ശാസ്താംകോട്ട:മൈനാഗപ്പള്ളി ഉദയ ജംഗ്ഷനിൽ വീടിനോട് ചേർന്ന ടൂവീലർ വർക്ക്ഷോപ്പിലേക്ക് നിയന്ത്രണം വിട്ട മാരുതി കാർ ഇടിച്ചു കയറി.മാനിവിള പുത്തൻവീട്ടിൽ രാധാകൃഷ്ണൻ്റെ വീട്ടുമുറ്റത്തുള്ള വർക്ഷോപ്പിൽ കഴിഞ്ഞ ദിവസം രാത്രി 11.30ഓടെയാണ് സംഭവം.അപകടം ഉണ്ടാകുന്നതിന് തൊട്ടു മുൻപ് ഇദ്ദേഹം ഭക്ഷണം കഴിക്കാനായി വീടിനകത്തേക്ക് കയറിയതിനാൽ തലനാരിഴയ്ക്കാണ് രക്ഷപ്പെട്ടത്.

കാർ ഡ്രൈവർക്കും പരിക്കില്ല.മൈനാഗപ്പള്ളി ഭാഗത്തു നിന്നും ശാസ്താംകോട്ടയിലേക്ക് പോകുകയായിരുന്ന ഐസിഎസ് സ്വദേശി ഓടിച്ചിരുന്ന വാഹനമാണ് അപകടം സൃഷ്ടിച്ചത്.അപകടത്തിൽ  അറ്റകുറ്റപണികൾക്കായി സൂക്ഷിച്ചിരുന്ന 9 ബൈക്കുകളും വർക്ക്ഷോപ്പും പൂർണമായും കാർ ഭാഗികമായും തകർന്നു.

ശാസ്താംകോട്ട:ക്ഷീര വികസനവകുപ്പ് ശാസ്താംകോട്ട ബ്ലോക്കിന്റെയും പടിഞ്ഞാറെ കല്ലട കടപ്പാക്കുഴി ക്ഷീരോൽപാദക സഹകരണ സംഘത്തിന്റെയും സംയുക്താഭിമുഖ്യത്തിൽ സംഘടിപ്പിച്ച ക്ഷീരകർഷക സമ്പർക്ക പരിപാടിയും കർഷകർക്കുള്ള കാലിത്തീറ്റയുടെ വിതരണോദ്ഘാടനവും ബ്ലോക്ക്‌ പഞ്ചായത്ത്‌ വികസനകാര്യ സ്റ്റാന്റിംഗ് കമ്മിറ്റി ചെയർമാൻ വി.രതീഷ്‌ നിർവഹിച്ചു.എൻ.യശോധരൻ അദ്ധ്യക്ഷത വഹിച്ചു.സംഘം പ്രവർത്തനങ്ങൾ കർഷകർ അറിഞ്ഞിരിക്കേണ്ടത് – എന്ന വിഷയത്തിൽ ക്ഷീര വികസനഓഫീസർ അനു.ആർ.ബാബുവും,പശു പരിപാലനവും കാലിക രോഗങ്ങളും – എന്ന വിഷയത്തിൽ വെറ്റിനറി ഡോക്ടർ രശ്മിയും,ക്ഷീരകർഷക ക്ഷേമനിധി എന്ന വിഷയത്തിൽ വിഎഫ്ഒ സുനിൽകുമാറും ക്ലാസ്സ്‌ നയിച്ചു.അരവിന്ദാക്ഷൻപിള്ള, ആർ.രാജൻപിള്ള,അരവിന്ദാക്ഷൻ.കെ, സുരേന്ദ്രൻ,മറിയംബീവി,ബിന്ദു എന്നിവർ സംസാരിച്ചു.

പടിഞ്ഞാറേ കല്ലട . തമിഴ്നാട് മെഡിക്കൽ യൂണിവേഴ്സിറ്റിയിൽ നിന്നും2024 ലെ MBBS പരീക്ഷയിൽ   ഒന്നാം റാങ്കിനുള്ള ഗോൾഡ് മെഡലുകളും ചെന്നൈ  ഗവ.കിൽപാക്ക്  മെഡിക്കൽ കോളേജിലെ ബെസ്റ്റ് ഔട്ട് ഗോയിങ് സ്റ്റുഡന്റ് അവാർഡും നേടി പടി.കല്ലടയുടെ  അഭിമാനമായിരിക്കുകയാണ്, ഡോ. അശ്വതി മറിയം വർഗീസ്.

പടി. കല്ലട  വലിയപാടം ഈസ്റ്റ്‌ മംഗലശ്ശേരിൽ വീട്ടിൽ, പ്രശസ്ത മീഡിയ വിഷ്വൽ എഡിറ്റർ  വർഗീസ്  കല്ലടയുടെയും  കേന്ദ്ര വാണിജ്യ മന്ത്രാലയത്തിലെ ഡെപ്യൂട്ടി കൺട്രോളർ ഡോ. ബിന്ദു ജേക്കബിന്റെയും മകളാണ്  ഡോ.അശ്വതി.

തമിഴ്നാട്ടിൽ  സ്കൂൾ മുതൽ  യൂണിവേഴ്സിറ്റി തലം വരെ വിദ്യാർഥികൾക്കായി  നടന്ന  നിരവധി സംസ്ഥാനതല ഇംഗ്ലീഷ് പ്രസംഗമത്സരങ്ങളിൽ  ഒന്നാം സ്ഥാനം  മിക്കപ്പോഴും തേടിയെത്തിയിട്ടുള്ള കല്ലടയുടെ അഭിമാനമാണ് അശ്വതി. ഒപ്പം തന്നെ ചിത്രരചനയിലും ശാസ്ത്രീയ സംഗീതത്തിലുമെല്ലാം കഴിവ് പ്രദർശിപ്പിക്കുന്ന പ്രതിഭ.അടുത്ത ആഴ്ച നടക്കുന്ന മെഡിക്കൽ പി. ജി പരീക്ഷയ്ക്കുള്ള തയ്യാറെടുപ്പിലാണ്, അശ്വതി.

കല്ലടയിലെ മുൻ സർക്കാർ ഉദ്യോഗസ്ഥരുടെ കൂട്ടായ്മ ദ് കോസ്,  ഡോ. അശ്വതിയെ വലിയപാടത്തെ വീട്ടിലെത്തി ഉപഹാരം നൽകി ആദരിച്ചു. പ്രസിഡന്റ്‌ മംഗലത്ത് ഗോപാലകൃഷ്‌ണൻ  അവാർഡ് സമ്മാനിച്ചു.

സെക്രട്ടറി ആർ. അശോകൻ, കിടങ്ങിൽ മഹേന്ദ്രൻ, പി. വിനോദ്, കെ. ടി. ശാന്തകുമാർ, അലങ്ങാട്ട് സഹജൻ, ഡി. ശിവപ്രസാദ്, എസ്. സോമരാജൻ തുടങ്ങിയവർ പങ്കെടുത്തു.

ശാസ്താംകോട്ട
പടിഞ്ഞാറേ കല്ലട മഹിളാ കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ മലയാറ്റൂ മുക്കിൽ പ്രതിഷേധയോഗവും കൺവെൻഷനും നടത്തി…
മഹിളാ കോൺഗ്രസ് സംസ്ഥാന പ്രസിഡന്റ് അഡ്വക്കേറ്റ് ജെബി മേത്തർ നയിക്കുന്ന കേരള യാത്രയുടെ വിജയത്തിനായി പടിഞ്ഞാറേ കല്ലട മഹിള കോൺഗ്രസ് മണ്ഡലം കമ്മിറ്റിയുടെ  ആഭിമുഖ്യത്തിൽ കൺവെൻഷനും പ്രതിഷേധ കൂട്ടായ്മയും നടത്തി. നിത്യോപയോഗ സാധനങ്ങളുടെ വിലക്കയറ്റവും, വൈദ്യുതി ചാർജ്,വെള്ളക്കരം, ഭൂനികുതി വർദ്ധനവ്, കെട്ടിടനികുതി വർദ്ധനവ്, സമസ്ത മേഖലയും തകർത്ത് വനിതകൾ നേതൃത്വം കൊടുക്കുന്ന ആശ സമരം 100 ദിവസം  പിന്നിട്ടിട്ടും ഒത്തുതീർപ്പാക്കാൻ കഴിയാത്ത സംസ്ഥാന ഗവൺമെന്റിന്റെ തെറ്റായ നയത്തിൽ പ്രതിഷേധിച്ചുകൊണ്ടാണ് സമരം സംഘടിപ്പിച്ചത്. മഹിളാ കോൺഗ്രസ് മണ്ഡലം പ്രസിഡന്റ് അംബുജാക്ഷി അമ്മയുടെ അധ്യക്ഷതയിൽ കൂടിയ പ്രതിഷേധയോഗം ഡിസിസി ജനറൽ സെക്രട്ടറി കല്ലട ഗിരീഷ് ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്റ് കടപുഴ മാധവൻ പിള്ള, മഹിളാ കോൺഗ്രസ് നിയോജകമണ്ഡലം പ്രസിഡന്റ് ബീന, ഗീവർഗീസ്, അജിത് ചാപ്രയിൽ, ഗീത, ജയലക്ഷ്മി,ഗീതാ കുമാരി, ശിവരാമ പിള്ള, ലീലാമ്മ പാപ്പച്ചൻ, സതീദേവിയമ്മ, എന്നിവർ പ്രസംഗിച്ചു