴുവനും ചോറ് വലിച്ചെടുത്ത് കറിയിലെ ഉപ്പ് കുറയ്ക്കും.അല്ലെങ്കില്‍ സവാളി വലിയ കഷ്ണമാക്കി മുറിച്ചിടാം. ഉപ്പ് വലിച്ചെടുക്കാന്‍ സവാള സഹായിക്കും ശേഷം ഇത് എടുത്തുമാറ്റാം. ഒരു ടേബിള്‍ സ്പൂണ്‍ വിനാഗിരിയും ഒരു നുള്ള് പഞ്ചസാരയും യോജിപ്പിച്ചു ചേര്‍ക്കുന്നതും ഉപ്പ് കുറയ്ക്കാന്‍ നല്ലതാണ്.

അടുക്കളയിലെ വൃത്തിയാക്കലിന് ശേഷം മൂലയില്‍ കൂട്ടിയിടുന്ന കിച്ചണ്‍ ക്ലോത്തുകളും സ്പോഞ്ചുകളും അടുക്കളയെ കൂടുതല്‍ ദുര്‍ഗന്ധമുള്ളതാക്കുന്നു. അഴുക്കു തുടച്ച തുണിയിലും പാത്രം കഴുകിയ സ്പോഞ്ചിലും പറ്റിപ്പിടിച്ചിരിക്കുന്ന ഭക്ഷ്യാവശിഷ്ടങ്ങള്‍ ബാക്ടീരിയകള്‍ പെരുകാന്‍ കാരണമാകുന്നു. എന്നാല്‍ ഇനി വിഷമിക്കേണ്ട, കിച്ചണ്‍ ക്ലോത്തുകള്‍ വൃത്തിയാക്കാന്‍ മടിയും കാണിക്കേണ്ട, അതിനായി ചില പൊടിക്കൈകള്‍ പരിചയപ്പെടാം.

ചൂടുവെള്ളത്തില്‍ തിളപ്പിക്കുക: സ്പോഞ്ചുകളും ഡിഷ് വാഷിങ് ക്ലോത്തുകളും ചൂടുവെള്ളത്തിലിട്ട് തിളപ്പിക്കുക. ഇതിനൊപ്പം ഡിറ്റര്‍ജെന്റും കൂടി ഒഴിച്ചാല്‍ അണുക്കള്‍ നശിക്കുകയും ദുര്‍ഗന്ധം പമ്പകടക്കുകയും ചെയ്യും.

മൈക്രോവേവ് ചെയ്യുക: ഉപയോഗശേഷം സ്പോഞ്ചിനെ ഓവനില്‍ വെച്ച് രണ്ട് മിനിറ്റ് പ്രിഹീറ്റ് ചെയ്യുക. തണുത്തശേഷം പുറത്തെടുക്കുക. ഉണങ്ങിയ സ്പോഞ്ചാ തുണിയോ ഓവനില്‍ വയ്ക്കാതിരിക്കാന്‍ പ്രത്യേകം ശ്രദ്ധിക്കുക.

ഉപ്പും വിനാഗിരിയും കലര്‍ത്തിയ ലായനിയില്‍ മുക്കിവയ്ക്കുക: ഉപയോഗിച്ചശേഷം സ്‌പോഞ്ച് ചൂടുവെള്ളവും ഉപ്പും വിനാഗിരിയും കലര്‍ന്ന മിശ്രിതത്തില്‍ ഒരു രാത്രി മുഴുവന്‍ മുക്കി വയ്ക്കുക. രാവിലെ എടുത്ത് നന്നായി പിഴിഞ്ഞ് സൂര്യപ്രകാശത്തില്‍ ഉണക്കിയെടുക്കാം.

ബ്ലീച്ച് ചെയ്യുക: ക്ലിച്ചണ്‍ ക്ലോത്തുകള്‍ വൃത്തിയാക്കാന്‍ ഏറ്റവും നല്ല വഴി അവയെ ബ്ലീച്ച് ചെയ്യുന്നതാണ്. തുണികള്‍ ബ്ലീച്ചിങ് പൗഡറും വെള്ളവും കലര്‍ന്ന മിശ്രിതത്തില്‍ അഞ്ച് മിനിറ്റ് മുക്കിവയ്ക്കുക. ശേഷം നന്നായി കഴുകിയെടുത്ത് സൂര്യപ്രകാശത്തില്‍ ഉണക്കിയെടുക്കാം.

അണുനാശിനികള്‍ ഉപയോഗിക്കുക: ഓരോ തവണ ഉപയോഗം കഴിയുമ്പോഴും കിച്ചണ്‍ ക്ലോത്തുകള്‍ അണുനാശിനി ഒഴിച്ച് കഴുകുക. ഇത് കീടങ്ങളെ ഇല്ലാതാക്കുന്നതിനൊപ്പം അടുക്കളയ്ക്കുള്ളില്‍ നല്ല സുഗന്ധം ലഭിക്കാനും സഹായിക്കുന്നു.

നമ്മുടെ വീടുകളിലും മറ്റും സൂക്ഷിച്ചിട്ടുള്ള പയര്‍, പരിപ്പ്, കടല, അരി എന്നിവ പഴകും തോറും ചിലപ്പോള്‍ ചെറിയ പ്രാണികള്‍ കയറാനുള്ള സാധ്യതയുണ്ട്. കടലയും പരിപ്പുമൊന്നും ഉപയോഗിക്കാന്‍ കഴിയാത്ത പോലെ ഇവയുടെ ശല്യമുണ്ടാകും. എങ്ങനെ ഈ പ്രാണികളെ തുരത്താമെന്നു ചിന്തിച്ചിട്ടുണ്ടോ? അതിനു ചില എളുപ്പ വഴികളുണ്ട്.
അരിയും ധാന്യങ്ങളും ഇട്ടുവയ്ക്കുന്ന പാത്രം നല്ലതുപോലെ കഴുകി വെയിലത്ത് വച്ച് ഉണക്കിയെടുക്കുക. ജലാംശം ഒട്ടും തന്നെയും പാടില്ല. ആ പാത്രത്തിന്റെ അടിഭാഗത്തായി ഒരു പേപ്പര്‍ മടക്കി വെയ്ക്കാം. ജലാംശം ഉണ്ടെങ്കില്‍ പേപ്പര്‍ അത് വലിച്ചെടുത്തുകൊള്ളും. മുകളിലായി അരി അല്ലെങ്കില്‍ ധാന്യങ്ങള്‍ ഇട്ടുകൊടുക്കണം. അതിനുശേഷം മുകളിലായി വീണ്ടും പേപ്പര്‍ മടക്കിവെയ്ക്കാം. പാത്രം നല്ലതുപോലെ അടച്ചു വയ്ക്കുക കൂടി ചെയ്താല്‍ പ്രാണികള്‍ കയറാതെയിരിക്കും.
അരി, ധാന്യങ്ങള്‍ എന്നിവ കൂടുതല്‍ നാളുകള്‍ പ്രാണികളുടെ ശല്യമില്ലാതെയിരിക്കാന്‍ പരീക്ഷിക്കാവുന്ന മറ്റൊരു വഴിയാണ് ഒട്ടും തന്നെയും ജലാംശമില്ലാത്ത പാത്രത്തില്‍ അരിയോ ധാന്യങ്ങളോ കുറച്ചു ഇട്ടതിനു ശേഷം കുറച്ച് ഗ്രാമ്പു നൂലില്‍ കെട്ടി ഇട്ടുകൊടുക്കണം. അതിനു മുകളിലായി വീണ്ടും അരിയിടാം. ഗ്രാമ്പുവും ഇട്ടു കൊടുക്കാം. ലെയറുകളായി ഇങ്ങനെ ചെയ്യണം. പ്രാണികള്‍ അരിയുടെയോ ധാന്യങ്ങളുടേയൊ സമീപത്തേയ്ക്ക് വരുകയില്ല. വെളുത്തുള്ളിയ്ക്കും പ്രാണികളുടെ ആക്രമണത്തെ പ്രതിരോധിക്കാനുള്ള കഴിവുണ്ട്. അരിയോ ധാന്യങ്ങളോ ഇട്ടുവെയ്ക്കുന്ന പാത്രത്തില്‍ ഒരു കുടം വെളുത്തുള്ളി കൂടി അവയ്ക്കൊപ്പം ഇട്ടുവെയ്ക്കണം. ഇങ്ങനെ ചെയ്താലും പ്രാണികളുടെ ശല്യത്തില്‍ നിന്നും രക്ഷപ്പെടാം.

ഒരു പാത്രത്തില്‍ അരിയോ ധാന്യങ്ങളോ ഇട്ടതിനുശേഷം ആര്യവേപ്പിന്റെ തണ്ട് വച്ച് കൊടുക്കണം. അതിനു മുകളിലായി വീണ്ടും അരിയോ ധാന്യങ്ങളോ ഇടാവുന്നതാണ്. ഇങ്ങനെ ചെയ്താലും പാത്രത്തില്‍ പ്രാണികള്‍ കയറുകയില്ല. കുറെ നാളുകള്‍ പ്രാണികളുടെ ശല്യമില്ലാതെ അരിയും ധാന്യങ്ങളും സംഭരിക്കണമെങ്കില്‍ പരീക്ഷിക്കാവുന്ന മറ്റൊരു വഴിയുണ്ട്. അതിനാവശ്യം മൂന്നോ നാലോ വറ്റല്‍ മുളക് മാത്രമാണ്. അരിയോ ധാന്യങ്ങളോ ഇട്ട പാത്രത്തിലേക്ക് വറ്റല്‍ മുളക് ഇട്ടു കൊടുക്കാം. രണ്ട് കിലോ അരിയ്ക്കു രണ്ടോ മൂന്നോ വറ്റല്‍ മുളക് എന്ന കണക്കില്‍ ചേര്‍ത്താല്‍ മതിയാകും. ഇങ്ങനെ മുളക് ചേര്‍ത്തതിന് മുകളിലേക്ക് വീണ്ടും അരിയിട്ടു കൊടുക്കാം. അതിനു ശേഷം പാത്രം നല്ലതുപോലെ അടച്ച് സൂക്ഷിക്കാവുന്നതാണ്. മഞ്ഞളിനും ചെറുപ്രാണികളെ പ്രതിരോധിക്കാനുള്ള കഴിവുണ്ട്. ഉണക്കിയ മഞ്ഞളും മേല്പറഞ്ഞതു പോലെ തന്നെ അരിയുടെയോ ധാന്യങ്ങളുടെയോ കൂടെ ഇട്ടതിനുശേഷം പാത്രം അടച്ചു സൂക്ഷിക്കാവുന്നതാണ്. പ്രാണികളുടെ ശല്യമുണ്ടാകുകയില്ല.
പ്രാണികള്‍ അരിയിലോ ധാന്യത്തിലോ കയറിയാല്‍ നമ്മള്‍ ആദ്യം തന്നെ ചെയ്യുന്നത് ഇവ നല്ല വെയിലത്ത് വയ്ക്കുക എന്നതാണ്. വെയിലത്ത് വച്ചതിനു ശേഷം പ്രാണികള്‍ പോയില്ലെങ്കില്‍ പരീക്ഷിക്കാവുന്ന ഒരു വിദ്യയുണ്ട്. മൂന്നോ നാല് തണ്ട് ആര്യവേപ്പില. അഞ്ചോ ആറോ അല്ലി വെളുത്തുള്ളി, കുറച്ചു കുരുമുളക്, ഗ്രാമ്പൂ എന്നിവ ഒരു മിക്സിയുടെ ജാറിലേയ്ക്കിട്ടു, അല്പം പോലും വെള്ളം ചേര്‍ക്കാതെ അരച്ചെടുക്കണം. വെളുത്തുള്ളിയുടെ തൊലി കളയേണ്ട കാര്യമില്ല. ഇങ്ങനെ അരച്ചെടുത്തതു ചെറിയ ഉരുളകളാക്കി വെയിലത്ത് വച്ച് ഉണക്കിയെടുക്കണം. ഈ കൂട്ട് ഒരു വൃത്തിയുള്ള കോട്ടണ്‍ തുണിയില്‍ കെട്ടി അരിയിലോ ധാന്യങ്ങളിലോ വെച്ച് കൊടുക്കാം. കുറെ നാളുകള്‍ അരിയും ധാന്യങ്ങളും കേടുകൂടാതെ ഇരിക്കാന്‍ ഇങ്ങനെ ചെയ്താല്‍ മതി.

വിവിധ ചർമ്മപ്രശ്നങ്ങൾ നിങ്ങളെ അലട്ടുന്നുണ്ടാകും. മുഖത്തെ കരുവാളിപ്പ്, കഴുത്തിന് ചുറ്റുമുള്ള കറുപ്പ്, ഡാർക്ക് സർക്കിൾസ് എന്നിവ അകറ്റുന്നതിന് സഹായിക്കുന്ന അഞ്ച് തരം ഫേസ് പാക്കുകൾ പരിചയപ്പെടാം

കാപ്പിയിൽ ക്ലോറോജെനിക് ആസിഡ് അടങ്ങിയിട്ടുണ്ട്. ഇതിലെ ആന്റി – ഇൻഫ്ലമേറ്ററി, ആൻ്റിഓക്‌സിഡൻ്റ്, ആന്റി ബാക്ടീരിയൽ എന്നിവ കറുപ്പകറ്റുന്നതിന് സഹായിക്കും. രണ്ട് സ്പൂൺ ഒലീവ് ഓയിലും അൽപം കോഫിയും മിക്സ് ചെയ്ത് മുഖത്തും കഴുത്തിനും ചുറ്റും പുരട്ടുക. 15 മിനുട്ട് കഴിഞ്ഞ് കഴുകി കളയുക. ചർമ്മത്തെ മൃദുവും ലോലമാക്കാനും ഈ പാക്ക് സഹായിക്കും.

രണ്ട് സ്പൂൺ കറ്റാർവാഴ ജെൽ, ഒരു സ്പൂൺ തൈര് എന്നിവയെടുത്ത് മിക്സ് ചെയ്യുക. ശേഷം ഈ മിശ്രിതം മുഖത്തു പുരട്ടി 15 മിനിറ്റിനു ശേഷം കഴുകി കളയാം. കരുവാളിപ്പ് മാറാനും മുഖം തിളങ്ങാനും ഈ പാക്ക് സഹായിക്കും.

രണ്ട് സ്പൂൺ പപ്പായ പേസ്റ്റിലേക്ക് രണ്ട് ടേബിൾസ്പൂൺ ഓട്സ്, ഒരു ടീസ്പൂൺ ബദാം ഓയിൽ എന്നിവ ചേർത്ത് മിക്സ് ചെയ്യുക. ശേഷം ഈ മിശ്രിതം മുഖത്തും കഴുത്തിന്റെ ഭാഗങ്ങളിലും പുരട്ടി 15 മിനിറ്റിന് കഴുകിക്കളയാം. മുഖത്തെ ചുളിവുകളെ തടയാനും മുഖം തിളങ്ങാനും ഈ പാക്ക് ഗുണം ചെയ്യും.

രണ്ട് ടീസ്പൂൺ ഓട്സ് പൊടിയിൽ ഒരു ടീസ്പൂൺ തൈരും റോസ് വാട്ടറും ചേർത്ത് പേസ്റ്റ് ഉണ്ടാക്കുക. ശേഷം ഈ മിശ്രിതം 10 മുതൽ 15 മിനിറ്റ് വരെ മുഖത്ത് പുരട്ടുക. ഉണങ്ങി കഴിഞ്ഞാൽ തണുത്ത വെള്ളത്തിൽ മുഖം കഴുകാം.

രണ്ട് സ്പൂൺ തക്കാളി പേസ്റ്റും അൽപം റോസ് വാട്ടറും യോജിപ്പിച്ച് പാക്ക് ഉണ്ടാക്കുക. ശേഷം ഈ പേസ്റ്റ് മുഖത്തും കഴുത്തിലുമായി പുരട്ടുക. 15 മിനുട്ട് കഴിഞ്ഞ് തണുത്ത വെള്ളത്തിൽ കഴുകി കളയുക. മുഖത്തെ കരുവാളിപ്പ് മാറാൻ മികച്ചതാണ് ഈ പാക്ക്.