ശാസ്താംകോട്ട:തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ നാത്തൂൻമാർ മൽസരിക്കുന്നുവെന്ന പ്രത്യേകതയാണ് ശാസ്താംകോട്ട ഗ്രാമ പഞ്ചായത്തിനുള്ളത്.2 വാർഡുകളിലായി മൽസരിക്കുന്ന രണ്ട് പേരും
യുഡിഎഫ് സ്ഥാനാർത്ഥികളാണ് എന്ന പ്രത്യേകതയുണ്ട്.മനക്കര 20-ാം വാർഡിലെ സ്ഥാനാർത്ഥിയായ എസ്.ശ്രീലക്ഷ്മിയും ഇവരുടെ സഹോദൻ പരേതനായ ശ്രീകുമാറിൻ്റെ ഭാര്യ ശിൽപ്പയുമാണ് മത്സര രംഗത്തുള്ള നാത്തൂന്മാർ.മുതുപിലാക്കാട് കിഴക്ക് 5 -ാം വാർഡിലെ സ്ഥാനാർത്ഥിയാണ് ശിൽപ.അനിൽകുമാറിൻ്റെ ഭാര്യയാണ് ശ്രീലക്ഷ്മി.രണ്ടു പേരുടെയും കന്നി മൽസരമാണിത്.

കുന്നത്തൂർ:മോട്ടോർ കത്തിനശിച്ചതിനെ തുടർന്ന് കുന്നത്തൂർ പഞ്ചായത്തിൽ ഒരാഴ്ചയായി കുടിവെള്ള വിതരണം മുടങ്ങിയിട്ടും നടപടിയില്ലെന്ന് പരാതി.കുന്നത്തൂർ ശുദ്ധജലപദ്ധതി പ്രകാരം ചേലൂർ കായലിൽ നിന്നുള്ള വെള്ളം കൊല്ലാറയിലെ പമ്പ് ഹൗസിൽ
എത്തിച്ചാണ് പഞ്ചായത്തിലെ മുഴുവൻ പ്രദേശങ്ങളിലും കുടിവെള്ളം വിതരണം ചെയ്യുന്നത്.മഴയ്ക്കൊപ്പം ഉണ്ടായ ശക്തമായ ഇടിയും മിന്നലിനെയും തുടർന്നാണ് മോട്ടോർ കത്തിയതെന്നാണ് അധികൃതർ പറയുന്നത്.എന്നാൽ ദിവസങ്ങൾ പിന്നിട്ടിട്ടും നന്നാക്കാൻ അധികൃതർ തയ്യാറായിട്ടില്ലെന്നാണ് പരാതി ഉയരുന്നത്.പൂർണമായും പൈപ്പ് വെള്ളത്തെ ആശ്രയിച്ച് കഴിയുന്ന നിരവധി കുടുംബങ്ങളാണ് കുന്നത്തൂർ പഞ്ചായത്തിലുള്ളത്.ഇതിനാൽ പ്രാഥമിക കൃത്യങ്ങൾ നിർവഹിക്കുന്നതിനു പോലും തുള്ളി വെള്ളമില്ലാതെ സാധാരണക്കാർ വലയുകയാണ്.പാചകം ചെയ്യുന്നതിനും മറ്റും പല ഭാഗങ്ങളിൽ പോയി കിണർ വെള്ളം ശേഖരിക്കുകയാണ്.പെരുമാറ്റച്ചട്ടം നിലനിൽക്കുന്നതിനാൽ പഞ്ചായത്തും പ്രശ്നത്തിൽ ഇടപെടുന്നില്ലെന്ന് ജനങ്ങൾ പറയുന്നു.നിരവധി തവണ ശാസ്താംകോട്ട വാട്ടർ അതോറിറ്റി അധികൃതരുമായി ജനപ്രതിനിധികളും വിവിധ രാഷ്ട്രീയ നേതാക്കളും ബന്ധപ്പെട്ടിട്ടും നടപടിയെടുക്കുന്നില്ലെന്ന് പരാതിയുണ്ട്.അതിനിടെ കത്തിനശിച്ച മോട്ടോർ മാറ്റി പകരം സംവിധാനം ഉറപ്പാക്കിയതായും അടുത്ത ദിവസം തന്നെ കുടിവെള്ള വിതരണം പുനരാരംഭിക്കുമെന്നും വാട്ടർ അതോറിറ്റി അധികൃതർ അറിയിച്ചു.

യുഡിഎഫ് കുന്നത്തൂർ മണ്ഡലം തെരഞ്ഞെടുപ്പ് കൺവൻഷനും സ്ഥാനാർത്ഥി സംഗമവും

കുന്നത്തൂർ:യുഡിഎഫ് കുന്നത്തൂർ മണ്ഡലം തെരഞ്ഞെടുപ്പ് കൺവൻഷനും സ്ഥാനാർത്ഥി സംഗമവും മുൻ പ്രതിപക്ഷ നേതാവ് രമേശ്‌ ചെന്നിത്തല ഉദ്ഘാടനം ചെയ്തു.പഞ്ചായത്ത് തിരഞ്ഞെടുപ്പോടെ കേരളത്തിൽ ഒരു രാഷ്ട്രിയ മാറ്റം ഉണ്ടാകുമെന്നും തിരഞ്ഞെടുപ്പിൽ യുഡിഎഫ് വൻ വിജയം നേടുമെന്നും അദ്ദേഹം പറഞ്ഞു.ജനങ്ങളുടെ വിശ്വാസം നഷ്ടപ്പെട്ട സർക്കാരാണ് കേരളം ഭരിക്കുന്നത്.കഴിഞ്ഞ 10 വർഷമായി കേരളം ഭരിച്ച സർക്കാരിനെതിരെയുള്ള വൻ ജനരോക്ഷം ഈ തിരഞ്ഞെടുപ്പിൽ പ്രതിഫലിക്കും.കോടതി ഇടപെട്ടില്ലായിരുന്നെങ്കിൽ ഈ മകര വിളക്കിന് മുൻപ് അയ്യപ്പന്റെ വിഗ്രഹവും ഇവർ അടിച്ച് മാറ്റിയേനെയെന്നും ചെന്നിത്തല കൂട്ടിച്ചേർത്തു.കെ.സുകുമാരപിള്ള അധ്യക്ഷത വഹിച്ചു.ഡിസിസി പ്രസിഡന്റ് പി.രാജേന്ദ്രപ്രസാദ്,എം.വി ശശികുമാരൻ നായർ,ഉല്ലാസ് കോവൂർ,ദിനേശ് ബാബു,കാരയ്ക്കാട്ട് അനിൽ,ബഷീർ ഒല്ലായ്,കണ്ണൻ നായർ,കെ.ജി വിജയദേവൻപിള്ള,ഏഴാംമൈൽ ശശിധരൻ,ബേബി ജോൺ,ഷീജാ രാധാകൃഷ്ണൻ,റെജി കുര്യൻ,രാജൻ നാട്ടിശേരി എന്നിവർ പ്രസംഗിച്ചു.