കൊച്ചി : അവയവദാനത്തില് പുതുചരിത്രം കുറിച്ച് കേരളം. പത്ത് മാസം പ്രായമായ കുഞ്ഞിന്റെ അവയവങ്ങളുമായി ആംബുലന്സ് കൊച്ചിയില് നിന്ന് തിരുവനന്തപുരത്തേക്ക് യാത്ര തിരിച്ചു. എറണാകുളം അമൃത ആശുപത്രിയില് നിന്ന് 7.12ന് യാത്ര തിരിച്ച ആംബുലന്സ് 7.25ന് വൈറ്റില കടന്നു. KL 07 DF 3177 എന്ന നമ്പരിലുള്ള ആംബുലന്സിലാണ് യാത്ര. എറണാകുളം അമൃത ആശുപത്രിയില്നിന്ന് കുന്നുപുറം- ഇടപ്പള്ളി- വൈറ്റില- തൃപ്പൂണിത്തുറ- ഏറ്റുമാനൂര്- കോട്ടയം- അടൂര്- കൊട്ടാരക്കര- കിളിമാനൂര് വഴിയാണ് തിരുവനന്തപുരത്തേക്ക് ആംബുലന്സ് എത്തുക. ?ഗ്രീന് കോറിഡോര് ഒരുക്കിയുള്ള യാത്രയില് പൊലീസ് ഗതാഗതം ക്രമീകരിക്കുന്നുണ്ട്.
തിരുവനന്തപുരം കിംസ് ആശുപത്രിയിലെ ഡോക്ടര് ആംബുലന്സിലുണ്ട്. തൃശൂര് മാള സ്വദേശി ജനീഷ് ആണ് ആംബുലന്സ് ഡ്രൈവര്. തിരുവനന്തപുരം സ്വദേശി ശരത് ആണ് കോ ഡ്രൈവര്.
പത്തനംതിട്ട സ്വദേശികളായ അരുണ് എബ്രഹാം- ഷെറിനും ആന് ജോണിന്റെയും മകള് ആലിന് ഷെറിന് എബ്രഹാമിന്റെ അഞ്ച് അവയവങ്ങളാണ് ദാനം ചെയ്യുന്നത്. കരള്, രണ്ട് വൃക്ക, ഹൃദയവാല്വ്, രണ്ട് നേത്ര പടലങ്ങള് എന്നിവയാണ് ദാനം ചെയ്തത്. സംസ്ഥാനത്ത ഏറ്റവും പ്രായം കുറഞ്ഞ അവയവ ദാതാവാണ് ആലിന്. ഫെബ്രുവരി അഞ്ചിനുണ്ടായ അപകടത്തില് ഗുരുതരമായി പരിക്കേറ്റ് ചികിത്സയില് കഴിഞ്ഞ ആലിന് ഇന്നാണ് മസ്തിഷ്കമരണം സംഭവിച്ചത്. തുടര്ന്ന് കുടുംബം അവയവദാനത്തിന് സമ്മതം പ്രകടിപ്പിക്കുകയായിരുന്നു. കെ-സോട്ടോയുടെ നേതൃത്വത്തിലാണ് അവയവദാനത്തിന്റെ ഏകോപനം നടക്കുന്നത്.
