ആദായനികുതി നിരക്കിൽ മാറ്റം വരുത്താതെ കേന്ദ്ര ബജറ്റ്. കഴിഞ്ഞ വർഷം പ്രഖ്യാപിച്ച നികുതി നിരക്കുകൾ തന്നെ തുടരും.
വിദേശയാത്രയുടെ ടിസിഎസ് കുറച്ചു
വിദേശ യാത്രയുടെ ടിസിഎസ് നിലവിലെ 5 ശതമാനം, 20 ശതമാനം എന്നിവയില് നിന്ന് രണ്ടു ശതമാനമായി കുറച്ചു.
മെഡിക്കല് വിഭ്യാഭ്യാസത്തിന്റെ ടിസിഎസ് കുറച്ചു
വിദ്യാഭ്യാസത്തിനും മെഡിക്കല് ആവശ്യങ്ങള്ക്കുമായി വിദേശത്ത് പോകുന്നവര്ക്ക് ആശ്വാസം. ലിബറലൈസ്ഡ് റെമിറ്റന്സ് സ്കീം അനുസരിച്ച് വിദേശത്ത് പോകുന്നവരുടെ ടിസിഎസ് നിരക്ക് നിലവിലെ അഞ്ചു ശതമാനത്തില് നിന്ന് രണ്ടു ശതമാനമായി കുറയ്ക്കാന് ബജറ്റ് നിര്ദേശിച്ചു.
ഏപ്രില് ഒന്നുമുതല് പുതിയ ആദായനികുതി നിയമം
ഏപ്രില് ഒന്നുമുതല് പുതിയ ആദായനികുതി നിയമം നിലവില് വരുമെന്ന് ധനമന്ത്രി പ്രഖ്യാപിച്ചു.
എല്ലാ ജില്ലയിലും പെണ്കുട്ടികളുടെ ഹോസ്റ്റല്
എല്ലാ ജില്ലയിലും പെണ്കുട്ടികളുടെ ഹോസ്റ്റല് സ്ഥാപിക്കുമെന്ന് ബജറ്റ് പ്രഖ്യാപനം. വെറ്ററിനറി കോളജുകള്, ആശുപത്രികള്, ഡയഗ്നോസ്റ്റിക്സ് ലബോറട്ടറികള് എന്നിവയ്ക്കായി വായ്പാ ബന്ധിത മൂലധന സബ്സിഡി പിന്തുണാ പദ്ധതിയും നിര്ദ്ദേശിച്ചു. പ്രധാന വ്യാവസായിക ലോജിസ്റ്റിക് കേന്ദ്രങ്ങള്ക്ക് സമീപമുള്ള അഞ്ച് യൂണിവേഴ്സിറ്റി ടൗണ്ഷിപ്പുകളെ കേന്ദ്രം പിന്തുണയ്ക്കുമെന്ന് ധനമന്ത്രി പറഞ്ഞു.
മൂന്ന് ഓള് ഇന്ത്യ ഇന്സ്റ്റിറ്റ്യൂട്ട് ഓഫ് ആയുര്വേദ സ്ഥാപിക്കും
രാജ്യത്ത് ആയുര്വേദ ചികിത്സ കൂടുതല് ആളുകളിലേക്ക് എത്തിക്കുന്നതിന് മൂന്ന് ഓള് ഇന്ത്യ ഇന്സ്റ്റിറ്റ്യൂട്ട് ഓഫ് ആയുര്വേദ സ്ഥാപിക്കുമെന്ന് ബജറ്റ് പ്രഖ്യാപനം.
പ്രവാസികള്ക്കും ഓഹരി വിപണിയില് നിക്ഷേപിക്കാം
പ്രവാസികള്ക്ക് പോര്ട്ട്ഫോളിയോ നിക്ഷേപ പദ്ധതിയിലൂടെ ഇന്ത്യന് ഓഹരികളില് നിക്ഷേപിക്കാമെന്ന് ധനമന്ത്രി നിര്മ്മല സീതാരാമന്. ഇന്ത്യന് ഓഹരി വിപണി നിര്ണായക ഘട്ടത്തിലൂടെ കടന്നുപോകുന്ന പശ്ചാത്തലത്തിലാണ് പ്രഖ്യാപനം. വിദേശ നിക്ഷേപകര് ഇന്ത്യന് ഓഹരി വിപണിയില് നിന്ന് നിക്ഷേപം പിന്വലിക്കുന്നത് തുടരുന്ന പശ്ചാത്തലത്തിലാണ് ഓഹരി വിപണിക്ക് കരുത്തുപകരുന്ന പ്രഖ്യാപനം.
10,000 കോടി രൂപയുടെ എംഎസ്എംഇ വളര്ച്ചാ ഫണ്ട്
ചെറുകിട സംരംഭങ്ങള്ക്ക് കരുത്തുപകരാന് 10,000 കോടി രൂപയുടെ എംഎസ്എംഇ വളര്ച്ചാ ഫണ്ടിന് രൂപം നല്കുമെന്ന് ബജറ്റില് പ്രഖ്യാപനം
മെഗാ ടെക്സ്റ്റൈല് പാര്ക്കുകള് സ്ഥാപിക്കും
വെല്ലുവിളി നിറഞ്ഞ ടെക്സ്റ്റൈല് മേഖലയ്ക്ക് ബജറ്റില് കൈത്താങ്. രാജ്യത്ത് മെഗാ ടെക്സ്റ്റൈല് പാര്ക്കുകള് സ്ഥാപിക്കുമെന്ന് ധനമന്ത്രി ബജറ്റില് പറഞ്ഞു. ഖാദി, കൈത്തറി എന്നിവ ശക്തിപ്പെടുത്തുന്നതിനായി മഹാത്മാഗാന്ധി ഗ്രാമസ്വരാജ് പദ്ധതി ആരംഭിക്കും.
ധാതു ഖനന ഇടനാഴി
കേരളം, ഒഡിഷ തുടങ്ങിയ സംസ്ഥാനങ്ങളില് കടലോര മേഖലകളിൽ സമ്പന്നമായി കിടക്കുന്ന ധാതുക്കള് പ്രയോജനപ്പെടുത്താന് ധാതു ഖനന ഇടനാഴി സ്ഥാപിക്കും. ഇതിലൂടെ ധാതുക്കളുടെ ഇറക്കുമതി കുറയ്ക്കാനാണ് ലക്ഷ്യമിടുന്നതെന്ന് ധനമന്ത്രി നിര്മല സീതാരാമന് ബജറ്റില് പറഞ്ഞു. ഒഡീഷ, കേരളം എന്നിവയ്ക്ക് പുറമേ ആന്ധ്രാപ്രദേശ്, തമിഴ്നാട് എന്നീ സംസ്ഥാനങ്ങള്ക്ക് ഇത് പ്രയോജനം ചെയ്യും.
സെമികണ്ടക്ടര് ഉല്പ്പാദനം
സെമികണ്ടക്ടര് ഉല്പ്പാദനം മെച്ചപ്പെടുത്തുന്നതിന് 40,000 കോടിയുടെ പദ്ധതി പ്രഖ്യാപിച്ച് ധനമന്ത്രി. സെമികണ്ടക്ടര് ഉല്പ്പാദനം മെച്ചപ്പെടുത്തുന്നതിന് ഇന്ത്യ സെമികണ്ടക്ടര് മിഷന് 2.0 പ്രഖ്യാപിച്ചു.
ഹൈ സ്പീഡ് റെയില് കോറിഡോര്
ബജറ്റില് ഹൈ സ്പീഡ് റെയില് കോറിഡോര് പ്രഖ്യാപിച്ചു. എന്നാല് ഏറെ ഉറ്റുനോക്കിയ ഈ പദ്ധതിയില് കേരളമില്ല.
1. മുംബൈ -പുനെ
2. പുനെ-ഹൈദരാബാദ്
3. ഹൈദരാബാദ്- ബംഗളൂരു
4. ബംഗളൂരു- ചെന്നൈ
5. ചെന്നൈ- ബംഗളൂരു
6. ഡല്ഹി- വാരാണസി
7. വാരാണസി- സിലിഗുരി
