മൈനാഗപ്പള്ളി:ബ്ലോക്ക് പഞ്ചായത്ത് കടപ്പ ഡിവിഷൻ സ്ഥാനാർത്ഥിയും ഡിസിസി ജനറൽ സെക്രട്ടറിയുമായ രവി മൈനാഗപ്പള്ളിയുടെ തിരഞ്ഞെടുപ്പ് പ്രചാരണമായി ബന്ധപ്പെട്ട് സ്ഥാപിച്ചിരുന്ന ബോർഡുകൾ വ്യപകമായി നശിപ്പിക്കുകയും വ്യക്തി അധിക്ഷേപം നടത്തുകയും ചെയ്യുന്നതായി പരാതി.അന്വേഷണം ആവശ്യപ്പെട്ട് ചീഫ് ഇലക്ഷൻ ഏജൻ്റായ രാജി രാമചന്ദ്രൻ ശാസ്താംകോട്ട പൊലീസിൽ പരാതി നൽകി.മൈനാഗപ്പള്ളി 14-ാം വാർഡിലെ പാറപ്പുറം ജംഗ്ഷനിലേത് ഉൾപ്പെടെ സ്ഥാപിച്ചിരുന്ന ബ്ലോർഡുകൾ ബ്ലയ്ഡ് ഉപയോഗിച്ച് കീറി നശിപ്പിക്കുകയും പോസ്റ്ററുകൾ വലിച്ചു കീറി കളയുകയും ചെയ്ത നിലയിലാണ്.രാത്രിയുടെ മറവിലാണ് ഇത്തരം സംഭവങ്ങൾ നടക്കുന്നത്.കൂടാതെ വ്യക്തിപരമായ അധിക്ഷേപം ഉന്നയിച്ച് വീടുകളിൽ കയറി വോട്ടർമാരെ സ്വാധീനിക്കാൻ ശ്രമിക്കുന്നതായും പരാതിയിൽ പറയുന്നു.

കുന്നത്തൂർ:പൈപ്പ് ലീക്കായതിനെ തുടർന്ന് ദിവസങ്ങളായി കുടിവെള്ളം പാഴായിട്ടും നന്നാക്കാൻ വാട്ടർ അതോറിറ്റി നടപടിയെടുക്കുന്നില്ലെന്ന്  പരാതി.ആറ്റുകടവ് – ചീക്കൽകടവ് റോഡിൽ കുന്നത്തൂർ തോട്ടത്തുംമുറി കുരിശ്ശടിക്ക് സമീപമാണ് കുടിവെള്ളം പാഴാകുന്നത്.നിരവധി തവണ നാട്ടുകാർ വിവരം അറിയിച്ചിട്ടും അധികൃതർ തിരിഞ്ഞു നോക്കിയിട്ടില്ല.മോട്ടോർ കത്തിനശിച്ചതിനെ തുടർന്ന് ദിവസങ്ങളായി കുടിവെള്ള വിതരണം നിലച്ചിരുന്ന മേഖലയിലാണ് തകരാർ പരിഹരിച്ചപ്പോൾ ഇത്തരം അവസ്ഥ ഉണ്ടായിരിക്കുന്നത്.

ശാസ്താംകോട്ട:പ്രചാരണത്തിനിടെ കളഞ്ഞുകിട്ടിയ പഴ്സ് ഉടമയ്ക്ക് കൈമാറി സ്ഥാനാർത്ഥി മാതൃകയായി.പോരുവഴി ഗ്രാമപഞ്ചായത്തിലെ 9-ാം വാർഡ് യുഡിഎഫ് സ്ഥാനാർത്ഥിയും കുന്നത്തൂർ താലൂക്കിലെ ആദ്യത്തെ വനിതാ ഫോട്ടോഗ്രാഫറുമായ ശാലിനി എസ്-ന് തിരഞ്ഞെടുപ്പ് പ്രവർത്തനവുമായി ബന്ധപ്പെട്ട് ശാസ്താംകോട്ടയിലേക്ക് പോകവേ സിനിമാപറമ്പ് ജംഗ്ഷനിൽ നിന്നാണ് പഴ്സ് കിട്ടിയത്.തുറന്ന് നോക്കിയപ്പോൾ നിരവധി വിലപ്പെട്ട രേഖകൾ പഴ്സിൽ ഉണ്ടായിരുന്നു.ഉടൻ തന്നെ ശൂരനാട് പൊലീസ് സ്റ്റേഷനിലെത്തി പഴ്സ് കൈമാറി.തുടർന്ന് പൊലീസ് നടത്തിയ അന്വേഷണത്തിൽ കുന്നത്തൂർ പുത്തനമ്പലം പ്ലാമണ്ണിൽ പടിഞ്ഞാറ്റേതിൽ കവിതയുടേതാണ് പഴ്സ് എന്ന് കണ്ടെത്തി.പിന്നീട് പൊലീസിൻ്റെ സാന്നിധ്യത്തിൽ ശാലിനി കവിതയ്ക്ക് പഴ്സ് കൈമാറി.