ശാസ്താംകോട്ട :  തേവലക്കര ബോയ്സ്  ഹെെസ്കൂളിൽ ഷോക്കറ്റ് മരണപ്പെട്ട മിഥുൻ്റെ വീട്ടിൽ പാണക്കാട് ബഷീറലി ശിഹാബ് തങ്ങളും,  മുസ്ലീം ലീഗ് സംസ്ഥാന ജനറൽ  സെക്രട്ടറി അഡ്വ. പി.എം.എ. സലാമും എത്തി.    പടിഞ്ഞാറക്കല്ലട വിളന്തറ  മനുഭവനിൽ  രാവിലെ 10 ന് പാണക്കാട് ബഷീറലി ശിഹാബ്തങ്ങളും. ഉച്ചക്ക് 2 നുമാണ്       മുസ്ലിം ലീഗ് സംസ്ഥാന ജനറൽ    സെക്രട്ടറി  അഡ്വ. പി എം സലാമും എത്തിചേർന്നത്.        സർക്കാരിൻ്റെ കടുകാര്യസ്ഥിതിയുടെ ഭാഗമായി മിഥുൻ എന്ന വിദ്യാർത്ഥി ഷോക്കേറ്റ് മരണപ്പെട്ട സംഭവം വളരെ വേദനാജനകമാണ്. അധികൃതരുടെ അനാസ്ഥ മൂലം രക്തസാക്ഷിയാകേണ്ടി വന്ന മിഥുൻ്റെ   കുടുംബത്തെ  പൂർണ്ണമായും സർക്കാർ ഏറ്റെടുക്കണമെന്നു    പി. എം. എ. സലാം ആവശ്യപെട്ടു. ഈ കുടുംബത്തിൻ്റെ  വൈദ്യുതി ചാർജ് ആജീവനന്ദം സൗജന്യമായി നൽകണമെന്നും അദ്ദേഹം പറഞ്ഞു.  സർക്കാരിന്റെ അനാസ്ഥ മൂലം കേരളത്തിൽ   രക്തസാക്ഷികൾ എണ്ണം കൂടിവരുന്നതായിപി എം എ സലാം ആരോപിച്ചു .സംസ്ഥാനത്തെ  കലാലയങ്ങളിൽ 50 വർഷത്തിലേറെ പഴക്കമുള്ള കെട്ടിടങ്ങൾ തകർന്നുവീഴാറായ നിലയിൽ ഇപ്പോഴും നില നിൽക്കുന്നുണ്ട്. ഇത്തരം സ്കൂളുകൾക്ക്  ഫിറ്റ്നസ്  നൽകുന്ന സർക്കാർ നടപടി ഞട്ടൽ ഉളവാക്കുന്നതാണ്. വിദ്യാർഥികൾക്ക് സുരക്ഷിതമായി കലാലയത്തിൽ വന്ന് പഠിച്ചിട്ട് പോകുന്നതിനുള്ള സൗകര്യമൊരുക്കുന്നതിൽ സർക്കാരും തദ്ദേശ സ്വയംഭരണ വകുപ്പും പരാജയപ്പെട്ടതായി  പി.എം.എ.    സലാം പറഞ്ഞു. മുസ്ലിം ലീഗ് കൊല്ലം ജില്ലാ പ്രസിഡൻ്റ് നൗഷാദ് യൂനസ് , ജില്ലാ ജനറൽ സെക്രട്ടറി അഡ്വ.സുൾഫിക്കർ സലാം, ജില്ലാ സെക്രട്ടറി ശൂരനാട് ആലൂക്ക  ,   മുസ്ലിം ലീഗ് സംസ്ഥാന കൗൺസിൽ അംഗം പണിക്കത്ത് സലാം, നിയോജക മണ്ഡലം ഭാരവാഹികളായ   പറമ്പിൽ സുബേർ , മുഹമ്മദ് ഖുറേഷി എ.ഖാലിദീൻകുട്ടി, ഇടവനശേരി സലാഹുദീൻ,  എന്നിവർ പി.എം.എ. സലാമിനോടൊപ്പം ഉണ്ടായിരുന്നു.

കുന്നത്തൂർ:തെങ്ങമം – കല്ലട മൂന്നുമുക്ക് റോഡിൽ തിരക്കേറിയ പാതയോരത്ത് അപകട ഭീഷണി ഉയർത്തി നിൽക്കുന്ന ട്രാൻസ്ഫോർമർ മാറ്റി സ്ഥാപിക്കണമെന്ന ആവശ്യം ശക്തമാകുന്നു.കുന്നത്തൂർ പനന്തോപ്പ് വടക്ക മുക്ക് പാൽ സൊസൈറ്റിക്ക് മുൻവശത്തായാണ് ഏത് നിമിഷവും നിലം പൊത്താവുന്ന തരത്തിൽ ട്രാൻസ്ഫോർമർ സ്ഥിതി ചെയ്യുന്നത്.ഇതിനോട് ചേർന്നാണ്  കാത്തിരിപ്പ് കേന്ദ്രവും ബസ് സ്റ്റോപ്പും.സ്കൂൾ കുട്ടികൾ അടക്കമുള്ള യാത്രക്കാരെ കൂടാതെ ഗ്രാമവാസികൾ സമയം ചെലവഴിക്കാനെത്തുന്നതും ഇവിടെയാണ്.ക്ഷീര സംഘവും നിരവധി വ്യാപാര സ്ഥാപനങ്ങളും ഇവിടെ പ്രവർത്തിക്കുന്നു.സദാ തിരക്കേറിയ ഇവിടെ ട്രാൻസ്ഫോർമറിനു ചുറ്റും വേലി കെട്ടിയിട്ടുണ്ടെങ്കിലും ട്രാൻസ്ഫോർമറിനെ താങ്ങി നിർത്തിയിരിക്കുന്ന വലിയ പോസ്റ്റുകളും ലൈനുകളും റോഡിലേക്ക് ചാഞ്ഞ് നിൽക്കുകയാണ്.ശക്തമായ കാറ്റ് വീശുമ്പോൾ ജംഗ്ഷനിൽ നിന്നും ഭീതിയോടെ ആളുകൾ ഓടി മാറുകയാണ് പതിവ്.ട്രാൻസ്ഫോർമർ അപകട നിലയിലായ നിമിഷം മുതൽ കെഎസ്ഇബി കടമ്പനാട് സെക്ഷൻ ഓഫീസിൽ പരാതിയുമായി നാട്ടുകാർ കയറിയിറങ്ങുകയാണ്.ഉന്നത അധികൃതർക്കും പരാതി നൽകിയിരുന്നു.മാസങ്ങൾ നിരവധി കഴിഞ്ഞിട്ടും നടപടി ഉണ്ടായില്ല.പരാതിയുമായി എത്തുമ്പോൾ
പലപ്പോഴും ജീവനക്കാർ പുശ്ചത്തോടെയാണ് പ്രതികരിക്കുന്നതെന്നും നാട്ടുകാർ പറയുന്നു.തേവലക്കര ബോയ്സ് ഹൈസ്കൂളിലെ വിദ്യാർത്ഥി മിഥുൻ താഴ്ന്ന് കിടന്ന വൈദുതി കമ്പിയിൽ നിന്നും ഷോക്കേറ്റ് മരിച്ചതിനെ തുടർന്ന് പനന്തോപ്പിലെ ട്രാൻസ്ഫോർമർ മാറ്റിസ്ഥാപിക്കണമെന്ന ആവശ്യം ശക്തമായിരിക്കയാണ്.ദുരന്തത്തിനായി കാത്തിരിക്കാതെ അധികൃതർ പിടിവാശി ഉപേക്ഷിച്ച് അടിയന്തിര നടപടി സ്വീകരിക്കണമെന്ന് കോൺഗ്രസ് മണ്ഡലം വൈസ് പ്രസിഡന്റ് പാപ്പച്ചൻ,പ്രദേശവാസിയായ ദീപു ആയുഷ് എന്നിവർ ആവശ്യപ്പെട്ടു.

ശാസ്താംകോട്ട:സിപിഎം നിയന്ത്രണത്തിലുള്ള തേവലക്കര ബോയ്സ് ഹൈസ്കൂളിൽ എട്ടാം ക്ലാസ് വിദ്യാർത്ഥി വിളന്തറ സ്വദേശി മിഥുൻ(13) ഷോക്കേറ്റ് മരിച്ച സംഭവത്തിൽ പോലീസ് വിശദമായ അന്വേഷണം ആരംഭിച്ചു.ശാസ്താംകോട്ട ഡിവൈഎസ്പിയുടെ നേതൃത്വത്തിലുള്ള
പോലീസ് സംഘമാണ് അന്വേഷണം നടത്തുന്നത്.സ്കൂൾ മാനേജ്മെൻ്റ്,തേവലക്കര ഇലക്ട്രിക്കൽ സെക്ഷൻ എന്നിവർക്കെതിരെയാണ് പ്രധാനമായും അന്വേഷണം.സ്കൂൾ അധികൃതരെയും നാട്ടുകാരെയും വിദ്യാർത്ഥികളെയും നേരിൽ കണ്ട് വിവരങ്ങൾ അന്വേഷിച്ചു.വിദ്യാർത്ഥികളുടെ മൊഴിയും രേഖപ്പെടുത്തിയിട്ടുണ്ട്.തേവലക്കരയിലെ വൈദ്യുതി ഓഫീസിലും എത്തി വിവരങ്ങൾ ശേഖരിച്ചു.നിയമോപദേശത്തിൻ്റെ അടിസ്ഥാനത്തിൽ മാത്രമേ അന്തിമ കുറ്റപത്രം തയ്യാറാക്കുകയുള്ളു.സ്കൂൾ അധികൃതരും വൈദ്യുതി ബോർഡും പ്രതികളാകാനുള്ള സാധ്യത വളരെ കൂടുതലാണ്.സംഭവ ദിവസം മിഥുൻ ചെരിപ്പെടുക്കാൻ കയറിയ ഷീറ്റിട്ട ഷെഡ് യാതൊരു അനുമതിയും കൂടാതെ അനധികൃതമായി നിർമ്മിച്ചതാണെന്ന് കണ്ടെത്തിയിരുന്നു.ഇതിനാൽ അന്നത്തെ മാനേജ്മെൻ്റ് കമ്മിറ്റിക്കെതിരെയും അന്വേഷണം ഉണ്ടാകും.അതിനിടെ സിപിഎം നേതാക്കൾ പ്രതിപ്പട്ടികയിലേക്ക് വരാനുള്ള സാധ്യത ഏറെയായതിനാൽ അന്വേഷണം അട്ടിമറിക്കപ്പെടാനുള്ള സാധ്യതയും നിലനിൽക്കുന്നു.സ്കൂൾ മാനേജ്മെന്റ് കമ്മിറ്റിയിൽ സിപിഎം ചവറ ലോക്കൽ സെക്രട്ടറി ഗോവിന്ദപിള്ള പ്രസിഡൻ്റും മൈനാഗപ്പളളി കിഴക്ക് ലോക്കൽ സെക്രട്ടറി തുളസീധരൻ പിള്ള മാനേജരുമാണ്.ചവറ,കുന്നത്തൂർ ഏരിയാ – ലോക്കൽ കമ്മിറ്റി അംഗങ്ങൾ അടങ്ങുന്ന സമിതിയാണ് സ്കൂളിൻ്റെ പ്രവർത്തനം നിയന്ത്രിക്കുന്നത്.തദ്ദേശ തെരഞ്ഞെടുപ്പ് അടുത്തിരിക്കെ സിപിഎം നേതാക്കൾക്കെതിരെ പോലീസ് നടപടി ഉണ്ടായാൽ അത് തിരിച്ചടിയാകാൻ സാധ്യതയുണ്ടെന്ന കാഴ്ചപ്പാടും സിപിഎമ്മിനുണ്ട്.ഇതിനാൽ പോലീസിനുമേൽ സമ്മർദ്ദം ചെലുത്തി അന്തിമ കുറ്റപത്രം നൽകുന്നത് വൈകിപ്പിക്കാനും അത് വഴി കേസ് ദുർബലമാക്കാനുള്ള നീക്കങ്ങളാകും വരുംദിവസങ്ങളിൽ സിപിഎമ്മിന്റെ ഭാഗത്തു നിന്നും പ്രതീക്ഷിക്കേണ്ടത്.