തേനീച്ചക്കൂട്ടത്തിൻ്റെ ആക്രമണത്തിൽ 62 വയസ്സുള്ള റിട്ട. പൊലീസ് ഉദ്യോഗസ്ഥൻ മരിച്ചു. ഉത്തർപ്രദേശിലെ എട്ടായിൽ ഞായറാഴ്ചയാണ് സംഭവം.

അലിഗഞ്ച് ഏരിയക്ക് കീഴിലുള്ള കിനൗദി ഖൈരാബാദ് ഗ്രാമത്തിലാണ് അപകടം ഉണ്ടായത്. റിട്ട. പൊലീസ് ഉദ്യോഗസ്ഥനായ അത്തർ സിംഗ് മക്കളോടൊപ്പം തൻ്റെ കൃഷിയിടത്തിൽ വെള്ളം നനയ്ക്കാൻ പോയപ്പോഴാണ് തേനീച്ചകൾ കൂട്ടത്തോടെ ആക്രമിച്ചത്.

അപ്രതീക്ഷിതമായുണ്ടായ ആക്രമണത്തിൽ സിങ്ങിന്റെ ശരീരത്തിൽ പലഭാഗത്തും കുത്തേറ്റു. കടിയേറ്റ് അവശനിലയിലായ അദ്ദേഹം ഉടൻതന്നെ അവിടെ കുഴഞ്ഞുവീണു.

അബോധാവസ്ഥയിലായ അത്തർ സിങ്ങിനെ ഉടൻതന്നെ കമ്യൂണിറ്റി ഹെൽത്ത് സെൻ്ററിൽ എത്തിച്ചെങ്കിലും മരണം സംഭവിച്ചിരുന്നു. ഒരാൾക്ക് ഒരേ സമയം നൂറുകണക്കിന് തേനീച്ചകളുടെ കുത്തേൽക്കുന്നത് മാരകമാകാമെന്നും അദ്ദേഹം കൂട്ടിച്ചേർത്തു. ആക്രമണം നടന്ന് മിനിറ്റുകൾക്കുള്ളിൽ തന്നെ മരണം സംഭവിക്കാൻ സാധ്യത കൂടുതലാണെന്നും അലിഗഞ്ച് കമ്യൂണിറ്റി ഹെൽത്ത് സെൻ്ററിലെ ഡോക്ടർ അഖ്‌ലാഖ് ഖാൻ അറിയിച്ചു.

പ്രശസ്ത കന്നഡ നടന്‍ എം.എസ്. ഉമേഷ് (80) അന്തരിച്ചു. അര്‍ബുദ ബാധിതനായി ഏറെ നാളുകളായി ചികിത്സയിലായിരുന്നു. കഴിഞ്ഞ മാസം വീട്ടില്‍ കാല്‍ വഴുതി വീണതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചിരിക്കുകയായിരുന്നു. കന്നഡ സിനിമയിലെ തന്നെ മികച്ച ഹാസ്യ വേഷങ്ങള്‍ ചെയ്യുന്ന നടനായിരുന്നു ഉമേഷ്.
തപ്പു തലങ്കല്‍, കിലാഡി ജോഡി, മക്കല രാജ്യ, കഥാ സംഗമ, അന്ത, ഗുരു ശിഷ്യരു തുടങ്ങിയ ചിത്രങ്ങളിലെ അദ്ദേഹത്തിന്റെ പ്രകടനം ശ്രദ്ധേയമായിരുന്നു. ആറ് പതിറ്റാണ്ടിലേറെ നീണ്ടു നിന്ന കരിയറില്‍ ഏകദേശം 400-ലധികം സിനിമകളില്‍ അഭിനയിച്ചിട്ടുണ്ട്.
രാഷ്ട്രീയ നേതാക്കളും ചലച്ചിത്ര പ്രവര്‍ത്തകരുമടക്കം നിരവധി പേരാണ് അദ്ദേഹത്തിന് ആദരാഞ്ജലി അര്‍പ്പിച്ച് രംഗത്തെത്തിയിരിക്കുന്നത്. ബി.ആര്‍. പന്തുലുവിന്റെ മക്കള രാജ്യ എന്ന ചിത്രത്തിലൂടെ ബാലതാരമായാണ് ഉമേഷ് സിനിമാ ലോകത്തേക്ക് കടക്കുന്നത്.

ഇന്ത്യയുടെ ഊർജ സ്വയംപര്യാപ്തതാ ലക്ഷ്യങ്ങൾക്ക് കരുത്തേകിക്കൊണ്ട്, കേരള-കൊങ്കൺ തീരക്കടലിലെ ആഴമേറിയ പ്രദേശങ്ങളിൽ വൻതോതിലുള്ള എണ്ണയുടെയും പ്രകൃതിവാതകത്തിന്റെയും ശേഖരം കണ്ടെത്തുന്നതിനുള്ള പര്യവേക്ഷണ ഡ്രില്ലിങ്ങിന് തുടക്കമായി. കേന്ദ്ര പൊതുമേഖലാ സ്ഥാപനമായ ഓയിൽ ഇന്ത്യ ലിമിറ്റഡാണ് (OIL) ഈ ദൗത്യത്തിന് നേതൃത്വം നൽകുന്നത്.
കേരളത്തിന്റെ തെക്കേ അറ്റംമുതൽ മഹാരാഷ്ട്ര വരെ നീണ്ടുകിടക്കുന്ന കേരള-കൊങ്കൺ ബേസിനിൽ, പ്രത്യേകിച്ച് കൊല്ലത്തോട് ചേർന്നുള്ള ഭാഗത്താണ് നിലവിൽ പര്യവേക്ഷണം നടക്കുന്നത്.
ഈ സുപ്രധാന നീക്കം കേന്ദ്ര പെട്രോളിയം മന്ത്രി ഹർദീപ് സിങ് പുരി എക്സിലൂടെ സ്ഥിരീകരിച്ചു. “ഊർജ സ്വയംപര്യാപ്തതയിലേക്കുള്ള ഇന്ത്യയുടെ ശ്രമങ്ങൾക്ക് ഇതൊരു വൻ കുതിച്ചുചാട്ടമാണ്,” മന്ത്രി വ്യക്തമാക്കി.

• ഇറക്കുമതി ആശ്രയത്വം കുറയ്ക്കാൻ ലക്ഷ്യം

നിലവിൽ, ഇന്ത്യയുടെ ക്രൂഡ് ഓയിൽ ഉപഭോഗത്തിന്റെ 85-90% വും പ്രകൃതിവാതകത്തിന്റെ 50% വും ഇറക്കുമതിയെയാണ് ആശ്രയിക്കുന്നത്. ആഭ്യന്തര ഉൽപാദനം ഗണ്യമായി വർദ്ധിപ്പിച്ച് ഈ ഇറക്കുമതി ആശ്രയത്വം കുറയ്ക്കുക എന്ന ദേശീയ ലക്ഷ്യത്തിന്റെ ഭാഗമായാണ് കേരള-കൊങ്കൺ മേഖലയിലെ പര്യവേക്ഷണ ശ്രമങ്ങൾ.
അടുത്തിടെ, ആൻഡമാൻ മേഖലയിലും സമാനമായ എണ്ണ-പ്രകൃതിവാതക ശേഖരം പ്രതീക്ഷിക്കുന്ന പ്രദേശങ്ങളിൽ ഇന്ത്യ പര്യവേക്ഷണ നടപടികൾ ആരംഭിച്ചിരുന്നു. കേരള തീരത്തോടടുത്തുള്ള ഈ കണ്ടെത്തൽ യാഥാർത്ഥ്യമാവുകയാണെങ്കിൽ, രാജ്യത്തിന്റെ സാമ്പത്തിക ഭാവിക്കും ഊർജ്ജ സുരക്ഷയ്ക്കും അത് നിർണ്ണായകമായ ഒരു വഴിത്തിരിവാകും.