ഉറുമ്പുകളോടുള്ള ഭയം മൂലം (മൈർമെകോഫോബിയ) യുവതി ജീവനൊടുക്കി. തെലങ്കാനയില് സംഗറെഡ്ഡി ജില്ലയിലെ മനീഷ(25) എന്ന യുവതിയാണ് ആത്മഹത്യ ചെയ്തത്. നവംബർ നാലിനാണ് സംഭവം. സാരി ഉപയോഗിച്ച് സീലിങ് ഫാനിൽ തൂങ്ങിമരിച്ച നിലയിലായിരുന്നു മൃതദേഹം. മനീഷയ്ക്ക് കുട്ടിക്കാലം മുതൽ ഉറുമ്പുകളെ ഭയമായിരുന്നുവെന്നും മുന്പ് കൗണ്സിലിങിന്റെ സഹായം തേടിയിരുന്നുവെന്നും പൊലീസ് വ്യക്തമാക്കി. 2022 ൽ വിവാഹിതയായ മനീഷയ്ക്ക് മൂന്ന് വയസ്സുള്ള ഒരു മകളുണ്ട്.
നവംബര് നാലിന് രാവിലെ മനീഷ തന്റെ മകളെ ഒരു ബന്ധുവിന്റെ വീട്ടില് കൊണ്ടുവിട്ടിരുന്നു. വീട് വൃത്തിയാക്കുകയാണെന്നും വൃത്തിയാക്കിയ ശേഷം താൻ അവളെ വന്ന് കൂട്ടിക്കൊണ്ടുപോകാമെന്നുമായിരുന്നു പറഞ്ഞത്. ഇതിന് ശേഷം മനീഷ സീലിങ് ഫാനിൽ തൂങ്ങിമരിച്ച നിലയിൽ കണ്ടെത്തുകയായിരുന്നു.
സംഭവസ്ഥലത്ത് നിന്ന് മനീഷയുടെ ആത്മഹത്യാക്കുറിപ്പ് കണ്ടെടുത്തിട്ടുണ്ട്. ‘ശ്രീ, ക്ഷമിക്കണം, എനിക്ക് ഈ ഉറുമ്പുകളുടെ കൂടെ ജീവിക്കാൻ കഴിയില്ല. മകളെ നോക്കണം, സൂക്ഷിക്കണം’ മനീഷയുടെ ആത്മഹത്യാ കുറിപ്പില് പറയുന്നു. തിരുപ്പതി ക്ഷേത്രത്തിലേക്കുള്ള വഴിപാടും കുറിപ്പില് ഓര്മ്മിപ്പിക്കുന്നുണ്ട്. വീട് വൃത്തിയാക്കുന്നതിനിടയിൽ ഉറുമ്പുകളെ കണ്ട് മനീഷ ഭയന്നിരിക്കാം എന്നാണ് പൊലീസ് കരുതുന്നത്, സംഭവത്തില് അമീൻപൂർ പൊലീസ് കേസ് രജിസ്റ്റർ ചെയ്ത് അന്വേഷണമാരംഭിച്ചിട്ടുണ്ട്.
