ചാത്തന്നൂര്‍: പെട്രോള്‍ പമ്പിന് നേരെ നടത്തിയ ആക്രമണത്തില്‍ ജീവനക്കാരനും ഇന്ധനം നിറയ്ക്കാന്‍ എത്തിയ ഓട്ടോ ഡ്രൈവര്‍ക്കും പരിക്കേറ്റു. പെട്രോള്‍ പമ്പ് ജീവനക്കാരനായ താഴം വടക്ക് ഗോകുല്‍ നിവാസില്‍ ഗോകുല്‍ (20), ഓട്ടോറിക്ഷാ ഡ്രൈവര്‍ മാമ്പള്ളിക്കുന്നം ചരുവിള വീട്ടില്‍ അജീഷ് (36) എന്നിവര്‍ക്കാണ് പരിക്കേറ്റത്.
ഇന്നലെ ഉച്ചയ്ക്ക് രണ്ടോടെ പമ്പില്‍ ഇന്ധനം നിറയ്ക്കാന്‍ എത്തിയ കാര്‍ ഡ്രൈവര്‍ 500 രൂപയ്ക്ക് പെട്രോള്‍ അടിക്കാന്‍ ആവശ്യപ്പെട്ടു. 300 രൂപയും കഴിഞ്ഞ് അടിച്ചപ്പോള്‍ മതിയെന്ന് പറഞ്ഞ് 300രൂപ നല്കി പോകാനൊരുങ്ങി. അധികം അടിച്ച പെട്രോളിന്റെ തുക ആവശ്യപ്പെട്ട ജീവനക്കാരനെ കാറില്‍ നിന്നിറങ്ങി ആക്രമിച്ചു.
അവിടെ നിന്ന് പോയ കാര്‍ ഉടമ മൂന്നു മണിയോടെ ആള്‍ക്കാരുമായി വന്ന് വീണ്ടും ആക്രമണം നടത്തി. യാതൊരു പ്രകോപനവും കൂടാതെ മൂന്നംഗ സംഘം പെട്രോള്‍ അടിക്കാന്‍ എത്തിയ ഓട്ടോ ഡ്രൈവറെയും ജീവനക്കാരനെയും ആക്രമിച്ച് സാധനങ്ങള്‍ തല്ലി തകര്‍ത്തു. മാരകായുധങ്ങളുമായി നാട്ടുകാര്‍ക്ക് നേരെ ഭീഷണി മുഴക്കി പ്രദേശത്ത് ഭീകരാന്തരീക്ഷം സൃഷ്ടിച്ചു.
ഊറാംവിള കേന്ദ്രീകരിച്ചുള്ള ഭൂമാഫിയ സംഘമാണ് ആക്രമണം നടത്തിയതെന്ന് നാട്ടുകാര്‍ പറഞ്ഞു. രണ്ട് തവണയും സംഘം പമ്പിലെത്തി യാതൊരു പ്രകോപനവുമില്ലാതെ ജീവനക്കാരെ ആക്രമിക്കുന്നത് സിസിടിവി ദൃശ്യങ്ങളില്‍ വ്യക്തമാണ്. തലയ്ക്ക് ഗുരുതരമായി പരിക്കേറ്റ അജീഷിനെ സ്വകാര്യ മെഡിക്കല്‍ കോളേജിലെ തീവ്രപരിചരണ വിഭാഗത്തിലും കണ്ണിന് പരിക്കേറ്റ ഗോകുലിനെ നെടുങ്ങോലം താലൂക്ക് ആശുപത്രിയിലും പ്രവേശിപ്പിച്ചു. ചാത്തന്നൂര്‍ പോലീസ് കേസെടുത്തു.  പ്രതികള്‍ ഒളിവിലാണെന്ന് പോലീസ് പറഞ്ഞു.

അഞ്ചല്‍: അഞ്ചലില്‍ ബൈക്ക് നിയന്ത്രണംവിട്ട് വൈദ്യുതി പോസ്റ്റില്‍ ഇടിച്ചു കയറി യുവാവിന് ദാരുണാന്ത്യം. ഏരൂര്‍ അയിലറ വേലന്‍കുഴി ചരുവിള പുത്തന്‍വീട്ടില്‍ സുബിന്‍ ആണ് മരിച്ചത്. അഞ്ചല്‍ ചീപ്പുവയല്‍ ഭാഗത്ത് വാടകയ്ക്ക് താമസിച്ചു വരികയായിരുന്നു.
കഴിഞ്ഞ ദിവസം പുലര്‍ച്ചെ അഞ്ചല്‍-പുനലൂര്‍ പാതയില്‍ കൊല്ലം അര്‍ബന്‍ നിധിക്ക് മുന്നിലായിരുന്നു അപകടം. പോലീസും നാട്ടുകാരും ചേര്‍ന്ന് ഉടന്‍തന്നെ സുബിനെ അഞ്ചലിലെ സ്വകാര്യാശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. ഇടിയുടെ ആഘാതത്തില്‍ വൈദ്യുത പോസ്റ്റ് ഒടിഞ്ഞു മാറിയ നിലയിലാണ്. ബൈക്കിന്റെ മുന്‍ഭാഗവും പൂര്‍ണ്ണമായും തകര്‍ന്നിട്ടുണ്ട്. അമിതവേഗതയില്‍ എത്തിയ ബൈക്ക് നിയന്ത്രണം വിട്ട് ഫുട്പാത്തിലെ കൈവരിക്കുള്ളിലുള്ള വൈദ്യുതി പോസറ്റില്‍ ഇടിക്കുകയായിരുന്നു. അഞ്ചല്‍ പോലീസ് നിയമ നടപടി സ്വീകരിച്ചു.