കൃത്യതയോടെയുള്ള പൊതുവിതരണ സംവിധാനം ഉറപ്പാക്കുന്നതിനായി നടത്തിയ പരിശോധനകളിലൂടെ ക്രമക്കേടുകള് കണ്ടെത്തിയ ജില്ലയിലെ റേഷന് കടകള്ക്ക് 11.29 ലക്ഷം രൂപ പിഴചുമത്തി ഈടാക്കിയെന്ന് എ.ഡി.എം ജി. നിര്മല് കുമാര് അറിയിച്ചു. 2025 നവംബര് മുതല് 2026 ജനുവരി വരെ 2,439 റേഷന് കടകള് പരിശോധിച്ച് 444 ക്രമക്കേടുകളാണ് കണ്ടെത്താനായതെന്ന് ദേശീയ ഭക്ഷ്യഭദ്രതാനിയമത്തിന്റെ അടിസ്ഥാനത്തിലുള്ള പ്രവര്ത്തനങ്ങള് വിലയിരുത്തുന്നതിന് ചേമ്പറില് ചേര്ന്ന ജില്ലാ പരാതി പരിഹാര യോഗത്തില് വ്യക്തമാക്കി.
മുന്ഗണനാ റേഷന് കാര്ഡിനുള്ള അപേക്ഷകള് വേഗത്തില് തീര്പ്പാക്കണം. പട്ടികജാതി/വര്ഗ വിഭാഗങ്ങളിലെ അര്ഹരായവരെ ഒഴിവാക്കരുത്. അപേക്ഷകള് ഓണ്ലൈനായി സമര്പ്പിക്കുമ്പോള് അക്ഷയകേന്ദ്രങ്ങള് അമിതനിരക്ക് ഈടാക്കരുത്, പരാതികള് പരിഹരിക്കാന് താലൂക്ക് സപ്ലൈ ഓഫീസര്മാരെ ചുമതലപ്പെടുത്തി. ജില്ലയില് നിലവില് 3,94,169 മുന്ഗണനാ കാര്ഡ് ഉടമകളുണ്ട്, വിശദാംശങ്ങള് റേഷന് കടകളില് പ്രസിദ്ധീകരിച്ചിട്ടുണ്ട്.
സ്കൂള് ഉച്ചഭക്ഷണപദ്ധതി നടപ്പാക്കേണ്ട മാനദണ്ഡങ്ങള് സംബന്ധിച്ച് അധ്യാപകര്ക്കും സ്കൂള് ജീവനക്കാര്ക്കും ബോധവത്ക്കരണം നല്കണം. സ്മാര്ട്ട് പൊതുവിതരണ സംവിധാനം നടപ്പാക്കുന്നതിന്റെ ഭാഗമായി അനര്ഹരെ കണ്ടെത്തി ഒഴിവാക്കണം. ഉന്നതികളില് റേഷന് സാമഗ്രികള് എത്തിക്കുന്ന സഞ്ചരിക്കുന്ന റേഷന് കടകള് വിപുലീകരിക്കുകയുംവേണമെന്ന് നിര്ദേശിച്ചു. ജില്ലാ സപ്ലൈ ഓഫീസര് ജി.എസ് ഗോപകുമാര്, സപ്ലൈകോ, ഭക്ഷ്യസുരക്ഷാ, പൊതുവിതരണം, ലീഗല് മെട്രോളജി വകുപ്പുകളിലെ ഉദ്യോഗസ്ഥര് തുടങ്ങിയവര് പങ്കെടുത്തു.
