ശാസ്താംകോട്ട. ബൈക്കുകാരുടെ മരണപാച്ചില്‍ വേങ്ങ പൊട്ടക്കണ്ണന്‍മുക്കില്‍ നാലുപേര്‍ക്ക് പരുക്കേറ്റു. ഇന്ന് വൈകിട്ട് അഞ്ചുമണിക്കാണ് വലിയ അപകടം നടന്നത്. ശാസ്താംകോട്ടഭാഗത്തുനിന്നും ഒരു ബൈക്കില്‍വന്ന മൂന്നുപേര്‍ അമിത വേഗതയില്‍ വലതുവശത്തെ കടയിലേക്ക് ഇടിച്ചുകയറുകയായിരുന്നു. കാരാളിമുക്ക്ഭാഗത്തുനിന്നും വന്ന ബൈക്കുകാരനെ ഇടിച്ചു തെറിപ്പിച്ച് നിയന്ത്രണം വിട്ടാണ് മൂന്നുപേരുമായി ബൈക്ക് കടത്തിണ്ണയിലേക്ക് പാഞ്ഞുകയറിയത്തെറിച്ചുവീണ യുവാക്കള്‍ക്ക് ഗുരുതരമായി പരുക്കേറ്റു.. കടഇറക്കിനായി സ്ഥാപിച്ച ഇരുമ്പുതൂണും കടയുടെ കൂരയും ഇടിയേറ്റ് വളഞ്ഞു. ഇടിയേറ്റ എതിര്‍ദിശയില്‍നിന്നും വന്ന ബൈക്കുകാരനും കാര്യമായ പരുക്കുണ്ട്. എല്ലാവരും വിവിധ ആശുപത്രികളിലാണ്.

മേഖലയില്‍ പവര്‍ബൈക്കുകാരുടെ മരണപ്പാച്ചില്‍ സംഭീതാവസ്ഥയാണുണ്ടാക്കുന്നതെന്ന് നാട്ടുകാര്‍ പറയുന്നു. റോഡ് മുറിച്ചു കടക്കാന്‍ പ്രായമായവരും കുട്ടികളും വിഷമിക്കുകയാണ്. പൊട്ടക്കണ്ണന്‍മുക്കിലെ വളവില്‍ അപകടം കുറയ്ക്കാന്‍ വീതി വര്‍ദ്ധിപ്പിച്ച് വര്‍ഷങ്ങളായിട്ടും നടുക്കു നില്‍ക്കുന്ന കെഎസ്ഇബി 11കെവി പോസ്റ്റ് ഒതുക്കി സ്ഥാപിച്ചിട്ടില്ല. വലിയ വാഹനങ്ങള്‍ ഇതില്‍തട്ടാനുള്ള സാധ്യത ഏറെയാണ്.തട്ടിയാല്‍ വന്‍ദുരന്തമാകും ഉണ്ടാകുന്നതെന്ന് നാട്ടുകാര്‍ പറയുന്നു. എസ് വളവില്‍ വെള്ളം കെട്ടിക്കിടക്കുന്നതും അപകടമാണ്. ഇവിടെ ഓട നിര്‍മ്മാണം നടത്തിയെങ്കിലും ഫലപ്രദമായില്ല.

ശാസ്താംകോട്ട കുമ്പളത്ത് ശങ്കുപ്പിള്ള മെമ്മോറിയൽ ദേവസ്വം ബോർഡ് കോളേജിൻ്റെ വജ്ര ജൂബിലി ആഘോഷങ്ങളുടെ ഭാഗമായി പൂർവ്വ അധ്യാപകരെ ആദരിക്കുന്ന ഗുരുവന്ദനം പരിപാടി നടത്തി. കെ വി രാമാനുജൻ തമ്പിയുടെ അധ്യക്ഷതയിൽ ബഹുമാനപ്പെട്ട മൃഗസംരക്ഷണ ക്ഷീരവികസന വകുപ്പ് മന്ത്രി ശ്രീമതി ജെ .ചിഞ്ചു റാണി ഉദ്ഘാടനം നിർവ്വഹിച്ചു. 1964 മുതലുള്ള മുൻകാല അധ്യാപകരായ നൂറോളം പേർ ആദരിക്കൽ ചടങ്ങിൽപങ്കെടുത്തു. കേരള സർവകലാശാല രജിസ്റ്റർ കെ എസ് അനിൽകുമാർ മുഖ്യ പ്രഭാഷണം നടത്തി. കോളേജ് പ്രിൻസിപ്പൽ പ്രൊഫസർ കെ സി പ്രകാശ് ഫോട്ടോ എക്സിബിഷൻ ഉദ്ഘാടനം നടത്തി. ഡോക്ടർ എൻ സുരേഷ് കുമാർ, ഡോ. സി.ഉണ്ണികൃഷ്ണൻ,അഡ്വക്കേറ്റ് എൻ എസ് ജ്യോതികുമാർ ,കെ എസ് പ്രദീപ് ,ഉല്ലാസ് കോവൂർ ,പ്രൊഫസർ വി മാധവൻ പിള്ള, വൈ ഷാജഹാൻ, അഡ്വക്കേറ്റ് എ നൗഷാദ്, ഡോ. പ്രീത’ ജി പ്രസാദ്, ,ആർ ഗിരികുമാർ , സ്റ്റാലിൻ രാജഗിരി, ജി.രാധാകൃഷ്ണൻ നായർ,ഗിരീഷ് ഗോപിനാഥ് ,സൈറസ് പോൾ,രശ്മിദേവി,ദീപ പി. ആർ, എന്നിവർ പ്രസംഗിച്ചു. സി ജയകുമാർ സ്വാഗതവും എൻ സോമൻപിള്ള നന്ദി യും പറഞ്ഞു

ശാസ്താംകോട്ട:ദേശീയ പാതയിൽ പുന്നമൂടിനു സമീപം വച്ച് മൂന്നര കിലോ കഞ്ചാവുമായി രണ്ട് യുവാക്കൾ പിടിയിൽ.കുന്നത്തൂർ തുരുത്തിക്കര കല്ലുംമൂട്ടിൽ താഴതിൽ വീട്ടിൽ സുരേഷ് എന്ന കാട്ടി സുരേഷ് (30),പത്തനാപുരം കുര ചരുവിള താഴതിൽ അഖിൽ (25) എന്നിവരെയാണ് ശാസ്താംക്കോട്ട പോലീസും കൊല്ലം റൂറൽ ഡാൻസാഫ് ടീമും ചേർന്ന് പിടികൂടിയത്.കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.കഞ്ചാവുമായി പിടികൂടിയ അഖില്‍ പോക്സോ അടക്കം വിവിധ പോലീസ് സ്റ്റേഷനുകളിൽ 14 കേസ്സുകളിലെ പ്രതിയാണ്.സുരേഷും നിരവധി കഞ്ചാവ് കേസ്സുകളിലെ പ്രതിയാണ്.

കുന്നത്തൂർ:കുന്നത്തൂർ ആറ്റുകടവ് ജംഗ്ഷനിലും പരിസര പ്രദേശങ്ങളിലും തെരുവ് നായ്ക്കളുടെ ശല്യം അതിരൂക്ഷം.രാത്രികാലങ്ങളിൽ മറ്റ് പ്രദേശങ്ങളിൽ നിന്നും വാഹനങ്ങളിലെത്തിച്ച് തള്ളുന്ന നായ്ക്കളാണ് പ്രദേശവാസികൾക്ക് ഭീഷണിയായി മാറിയിരിക്കുന്നത്.പാതയോരത്ത് രാപകൽ വ്യത്യാസമില്ലാതെ തമ്പടിക്കുന്ന നായ്ക്കൾ കാൽ നടയാത്രക്കാരെ ആക്രമിക്കാൻ ശ്രമിക്കുന്നത് പതിവാണ്.ഇതിനാൽ സ്കൂൾ കുട്ടികൾക്കൊപ്പം രക്ഷിതാക്കളും കുട്ടിനെത്തേണ്ട അവസ്ഥയാണുള്ളത്.ആറ്റുകടവ് – ചീക്കൽകടവ് റോഡിലാണ് ഇത്തരത്തിൽ നായ്ക്കൾ കൂട്ടമായി തമ്പടിക്കുന്നത്.മഴ പെയ്താൽ നായ്ക്കൾ കൂട്ടത്തോടെ സമീപത്തെ വീടുകളിലെ സിറ്റൗട്ടിലും പോർച്ചിലും എത്തുന്നതും പ്രശ്നമായിട്ടുണ്ട്.പകൽ നേരത്ത് വീടുകളിൽ നിന്നും കോഴികളെ പിടികൂടുന്നതും പതിവാണ്.അടുത്തിടെ നിരവധി കോഴികളെ നായ്ക്കൾ അകത്താക്കിയിട്ടുണ്ട്.തെരുവ് നായശല്യം നിയന്ത്രിക്കാൻ പഞ്ചായത്ത് അധികൃതർ അടിയന്തിര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.