കൊല്ലത്ത് ഇ എസ് ഐ മെഡിക്കൽ കോളേജ് അനുവദിച്ചതായി കേന്ദ്ര മന്ത്രി മൺസുഖ് മണ്ഡാവിയ പ്രഖ്യാപിച്ചതായി എൻ കെ പ്രേമചന്ദ്രൻ എംപി അറിയിച്ചു. കൊല്ലം ആശ്രാമം ഇ എസ് ഐ മോഡൽ ആൻഡ് സൂപ്പർ സ്പെഷ്യാലിറ്റി ആശുപത്രി മെഡിക്കൽ കോളേജ് ആയി ഉയർത്തണമെന്ന ആവശ്യം എൻ കെ പ്രേമചന്ദ്രൻ എംപി ഇ എസ് ഐ ഡയറക്ടർ ബോർഡിൽ ഉന്നയിച്ചിരുന്നു. തൊഴിലാളികൾക്കായി സ്ഥാപിച്ച പാരിപ്പള്ളി ഇ എസ് ഐ മെഡിക്കൽ കോളേജ് കേന്ദ്ര സർക്കാരിന്റെ നയം മാറ്റിയതിനാൽ സംസ്ഥാന സർക്കാറിന് കൈമാറേണ്ടി വന്നു. കൊല്ലം ഗവൺമെൻറ് മെഡിക്കൽ കോളേജ് ആയി പ്രവർത്തിക്കുന്നത് ഇ എസ് ഐ പണി പൂർത്തിയാക്കിയ മെഡിക്കൽ കോളേജ് ആണ്. ഈ സാഹചര്യത്തിൽ കൊല്ലത്തെ തൊഴിലാളികൾക്കായി പുതിയ ഇ. എസ്. ഐ മെഡിക്കൽ കോളേജ് വേണമെന്ന എം പി യുടെ ആവശ്യം ബോർഡ് തത്വത്തിൽ അംഗീകരിച്ചത്. എന്നാൽ മന്ത്രി ഇന്നാണ് ആ വിവരം ഔദ്യോഗികമായി പ്രഖ്യാപിച്ചത്. ഇ എസ് ഐ ബോർഡ് ചെയർമാൻ കൂടിയായ കേന്ദ്ര തൊഴിൽ വകുപ്പ് മന്ത്രി കൊല്ലത്ത് പുതിയ മെഡിക്കൽ കോളേജ് ആരംഭിക്കുമെന്നാണ് അറിയിച്ചിട്ടുള്ളത്. കൊല്ലത്തിന് പുറമേ മഹാരാഷ്ട്രയിലെ പൂന നാഗ്പൂർ, ഹരിയാനയിലെ മനേസർ, ഗുജറാത്തിലെ സൂറത്ത്, ആന്ധ്രപ്രദേശിലെ വിശാഖപട്ടണം, ഒഡീഷ്യയിലെ ഭുവനേശ്വർ വെസ്റ്റ്, ബംഗാളിലെ അസാൻ സോൾ, ഉത്തർപ്രദേശിലെ പാണ്ഡ്യ നഗർ, ഗോദയിലെ മഗ് ഗോൺ എന്നിവിടങ്ങളിലാണ് മറ്റു മെഡിക്കൽ കോളേജുകൾ. പുതിയ മെഡിക്കൽ കോളേജുകളിലെ പട്ടികയിൽ മഹാരാഷ്ട്രയും ഹരിയാനയും കഴിഞ്ഞാൽ കേരളത്തിലെ കൊല്ലമാണ് ഉൾപ്പെടുത്തിയിട്ടുള്ളത്. കൊല്ലം ആശ്രമം ഇ എസ് ഐ ആശുപത്രി മെഡിക്കൽ കോളേജ് ഉയർത്തുന്നതിന് കൊല്ലത്ത് പുതിയ ഇഎസ്ഐ മെഡിക്കൽ കോളേജ് അനുവദിച്ച കേന്ദ്രമന്ത്രി മൺസൂഖ് മണ്ഡാവ്യയുടെ തീരുമാനത്തെ എൻ കെ പ്രേമചന്ദ്രൻ എംപി സ്വാഗതം ചെയ്തു.

കൊട്ടാരക്കര: കൊട്ടാരക്കര മഹാഗണപതി ക്ഷേത്രത്തില്‍ മേട തിരുവാതിര മഹോത്സവത്തിന് കൊടിയേറി. ഇന്നലെ രാത്രി 7.30ന് ക്ഷേത്രം തന്ത്രി തരണനെല്ലൂര്‍ ഗോവിന്ദന്‍ നമ്പൂതിരിപ്പാടിന്റെയും ക്ഷേത്രം മേല്‍ശാന്തി രതീഷ്‌കുമാര്‍ കുടവട്ടൂര്‍, കീഴ്ശാന്തി നാരായണന്‍ നമ്പൂതിരി എന്നിവരുടെ മുഖ്യ കാര്‍മികത്വത്തില്‍ തൃക്കൊടിയേറ്റ് ചടങ്ങ് നടന്നു.
മെയ് 2ന് ആറാട്ട് ഘോഷയാത്രയോടെ ഉത്സവം സമാപിക്കും. തൃക്കൊടിയേറ്റ് ചടങ്ങിനോടനുബന്ധിച്ച് അവണൂര്‍ ചിഞ്ചിലം ട്രൂപ്പിന്റെ വിശേഷാല്‍ പഞ്ചാരി മേളം ഉണ്ടായിരുന്നു. തൃക്കൊടിയേറ്റ് ചടങ്ങില്‍ ഉപദേശക സമിതി പ്രസിഡന്റ് വി. അനില്‍കുമാര്‍, സെക്രട്ടറി സ്മിത രവി, ദേവസ്വം അഡ്മിനിസ്‌ട്രേറ്റീവ് ഓഫീസര്‍ എസ്. സുഷമ, ഉപദേശക സമിതി അംഗങ്ങള്‍ എന്നിവര്‍ സന്നിഹിതരായിരുന്നു.
ഇന്ന് രാവിലെ 8നും രാത്രി 8നും ശ്രീ ഭൂതബലി എഴുന്നെള്ളത്തും വിളക്കും. വിവിധ കലാപരിപാടികള്‍ക്ക് പുറമെ രാവിലേ 11.30നും വൈകിട്ട് 6.45നും പ്രഭാഷണം. ഉച്ചക്ക് 1ന് അന്നദാനം രാത്രി 8.45ന് ഗാനമേള.

കുണ്ടറ: ഇളമ്പള്ളൂര്‍ ശ്രീമഹാദേവി ക്ഷേത്ര ഉത്സവവുമായി ബന്ധപ്പെട്ട് ഇന്ന് ഉച്ചയ്ക്ക് 3 മുതല്‍ കുണ്ടറയില്‍ ഗതാഗത നിയന്ത്രണം ഏര്‍പ്പെടുത്തി. കിഴക്കേ കല്ലട ഭാഗത്തു നിന്നും വരുന്ന വാഹനങ്ങള്‍ പേരയത്തു നിന്നും ഇടത്തോട്ട് തിരിഞ്ഞ് മുളവന-കുണ്ടറ പള്ളിമുക്ക് വഴി പോകേണ്ടതും, കൊട്ടാരക്കര ഭാഗത്തു നിന്നും കൊല്ലം ഭാഗത്തേക്ക് മറ്റും പോകേണ്ട വാഹനങ്ങള്‍ ആശുപത്രി ജംഗ്ഷനില്‍ നിന്നും ഇടത്തോട്ട് തിരിഞ്ഞ് മോയ്തീന്‍മുക്ക്-കണ്ണനല്ലൂര്‍ വഴി കൊല്ലത്തേക്ക് പോകേണ്ടതും, അഞ്ചാലുംമൂട് ഭാഗത്തു നിന്നും കൊട്ടാരക്കരയ്ക്ക് വരുന്ന വാഹനങ്ങള്‍ സ്റ്റാര്‍ച്ച് മുക്കില്‍ നിന്നും വലത്തോട്ട് തിരിഞ്ഞ് കേരളപുരം-പെരുമ്പുഴ വഴി കുണ്ടറ ആശുപത്രി ജംഗ്ഷന്‍ ഭാഗത്തേക്കും, കൊല്ലം ഭാഗത്തു നിന്നും കൊട്ടാരക്കരയ്ക്ക് വരുന്ന വാഹനങ്ങള്‍ കേരളപുരം ജംഗ്ഷന്‍ കഴിഞ്ഞ് വലത്തോട്ട് തിരിഞ്ഞ് പെരുമ്പുഴ വഴി കുണ്ടറ ആശുപത്രി ജംഗ്ഷന്‍ ഭാഗത്തേക്കും, അഞ്ചാലുംമൂട് ഭാഗത്തു നിന്നും ഭരണിക്കാവിന് പോകുന്ന വാഹനങ്ങള്‍ നാന്തിരിക്കല്‍ ജംഗ്ഷനില്‍ നിന്നും ഇടത്ത് തിരിഞ്ഞ് മൃഗാശുപത്രി ജംഗ്ഷന്‍ കച്ചേരിമുക്ക് വഴി പോകേണ്ടതാണ്. കുണ്ടറ മുക്കട ജംഗ്ഷന്‍ മുതല്‍ ഇളംമ്പള്ളൂര്‍ ഗുരുദേവ ആഡിറ്റോറിയം വരെ വാഹന പാര്‍ക്കിംഗ് അനുവദിക്കില്ല.