ശാസ്താംകോട്ട : മെനാഗപ്പള്ളി ഗ്രാമ പഞ്ചായത്തിൻ്റെ ആഭിമുഖ്യത്തിലും കൃഷിഭവന്റെ മേൽനോട്ടത്തിലും ഒരു കൂട്ടം കൃഷിക്കാർ നടത്തുന്ന തേജസ് കാർഷിക വിപണിയുടെ പ്രവർത്തനം ശ്രദ്ധേയമാകുന്നു. ഏതാനും വർഷങ്ങൾക്ക് മുമ്പാണ് മൈനാഗപ്പള്ളി പബ്ലിക്ക് മാർക്കറ്റിൽ വിപണി പ്രവർത്തനം ആരംഭിച്ചത്. പ്രദേശത്തെ കർഷകരുടെ നാടൻ കാർഷിക വിഭവങ്ങൾ വിൽക്കുവാനും വാങ്ങുവാനും സഹായകരമാകുന്നു എന്നതാണ് വിപണിയുടെ പ്രത്യേകത.
പഴങ്ങൾ ,പച്ചക്കറികൾ, വിവിധ തരം ചീരകൾ, സുഗന്ധവ്യഞ്ജനങ്ങൾ, പാൽ ഉൽപ്പന്നങ്ങൾ, നടീൽ വസ്തുക്കൾ, കിഴങ്ങുവർഗ്ഗങ്ങൾ, വിത്തുകൾ,തൈകൾ, തേൻ, തേൻ ഉൽപ്പന്നങ്ങൾ, താറാവ്, കോഴി, കാട പക്ഷികൾ ഇവയുടെ മുട്ടകൾ, നാടൻ കുളമത്സ്യങ്ങൾ തുടങ്ങി കർഷകരുടെ എല്ലാ നാടൻ കാർഷിക ഉൽപ്പന്നങ്ങളും ഇവിടെ വിൽക്കാനും വാങ്ങാനും കഴിയും. ലേല വ്യവസ്ഥ ആയതിനാൽ ഉൽപ്പാദകർക്ക് പരമാവധി വില ലഭിക്കും എന്ന പ്രത്യേകതയും ഉണ്ട്.
also read:
എല്ലാ ചൊവ്വ, വെള്ളി ദിവസങ്ങളിൽ രാവിലെ 10:30 മുതൽ ലേലം ആരംഭിക്കും. രാവിലെ 8:30 മുതൽ 10:15 വരെ വിൽപ്പനയ്ക്കുള്ള കർഷകരുടെ ഉൽപ്പന്നങ്ങൾ സ്വീകരിക്കും. ഒരു വിപണി ദിവസം എടുക്കുന്ന ഉൽപ്പന്നങ്ങളുടെ വില അടുത്ത വിപണി ദിവസം വിതരണം ചെയ്യും. മൈനാഗപ്പള്ളി പഞ്ചായത്തിലെ കർഷകർ കൂടാതെസമീപ പഞ്ചായത്തുകളിലെ കർഷകർ പോലും ഇവിടെ സാധനങ്ങൾ വിൽപ്പനയ്ക്ക് എത്തിക്കാറുണ്ട്. അതുപോലെ തന്നെ വാങ്ങാനും ഏറെപ്പേര് എത്താറുണ്ട്. ഓണത്തിന് കർഷകർക്ക് ബോണസ് അടക്കമുള്ള അനുകൂല്യങ്ങൾ വിതരണം ചെയ്തു വരുന്നു. എന്നതിനാൽ വിപണിയുടെ പ്രവർത്തനം നാൾക്കുനാൾ മെച്ചപ്പെട്ട് വരികയാണ്. ചിറയ്ക്കുമേൽ ഷാജി പ്രസിഡൻ്റും ഹാഷിർ സെക്രട്ടറിയും ആയുള്ള 15 അംഗ ഭരണസമിതിയാണ് വിപണിയുടെ മേൽനോട്ടം വഹിക്കുന്നത്
