തേക്കിൻകാട് മൈതാനത്ത് ഉണ്ടായ കൊലപാതകം. പ്രതികളായ വിദ്യാർത്ഥികൾ ലഹരിക്ക് അടിമകൾ

January 1, 2025

തൃശ്ശൂർ.പുതുവത്സര രാത്രി തേക്കിൻകാട് മൈതാനത്ത് ഉണ്ടായ കൊലപാതകം. പ്രതികളായ വിദ്യാർത്ഥികൾ ലഹരിക്ക് അടിമകൾ. കൊലയ്ക്ക് ഉപയോഗിച്ച കത്തി വിദ്യാർഥികളുടെ തന്നെ. കുത്തേറ്റ് മരിച്ച യുവാവിന്‍റെ കത്തി പിടിച്ചുവാങ്ങി പ്രാണരക്ഷാര്‍ത്ഥം കുത്തി എന്ന പ്രചരണം അടിസ്ഥാനരഹിതമെന്നാണ് കണ്ടെത്തല്‍. തൃശൂർ പാലിയം റോഡ് സ്വദേശി ലിവിൻ (30) ആണ് കൊല്ലപ്പെട്ടത്. സംഭവത്തില്‍ 14 വയസുകാരനെ പൊലീസ് കസ്റ്റഡിയിലെടുത്തു. ഒമ്പതാം ക്ലാസ് വിദ്യാർത്ഥിയാണ്. മദ്യലഹരിയിൽ ലിവിൻ ആക്രമിച്ചെന്ന് 14 കാരൻ പൊലീസിന് മൊഴി നല്‍കി. എന്നാല്‍ ഇത് തെറ്റെന്നാണ് തെളിയുന്നത്. പെണ്‍കുട്ടിയുമായി അസമയത്ത് ഇരുന്നത് ചോദ്യം ചെയ്ത ഗുവാവിനെ ആക്രമിക്കുകയായിരുന്നു. കഞ്ചാവ് ഉപയോഗിച്ചത് ചോദ്യം ചെയ്തുവെന്നും വിവരമുണ്ട്.

പതിവ് പ്രശ്നകാരികളായ ഇവരെ ഒമ്പതാം ക്ലാസിൽ വച്ച് മുമ്പ് സ്കൂളിൽ നിന്നും പുറത്താക്കപ്പെട്ടിരുന്നു. സഹപാഠിയെ കത്തി കാട്ടി ഭീഷണിപ്പെടുത്തിയതിന്റെ പേരിലായിരുന്നു നടപടി.

15കാരിയെ കാണാതായിട്ട് 48 മണിക്കൂർ പിന്നിട്ടു

January 1, 2025

പാലക്കാട്‌. വലപ്പുഴയിൽ 15കാരിയെ കാണാതായിട്ട് 48 മണിക്കൂർ പിന്നിട്ടു. ചൂരക്കോട് സ്വദേശി അബ്ദുൾ കരീമിൻ്റെ മകൾ ഷഹാനാ ഷെറിനെയാണ് കാണാതായത്. കൊടുമുണ്ടയിലുള്ള ബന്ധു വീട്ടിൽ പുസ്തകങ്ങൾ എടുത്ത് വരാമെന്ന് സുഹൃത്തിനോട് പറഞ്ഞാണ് ട്യൂഷൻ സെന്ററിൽ നിന്ന് പോയത്.കുട്ടി പട്ടാമ്പി റെയിൽവേ സ്റ്റേഷന് സമീപം എത്തിയതിൻ്റെ ദൃശ്യങ്ങൾ പൊലീസ് കണ്ടെത്തി. പട്ടാമ്പി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പട്ടാമ്പി പോലീസിന്റെ അന്വേഷണം പുരോഗമിക്കുന്നു

സനാതന ധർമ്മ വിവാദം,മുഖ്യമന്ത്രിക്കെതിരെ ബിജെപി

January 1, 2025

ന്യൂഡെല്‍ഹി.സനാതന ധർമ്മ വിവാദം,മുഖ്യമന്ത്രി പിണറായി വിജയനെതിരെ ബിജെപി. മുഖ്യമന്ത്രിയുടെ പ്രസ്താവന വോട്ട് ബാങ്ക് ലക്ഷ്യമിട്ടെന്ന് ബിജെപി ദേശീയ വക്താവ് ഷെഹ്സാദ് പൂനെവാല. തീവ്ര നിലപാടുകാരുടെ വോട്ട് തിരിച്ചുപിടിക്കാനാണ് പിണറായി വിജയൻറെ പ്രസ്താവന. ഹിന്ദു വിശ്വാസത്തെയും സനാതന ധർമ്മത്തെയും അവഹേളിക്കുന്നു.

അതുപോലെതന്നെ ശിവഗിരിയില്‍ പിണറായിയും മന്ത്രി എംബി രാജേഷും നടത്തിയ പ്രസംഗങ്ങള്‍ ജാതീയമായ പ്രകോപനം സൃഷ്ടിക്കുന്നു എന്നാക്ഷേപമുണ്ട്. പോയവര്‍ഷം ശിവഗിരിയില്‍ ശ്രീശങ്കരാചാര്യര്‍ക്കെതിരെ പ്രസംഗിതച്ചു എന്ന് എംബി രാജേഷിനെതിരെ ആക്ഷേപമുയര്‍ന്നതാണ്. ഈവര്‍ഷം ശ്രീനാരായണഗുരുവാണ് കേരളത്തിലെ മികച്ച സന്യാസി എന്നതരത്തില്‍പ്രസംഗിച്ചത് ഇതരജാതിക്കാരില്‍ അനിഷ്ടമുണ്ടാക്കിയിട്ടുണ്ട്. പിന്നാലെ ഇത് മനപൂര്‍വമാണെന്ന് തോന്നിക്കത്തക്ക തരത്തില്‍ മുഖ്യമന്ത്രിയും സമാനപ്രസ്ഥാവനയുമായി മുന്നോട്ടുവന്നു.

പാചകവാതക സിലിണ്ടറിന്റെ വില കുറച്ചു

January 1, 2025

ന്യൂഡല്‍ഹി: പുതുവര്‍ഷത്തില്‍ വാണിജ്യ ആവശ്യത്തിനുള്ള പാചകവാതക സിലിണ്ടറിന്റെ വില കുറച്ചു. 19 കിലോ സിലിണ്ടര്‍ വില 14.50 രൂപയാണ് എണ്ണ വിതരണ കമ്പനികള്‍ കുറച്ചത്. റെസ്‌റ്റോറന്റുകള്‍ക്കും കാറ്ററിങ് സര്‍വീസ് നടത്തുന്നവര്‍ക്കുമാണ് ഇത് ഏറ്റവുമധികം പ്രയോജനം ചെയ്യുക.

തുടര്‍ച്ചയായി അഞ്ചു മാസം വില വര്‍ധിപ്പിച്ച ശേഷമാണ് ആദ്യമായി വിലയില്‍ കുറവ് വരുത്തിയത്. അഞ്ചുമാസം കൊണ്ട് 173 രൂപയുടെ വര്‍ധനയാണ് വരുത്തിയത്. വില കുറച്ചതോടെ ഡല്‍ഹിയില്‍ വാണിജ്യ സിലിണ്ടറിന്റെ വില 1804 രൂപയായി. മുംബൈ 1756, ചെന്നൈ 1966, കൊല്‍ക്കത്ത 1911 എന്നിങ്ങനെയാണ് പുതിയ നിരക്ക്. പുതുക്കിയ നിരക്ക് ഇന്നുമുതൽ പ്രാബല്യത്തിൽ വന്നു. ഗാർഹിക ആവശ്യത്തിനുള്ള പാചകവാതക സിലിണ്ടറിന്റെ വിലയിൽ മാറ്റം വരുത്തിയിട്ടില്ല.

ഇരുചക്ര വാഹനത്തിൽ കാട്ടുപന്നിയിടിച്ച് രണ്ടു പേർക്ക് പരുക്ക്

January 1, 2025

കണ്ണൂർ. ആറളത്ത് ഇരുചക്ര വാഹനത്തിൽ കാട്ടുപന്നിയിടിച്ച് രണ്ടു പേർക്ക് പരുക്ക്.കീഴ്പ്പള്ളി സ്വദേശികളായ തെക്കെടത്ത് ജിനു അലക്സ്‌, പിതാവ് അലക്സ്‌ എന്നിവർക്കാണ് പരുക്കേറ്റത്.ആറളത്ത് റബർ ടാപ്പിങ്ങിന് പോകുന്നതിനിടെയാണ് ഇവരുടെ ബൈക്കിൽ കാട്ടുപന്നി ഇടിച്ചത്.റോഡിൽ തെറിച്ച് വീണ ഇരുവർക്കും സാരമായി പരുക്കേറ്റു

ഇരുവരെയും കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു

തലമുടി കൊഴിച്ചില്‍ തടയാന്‍ പരീക്ഷിക്കേണ്ട ഹെയര്‍ പാക്കുകള്‍

January 1, 2025

തലമുടി കൊഴിച്ചില്‍ തടയാനും മുടി വളരാനും പരീക്ഷിക്കേണ്ട മുട്ട കൊണ്ടുള്ള ചില ഹെയര്‍ പാക്കുകളെ പരിചയപ്പെടാം.

പ്രോട്ടീൻ, ബയോട്ടിൻ, ഫാറ്റി ആസിഡ്, വിറ്റാമിനുകള്‍ തുടങ്ങി തലമുടിയുടെ ആരോഗ്യത്തിന് വേണ്ട നിരവധി പോഷകങ്ങള്‍ അടങ്ങിയതാണ് മുട്ട. തലമുടി കൊഴിച്ചില്‍ തടയാനും മുടി വളരാനും പരീക്ഷിക്കേണ്ട മുട്ട കൊണ്ടുള്ള ചില ഹെയര്‍ പാക്കുകളെ പരിചയപ്പെടാം.

മുട്ട + ഒലീവ് ഓയില്‍

ഒരു മുട്ടയും മൂന്ന് ടീസ്പൂണ്‍ ഒലീവ് ഓയിലും മിശ്രിതമാക്കി തലയോട്ടിയിലും മുടിയിഴകളിലും നന്നായി തേച്ചുപിടിപ്പിക്കുക. 30 മിനിറ്റിന് ശേഷം തല കഴുകണം. തലമുടി കൊഴിച്ചില്‍ തടയാനും മുടിക്ക് തിളക്കവും കരുത്തും ലഭിക്കാനും ഇത് സഹായിക്കും.

മുട്ട + പഴം

ഒരു മുട്ടയുടെ വെള്ള, രണ്ട് ടേബിൾസ്പൂൺ പഴുത്ത പഴം എന്നിവ മിശ്രിതമാക്കി തലയോട്ടിയിലും തലമുടിയിലും പുരട്ടാം. 30 മിനിറ്റിന് ശേഷം ചെറുചൂടുവെള്ളത്തില്‍ തല കഴുകണം.

മുട്ട + കറ്റാർവാഴ ജെൽ

രണ്ടോ മൂന്നോ ടേബിൾ സ്പൂൺ മുട്ട വെള്ള, അഞ്ച് ടേബിൾ സ്പൂൺ കറ്റാർവാഴ ജെൽ, ഒരു ടേബിൾ സ്പൂൺ വെളിച്ചെണ്ണ എന്നിവ യോജിപ്പിച്ച് മിശ്രിതം തയ്യാറാക്കുക. ശേഷം ഈ മിശ്രിതം മുടിയിൽ പുരട്ടി അര മണിക്കൂറിനുശേഷം തണുത്ത വെള്ളത്തിൽ കഴുകിക്കളയാം.

മുട്ട + തൈര്

മുട്ടയുടെ മഞ്ഞക്കരുവും തൈരും ചേര്‍ത്ത് മിശ്രിതമാക്കി തലയോട്ടിയിലും മുടിയിലും പുരട്ടുക. 20 മിനിറ്റിന് ശേഷം കഴുകി കളയാം.

നവകേരള ബസ് വീണ്ടും കോഴിക്കോട് ബംഗലൂരു റൂട്ടില്‍ സര്‍വീസ് തുടങ്ങി,37 സീറ്റുകള്‍, ടിക്കറ്റ് നിരക്ക് 910രൂപ

January 1, 2025

കോഴിക്കോട്: ഒരു ഇടവേളയ്ക്ക് ശേഷം നവകേരള ബസ് വീണ്ടും സര്‍വീസ് തുടങ്ങി. കോഴിക്കോട് ബംഗലൂരു റൂട്ടിലാണ് സര്‍വീസ്. സീറ്റുകളുടെ എണ്ണം കൂട്ടിയും സമയക്രമത്തിലടക്കം മാറ്റങ്ങള്‍ വരുത്തിയുമാണ് സര്‍വീസ് പുനരാരംഭിച്ചത്.

ഒരു മാസത്തോളം രാഷ്ട്രീയ കേരളത്തിന്‍റെ ശ്രദ്ധയത്രയും ആകര്‍ഷിച്ച നവകേരള ബസ്. കേരളമൊട്ടുക്ക് സംഘടിപ്പിച്ച നവകേരള സദസുകളിലേക്ക് മുഖ്യമന്ത്രിയെയും മന്ത്രിമാരെയും ആനയിച്ച ബസ് മ്യൂസിയത്തില്‍ വച്ചാല്‍ പോലും കാണാന്‍ ജനം ടിക്കറ്റ് എടുത്ത് ക്യൂ നില്‍ക്കുമെന്നു വരെയുളള വാഴ്ത്തുപാട്ടുകള്‍. ഒടുവില്‍ സര്‍വീസ് തുടങ്ങിയപ്പോഴാകട്ടെ പലതരം തകരാറുകളാല്‍ സര്‍വീസ് പലവട്ടം മുടങ്ങി. ഇപ്പോള്‍ പുതുവര്‍ഷ ദിനം വീണ്ടും ഓടിത്തുടങ്ങിയിരിക്കുകയാണ് കെ ബസ് എന്ന് വളിപ്പേര് വന്ന നവകേരള ബസ്.

കോഴിക്കോട് നിന്ന് രാവിലെ 8.30നും തിരികെ ബംഗലൂരുവില്‍ നിന്ന് രാത്രി 10.30നുമാണ്ബസ്. എല്ലാ ദിവസവും സര്‍വീസുണ്ട്. 910രൂപയാണ് ടിക്കറ്റ് നിരക്ക്. 11 സീറ്റുകള്‍ അധികമായി സ‍ജ്ജീകരിച്ചതോടെ നിലവില്‍ 37 സീറ്റുകള്‍ബസിലുണ്ട്. എസ്കലേറ്ററും പിന്‍ഡോറും ഒഴിവാക്കി മുന്നിലൂടെ കയറാവുന്ന രീതിയിലാണ് പുതിയ വാതില്‍ സജ്ജീകരിച്ചിട്ടുളളത്.

കല്‍പ്പറ്റ, സുല്‍ത്താന്‍ ബത്തേരി, മൈസൂര്‍ എന്നിവിടങ്ങളിലാണ് ബസിന് സ്റ്റോപ്പുളളത്. നവീകരണം പൂര്‍ത്തിയാക്കിയ ശേഷം ബംഗലൂരുവില്‍ നിന്ന് കഴിഞ്ഞ ദിവസമായിരുന്നു ബസ് കോഴിക്കോട്ട് എത്തിച്ചത്.

ഡോ.കെ.എസ്.മണിലാൽ അന്തരിച്ചു; ഹോർത്തൂസ് മലബാറിക്കൂസിന് പുനർജന്മമേകിയ സസ്യശാസ്ത്രജ്ഞൻ

January 1, 2025

തൃശൂർ: പ്രമുഖ സസ്യശാസ്ത്രജ്ഞനും പത്മശ്രീ ജേതാവുമായ ഡോ. കെ.എസ്. മണിലാൽ അന്തരിച്ചു. കേരളത്തിലെ സസ്യസമ്പത്തിനെക്കുറിച്ചുള്ള ‘ഹോർത്തൂസ് മലബാറിക്കൂസ്’ എന്ന പ്രാചീന ലാറ്റിൻ ഗ്രന്ഥം, 50 വർഷം നീണ്ട ഗവേഷണ പ്രവർത്തനം വഴി ഇംഗ്ലിഷിലും മലയാളത്തിലും ആദ്യമായി എത്തിച്ച ഗവേഷകനാണ്. ഏറെനാളായി രോഗബാധിതനായിരുന്നു. തൃശൂരിലെ സ്വകാര്യ ആശുപത്രിയിലായിരുന്നു അന്ത്യം. ഭാര്യ: ജ്യോത്സ്ന. മകൾ: അനിത. മരുമകൻ: കെ.പി.പ്രീതൻ.

കാട്ടുങ്ങൽ എ.സുബ്രഹ്മണ്യത്തിന്റെയും കെ.കെ.ദേവകിയുടെയും മകനായി 1938 സെപ്റ്റംബർ 17ന് പറവൂർ വടക്കേക്കരയിലായിരുന്നു ജനനം. മധ്യപ്രദേശിലെ സാഗർ സർവകലാശാലയിൽനിന്ന് 1964ൽ സസ്യശാസ്ത്രത്തിൽ പിഎച്ച്‌ഡി നേടി. ആ വർഷംതന്നെ കേരള സർവകലാശാലയുടെ കാലിക്കറ്റ് സെന്ററിൽ ബോട്ടണി വകുപ്പിൽ അധ്യാപകനായി ചേർന്ന അദ്ദേഹം, പിന്നീട് കാലിക്കറ്റ് സർവകലാശാല നിലവിൽ വന്നപ്പോൾ അവിടെ ബോട്ടണി വകുപ്പിന്റെ ഭാഗമായി.

17ാം നൂറ്റാണ്ടിന്റെ പകുതിയിൽ കേരളത്തിലെ സസ്യസമ്പത്തിനെക്കുറിച്ചു ലാറ്റിൻ ഭാഷയിൽ പ്രസിദ്ധീകരിച്ച 12 വാല്യങ്ങളുള്ള ‘ഹോർത്തൂസ് മലബാറിക്കൂസി’ന്റെ ഇംഗ്ലിഷ് പതിപ്പ് 2003ലും മലയാളം പതിപ്പ് 2008ലും പ്രസിദ്ധീകരിച്ചു. 1958 മുതൽ അദ്ദേഹം നടത്തിയ പ്രതിജ്ഞാബദ്ധമായ പ്രവർത്തനമാണ് ഇംഗ്ലിഷ്, മലയാളം പതിപ്പിനു പിന്നിൽ. കേരള സർവകലാശാലയാണ് ഹോർത്തൂസ് ഇംഗ്ലിഷ്, മലയാളം പതിപ്പുകൾ പ്രസിദ്ധീകരിച്ചത്. കോഴിക്കോട്ടെയും സൈലന്റ് വാലിയിലെയും സസ്യവൈവിധ്യത്തെക്കുറിച്ച് മണിലാലിന്റെ നേതൃത്വത്തിൽ നടന്ന വർഷങ്ങൾ നീണ്ട പഠനങ്ങളും പ്രസിദ്ധമാണ്.

ശാസ്ത്രമേഖലയിൽ നൽകിയ സംഭാവനകളെ പരിഗണിച്ച്, 2020 ലാണ് രാഷ്ട്രം പത്മശ്രീ ബഹുമതി നൽകി ആദരിച്ചത്. സസ്യവർഗീകരണ ശാസ്ത്രത്തിനു നൽകിയ സമഗ്ര സംഭാവനകൾ മുൻനിർത്തി 2003ൽ കേന്ദ്ര വനം-പരിസ്ഥിതി മന്ത്രാലയം ഇ.കെ.ജാനകി അമ്മാൾ പുരസ്കാരവും സമ്മാനിച്ചു.

ഇങ്ങനെ ഒരു അന്ത്യം ആരും പ്രതീക്ഷിച്ചിരുന്നില്ല; നാഗങ്ങളുടെ തോഴന് കണ്ണീരോടെ വിട

January 1, 2025

അഞ്ചൽ: നാഗങ്ങളുടെ തോഴനായിരുന്നു ഏരൂർ സൗമ്യ ഭവനിൽ സജു രാജൻ; അബദ്ധത്തിലെങ്കിലും അവയിൽ ഒന്നിന്റെ വിഷം സജുവിന്റെ ജീവനെടുത്തതിന്റെ ആഘാതത്തിലാണു നാട്ടുകാർ. ഏരൂർ, അ‍ഞ്ചൽ പ്രദേശങ്ങളിൽ എവിടെയെങ്കിലും പാമ്പ് ശല്യം ഉണ്ടായാൽ ആളുകൾ ആദ്യം തേടുക സജുവിന്റെ മൊബൈൽ ഫോൺ നമ്പർ ആയിരുന്നു. വിവരം അറിഞ്ഞാൽ ഉടൻ ഓടിയെത്തിയിരുന്ന സജു ഇനി ഓർമകളിൽ… പാമ്പുകളെ നോവിക്കാതെ പിടികൂടി സുരക്ഷിത സ്ഥാനങ്ങളിൽ എത്തിച്ചിരുന്നു സജു. ഒട്ടേറെ വിഷപ്പാമ്പുകളെ വരുതിയിലാക്കിയ സജുവിന് ഇങ്ങനെ ഒരു അന്ത്യം ആരും പ്രതീക്ഷിച്ചിരുന്നില്ല.

ഏരൂർ തെക്കേവയൽ കോളനിക്കു സമീപം പാമ്പുകൾ ഭീതി പടർത്തുകയും പ്രദേശവാസിയായ ഗൃഹനാഥന്റെ ജീവനെടുക്കുകയും ചെയ്തതോടെയാണു ഞായറാഴ്ച സജു ഇവിടെ എത്തിയത്. സമീപത്തെ കാടും പടലും വെട്ടിമാറ്റി പാമ്പുകളെ പരതുന്നതിനിടെ മൂർഖൻ പാമ്പിനെ കണ്ടെത്തി. അതിനെ കയ്യോടെ പിടികൂടി ബന്ധിച്ചു. പതിവുപോലെ ഇതിനെ കുളിപ്പിക്കുകയും ചെയ്തെന്നു നാട്ടുകാർ പറയുന്നു. ഇതിനിടെ കടിയേൽക്കുകയായിരുന്നു.

ലവലേശം ഭയപ്പെടാതെ വാഹനത്തിൽ കയറിയ സജുവിനെ കൊട്ടിയത്തെ സ്വകാര്യ ആശുപത്രിയിൽ എത്തിച്ചപ്പോഴേക്കും നില വഷളായി. കടിച്ച പാമ്പിനെ ഇതിനിടെ വനപാലകർ ഏറ്റെടുത്തു. ഇന്നലെ പുലർച്ചെ സജുവിന്റെ ജീവൻ നഷ്ടമായി. സാധാരണക്കാരായ ആളുകളുടെ ജീവനു സംരക്ഷണം നൽ‍കുന്നതിനു മുന്നിട്ടിറങ്ങിയ സജുവിനു ജീവൻ നഷ്ടമായതോടെ അദ്ദേഹത്തിന്റെ സാമ്പത്തികമായി പിന്നാക്കം നിൽക്കുന്ന കുടുംബം കഷ്ടപ്പാടിലേക്കു നീങ്ങുകയുമാണ്. ഭാര്യ, 2 പെൺകുട്ടികൾ എന്നിവരുൾപ്പെടുന്നതാണു സജുവിന്റെ കുടുംബം.

ഉമ തോമസ് പ്രതികരിച്ചു, ‘ഹാപ്പി ന്യൂ ഇയര്‍ പറഞ്ഞു’; ആരോഗ്യനിലയില്‍ പുരോഗതിയെന്ന് ഡോക്ടർമാർ

January 1, 2025

കൊച്ചി: കലൂർ സ്റ്റേഡിയത്തിൽ നിന്ന് വീണ് പരിക്കേറ്റ ഉമ തോമസ് എംഎൽഎയുടെ ആരോഗ്യനിലയില്‍ പുരോഗതി. ഉമ തോമസിന്‍റെ ആരോഗ്യനില ഇന്നലത്തെതിനേക്കാൾ മെച്ചപ്പെട്ടു. ഉമ തോമസ് ഹാപ്പി ന്യൂ ഇയര്‍ പറഞ്ഞെന്ന് ഡോക്ടര്‍മാര്‍ മാധ്യമങ്ങളോട് പ്രതികരിച്ചു. നേർത്ത ശബ്ദത്തിലായിരുന്നു ഉമ തോമസിന്‍റെ പ്രതികരണം. തലയ്ക്ക് ഉണ്ടായ മുറിവ് ഭേദപ്പെട്ടു വരുകയാണ്. ഇപ്പോള്‍ ആളുകളെ തിരിച്ചറിയുന്നുണ്ട്. എന്നാല്‍ വെന്റിലേറ്റർ എത്ര ദിവസം തുടരണം എന്നതില്‍ തീരുമാനമായിട്ടില്ലെന്നും ഡോക്ടര്‍മാര്‍ അറിയിച്ചു.

വെന്‍റിലേറ്ററിൽ തുടരുകയാണെങ്കിലും ഉമ തോമസിന്‍റെ ആരോഗ്യനിലയില്‍ ആശാവഹമായ പുരോഗതിയുണ്ടെന്നാണ് ഡോക്ടർമാർ പറയുന്നത്. എംഎൽഎയുടെ ആരോഗ്യ സ്ഥിതി ഇന്ന് വീണ്ടും പരിശോധിച്ച ശേഷം തുടർ ചികിത്സകൾക്കുള്ള തീരുമാനങ്ങളെടുക്കും. അതേസമയം, അപകടവുമായി ബന്ധപ്പെട്ട് എടുത്ത കേസിൽ മൃദംഗവിഷൻ എംഡി അടക്കം അഞ്ച് പേരെ പ്രതി ചേർത്തിട്ടുണ്ട്. ഇന്നലെ അറസ്റ്റിലായ മൂന്ന് പേർക്ക് കോടതി ഇടക്കാല ജാമ്യം അനുവദിച്ചു. മുൻകൂർ ജാമ്യപേക്ഷയുമായി ഹൈക്കോടതിയെ സമീപിച്ച മൃദംഗ വിഷൻ എംഡി നിഗോഷ് കുമാർ, ഓസ്കാർ ഇവന്റ് ചുമതലക്കാരൻ ജിനേഷ് കുമാർ എന്നിവരോട് വ്യാഴാഴ്ച അന്വേഷണ ഉദ്യോഗസ്ഥന് മുന്നിൽ ഹാജരാകാൻ കോടതി നിർദേശിച്ചു.