ആറ്റുകാൽ പൊങ്കാലയ്ക്കിടെ ഉണ്ടായ വിവാദങ്ങളിൽ മാപ്പ് ചോദിച്ചു നടി അന്നാ രാജൻ. സോഷ്യൽ മീഡിയ പോസ്റ്റിലൂടെയായിരുന്നു താരം ക്ഷമാപണം നടത്തിയത്. ആദ്യമായാണ് പൊങ്കാല ഇടുന്നതെന്നും പൂർണ്ണ ഭക്തിയോടെയായിരുന്നു പൊങ്കാലയിൽ പങ്കെടുത്തതെന്നും നടി വ്യക്തമാക്കി.
ചില ഓൺലൈൻ മാധ്യമങ്ങൾ തന്റെ ചിത്രങ്ങളും ദൃശ്യങ്ങളും അനാവശ്യമായി പ്രചരിപ്പിച്ചുവെന്നും അത് താൻ മാധ്യമങ്ങളെയും ചുറ്റുമുള്ളവരെയും വിശ്വസിച്ചതിന്റെ ഫലമായാണെന്നും അന്നാ രാജൻ പറഞ്ഞു. ഇത് വിശ്വാസികൾക്ക് വേദന ഉണ്ടാക്കിയിട്ടുണ്ടെങ്കിൽ ക്ഷമ ചോദിക്കുന്നുവെന്നും നടി കൂട്ടിച്ചേർത്തു.
ആദ്യമായി ആറ്റുകാൽ ഭഗവതി ക്ഷേത്രത്തിൽ പൊങ്കാല അർപ്പിക്കാൻ എത്തിയതായിരുന്നു നടി അന്ന രാജൻ. എന്നാൽ ഇത് സോഷ്യൽ മീഡിയയിൽ വിവാദമായി മാറുകയായിരുന്നു. സോഷ്യൽ മീഡിയയിൽ പ്രചരിച്ച ചില വീഡിയോകളും ചിത്രങ്ങളും വലിയ വിവാദത്തിന് കാരണമാവുകയായിരുന്നു.
പൊങ്കാലയർപ്പിക്കുന്നതിനിടെ അന്നയുടെ വസ്ത്രധാരണവും ചില നിമിഷങ്ങളും ചിലർ എടുത്ത് മോശമായ രീതിയിൽ എഡിറ്റ് ചെയ്ത് പ്രചരിപ്പിച്ചു. ഇത് ഭക്തരുടെ വികാരങ്ങളെ വ്രണപ്പെടുത്തിയെന്ന വിമർശനങ്ങൾ ഉയർന്നു. സോഷ്യൽ മീഡിയയിൽ നിന്നുള്ള കടുത്ത വിമർശനങ്ങളും സൈബർ ബുള്ളിങും അന്നയെ തുടർന്നത്തോടെയാണ് നടി പ്രതികരണവുമായി രംഗത്തെത്തിയത്. അന്ന രാജൻ വൈകാരിക കുറിപ്പാണ് ഇൻസ്റ്റാഗ്രാമിൽ പോസ്റ്റ് ചെയ്തത്.
ഭക്തർക്ക് വേദനയുണ്ടായെങ്കിൽ ഞാൻ ക്ഷമ ചോദിക്കുന്നു” എന്ന് തുടങ്ങുന്ന കുറിപ്പിൽ തന്റെ വസ്ത്രധാരണമോ പ്രവർത്തനങ്ങളോ ആരെയെങ്കിലും വേദനിപ്പിച്ചെങ്കിൽ ഹൃദയപൂർവ്വം ക്ഷമ ചോദിക്കുന്നുവെന്നും നടി പറയുന്നു.
