കൊല്ലം ജില്ലാ ലീഗല്‍ സര്‍വീസസ് അതോറിറ്റിയും താലൂക്ക് ലീഗല്‍ സര്‍വീസസ് കമ്മിറ്റികളും സംയുക്തമായി ജില്ലയിലെ വിവിധ കോടതികളില്‍ നടത്തിയ നാഷണല്‍ ലോക് അദാലത്തില്‍ 22.85 കോടി രൂപയുടെ വ്യവഹാരങ്ങള്‍ തീര്‍പ്പാക്കി.
ജില്ലാ കോടതി സമുച്ചയത്തിലും കൊല്ലം, കരുനാഗപ്പള്ളി, പത്തനാപുരം, കൊട്ടാരക്കര, കുന്നത്തൂര്‍ താലൂക്കുകളിലെ വിവിധ കോടതികളിലുമായി നടത്തിയ അദാലത്തില്‍ സിവില്‍ കേസുകള്‍, ഭൂമി ഏറ്റെടുക്കല്‍ കേസുകള്‍, വാഹനാപകട കേസുകള്‍, കുടുംബ തര്‍ക്കങ്ങള്‍, ഒത്തു തീര്‍പ്പാക്കാവുന്ന ക്രിമിനല്‍ കേസുകള്‍, ബാങ്ക് വായ്പ സംബന്ധമായ കേസുകള്‍ എന്നിങ്ങനെയുള്ള വ്യവഹാരങ്ങളാണ് തീര്‍പ്പാക്കിയത്. ആകെ പരിഗണിച്ച 73,854 കേസുകളില്‍ 12,569 എണ്ണം ഒത്തുതീര്‍പ്പാക്കി. ജില്ലാ ലീഗല്‍ സര്‍വീസസ് അതോറിറ്റി ചെയര്‍മാന്‍ (ഇന്‍ ചാര്‍ജ്) പി.എന്‍.വിനോദ് അദാലത്തിന് നേതൃത്വം വഹിച്ചു.

ജില്ലയിലെ ആന പാപ്പാന്മാര്‍ക്ക് നവംബര്‍ 16ന് കൊട്ടിയം ലൈവ് സ്റ്റോക്ക് മാനേജ്‌മെന്റ് ട്രെയിനിംഗ് സെന്ററില്‍ ഏകദിന പരിശീലന പരിപാടി സംഘടിപ്പിക്കും. ജില്ലയിലെ എല്ലാ  ആനപ്പാപ്പാന്മാരും പങ്കെടുക്കണമെന്ന് അസി. ഫോറസ്റ്റ് കണ്‍സര്‍വേറ്റര്‍ അറിയിച്ചു. ഫോണ്‍:  0474- 2748976.

കൊട്ടാരക്കരയില്‍ രണ്ട് മിനി ഐടി പാര്‍ക്കുകളുടെ പ്രവര്‍ത്തനങ്ങള്‍ പുരോഗമിക്കുന്നതായി ധനകാര്യ മന്ത്രി കെ എന്‍ ബാലഗോപാല്‍ പറഞ്ഞു. ഇതിലൂടെ ഐ.ടി, ഐ.ടി അനുബന്ധ മേഖലയില്‍ 500 പ്രൊഫഷണലുകള്‍ക്ക് ആദ്യഘട്ടത്തില്‍ ജോലി ലഭിക്കും. ലോകോത്തര ഐ.ടി കമ്പനിയായ സോഹോ കോര്‍പറേഷന്റ ഇന്ത്യയിലെ രണ്ടാമത്തെ ക്യാമ്പസ് കൊട്ടാരക്കര മണ്ഡലത്തിലെ നെടുവത്തൂര്‍ പഞ്ചായത്തില്‍ അഞ്ചുമാസത്തിനുള്ളില്‍ പ്രവര്‍ത്തനം ആരംഭിക്കും. പ്രാരംഭ ഘട്ടത്തില്‍ 250 പേര്‍ക്ക് ഇവിടെ ജോലി ഉറപ്പാകും. ഐടി ക്യാമ്പസിന് ആവശ്യമായ ഭൂമിയും കെട്ടിടവും അടക്കം സോഹോ കോര്‍പ്പറേഷന് ലഭ്യമായിട്ടുണ്ടെന്നും ധനകാര്യ മന്ത്രി അറിയിച്ചു. ഐഎച്ച്ആര്‍ഡി എന്‍ജിനിയറിങ് കോളേജ് ക്യാമ്പസില്‍ സോഹോ കോര്‍പറേഷന്‍ നേതൃത്വം നല്‍കുന്ന ക്യാമ്പസ് ഇന്‍ഡസ്ട്രീയല്‍ ഐടി പാര്‍ക്കായ ലീപ് സെന്ററിലെ ട്രെയിനികളോട് സംവദിക്കുകയായിരുന്നു മന്ത്രി.
സംസ്ഥാന സര്‍ക്കാരിന്റെ വര്‍ക്ക് നിയര്‍ ഹോം പദ്ധതിയിലെ ആദ്യ വര്‍ക്ക് സ്റ്റേഷന്‍ കൊട്ടാരക്കരയില്‍ ആരംഭിക്കുകയാണ്. 12,000 ചതുരശ്ര അടിയിലെ മിനി ഐ.ടി പാര്‍ക്കിന്റെ സജ്ജീകരണ പ്രവര്‍ത്തനങ്ങള്‍ അടുത്ത ആഴ്ചയില്‍ തുടങ്ങും. വീടിനടുത്ത് എല്ലാവിധ സൗകര്യങ്ങളോടെ 250 ഐ.ടി പ്രൊഫഷണലുകള്‍ക്ക് ഐ.ടി, ഐ.ടി അനുബന്ധ മേഖലയില്‍ ജോലി ചെയ്യാനാകും.
കൊട്ടാരക്കര നഗരത്തില്‍ ഡ്രോണ്‍ റിസര്‍ച്ച് പാര്‍ക്ക് സ്ഥാപിക്കാന്‍ തീരുമാനമായതായും മന്ത്രി അറിയിച്ചു. കേരള അക്കാദമി ഓഫ് സ്‌കില്‍ എക്സലന്‍സുമായി സഹകരിച്ചാണ് പാര്‍ക്ക് സ്ഥാപിക്കുക. ഇതുവഴി ഡ്രോണ്‍ സാങ്കേതിക വിദ്യയുടെ പ്രയോജനം നാടിന് ഉറപ്പാക്കാനാകും. ഈ രംഗത്ത് പുതിയ ഗവേഷണ പ്രവര്‍ത്തനങ്ങള്‍ക്കടക്കം പാര്‍ക്ക് നേതൃത്വം നല്‍കും.
പുതിയ തൊഴില്‍ അവസരങ്ങള്‍ സൃഷ്ടിക്കും. പാര്‍ക്കിന് ആവശ്യമായ സ്ഥലം കൊട്ടാരക്കര നഗരത്തില്‍തന്നെ ലഭ്യമാക്കാനാകും. ചെന്നൈ ഐഐടിയുടെ സാങ്കേതിക സഹായവും ഡ്രോണ്‍ പാര്‍ക്ക് സ്ഥാപനത്തിന് സഹായകമാകും.
കൊട്ടാരക്കരയെ ഐടി, റിസര്‍ച്ച് ആന്‍ഡ് ഡെവലെപ്പ്മെന്റ് ഹബ് ആക്കാന്‍ വിവിധ തരത്തിലുള്ള പദ്ധതികളാണ് മുന്നേറുന്നതെന്ന് ധനകാര്യ മന്ത്രി വ്യക്തമാക്കി. ഐടി ക്യാമ്പസിന് ഏറ്റവും അനുയോജ്യമായ മേഖല എന്ന നിലയിലാണ് സോഹോ കോര്‍പറേഷന്‍ ഇന്ത്യയില്‍ തങ്ങളുടെ രണ്ടാമത്തെ ക്യാമ്പസ് തുറക്കാന്‍ കൊട്ടാരക്കരയെ തെരഞ്ഞെടുത്തത്. ആ സാധ്യതകള്‍ പരമാവധി പ്രയോജനപ്പടുത്തുന്നതിനൊപ്പം രണ്ടാംനിര നഗരങ്ങളിലേക്ക് ഐടി മേഖലയുടെ പറിച്ചുനടീലിനുള്ള മാതൃക കൂടിയായി കൊട്ടാരക്കര മാറുകയാണ്. വിജ്ഞാന സമ്പദ്വ്യവസ്ഥിയിലേക്ക് കേരളത്തെ നയിക്കുമെന്ന സംസ്ഥാന സര്‍ക്കാരിന്റെ പ്രഖ്യാപിത നയത്തിന്റെ ഭാഗമായാണ് ഇത്തരം ഇടപെടലുകളെന്നും ധനകാര്യ മന്ത്രി പറഞ്ഞു.
ലീപ് സെന്ററിലെ ട്രയിനികള്‍ മന്ത്രിയുമായി  അനുഭവങ്ങള്‍ പങ്കുവച്ചു. കമ്പ്യൂട്ടര്‍ എന്‍ജിനിയറിങ്, ഇലക്ട്രോണിക്സ്, ഇലക്ട്രിക്കല്‍, മെക്കാനിക്കല്‍ മേഖലകളിലെ ഡിഗ്രി, പ്രൊഫഷണല്‍ ഡിഗ്രി, പോളിടെക്നിക് ഡിപ്ലോമ കോഴ്സുകള്‍ക്കുശേഷം ലീപ് സെന്ററില്‍ എത്തിയ വിദ്യാര്‍ഥികള്‍ പഠിച്ച കാര്യങ്ങളുടെ പ്രായോഗികത മനസിലാക്കാന്‍ പരിശീലനം സഹായമാകുന്നതെങ്ങനെയെന്ന് വിവരിച്ചു. പരിശീലനം പൂര്‍ത്തിയാക്കി സെന്ററില്‍ തന്നെ പ്രോജക്ട് ഇന്റേണികളായി ചേര്‍ന്നവരും അനുഭവങ്ങള്‍ പങ്കുവച്ചു. അസാപ് സിഇഒ അനൂപ് അംബിക, ലീപ് സെന്റര്‍ പ്രോഗ്രാം മാനേജര്‍ മഹേഷ് ബാലന്‍, പ്രിന്‍സിപ്പല്‍ റിസേര്‍ച്ചര്‍ ഡോ. ജയരാജ് പോരൂര്‍, ഡെവലെപ്പ്മെന്റല്‍ സൈക്കോളജിസ്റ്റ് എ ബാബു മാത്യു എന്നിവരും പങ്കെടുത്തു.

സംസ്ഥാന യുവജനക്ഷേമ ബോര്‍ഡ് തദ്ദേശ സ്വയംഭരണ  സ്ഥാപനങ്ങളുടെ സഹകരണത്തോടെ സംഘടിപ്പിക്കുന്ന കേരളോത്സവം പ്രാഥമികതല മത്സരങ്ങള്‍ നവംബറില്‍ ആരംഭിക്കും. ഗ്രാമപഞ്ചായത്ത് തലത്തില്‍ നവംബര്‍ 15 മുതല്‍ 30 വരെയും മുനിസിപ്പാലറ്റി, കോര്‍പ്പറേഷന്‍, ബ്ലോക്ക് പഞ്ചായത്ത് തലങ്ങളില്‍ ഡിസംബര്‍ 1 മുതല്‍ 15 വരെയും ജില്ലാ പഞ്ചായത്ത് തലത്തില്‍ ഡിസംബര്‍ 16 മുതല്‍ 31 വരെയും സംസ്ഥാനതലത്തില്‍ 2025 ജനുവരി ആദ്യവാരത്തിലുമായാണ് മത്സരങ്ങള്‍. ഫോണ്‍: 0474 2798440.

ജ്യോഗ്രഫി, ഫിസിക്‌സ്, മാത്തമാറ്റിക്‌സ്, ഗാന്ധിയന്‍ സ്റ്റഡീസ്, ബോട്ടണി, ഹിന്ദി, കെമിസ്ട്രി, സുവോളജി, കൊമേഴ്‌സ്, ഇക്കണോമിക്‌സ്, മലയാളം, ഇംഗ്ലീഷ്, ഹിസ്റ്ററി, കമ്മ്യൂണിക്കേറ്റീവ് ഇംഗ്ലീഷ്, സംസ്‌കൃതം, സോഷ്യോളജി, പൊളിറ്റിക്കല്‍ സയന്‍സ്, അറബിക്, കമ്പ്യൂട്ടര്‍ സയന്‍സ് എന്നീ വിഷയങ്ങളില്‍ ഹയര്‍ സെക്കന്‍ഡറി അധ്യാപക നിയമനത്തിന് യോഗ്യരായ 50 വയസ്സിന് താഴെയുള്ള കാഴ്ചപരിമിതര്‍, കേള്‍വിപരിമിതര്‍ എന്നീ ഭിന്ന ശേഷി വിഭാഗങ്ങളില്‍ പെടുന്നവര്‍ ബന്ധപ്പെട്ട റീജിയണല്‍ പ്രൊഫഷണല്‍ ആന്‍ഡ് എക്‌സിക്യൂട്ടീവ് എംപ്ലോയ്‌മെന്റ് എക്‌സ്‌ചേഞ്ചിലോ പ്രാദേശിക എംപ്ലോയ്‌മെന്റ് എക്‌സ്‌ചേഞ്ചിലോ നവംബര്‍ 16നകം പേര് രജിസ്റ്റര്‍ ചെയ്യണമെന്ന് ഡിവിഷണല്‍ എംപ്ലോയ്‌മെന്റ് ഓഫിസര്‍ അറിയിച്ചു.