കാസര്കോട്: ജീവനൊടുക്കിയ വ്ലോഗര് ചിന്നു പാപ്പുവിന്റെ സുഹൃത്ത് മരിച്ച നിലയില്. കാസര്കോട് മന്നിപ്പാടി സ്വദേശി സന്ദേശ്(29) ആണ് മരിച്ചത്. കഴിഞ്ഞ ചൊവ്വാഴ്ചയാണ് സോഷ്യല്മീഡിയ താരവും ഇന്ഫ്ലുവന്സറുമായ ചിന്നു പാപ്പു എന്ന കെ രേഷ്മയെ ജീവനൊടുക്കിയ നിലയില് കണ്ടെത്തിയത്. വാടക ക്വാര്ട്ടേഴ്സില് തൂങ്ങിയ നിലയിലാണ് മൃതദേഹം കണ്ടെത്തിയത്. രേഷ്മയുടെ മരണത്തിന് പിന്നാലെ സന്ദേശ് മാനസിക സമ്മര്ദത്തിലായിരുന്നുവെന്നാണ് വിവരം. ഇന്ന് ഉച്ചയോടെയാണ് സന്ദേശിനെ മരിച്ച നിലയില് കണ്ടെത്തിയത്.
കാസര്കോട് അഡൂര് സ്വദേശിയാണ് രേഷ്മ. മരണത്തില് പൊലീസ് കേസെടുത്ത് അന്വേഷണം നടത്തിവരികയാണ്. കുടുംബപ്രശ്നങ്ങളെ തുടര്ന്നള്ള മാനസിക വിഷമമാണ് ആത്മഹത്യയ്ക്ക് പിന്നിലെന്നാണ് നിഗമനം. അയല്വാസികളാണ് രേഷ്മയെ തൂങ്ങിയ നിലയില് കണ്ടത്. ഉടന് ആശുപത്രിയിലെത്തിച്ചെങ്കിലും അപ്പോഴേക്കും മരിച്ചിരുന്നു. അഡൂര് ആലന്തടുക്കയിലെ ഗംഗാധരന് ശൈലജ ദമ്പതികളുടെ മകളാണ്. മകന്: ദിഹാന്. സഹോദരങ്ങള്: രതീഷ്, രഞ്ജിത്ത്.
ഇന്സ്റ്റഗ്രാം ഉള്പ്പെടെയുള്ള സോഷ്യല്മീഡിയ പ്ലാറ്റ്ഫോമുകളില് രണ്ടുലക്ഷത്തിലധികം ഫോളോവേഴ്സുള്ള ഇന്ഫ്ലുവന്സറാണ് ചിന്നു പാപ്പു. കാസര്കോടന് ഭാഷയിലുള്ള സംസാരത്തിന് ഏറെ പ്രചാരമാണുണ്ടായിരുന്നത്. പാചക, യാത്രാ വീഡിയോകളാണ് ഏറെയും ചെയ്തിരുന്നത്.
