ശാസ്താംകോട്ട.കുമ്പളത്ത് ശങ്കുപ്പിള്ള മെമ്മോറിയൽ ദേവസ്വം ബോർഡ് കോളേജിൽ പ്രൊഫ. ജി.ശങ്കരപ്പിള്ള അനുസ്മരണം നടന്നു. പ്രശസ്ത നാടകചിന്തകനും സംവിധായകനുമായ ഡോ. രാജാവാര്യർ ‘ജി.ശങ്കരപ്പിള്ള: എഴുത്തും ജീവിതവും’ എന്ന വിഷയത്തിൽ അനുസ്മരണ പ്രഭാഷണം നടത്തി.
മലയാളനാടകവേദിയെ നവീകരിച്ച നാടകകൃത്താണ് ജി.ശങ്കരപ്പിള്ള എന്ന് അദ്ദേഹം അഭിപ്രായപ്പെട്ടു. പ്രിൻസിപ്പൽ ഡോ. കെ.എസ്. അനിൽകുമാറിൻ്റെ അധ്യക്ഷതയിൽ ചേർന്ന യോഗത്തിൽ ഡോ. ടി. മധു സ്വാഗതം പറഞ്ഞു. ഡോ. ആർ.എസ്. രാജീവ് പ്രൊഫ ജി.ശങ്കരപ്പിള്ളയെ അനുസ്മരിച്ച് സംസാരിച്ചു. മലയാളം വിദ്യാർത്ഥികൾക്കുള്ള എൻഡോവ്മെൻ്റുകൾ പ്രൊഫ. വി. മഹേശ്വരി വിതരണം ചെയ്തു. മലയാളനാടകവേദിയെ ആസ്പദമാക്കി കേരളത്തിലെ വിവിധ സർവ്വകലാശാലകളിലെ ഗവേഷകരെ പങ്കെടുപ്പിച്ച് നടത്തിയ പ്രബന്ധരചന മത്സരത്തിലെ വിജയികൾക്കുള്ള സമ്മാനവിതരണം പ്രൊഫ. പി. വിജയൻ പിള്ള നിർവ്വഹിച്ചു.
ഈ വർഷത്തെ ശ്രീകോവിൽ കാവ്യപുരസ്കാര വിതരണവും ചടങ്ങിനോടനുബന്ധിച്ച് നടന്നു. കോളേജ് വിദ്യാർത്ഥികൾക്കിടയിൽ സംഘടിപ്പിച്ച മലയാള കവിതാരചനമത്സരത്തിൽ ആദ്യ മൂന്ന് സ്ഥാനം നേടുന്നവർക്കാണ് പുരസ്കാരം നൽകുന്നത്. മൂന്ന് വർഷമായി നൽകുന്ന ഈ പുരസ്കാരം മലയാളവിഭാഗം അധ്യാപകനായിരുന്ന പ്രൊഫ. പി. ഭാസ്കരൻ നായർ അദ്ദേഹത്തിൻ്റെ ശ്രീകോവിൽ എന്ന ആദ്യ കവിതാസമാഹാരം പ്രസിദ്ധീകരിച്ചതിൻ്റെ അമ്പതാം വാർഷികത്തോടനുബന്ധിച്ച് ഏർപ്പെടുത്തിയതാണ്. പുരസ്കാരവിതരണം ഡോ. രാജാവാര്യർ നിർവ്വഹിച്ചു.
ചടങ്ങിൽ ഭാഷാവിഭാഗം അധ്യക്ഷരായ ഡോ. മിനി ആർ. നായർ, ഡോ. എസ്. സുശാന്ത്, ഡോ. ധന്യ എൽ., ഓഫീസ് സൂപ്രണ്ട് ശ്രീജ ആർ. എന്നിവർ ശ്രദ്ധാഞ്ജലിയർപ്പിച്ച് സംസാരിച്ചു. മലയാളവിഭാഗം അധ്യാപകൻ ആത്മൻ എ.വി. നന്ദി പറഞ്ഞു. അനുസ്മരണത്തോടനുബന്ധിച്ച് ജി.ശങ്കരപ്പിള്ള എഴുതിയ ‘മൂന്ന് പണ്ഡിതന്മാരും പരേതനായ സിംഹവും’ എന്ന നാടകത്തിൻ്റെ അവതരണം നടന്നു. മലയാളവിഭാഗം അധ്യാപിക ലക്ഷ്മിപ്രഭ സംവിധാനം ചെയ്ത നാടകത്തിൽ മലയാളം വിദ്യാർത്ഥികളാണ് അഭിനയിച്ചത്. നാടകം പ്രേക്ഷക പ്രശംസ പിടിച്ചുപറ്റി.
