കൊട്ടാരക്കര: വിലങ്ങറ സുബ്രഹ്‌മണ്യ സ്വാമി ക്ഷേത്രത്തില്‍ സ്‌കന്ദ ഷഷ്ടി ഉത്സവത്തിന് ഒരുക്കങ്ങളായി. നവംബര്‍ 1-നാണ് സ്‌കന്ദ ഷഷ്ടി വ്രതം ആരംഭിക്കുന്നത് ക്ഷേത്രത്തില്‍
പ്രസിദ്ധമായ പാല്‍ക്കുടം എഴുന്നള്ളത്തിനുള്ള വെള്ളികുടം ആചാരനുഷ്ടാനങ്ങളോടെ സ്ത്രീകള്‍ സ്വീകരിച്ചു. കഴിഞ്ഞ ദിവസം രാവിലെ നടന്ന ചടങ്ങില്‍ മേല്‍ശാന്തി ശ്രീകോവിലില്‍ നിന്നും പൂജിച്ചുകൊണ്ടു വന്ന വെള്ളികുടം ഭക്തയ്ക്ക് കൈമാറുകയായിരുന്നു. ഷഷ്ടി ദിവസം ഇതിലാണ് പാല്‍ കൊണ്ടു വരുന്നത്. അകമ്പടിയായി നൂറോളം സ്ത്രീകള്‍ മറ്റ് കുടങ്ങളില്‍ പാല്‍ നിറച്ചു എത്തും.
ഇണ്ടിളയപ്പന്‍ ക്ഷേത്രത്തില്‍ നിന്ന് പകല്‍ 11-ഓടെയാണ് പാല്‍ക്കുടം എഴുന്നള്ളത്ത് ആരംഭിക്കുന്നത്. വിലങ്ങറ ക്ഷേത്രത്തില്‍ ഇത് അഭിഷേകം നടത്തും. തുടര്‍ന്ന് ദേവരഥ എഴുന്നള്ളത്തും ഉണ്ടായിരിക്കും. ഉച്ചയ്ക്ക് 1-നാണ് ഷഷ്ടി പൂജയും ദീപാരാധനയും. രാത്രി 7ന് നടക്കുന്ന പുഷ്പാഭിഷേകവും ഭസ്മാഭിഷേകത്തോടെയുമാണ് ചടങ്ങുകള്‍ അവസാനിക്കുന്നത്.
ഷഷ്ടിയുടെ ഭാഗമായി ഒരു ലക്ഷത്തോളം പടച്ചോറാണ് ദേവന് സമര്‍പ്പിക്കുന്നത്. ഇതിനായി വിപുലമായ ഒരുക്കങ്ങളായി. ഇരുപതോളം പൂജാരിമാരുടെ നേതൃത്വത്തിലാണ് പടച്ചോര്‍ ഒരുക്കുന്നത്. വ്യാഴാഴ്ച രാവിലെ 7 മുതല്‍ ഇത് ഭക്തര്‍ക്ക് വിതരണം ചെയ്യും. തിരക്ക് കുറയ്ക്കാനായി ഒന്നിലധികം കൗണ്ടറുകള്‍ വിതരണത്തിനായി ദേവസ്വം അധികൃതര്‍ ഒരുക്കിയിട്ടുണ്ട്. പുലര്‍ച്ചെ നടക്കുന്ന പഞ്ചാമൃത അഭിഷേകത്തോടെയാണ് പൂജാ ചടങ്ങുകള്‍ തുടങ്ങുന്നത്. സ്‌കന്ദ പുരാണ പാരായണം, അഖണ്ഡ നാമ ജപം, ഐശ്വര്യ പൂജ എന്നിവയും ഉണ്ട്.

കരുനാഗപ്പള്ളി: വള്ളികുന്നം, കാപ്പില്‍, തെങ്ങമം, ശൂരനാട് തുടങ്ങിയ സ്ഥലങ്ങളില്‍ കരുനാഗപ്പള്ളി എക്സൈസ് റേഞ്ച് ഇന്‍സ്പെക്ടര്‍ ലതീഷ്. എസിന്റെ നേതൃത്വത്തില്‍ നടത്തിയ പരിശോധനയില്‍ വില്‍പ്പനയ്ക്കായി കടത്തികൊണ്ട് വന്ന 110 ലിറ്റര്‍ വ്യാജമദ്യം പിടിച്ചെടുത്തു. സംഭവവുമായി ബന്ധപ്പെട്ട് കാപ്പില്‍ കിഴക്ക് മുറിയില്‍ മരങ്ങാട്ട് വടക്കതില്‍ ഹാരി ജോണ്‍, കാപ്പില്‍ മേക്ക് ചന്ദ്രാലയം വീട്ടില്‍ അമിതാബ് ചന്ദ്രന്‍ എന്നിവര്‍ പിടിയിലായി.
ഹാരി ജോണ്‍ ആലപ്പുഴ കൊല്ലം ജില്ലകളില്‍ രജിസ്റ്റര്‍ ചെയ്തിട്ടുള്ള നിരവധി അബ്കാരി കേസുകളില്‍ പ്രതിയാണ്. വ്യാജമദ്യ മാഫിയയുമായി ബന്ധം പുലര്‍ത്തിയിരുന്നതായി കണ്ടെത്തിയതിനെ സര്‍വീസില്‍ നിന്നും നീക്കം ചെയ്യപ്പെട്ട മുന്‍ എക്‌സൈസ് ഉദ്യോഗസ്ഥനാണ് ഹാരി ജോണ്‍. വ്യാജമദ്യം കടത്താനുപയോഗിച്ച വാഹനവും എക്‌സൈസ് കസ്റ്റഡിയില്‍ എടുത്തിട്ടുണ്ട്.

കൊല്ലം: കൊല്ലം ജില്ലാ സ്‌കൂള്‍ ശാസ്ത്രമേളയുടെ ആദ്യദിവസത്തെ മത്സരഫലങ്ങള്‍ പ്രഖ്യാപിച്ചപ്പോള്‍ റവന്യു ജില്ലാ ശാസ്ത്രമേളയില്‍ 235 പോയിന്റുമായി അഞ്ചല്‍ ഉപജില്ല മുന്നില്‍. 209 പോയിന്റുമായി ചടയമംഗലം ഉപജില്ല രണ്ടാമതും. 204 പോയിന്റുമായി കൊട്ടാരക്കര ഉപജില്ല മൂന്നാമതുമാണ്. 202 പോയിന്റുമായി ആതിഥേയരായ കൊല്ലം ഉപജില്ല നാലാം സ്ഥാനത്താണ്. മറ്റ് ഉപജില്ലകളുടെ പോയിന്റ് നില: പുനലൂര്‍ (199), വെളിയം(196), കരുനാഗപ്പള്ളി (195), കുളക്കട (193), ചാത്തന്നൂര്‍ (187), ചവറ (178), ശാസ്താംകോട്ട (165), കുണ്ടറ(161).
സ്‌കൂളുകളില്‍ 92 പോയിന്റുമായി അഞ്ചല്‍ വെസ്റ്റ് ഗവ. എച്ച്എസ്എസ് ആണ് ഒന്നാമത്. അയ്യന്‍കോയിക്കല്‍ ജിഎച്ച്എസ്എസ് 71 പോയിന്റുമായി രണ്ടാമതും 68 പോയിന്റുമായി കുറ്റിക്കാട് സിപിഎച്ച്എസ്എസ് മൂന്നാമതുമാണ്. യുപി, എച്ച്എസ്, എച്ച്എസ്എസ്, വിഎച്ച്എസ്എസ് വിഭാഗങ്ങളിലായി 153 മത്സരങ്ങളാണ് ഇന്നലെ നടന്നത്. പ്രവൃത്തി പരിചയമേളയിലായിരുന്നു കൂടുതല്‍ മത്സരങ്ങള്‍ നടന്നത്. എച്ച്എസ്, എച്ച്എസ്എസ് വിഭാഗങ്ങളിലായി 34 ഇനങ്ങളില്‍ വീതം മത്സരം നടന്നു.