ശാസ്താംകോട്ട: കുമ്പളത്ത് ശങ്കുപ്പിള്ള മെമ്മോറിയൽ ദേവസ്വം ബോർഡ് കോളേജിന്റെ വജ്രജൂബിലി ആഘോഷങ്ങളുടെ ഭാഗമായി ജഗത്ത് തുളസീധരന്റെ ഫോട്ടോ പ്രദർശനം സംഘടിപ്പിച്ചു. 20, 21 തീയതികളിലായി നടന്ന പ്രദർശനം കേരള സർവ്വകലാശാല സിന്റിക്കേറ്റ് അംഗവും പ്രിൻസിപ്പലുമായ ഡോ. കെ.സി. പ്രകാശ് ഉദ്ഘാടനം ചെയ്തു. മലയാളവിഭാഗം പൂർവ്വവിദ്യാർത്ഥി കൂടിയായ ജഗത്തിന്റെ ചിത്രങ്ങൾ ഇതിനകം ഏറെ ശ്രദ്ധ നേടിയിട്ടുണ്ട്. ഭിന്നശേഷിക്കാരനായ വിദ്യാർത്ഥിയെ സഹപാഠികൾ എടുത്ത് നടക്കുന്ന ജഗത്ത് എടുത്ത വീഡിയോ സാമൂഹ്യ മാധ്യമങ്ങളിൽ തരംഗമായിരുന്നു. വളരെയധികം മാധ്യമ ശ്രദ്ധയും പ്രശംസയും ആ ചിത്രം നേടി. കൃത്രിമത്വങ്ങളില്ലാത്ത ജീവനുള്ള ചിത്രങ്ങൾ ആണ് ഇവ.

കലാലയ ജീവിതത്തിന്റെയും തെരുവിന്റെയും വർണ്ണങ്ങളെ ഈ ഫോട്ടോഗ്രാഫർ സമർത്ഥമായി ആവിഷ്കരിച്ചിരിക്കുന്നു. കാലിക്കറ്റ് സർവ്വകലാശാല, ആരോഗ്യ സർവ്വകലാശാല എന്നിവിടങ്ങളിൽ നിന്ന് മികച്ച ഫോട്ടോഗ്രഫിക്കുള്ള പുരസ്കാരം ജഗത്തിന് ലഭിച്ചിട്ടുണ്ട്. ഡി.ബി.കോളേജ്, പാലക്കാട്, കോഴിക്കോട്, ബാംഗ്ലൂർ, എന്നിവിടങ്ങളിൽ നിന്നുള്ള ചിത്രങ്ങൾ പ്രദർശനത്തിലുണ്ട്.

ശാസ്താംകോട്ട : നെടിയവിള അംബികോദയം ഹയർ സെക്കൻ്ററി സ്ക്കൂളിൽ നാല് ദിവസമായി നടന്നു വന്ന സ്ക്കൂൾ കലോത്സവത്തിന് തിരശ്ശീല വീണു.ഹയർ സെക്കൻ്റി, ഹൈസ്ക്കൂൾ വിഭാഗങ്ങളിൽ പതാരം എസ്.എം.എച്ച്.എസ് .എസ്സും, യു.പി വിഭാഗത്തിൽ പതാരം എൻ.എസ്.എൻ.എസ്.യു.പി.എസും ഓവറോൾ കിരീടം നേടി. നിരവധി പ്രതിഭകൾ മാറ്റുരച്ച കലോത്സവത്തിൽ ഹയർ സെക്കൻ്ററി വിഭാഗത്തിൽ 270 പോയിൻ്റോടെയാണ് പതാരം എസ്.എം.എച്ച്.എസ്.എസ് മുമ്പിലെത്തിയത്.157 പോയിൻ്റോടെ പോരുവഴി ഗവ.എച്ച്.എസ്.എസ് രണ്ടാമതും 129 പോയിൻ്റോടെ നെടിയവിള വി.ജി.എസ്.എസ്.എ.എച്ച്.എസ്.എസ് മൂന്നാമതും എത്തി.

ഹയർ സെക്കൻ്ററി വിഭാഗത്തിൽ 254 പോയിൻ്റോടെ എസ്.എം.എച്ച്.എസ്.എസ് പതാരം ഓവറോൾ കിരീടം നേടിയപ്പോൾ 212 പോയിൻ്റോടെ ഭരണിക്കാവ് ജെ.എം.എച്ച്.എസും, 155 പോയിൻ്റോടെ നെടിയവിള വി.ജി.എസ്.എസ്.എ .എച്ച്.എസും രണ്ടും മൂന്നും സ്ഥാനങ്ങൾ കരസ്ഥമാക്കി.യു.പി വിഭാഗത്തിൽ 76 പോയിൻ്റോടെ പതാരം എൻ.എസ്.എൻ.എസ്.പി.എം.യു.പി.എസ് വിജയകിരീടം ചൂടി. 74 പോയിൻ്റോടെ ശൂരനാട് ഗവ: എച്ച്.എസ്.എസ് രണ്ടാമതും 72 പോയിൻ്റോടെ മുതുപിലാക്കാട് എൻ.എസ്.യു.പി.എസ് മൂന്നാം സ്ഥാനവും കരസ്ഥമാക്കി.