ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്റ്‌സ് അസോസിയേഷന്റെ നേതൃത്വത്തില്‍ കേരളത്തിലെ 4700 സ്വര്‍ണ്ണ വ്യാപാരികളെ പങ്കാളികളാക്കി ഓഗസ്റ്റ് ഒന്നു മുതല്‍ ഒക്ടോബര്‍ 31 വരെ നടത്തിയ ഓണം സ്വര്‍ണ്ണോത്സവം-2024 ന്റെ ബംബര്‍ നറുക്കെടുപ്പില്‍ സമ്മാനാര്‍ഹമായവര്‍ക്കുള്ള സമ്മാന വിതരണ സമ്മേളനം മന്ത്രി കെ.എന്‍. ബാലഗോപാല്‍ ഉദ്ഘാടനം ചെയ്തു. ബംബര്‍ സമ്മാനാര്‍ഹമായ 100 പവന്‍ സ്വര്‍ണം കൊല്ലം ജില്ലയിലെ ചടയമംഗലം സ്വദേശി രഞ്ജിത്ത് രാജിന് മന്ത്രി സമ്മാനിച്ചു.
കേരളത്തിലെ സ്വര്‍ണ വ്യാപാര മേഖലയെ സംരക്ഷിക്കുന്ന നിലപാടാണ് സര്‍ക്കാര്‍ സ്വീകരിക്കുന്നതെന്ന് ധനമന്ത്രി കെ.എന്‍ ബാലഗോപാല്‍. പരിശോധനകള്‍ സാധാരണ നടപടി മാത്രമാണ്. റെയ്ഡുകളില്‍ നിയമവിരുദ്ധ പ്രവര്‍ത്തികള്‍ ഉണ്ടെങ്കില്‍ അത് പരിശോധിക്കുമെന്ന് മന്ത്രി പറഞ്ഞു. ഈ വേ ബില്ല് നടപ്പാക്കുമ്പോള്‍ പരിധി ഉയര്‍ത്തുന്നത് പരിഗണനയിലുണ്ടെന്ന് അദ്ദേഹം പറഞ്ഞു. സ്വര്‍ണ്ണ വ്യാപാര മേഖലയിലെ പ്രശ്‌നങ്ങള്‍ സമ്പൂര്‍ണ്ണ ബജറ്റ് സമ്മേളനത്തിന് മുമ്പായി സ്വര്‍ണ്ണ വ്യാപാര അസോസിയേഷനുമായി ചര്‍ച്ച നടത്തുമെന്ന് അദ്ദേഹം അറിയിച്ചു.
ജില്ലാ പ്രസിഡന്റ് അഡ്വ. എസ്. അബ്ദുല്‍ നാസര്‍ അധ്യക്ഷത വഹിച്ചു. കുടുംബ സംഗമം, സ്വര്‍ണ്ണ വ്യാപാരികളെ ആദരിക്കല്‍, വിദ്യാര്‍ഥികള്‍ക്കുള്ള മെറിറ്റ് അവാര്‍ഡ്, കലാപരിപാടികള്‍ തുടങ്ങിയവയും ഉണ്ടായിരുന്നു. ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്റ്‌സ് അസോസിയേഷന്‍ സംസ്ഥാന ജനറല്‍ സെക്രട്ടറി കെ. സുരേന്ദ്രന്‍,വൈസ് പ്രസിഡണ്ട് ബി. പ്രേമാനന്ദ്, എംഎല്‍എ മാരായ എം.നൗഷാദ്, പി.സി. വിഷ്ണുനാഥ്, സി.ആര്‍. മഹേഷ്,
വ്യാപാരി വ്യവസായി ഏകോപന സമിതി ജില്ലാ പ്രസിഡന്റ് എസ്.ദേവരാജന്‍ അസോസിയേഷന്‍ സംസ്ഥാന വര്‍ക്കിംഗ് പ്രസിഡന്റ് പി.കെ. അയമു ഹാജി, വൈസ് പ്രസിഡണ്ട് നവാസ് പുത്തന്‍വീട്, ഓണം സ്വര്‍ണ്ണോത്സവം കമ്മിറ്റി ചെയര്‍മാന്‍ അബ്ദുല്‍ അസീസ് ഏര്‍ബാദ് സംസ്ഥാന സെക്രട്ടറിമാരായ സി. എച്ച്.ഇസ്മായില്‍ എസ്. പളനി, താനെ കൗണ്‍സില്‍ അംഗങ്ങളായ എസ്. സാദിഖ്, വിജയ കൃഷ്ണ വിജയന്‍, ഖലീല്‍ കുരുപോലില്‍, നാസര്‍ പോച്ചയില്‍, ലിബി മുഴയില്‍, എന്‍ ടി കെ. ബാപ്പു, എം സി. ദിനേശന്‍, അനില്‍കുമാര്‍ തലശ്ശേരി, കണ്ണന്‍ മഞ്ജു, തുടങ്ങിയവര്‍ പ്രസംഗിച്ചു.

കൊല്ലം: നഗരത്തില്‍ പോലീസ് നടത്തിയ രാത്രികാല പരിശോധനയില്‍ നിരോധിത മയക്കുമരുന്നായ എംഡിഎംഎയുമായി യുവാവ് പിടിയിലായി. തൃക്കോവില്‍വട്ടം ചേരികോണം ലക്ഷംവീട് കോളനിയില്‍ സുധീഷ് ഭവനില്‍ സുധീഷ് (20) ആണ് കൊല്ലം ഈസ്റ്റ് പോലീസിന്റെ പിടിയിലായത്. കൊല്ലം റെയില്‍വേ സ്റ്റേഷന് സമീപമുള്ള ബസ് സ്റ്റോപ്പില്‍ ഈസ്റ്റ്
പോലീസ് പരിശോധന നടത്തി വരവെ സംശയാസ്പദമായി എത്തിയ ഇരുചക്രവാഹന യാത്രികനായ യുവാവില്‍ നിന്ന് 51 മില്ലീഗ്രാം എംഡിഎംഎ കണ്ടെടുക്കുകയായിരുന്നു. സയന്റിഫിക്ക് കിറ്റ് ഉപയോഗിച്ച് പരിശോധിച്ചതിലാണ് ഇയാള്‍ ധരിച്ചിരുന്ന പാന്റിന്റെ പോക്കറ്റില്‍ നിന്ന് ലഹരിമരുന്ന് കണ്ടെടുത്തത്.
കൊല്ലം എസിപി ഷെരിഫിന്റെ നിര്‍ദേശാനുസരണം കൊല്ലം ഈസ്റ്റ് പോലീസ് ഇന്‍സ്‌പെക്ടര്‍ അനില്‍കുമാറിന്റെ നേതൃത്വത്തില്‍ എസ്‌ഐമാരായ ഷബ്‌ന, ഷൈജു, സിപിഒമാരായ ജയകൃഷ്ണന്‍, ഷൈന്‍ എന്നിവരും ഡാന്‍സാഫ് എസ്‌ഐ രാജേഷും കൊല്ലം സിറ്റി ഡാന്‍സാഫ് ടീം അംഗങ്ങളും ചേര്‍ന്നാണ് പ്രതിയെ പിടികൂടിയത്.

കൊട്ടാരക്കര: കേരളത്തിലെ കെഎസ്ആര്‍ടിസി ബസ് സ്റ്റേഷനുകളിലെ നവീകരിച്ച ആദ്യത്തെ സുലഭ് കംഫര്‍ട്ട് സ്റ്റേഷന്റെ പ്രവര്‍ത്തനം കൊട്ടാരക്കര കെഎസ്ആര്‍ടിസി ബസ് സ്റ്റേഷനില്‍ ആരംഭിച്ചു. ധനകാര്യ മന്ത്രി കെ.എന്‍. ബാലഗോപാല്‍ ഉദ്ഘാടനം ചെയ്തു. കൊട്ടാരക്കര നഗരസഭ ചെയര്‍മാന്‍ എസ്.ആര്‍. രമേശ് അധ്യക്ഷനായി.
ആധുനിക രീതിയിലാണ് കംഫര്‍ട്ട് സ്റ്റേഷന്‍ സുലഭ് എന്ന ഇന്റര്‍നാഷണല്‍ കമ്പനി നവീകരിച്ചിരിക്കുന്നത്. ഏറെ നാളായി വളരെ ശോചനീയാവസ്ഥയിലായിരുന്നു കൊട്ടാരക്കര കെഎസ്ആര്‍ടിസി ഉള്‍പ്പടെയുള്ള ജില്ലയിലെ മിക്ക സ്റ്റേഷനുകളിലേയും കംഫര്‍ട്ട് സ്റ്റേഷനുകള്‍. കേരളത്തിലെ 41 കെഎസ്ആര്‍ടിസി സ്റ്റേഷനുകളില്‍ കംഫര്‍ട്ട് സ്റ്റേഷനുകള്‍ ആധുനിക രീതിയില്‍ നവീകരിക്കാനുള്ള നിര്‍മാണ ചുമതല സുലഭ് കമ്പനിയെ കെഎസ്ആര്‍ടിസി ഏല്‍പ്പിച്ചു കഴിഞ്ഞു.
ക്ലോക്ക്‌റൂം, വാട്ടര്‍ ഫില്‍റ്റര്‍ ഉള്‍പ്പടെയുള്ള സജ്ജീകരണങ്ങള്‍ കൊട്ടാരക്കര ബസ് സ്റ്റേഷനില്‍ ഒരുക്കിയിട്ടുണ്ട്. കെഎസ്ആര്‍ടിസി മാനേജിങ് ഡയറക്ടര്‍ പി.എസ്. പ്രമോജ് ശങ്കര്‍ ഐഎഫ്ഒഎസ്, സുലഭ് ഇന്റര്‍നാഷണല്‍ കണ്‍ട്രോളര്‍ അവിനാഷ് കുമാര്‍ തിവാരി, അസിസ്റ്റന്റ് ട്രാന്‍സ്പോര്‍ട് ഓഫീസര്‍ ബി. അജിത്കുമാര്‍, ഡിപ്പോ എഞ്ചിനീയര്‍ എസ്. ശ്രീകാന്ത്, സുലഭ് കോഡിനേറ്റര്‍ മിനി ബാബു എന്നിവര്‍ സംസാരിച്ചു.