കണ്ണൂര്: പാനൂര് വിഷ്ണുപ്രിയ കൊലക്കേസില് കോടതി ഇന്ന് വിധി പ്രസ്താവിക്കും. തലശ്ശേരി അഡീഷണല് ജില്ലാ സെഷന്സ് കോടതിയാണ് വിധി പറയുക. കൂത്തുപറമ്പ് മാനന്തേരി സ്വദേശി ശ്യാംജിത് ആണ് കേസിലെ പ്രതി. പ്രണയനൈരാശ്യത്തിന്റെ പകയില് ശ്യാംജിത് വിഷ്ണുപ്രിയയെ വീട്ടില് കയറി ക്രൂരമായി വെട്ടിക്കൊലപ്പെടുത്തുകയായിരുന്നു.
2022 ഒക്ടോബര് 22 നാണ് നാടിനെ നടുക്കിയ കുറ്റകൃത്യം നടക്കുന്നത്. പാനൂര് വള്ള്യായിലെ വീട്ടില് സുഹൃത്തുമായി വീഡിയോ കോളില് സംസാരിക്കുന്നതിനിടെ കയറി വന്ന ശ്യാംജിത് വിഷ്ണുപ്രിയയെ ചുറ്റിക കൊണ്ട് തലയ്ക്കടിച്ച് വീഴ്ത്തിയ ശേഷം കഴുത്തറത്ത് കൊലപ്പെടുത്തുകയായിരുന്നു.
മരിച്ച ശേഷവും വിഷ്ണുപ്രിയയുടെ ശരീരത്തില് കുത്തിപ്പരിക്കേല്പ്പിച്ചു. 29 മുറിവുകളാണ് യുവതിയുടെ ശരീരത്തിലുണ്ടായിരുന്നത്. ശ്യാംജിത്തുമായുളള സൗഹൃദം വിഷ്ണുപ്രിയ അവസാനിപ്പിച്ചതിന്റെ പകയായിരുന്നു കൊലയ്ക്ക് പ്രേരിപ്പിച്ചത്. വീട്ടുകാര് ഒരു മരണാനന്തര ചടങ്ങില് പങ്കെടുക്കാന് പോയ സമയത്താണ് പ്രതി വിഷ്ണുപ്രിയയുടെ വീട്ടിലെത്തി കൊലപാതകം നടത്തിയത്.
പ്രണയപ്പക: വിഷ്ണുപ്രിയ കൊലക്കേസില് കോടതി വിധി ഇന്ന്
ജെസ്നയുടെ തിരോധാനം, തുടരന്വേഷണം ആവശ്യപ്പെട്ട് ജെസ്നയുടെ പിതാവ് നല്കിയ ഹര്ജിയില് ഇന്ന് വിധി
പത്തനംതിട്ട വെച്ചൂച്ചിറ സ്വദേശി ജെസ്നയുടെ തിരോധാനക്കേസില് തുടരന്വേഷണം ആവശ്യപ്പെട്ട് ജെസ്നയുടെ പിതാവ് നല്കിയ ഹര്ജിയില് കോടതി ഇന്ന് വിധി പ്രസ്താവിക്കും. തിരുവനന്തപുരം സിജെഎം കോടതിയാണ് വിധി പുറപ്പെടുവിക്കുക. കഴിഞ്ഞ ദിവസം കേസുമായി ബന്ധപ്പെട്ട ചില ചിത്രങ്ങള് മുദ്രവെച്ച കവറില് ജെസ്നയുടെ പിതാവ് ജെയിംസ് കോടതിയില് ഹാജരാക്കിയിരുന്നു.
ഇക്കാര്യം സിബിഐ അന്വേഷിച്ചിരുന്നോ എന്ന് കോടതി പരിശോധിക്കും. കേസ് ഡയറി കഴിഞ്ഞ ദിവസം സിബിഐ കോടതിയില് ഹാജരാക്കിയിരുന്നു. ഇവ കൂടി ഒത്തുനോക്കിയ ശേഷമാണ് കോടതി വിധി പുറപ്പെടുവിക്കുക. ജെസ്ന തിരോധാനവുമായി ബന്ധപ്പെട്ട് വിശദമായ അന്വേഷണം നടത്തിയിരുന്നുവെന്നാണ് സിബിഐ കോടതിയെ അറിയിച്ചത്.
5 വർഷം മുൻപ് കാണാതായ ജെസ്ന മരിയയ്ക്ക് എന്തു സംഭവിച്ചു എന്നറിയില്ലെന്നും മരിച്ചോ എന്നു വ്യക്തമല്ലെന്നുമാണ് കോടതിയിൽ സമർപ്പിച്ച അന്തിമ റിപ്പോർട്ടിൽ സിബിഐ വ്യക്തമാക്കിയിരുന്നത്. സിബിഐ റിപ്പോർട്ട് തള്ളി തുടരന്വേഷണം വേണമെന്നും സിബിഐ കണ്ടെത്താത്ത കാര്യങ്ങൾ താൻ സമാന്തര അന്വേഷണത്തിലൂടെ കണ്ടെത്തിയെന്നുമാണ് ജെസ്നയുടെ പിതാവ് ജയിംസിന്റെ വാദം.
മകള് ജീവിച്ചിരിപ്പില്ലെന്നും തന്റെ അന്വേഷണത്തില് കൂടുതല് തെളിവുകള് ലഭിച്ചുവെന്നും അച്ഛന് ജയിംസ് പറയുന്നു. ജെസ്നയുടെ അജ്ഞാത സുഹൃത്തിനെക്കുറിച്ചുള്ള വിവരങ്ങള് കൈമാറിയിരുന്നതായും സൂചിപ്പിച്ചിരുന്നു. തെളിവുകള് നല്കിയാല് അന്വേഷിക്കാമെന്ന് സിബിഐയും വ്യക്തമാക്കിയിരുന്നു. ജസ്നയെ 2018 മാര്ച്ച് 22 ന് കാണാായത്.
പോലീസ് സംരക്ഷണത്തോടെ സംസ്ഥാനത്ത് ഡ്രൈവിങ് ടെസ്റ്റുകള് ഇന്ന് പുനരാരംഭിക്കും….
സംസ്ഥാനത്ത് ഡ്രൈവിങ് ടെസ്റ്റുകള് ഇന്ന് പുനരാരംഭിക്കും. സംയുക്ത സമരസമിതിയുടെ സമരത്തെ തുടർന്ന് കഴിഞ്ഞ ആറു ദിവസമായി ടെസ്റ്റുകൾ മുടങ്ങിയിരുന്നു. ഇന്ന് പൊലീസ് സംരക്ഷണത്തോടെ ടെസ്റ്റുകൾ പുനരാരംഭിക്കാനാണ് ഗതാഗതമന്ത്രി കെബി ഗണേഷ് കുമാറിന്റെ നിർദേശം. അതേസമയം പ്രതിഷേധം ശക്തമാക്കുമെന്ന് സമര സമിതിയും അറിയിച്ചിട്ടുണ്ട്.
സ്ലോട്ട് ലഭിച്ചവർ സ്വന്തം വാഹനവുമായി ടെസ്റ്റിന് എത്തണമെന്നാണ് മോട്ടോർ വാഹനവകുപ്പിന്റെ നിർദേശം. അതിനാൽ സ്ലോട്ട് ലഭിച്ച എല്ലാവരും ഇന്ന് എത്താൻ സാധ്യതയില്ല. മോട്ടോർ വാഹനവകുപ്പിന് സ്വന്തമായി സ്ഥലമുള്ളയിടത്താകും ടെസ്റ്റുകൾ നടക്കുക. മറ്റ് സ്ഥലങ്ങളിൽ തിങ്കളാഴ്ച മാത്രമേ പകരം സൗകര്യം ഒരുങ്ങുകയുള്ളൂ. കെഎസ്ആർടിസിയുടെ സ്ഥലങ്ങളിൽ ഉള്പ്പടെ ടെസ്റ്റ് നടത്താനാണ് തീരുമാനം.
കാട്ടാക്കടയിൽ യുവതി റബർ തോട്ടത്തിൽ മരിച്ച നിലയിൽ കണ്ട സംഭവം; കൊലപാതകമെന്ന് ബന്ധുക്കൾ,ഒപ്പം താമസിച്ചിരുന്നയാൾക്കായി തിരച്ചിൽ
തിരുവനന്തപുരം: കാട്ടാക്കട മുതിയാ വിളയിൽ യുവതിയെ ദുരൂഹ സാഹചര്യത്തിൽ വാടക വീടിന് സമീപം റബർ തോട്ടത്തിൽ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് ബന്ധുക്കൾ. പേരൂർക്കട ഹാർവിപുരം ഭാവന നിലയത്തിൽ മായ മുരളിയാണ്(39) ദുരൂഹ സാഹചര്യത്തിൽ മരിച്ചത്. മായയുടെ ഭർത്താവ് എട്ട് വർഷം മുമ്പ് അപകടത്തിൽ മരിച്ചിരുന്നു. കഴിഞ്ഞ എട്ട് മാസമായി പേരൂർക്കട കുടപ്പനക്കുന്ന് സ്വദേശി രഞ്ജിത്ത് (31) എന്നയാൾക്കൊപ്പമായിരുന്നു മായ മുതിയാവിള കാവുവിളയിൽ വാടകയ്ക്ക് താമസിച്ചിരുന്നത്.
ഇവർ നിയമപരമായി വിവാഹിതരായിട്ടില്ലെന്നാണ് വിവരം. ഇന്നലെ രാവിലെ 11 ഓടെ നാട്ടുകാരാണ് മൃതദേഹം കണ്ടത്. മൃതദേഹത്തിൽ മർദ്ദനമേറ്റതിൻ്റെ പാടുകളും ,കണ്ണിനും മൂക്കിനും ക്ഷതമേറ്റ നിലയിലുമായിരുന്നുവെന്നാണ് വിവരം.ഓട്ടോ ഡ്രൈവർ ആയ രഞ്ജിത്തിനെയും വീട്ടിൽ സ്ഥിരമായി വന്നു പോകാറുള്ള മറ്റൊരാളിനെയും പോലീസ് അന്വേഷിക്കുന്നു. ആദ്യവിവാഹത്തിൽ
മായക്ക് രണ്ട് പെൺകുട്ടികളുണ്ട്.
കൊലപാതകമെന്ന നിഗമനത്തിൽ പോലീസ് അന്വേഷണം തുടങ്ങി. മൃതദേഹം മെഡിക്കൽ കോളജ് മോർച്ചറിയിൽ.
വാർത്താനോട്ടം
2024 മെയ് 10 വെള്ളി
? കേരളീയം ?
? പരിഷ്കരിച്ച സര്ക്കുലര് പ്രകാരം 40 പേരെ മാത്രം പങ്കെടുപ്പിച്ച് ഡ്രൈവിംഗ് ടെസ്റ്റ് നടത്താന് ഉദ്യോഗസ്ഥര്ക്ക് നിര്ദേശം നല്കി സര്ക്കാര്. ആദ്യം റോഡ് ടെസ്റ്റ്, പിന്നീട് ഗ്രൗണ്ട് ടെസ്റ്റ് എന്ന രീതി തുടരും. ടെസ്റ്റിന് തീയതി ലഭിച്ചവര് സ്വന്തം വാഹനവുമായി ഇന്നു മുതല് എത്തണം.
? ബിലീവേഴ്സ് ഈസ്റ്റേണ് ചര്ച്ച് സഭാധ്യക്ഷന് കാലം ചെയ്ത ഡോ. മാര് അത്തനേഷ്യസ് യോഹാന് മെത്രാപ്പൊലീത്തയുടെ ഭൗതികദേഹം സഭാ ആസ്ഥാനമായ തിരുവല്ല കുറ്റപ്പുഴയിലെ സെന്റ് തോമസ് നഗറില് കബറടക്കും. ബിലീവേഴ്സ് ഈസ്റ്റേണ് ചര്ച്ച് സിനഡിന്റേതാണ് തീരുമാനം. എട്ടു മുതല് പത്തു ദിവസത്തിനുള്ളിലാകും ചടങ്ങ് നടക്കുക.
? സംസ്ഥാനത്തെ ഹയര് സെക്കണ്ടറി പരീക്ഷാ ഫലവും വൊക്കേഷണല് ഹയര് സെക്കണ്ടറി പരീക്ഷാ ഫലവും പ്രഖ്യാപിച്ചു. 78.69 ശതമാനമാണ് ഹയര്സെക്കന്ഡറി പരീക്ഷയുടെ വിജയ ശതമാനം. വിഎച്ച്എസ്ഇ പരീക്ഷയില് 71.42ശതമാനമാണ് വിജയം.
? സംസ്ഥാനത്തെ രണ്ടാം വര്ഷ ഹയര് സെക്കണ്ടറി, വൊക്കേഷണല് ഹയര് സെക്കണ്ടറി പരീക്ഷാ ഫലം പുറത്തുവന്നപ്പോള് നൂറുമേനി വിജയം നേടിയ സര്ക്കാര് സ്കൂളുകളുടെ എണ്ണത്തില് കുറവ്. ഇക്കുറി 100 ശതമാനം വിജയം നേടിയത് ഏഴ് സര്ക്കാര് സ്കൂളുകള് മാത്രമാണ്. സര്ക്കാര് സ്കൂളുകളില് 100 ശതമാനം വിജയം നേടിയ സ്കൂള് അധികം ഇല്ലാത്തതില് വിദ്യാഭ്യാസ മന്ത്രി വി ശിവന്കുട്ടി അന്വേഷണം പ്രഖ്യാപിച്ചു.
? തിരുവിതാംകൂര് ദേവസ്വം ബോര്ഡ് ക്ഷേത്രങ്ങളില് അരളിപ്പൂവ് ഒഴിവാക്കാന് തീരുമാനം. നിവേദ്യസമര്പ്പണം, അര്ച്ചന, പ്രസാദം തുടങ്ങിയവയ്ക്ക് അരളിപ്പൂവ് ഇനി മുതല് ഉപയോഗിക്കില്ല എന്നാല് പൂജയ്ക്ക് ഉപയോഗിക്കുന്നതില് തടസമില്ല. തിരുവിതാംകൂര് ദേവസ്വം പ്രസിഡന്റ് പി എസ് പ്രശാന്താണ് ഇക്കാര്യം അറിയിച്ചത്. അരളിക്ക് പകരം പിച്ചിയും തുളസിയുമെല്ലാം ഉപയോഗിക്കും. ഇന്ന് മുതല് തന്നെ തീരുമാനം പ്രാബല്യത്തില് വരും.
? സംസ്ഥാനത്ത് ചൂട് ഇനിയും ഉയരുമെന്നും, ആലപ്പുഴ ജില്ലയില് ഉഷ്ണതരംഗ സാധ്യതയുണ്ടെന്നും കാലാവസ്ഥാ വിഭാഗത്തിന്റെ മുന്നറിയിപ്പ്. സാധാരണയേക്കാള് 3 മുതല് 5 ഡിഗ്രി വരെ താപനില ഉയരും. കൊല്ലം, കോട്ടയം, പത്തനംതിട്ട, എറണാകുളം, കോഴിക്കോട്, കണ്ണൂര് ജില്ലകളില് ഉയര്ന്ന താപനില 37 ഡിഗ്രി വരെയും തിരുവനന്തപുരം, മലപ്പുറം, കാസര്ഗോഡ് ജില്ലകളില് ഉയര്ന്ന താപനില 36 ഡിഗ്രി വരെയും ഉയരാന് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
? വൈദ്യുതി പ്രതിസന്ധിക്കിടെ മേഖല തിരിച്ച് നടത്തിയ വൈദ്യുതി നിയന്ത്രണം ഫലം കണ്ടതിനാല് സംസ്ഥാനത്ത് ലോഡ് ഷെഡ്ഡിങ് വേണ്ടി വരില്ലെന്ന് കെഎസ്ഇബി. നിലവില് വൈദ്യുതി പ്രതിസന്ധി നിയന്ത്രണ വിധേയമാണ്. ഉപഭോഗം കൂടുതലുളള സ്ഥലങ്ങളില് മാത്രം നിയന്ത്രണം തുടരാനും മന്ത്രി കെ കൃഷ്ണന്കുട്ടിയുടെ നേതൃത്വത്തില് ചേര്ന്ന അവലോകന യോഗത്തില് തീരുമാനിച്ചു.
? സംസ്ഥാനത്തെ എല്ലാ സര്ക്കാര് ഓഫിസുകളിലും ക്യാഷ് ഡിക്ലറേഷന് രജിസ്റ്റര് സൂക്ഷിക്കണമെന്ന് പൊതുഭരണ അഡിഷണല് ചീഫ് സെക്രട്ടറിയുടെ സര്ക്കുലര്. ഉദ്യോഗസ്ഥര് ഓഫിസില് ഹാജരാകുന്ന സമയം, അവരുടെ കൈവശമുള്ള തുക എത്ര, വിലപിടിപ്പുള്ള വസ്തുക്കള് എന്തൊക്കെ, എന്നുള്ള വിവരം ഡെയ്ലി ക്യാഷ് ഡിക്ലറേഷന് രജിസ്റ്ററിലോ പേഴ്സണല് ക്യാഷ് ഡിക്ലറേഷന് രജിസ്റ്ററിലോ രേഖപ്പെടുത്തി സൂക്ഷിക്കണമെന്നാണ് നിര്ദേശം.
? കുട്ടിക്കാനത്ത് കാര് കൊക്കയിലേക്ക് മറിഞ്ഞ് രണ്ടുപേര് മരണമടഞ്ഞു. കൊട്ടാരക്കര ദിണ്ടിഗല് ദേശീയപാതയില് മുറിഞ്ഞപുഴക്ക് അടുത്ത് നടന്ന അപകടത്തില് തിരുവനന്തപുരം ആറ്റിങ്ങല് സ്വദേശികളായ സിന്ധു, ഭദ്ര എന്നിവരാണ് മരിച്ചത്. നാല് പേര്ക്ക് പരിക്കേറ്റു. പരിക്കേറ്റവരുടെ ആരോഗ്യനില ഗുരുതരമാണ്.
?? ദേശീയം ??
? പ്രധാനമന്ത്രി നരേന്ദ്രമോദിയേയും കോണ്ഗ്രസ് നേതാവ് രാഹുല്ഗാന്ധിയേയും പൊതുസംവാദത്തിന് ക്ഷണിച്ച് വിരമിച്ച ജഡ്ജിമാരുടെ കത്ത്. സുപ്രീംകോടതി ജഡ്ജിയായിരുന്ന ജസ്റ്റിസ് മദന് ബി. ലോകൂര്, ഡല്ഹി ഹൈക്കോടതിയില്നിന്ന് വിരമിച്ച ജസ്റ്റിസ് എ.പി. ഷാ എന്നിവരാണ് ഇരുവര്ക്കും കത്തയച്ചത്.
? ഇറാന് പിടിച്ചെടുത്ത ചരക്കുകപ്പലിലെ അഞ്ച് ഇന്ത്യക്കാരടക്കം ഏഴു ജീവനക്കാരെകൂടി മോചിപ്പിച്ചു. ഇറാനിലെ ഇന്ത്യന് എംബസി മോചനം സ്ഥിരീകരിച്ചു. ഇന്നലെ വൈകീട്ടോടെ ഇവര് ഇറാനില്നിന്നും പുറപ്പെട്ടെന്നാണ് വിവരം. എന്നാല് അഞ്ചുപേരുടെ പേരുവിവരം ഇറാനോ ഇന്ത്യന് എംബസിയോ പുറത്തുവിട്ടിട്ടില്ല.
? ശിവകാശി പടക്കനിര്മ്മാണ ശാലയില് പൊട്ടിത്തെറി. അഞ്ച് സ്ത്രീകള് അടക്കം 8 പേര് മരിച്ചുവെന്നാണ് വിവരം. ഏഴുപേര്ക്ക് പരിക്കേററ്റിട്ടുണ്ട്. അതില് ഒരാളുടെ നില അതീവ ഗുരുതരമാണ്. അപകടസ്ഥലത്ത് രക്ഷാപ്രവര്ത്തനം തുടരുകയാണ്. മരിച്ച എല്ലാവരും തന്നെ പടക്ക നിര്മ്മാണശാലയിലെ തൊഴിലാളികളാണ് എന്നാണ് റിപ്പോര്ട്ട്.
?പശ്ചിമ ബംഗാളിലെ സന്ദേശ്ഖാലിയിലെ പരാതിക്കാരി ബലാത്സംഗ ആരോപണം നിഷേധിച്ചു. ശൂന്യമായ വെള്ളക്കടലാസില്
തന്നെകൊണ്ട് ഒപ്പിടിക്കുകയായിരുന്നുവെന്നാണ് വെളിപ്പെടുത്തല്. ബിജെപിയുമായി ബന്ധമുള്ളവരാണ് തന്നില് നിന്ന് ഒപ്പിട്ടുവാങ്ങിയതെന്നും പരാതിക്കാരി പറഞ്ഞു.
? ഹരിയാന ബിജെപി സര്ക്കാരിന്റെ രാഷ്ട്രീയ പ്രശ്നങ്ങള്ക്ക് പിന്നാലെ
ഗവര്ണറെ കാണാന് സമയം തേടി കോണ്ഗ്രസ് നേതാക്കള് . ജെജെപി എംഎല്എമാര് പിന്തുണ പിന്വലിച്ചതോടെ നായബ് സിംഗ് സയിനി സര്ക്കാര് ന്യൂനപക്ഷ സര്ക്കാരായെന്നും, ഉടന് രാജിവയ്ക്കണമെന്നും
കോണ്ഗ്രസ് ആവശ്യപ്പെട്ടു.
? ഡല്ഹി മുഖ്യമന്ത്രി അരവിന്ദ് കെജ്രിവാളിന്റെ ജാമ്യ ഹര്ജിയില് സുപ്രീം കോടതി ഇന്ന് ഉത്തരവ് പറയാനിരിക്കെ, കെജ്രിവാളിന് ഇടക്കാല ജാമ്യം നല്കരുതെന്ന ആവശ്യമുന്നയിച്ചുകൊണ്ട് ഇ ഡി സുപ്രീം കോടതിയില് സത്യവാങ്മൂലം സമര്പ്പിച്ചു.
? കര്ഷകസമരത്തില് പങ്കെടുക്കവെ പഞ്ചാബ് അതിര്ത്തിയില് വനിതാ കര്ഷക മരിച്ചു. 22 ദിവസമായി ഖനൌരിയില് തുടരുന്ന ട്രെയിന് തടയല് സമരത്തിനിടെയാണ് സുഖ്മിന്ദര് കൗര് എന്ന കര്ഷക കുഴഞ്ഞുവീണ് മരിച്ചത്.
? ഗവര്ണര് സി വി ആനന്ദബോസിനെതിരെ ലൈംഗികാരോപണം
ഉന്നയിച്ചതിന് പിന്നാലെ, പശ്ചിമ ബംഗാള് രാജ്ഭവനില് ജോലി ചെയ്യുന്ന താല്ക്കാലിക ജീവനക്കാരുടെ വിവരങ്ങള് പരിശോധിച്ച് റിപ്പോര്ട്ട് നല്കാന് രാജ്ഭവന്റെ നിര്ദേശം. നിലവില് ഉള്ള 40 താല്ക്കാലിക ജീവനക്കാര് എന്ത് ജോലി ചെയ്യുന്നു, എത്രകാലമായി രാജ്ഭവനിലുണ്ടെന്നത് അടക്കമുള്ള വിവരങ്ങള് ഉള്പ്പെടുത്തി റിപ്പോര്ട്ട് നല്കാനാണ് നിര്ദേശം നല്കിയിരിക്കുന്നത്.
?? അന്തർദേശീയം ??
? വിദ്യാര്ഥി വിസാനിയമം കര്ശനമാക്കി ഓസ്ട്രേലിയ. രാജ്യത്ത് പ്രവേശിക്കുന്നതിന് വിദ്യാര്ഥികള് അവരുടെ സേവിങ്സ് ആയി കാണിക്കേണ്ട തുക വീണ്ടും ഉയര്ത്തി ഓസ്ട്രേലിയ. 2024 മെയ് 10 മുതല് 29,710 ഓസ്ട്രേലിയന് ഡോളര് അഥവാ 16,29,964 രൂപ അക്കൗണ്ടില് കാണിക്കേണ്ടിവരും. ഏഴു മാസത്തിനിടയില് രണ്ടാം തവണയാണ് വിദ്യാര്ത്ഥികള് അക്കൗണ്ടില് കാണിക്കേണ്ട തുക ഓസ്ട്രേലിയ ഉയര്ത്തുന്നത്. നേരത്തെ 11.5 ലക്ഷമായിരുന്ന തുക കഴിഞ്ഞ ഒക്ടോബറിലാണ് 13.5 ലക്ഷമായി ഉയര്ത്തിയത്.
? മായം കലര്ന്ന 400 ലധികം ഇന്ത്യന് ഭക്ഷ്യ ഉല്പന്നങ്ങള്ക്ക് യൂറോപ്യന് യൂണിയന് നിരോധനം ഏര്പ്പെടുത്തിയതായി റിപ്പോര്ട്ട്. 2019 നും 2024 നും ഇടയില് ഇന്ത്യയില് നിന്ന് ഇറക്കുമതി ചെയ്ത ഭക്ഷ്യവസ്തുക്കള് മായം കലര്ന്നതിനെ തുടര്ന്നാണ് നിരോധിച്ചത്. ഏകദേശം 527 ഉല്പന്നങ്ങളില് കാന്സറിന് കാരണമാകുന്ന എഥിലീന് ഓക്സൈഡ് രാസവസ്തുക്കള് കണ്ടെത്തിയിട്ടുണ്ടെന്നും ചിലതില് വൃക്കകളുടെയും ഹൃദയ സംബന്ധമായ അസുഖങ്ങളുടെയും പ്രധാന കാരണമാകുന്ന മെര്ക്കുറി, കാഡ്മിയം തുടങ്ങിയ ലോഹങ്ങള് കണ്ടെത്തിയിട്ടുണ്ടെന്നും റിപ്പോര്ട്ടുകളുണ്ട്.
? ഖലിസ്താന് വിഘടനവാദിനേതാവ് ഹര്ദീപ് സിങ് നിജ്ജര് വധത്തില് മൂന്ന് ഇന്ത്യന്പൗരന്മാരെ അറസ്റ്റുചെയ്ത നടപടിയില് കാനഡക്ക് രാഷ്ട്രീയതാത്പര്യങ്ങളുണ്ടെന്നും കാനഡ വിഘടനവാദികള്ക്കും തീവ്രവാദികള്ക്കും രാഷ്ട്രീയ ഇടം നല്കുന്നുവെന്നും ഇന്ത്യ വിമര്ശിച്ചു. നിജ്ജറിന്റെ വധവുമായി ബന്ധപ്പെട്ട് എന്തെങ്കിലും പ്രസക്തമായ തെളിവോ വിവരമോ കാനഡ ഇതുവരെ കൈമാറിയിട്ടില്ല.
? അന്താരാഷ്ട്ര ഗുസ്തി സംഘടന ഗുസ്തി താരം ബജ്റംഗ് പൂനിയക്ക് വിലക്ക് ഏര്പ്പെടുത്തി. ഈവര്ഷം അവസാനംവരെ വിലക്ക് നിലനില്ക്കും. ഉത്തേജക മരുന്ന് പരിശോധനയ്ക്ക് വിധേയനാകാന് വിസമ്മതിച്ചതിനെത്തുടര്ന്ന് നേരത്തേ നാഡ ബജ്റംഗിനെ താത്കാലികമായി സസ്പെന്ഡ് ചെയ്തിരുന്നു. പിന്നാലെയാണ് അന്താരാഷ്ട്ര ഗുസ്തി സംഘടനയുടെ വിലക്ക് വന്നത്.
? കായികം ?
? ബംഗ്ലാദേശിനെതിരായ അഞ്ച് മത്സരങ്ങളടങ്ങിയ ടി20 പരമ്പര തൂത്തുവാരി ഇന്ത്യന് വനിതകള്. ഇന്നലെ നടന്ന അവസാന മത്സരത്തില് 21 റണ്സിന്റെ വിജയം കരസ്ഥമാക്കിയ ഇന്ത്യ അഞ്ച് മത്സരങ്ങളും വിജയിച്ച് പരമ്പര തൂത്തുവാരി.
? ഐപിഎല്ലില് പഞ്ചാബ് കിംഗ്സിനെതിരെ റോയല് ചലഞ്ചേഴ്സ് ബംഗളൂരുവിന് 60 റണ്സിന്റെ കൂറ്റന് ജയം. ആദ്യം ബാറ്റ് ചെയ്ത ബാംഗ്ലൂര് 47 പന്തില് 92 റണ്സെടുത്ത വിരാട് കോലിയുടേയും 23 പന്തില് 55 റണ്സെടുത്ത രജത് പട്ടിദാറിന്റേയും 27 പന്തില് 46 റണ്സെടുത്ത കാമറോണ് ഗ്രീനിന്റേയും മികവില് 7 വിക്കറ്റ് നഷ്ടത്തില് 241 റണ്സെടുത്തു.
?മറുപടി ബാറ്റിംഗിനിറങ്ങിയ പഞ്ചാബ് 17 ഓവറില് 181ന് എല്ലാവരും പുറത്തായി. ഇതോടെ12 കളികളില് നിന്ന് 8 പോയിന്റുമായി പ്ലേ ഓഫ് കാണാതെ പുറത്തായിരിക്കുകയാണ് പഞ്ചാബ്. 12 കളികളില് നിന്ന് 10 പോയിന്റുമായി ഏഴാം സ്ഥാനത്താണ് ബാംഗ്ലൂര്
ഉദ്യോഗസ്ഥര് ഓഫിസില് എത്തിയാല് ഇനി ഇക്കാര്യം ഉറപ്പാക്കണം
തിരുവനന്തപുരം: സംസ്ഥാനത്തെ എല്ലാ സര്ക്കാര് ഓഫിസുകളിലും ഉദ്യോഗസ്ഥര് ഓഫിസില് ഹാജരാകുന്ന സമയം കൈവശമുള്ള തുകയെ സംബന്ധിച്ചും വിലപിടിപ്പുള്ള വസ്തുക്കളെ സംബന്ധിച്ചുമുള്ള വിവരം ഡെയ്ലി ക്യാഷ് ഡിക്ലറേഷന് രജിസ്റ്റര്/ പേഴ്സണല് ക്യാഷ് ഡിക്ലറേഷന് രജിസ്റ്ററില് രേഖപ്പെടുത്തി സൂക്ഷിക്കണമെന്നും ഇക്കാര്യം എല്ലാ വകുപ്പു മേധാവികളും ഉറപ്പുവരുത്തണമെന്നും നിര്ദേശിച്ചു പൊതുഭരണ അഡിഷണല് ചീഫ് സെക്രട്ടറി സര്ക്കുലര് പുറപ്പെടുവിച്ചു.
സംസ്ഥാനത്ത് വിജിലന്സ് ആന്ഡ് ആന്റി കറപ്ഷന് ബ്യൂറോ നടത്തിയ മിന്നല് പരിശോധനയില് വിവിധ സര്ക്കാര് ഓഫിസുകളില് ഈ രജിസ്റ്ററുകള് സൂക്ഷിക്കപ്പെടുന്നില്ലെന്നു ശ്രദ്ധയില്പ്പെട്ട സാഹചര്യത്തിലാണു നിര്ദേശം. പണമിടപാട് നടക്കുന്ന സര്ക്കാര് ഓഫീസുകളില് നിര്ബന്ധമായി ഇക്കാര്യം പാലിക്കപ്പെടണമെന്ന നിയമുണ്ടായെഹ്കിലും ആരും അത് ശ്രദ്ധിക്കാറില്ലായിരുന്നു.
എടത്വയില് കെഎസ്ആര്ടിസി ബസിടിച്ച് പരിക്കേറ്റ രണ്ട് സ്കൂട്ടര് യാത്രികരും മരിച്ചു
ആലപ്പുഴ: എടത്വയില് കെഎസ്ആര്ടിസി ബസിടിച്ച് പരിക്കേറ്റ രണ്ട് സ്കൂട്ടര് യാത്രികരും മരിച്ചു. സോമന്, മോഹനന് എന്നിവരാണ് മരിച്ചത്.
എടത്വ-തകഴി സംസ്ഥാന പാതയില് കേളമംഗലം പറത്തറ പാലത്തിന് സമീപതായിരുന്നു ന്നു സംഭവം.ഇന്നലെ രാവിലെ 8 മണിക്കായിരുന്നു അപകടം. ഇടിയുടെ ആഘാതത്തില് സ്കൂട്ടര് നൂറ് മീറ്ററോളം നിരങ്ങി മാറിയാണ് നിന്നത്. സ്കൂട്ടറില് നിന്ന് യാത്രക്കാര് തെറിച്ചു വീണാണ് ഗുരുതര അപകടം സംഭവിച്ചത്.ഇരുവരും തകഴിയിലെ തടിമില്ലിലെ പണിക്കാരാണ് . തിരുവല്ലയിലേക്ക് പോവുകയായിരുന്ന ചേര്ത്തല ഡിപ്പോയിലെ ബസാണ് ഇടിച്ചത്.
മക്കളെ കൊന്നതിനു ശേഷം യുവതി കെട്ടിടത്തിനു മുകളില് നിന്ന് ചാടി ആത്മഹത്യ ചെയ്തു
മക്കളെ കൊന്നതിനു ശേഷം കെട്ടിടത്തിനു മുകളില് നിന്ന് ചാടി ആത്മഹത്യ ചെയ്ത് യുവതി. എട്ടും രണ്ടും വയസ്സ് മാത്രം പ്രായമുള്ള കുട്ടികളെ പൊലീസെത്തിയാണ് വീടിനുള്ളില് മരിച്ച നിലയില് കണ്ടെത്തിയത്. മുപ്പതുകാരിയായ അശ്വനി നികുംഭ് എന്ന യുവതിയാണ് മക്കളെ കൊന്ന് സ്വയം ജീവനൊടുക്കിയതെന്ന് പൊലീസ് വ്യക്തമാക്കി. . മഹാരാഷ്ട്രയിലെ നാസിക് സിറ്റിയിലാണ് സംഭവം. കൊനാര്ക് നഗറിലുള്ള ഹരി വന്ദന് എന്ന അപ്പാര്ട്ട്മെന്റിന്റെ ടെറസില് നിന്നാണ് യുവതി ചാടിയത്. സമീപവാസികള് വിവരം അറിയിച്ചതിനെ തുടര്ന്ന് പൊലീസെത്തിയപ്പോഴാണ് കുട്ടികളെയും മരിച്ച നിലയില് കണ്ടെത്തിയത്.
ഭര്ത്താവ് തന്നെ ഗാര്ഹിക പീഡനത്തിന് ഇരയാക്കിയെന്നും അതുകൊണ്ടാണ് തനിക്ക് ഇങ്ങനെയൊരു തീരുമാനത്തിലേക്ക് എത്തേണ്ടി വന്നതെന്നും ആത്മഹത്യാക്കുറിപ്പില് യുവതി എഴുതിട്ടുണ്ടെന്ന് പൊലീസ് പറഞ്ഞു. ഭര്ത്താവിന് ഒരു വീഡിയോ എടുത്ത് അയച്ച ശേഷമാണ് യുവതി ആത്മഹത്യ ചെയ്തത്.
സംഭവം നടക്കുമ്ബോള് യുവതിയുടെ ഭര്ത്താവ് സ്വപ്നില് ജോലി സംബന്ധമായ ആവശ്യത്തിന് പൂനെയിലായിരുന്നു. ഇയായാള്ക്കും ബന്ധുക്കള്ക്കും തന്റെ മരണ കാരണത്തെക്കുറിച്ച് വിഡിയോ എടുത്ത് അയച്ചശേഷമാണ് യുവതി ആത്മഹത്യ ചെയ്തത്. തന്റെയും മക്കളുടെയും മരണത്തിന്റെ പൂര്ണ ഉത്തരവാദിത്വം ഭര്ത്താവിനു മാത്രമാണെന്നാണ് യുവതി വീഡിയോയില് പറഞ്ഞിരിക്കുന്നത്
ദാഹം ശമിപ്പിക്കാനും ദേഹം തണുക്കാനും സർബത്ത് ആളൊരു മിടുക്കനാണേ
ഈ ഉഷ്ണ സമയത്ത് സര്ബത്തിനെ ആരും ഓര്ത്തുപോകും, ആടിലെ ചൂടന് സര്ബത്ത് ഷമീറിനെയല്ല. നമ്മുടെ നന്നാറി സര്ബത്തിനെ. ഇത്ര ആരോഗ്യദായകമായ പാനീയം നമ്മുടെ നാട്ടില് ഉള്ളപ്പോഴാണ് സോഫ്റ്റ് ഡ്രിങ്കുകള് വാങ്ങി നാം ദേഹം കേടാക്കുന്നത്. . പലർക്കും അറിയാം ചൂടേറുമ്പോൾ ദാഹം ശമിപ്പിക്കാനും ദേഹം തണുക്കാനും സർബത്ത് ആളൊരു മിടുക്കനാണേ. വീട്ടിലും നാടൻ സർബത്ത് ഉണ്ടാക്കാം
ചേരുവകൾ :
നമ്മുടെ പറമ്പുകളിൽ കാണുന്ന നന്നാറിയുടെ വേര് (ആങ്ങാടി മരുന്നു കടകളിലും ലഭിക്കും ) പച്ചവെള്ളത്തിൽ കഴുകി. കഷ്ണങ്ങളാക്കിയത് ഒരു ചെറിയ കപ്പ്, പഞ്ചസാര ഒരു കിലോ, വെള്ളം രണ്ട് ലിറ്റർ .
പാകം ചെയ്യുന്ന വിധം:
ഒരു ചെറിയ കപ്പ് പഞ്ചസാര ഒരു പാനിൽ എടുത്ത് കുറഞ്ഞ തീയിൽ വറക്കുക . പഞ്ചസാരയുടെ നിറം മാറി അലിഞ്ഞ് രൂപത്തിലാകുമ്പോൾ അതിൽ ഒരു ലിറ്റർ വെള്ളം ചേർക്കുക . വെള്ളം തിളയ്ക്കാറാകുമ്പോൾ എടുത്തുവച്ച പഞ്ചസാര മുഴുവൻ വെള്ളത്തിൽ ചേർക്കുക ബാക്കിയുള്ള ഒരു ലിറ്റർ വെള്ളവും ഈ സമയം ഒഴിക്കാം. വെള്ളം തിളയ്ക്കുമ്പോൾ നന്നാറി ചെറിയ കഷ്ണങ്ങളാക്കി മുറിച്ചതു കൂടി ചേർത്ത് അൽപസമയം നന്നായി ഇളക്കുക . നന്നാറിയുടെ ഗന്ധവും രുചിയും ചേർന്നോ എന്ന് രുചിച്ച് നോക്കുക, ഇല്ലെങ്കിൽ അൽപം കൂടി നന്നാറി ചേർത്ത് തിളപ്പിക്കാവുന്നതാണ്. ശേഷം ഇവ അരിച്ചെടുത്ത് മറ്റോരു കുപ്പിയിലേക്ക് ആക്കി സൂക്ഷിക്കുക . ഇതിൽ നിന്ന് കാൽ ഗ്ലാസ് സർബത്ത് എടുത്ത് നാരങ്ങ പിഴിഞ്ഞ് വെള്ളമോ സോഡയോ ചേര്ത്ത് ഉപയോഗിക്കാം. ദാഹം മാറുമെന്ന് മാത്രമല്ല ദേഹരക്ഷയുമാകാം.
ഗ്യാസ്കുറ്റി വരില്ല, ഡ്രൈവർമാരുടെ സമരത്തിൽ പരിഹാരം നീളുന്നു
കൊച്ചി. അമ്പലമുകൾ ബിപിസിഎല്ലിലെ ഡ്രൈവർമാരുടെ പണിമുടക്ക് സമരത്തിൽ പരിഹാരമായില്ല. കൂലി തർക്കത്തെ തുടർന്ന് ഡ്രൈവറെ മർദ്ദിച്ചതിൽ പ്രതിഷേധിച്ച് ഇന്നലെ ആരംഭിച്ച സമരം ഇന്നും തുടരും. അനുനയ ചർച്ചകൾക്ക് അധികൃതർ തയ്യാറാകാത്തതിനെ തുടർന്നാണ് സമരം തുടരുന്നത്. 170 ലോറികളിലെ 200ലധികം വരുന്ന ഡ്രൈവർമാരാണ് സമരത്തിൽ പങ്കെടുക്കുന്നത്. ഇതോടെ ബിപിസിഎല്ലിൽ നിന്നുള്ള പാചകവാതക സിലിണ്ടറുകളുടെ നീക്കം പൂർണമായും നിലച്ചു. 7 ജില്ലകളെയാണ് പ്രശ്നം ബാധിക്കുക. സമരം ഒരു ദിവസം പിന്നിട്ടതോടെ ദിവസേന ലോഡ് എത്തുന്ന ഗ്യാസ് ഏജൻസികളിൽ പുതിയ സിലിണ്ടറുകളുടെ ക്ഷാമം രൂക്ഷമാകും. മുന്നോട്ടുവെക്കുന്ന ആവശ്യങ്ങൾ പൂർണ്ണമായും അംഗീകരിക്കാതെ സമരത്തിൽ നിന്ന് പിന്നോട്ടില്ല എന്നാണ് ഡ്രൈവർമാരുടെ നിലപാട്