കൊച്ചി. കശുവണ്ടി കോര്പ്പറേഷന് അഴിമതി കേസിൽ സര്ക്കാരിന് ഹൈക്കോടതിയുടെ രൂക്ഷ വിമര്ശനം. സര്ക്കാര് അഴിമതിക്കാരെ സംരക്ഷിക്കുന്നുവെന്ന് ഹൈക്കോടതി ഐഎന്ടിയുസി നേതാവ് ആര് ചന്ദ്രശേഖരനെ പ്രൊസിക്യൂട്ട് ചെയ്യാന് അനുമതി നിഷേധിച്ചതാണ് വിമർശനത്തിന് കാരണം.
ഐഎന്ടിയുസി സംസ്ഥാന പ്രസിഡന്റ് ആര് ചന്ദ്രശേഖരന്, കശുവണ്ടി വികസന കോര്പ്പറേഷന് മുന് എംഡി കെ എ രതീഷ് എന്നിവരാണ് പ്രതികള്. ഇരുവര്ക്കുമെതിരെ കുറ്റപത്രം സമര്പ്പിക്കാന് പ്രോസിക്യൂഷന് അനുമതി തേടി സിബിഐ സര്ക്കാരിനെ സമീപിച്ചിരുന്നു. അഴിമതി നിരോധന നിയമം ചുമത്തണമെങ്കില് സര്ക്കാര് പ്രോസിക്യൂഷന് അനുമതി നല്കേണ്ടതുണ്ട്. മൂന്നു തവണ സിബിഐ ആവശ്യപ്പെട്ടിട്ടും സര്ക്കാര് അനുമതി നല്കിയിരുന്നില്ല. കേസ് ഹൈക്കോടതി വീണ്ടും പരിഗണിച്ചപ്പോള് പുനഃപരിശോധിക്കാമെന്ന് സര്ക്കാര് ഉറപ്പു നല്കി. എന്നാൽ കോടതി നിര്ദേശപ്രകാരം പുറത്തിറക്കിയ പുതിയ ഉത്തരവിലും പ്രോസിക്യൂഷന് അനുമതി നല്കിയിരുന്നില്ല. ഇതിലാണ് ജസ്റ്റിസ് ബദറുദ്ദീന് സര്ക്കാരിനെ വിമര്ശിച്ചത്. അഴിമതിക്കാരെ ഇടത് സര്ക്കാര് സംരക്ഷിക്കുന്നത് എന്തിനാണ്. പ്രോസിക്യൂഷന് അനുമതി നല്കാത്തത് എന്തുകൊണ്ടാണ്. നിയമത്തെ അംഗീകരിക്കുന്ന നിലപാടാണ് സര്ക്കാരില് നിന്നും ഉണ്ടാകേണ്ടതെന്ന് കോടതി അഭിപ്രായപ്പെട്ടു.
