ഡല്‍ഹിയില്‍ 15 ടണ്‍ വ്യാജ മസാലപ്പൊടി പിടികൂടി. ലോക്കല്‍ വിപണിയിലെ വിതരണത്തിനായി ഫാക്ടറിയില്‍ തയ്യാറാക്കിയ ഗരം മസാല അടക്കമുള്ള വ്യാജ മസാലപ്പൊടിയാണ് പിടികൂടിയത്. ഇതുമായി ബന്ധപ്പെട്ട് രണ്ട് ഫാക്ടറിയുടെ ഉടമസ്ഥര്‍ അടക്കം മൂന്ന് പേരെ അറസ്റ്റ് ചെയ്തു.
ഡല്‍ഹിയിലെ കരവാല്‍നഗര്‍ ഏരിയയിലെ ഫാക്ടറിയില്‍ നിന്നാണ് വ്യാജ മസാലപ്പൊടി പിടികൂടിയത്. മസാലപ്പൊടി തയ്യാറാക്കാന്‍ ഉപയോഗിച്ച ചേരുവകകളും ഇതില്‍ ഉള്‍പ്പെടുന്നു. ചീഞ്ഞളിഞ്ഞ ഇലകളും അരിയും, കേടായ തിന, അറക്കപ്പൊടി, ആസിഡുകള്‍, വ്യാജ ഉല്‍പന്നങ്ങള്‍ നിര്‍മ്മിക്കാന്‍ ഉപയോഗിക്കുന്ന എണ്ണകള്‍ എന്നിവ പിടിച്ചെടുത്തതില്‍ ഉള്‍പ്പെടുന്നതായി പൊലീസ് പറയുന്നു. ഫാക്ടറിയില്‍ വ്യാജ മസാലപ്പൊടി തയ്യാറാക്കി വിവിധ ബ്രാന്‍ഡുകളുടെ പേരില്‍ വില്‍പ്പന നടത്തുന്നതായുള്ള രഹസ്യവിവരത്തിന്റെ അടിസ്ഥാനത്തിലാണ് പൊലീസ് റെയ്ഡ് നടത്തിയത്.

സുഹൃത്തിന്റെ വിവാഹത്തിനായി എത്തിയ അഞ്ച് മെഡിക്കല്‍ വിദ്യാര്‍ഥികള്‍ കടലില്‍ മുങ്ങിമരിച്ചു. കന്യാകുമാരി ഗണപതിപുരത്ത് ലമൂര്‍ ബീച്ചിലാണ് അപകടം നടന്നത്. തഞ്ചാവൂര്‍ സ്വദേശി ചക്രവര്‍ത്തി, അന്ധ്രാപ്രദേശ് സ്വദേശി വെങ്കിടേഷ്, നെയ് വേല്‍ സ്വദേശി ഗായത്രി, ദിണ്ഡിഗല്‍ സ്വദേശി പ്രവീണ്‍ ശ്യാം കന്യാകുമാരി സ്വദേശി റഷീദ് എന്നിവരാണ് മരിച്ചത്. എട്ടുപേരാണ് കുളിക്കാനായി കടലില്‍ ഇറങ്ങിയത്. അതില്‍ മൂന്നു പേരെ നാട്ടുകാര്‍ ചേര്‍ന്ന് രക്ഷിച്ചു. ഇവര്‍ ചികിത്സയിലാണ്. ഒരാളുടെ നില ഗുരുതരമാണെന്നാണ് റിപ്പോര്‍ട്ടുകള്‍. തിരുച്ചിറിപ്പിള്ളി മെഡിക്കല്‍ കോളജിലെ അവസാനവര്‍ഷ വിദ്യാര്‍ഥികളാണ് എല്ലാവരും. രണ്ട് പെണ്‍കുട്ടികള്‍ ഉള്‍പ്പെടെ അഞ്ചുപേരാണ് മരിച്ചത്. മൂന്ന് പേര്‍ ചികിത്സയിലാണ്.
ഇന്നലെ ഗണപതിപുരത്തെ ബീച്ചില്‍ മൂന്നുപേര്‍ മുങ്ങിമരിച്ചിരുന്നു. ഇതിന് പിന്നാലെ പൊലീസ് ബീച്ച് അടച്ചിരുന്നു. എന്നാല്‍ സുഹൃത്തിന്റെ വിവാഹത്തിനെത്തിയ സംഘം കടലില്‍ കുളിക്കാന്‍ ഇറങ്ങുകയായിരുന്നു.