വനിതാ കമ്മീഷന് മുന്നിലെത്തുന്ന പരാതികളില് ഉള്പ്പെട്ട സ്ത്രീകള്, കുട്ടികള് തുടങ്ങിയവര്ക്ക് കൗണ്സിലിംഗ് ഉറപ്പാക്കുമെന്ന് വനിതാ കമ്മീഷന് ചെയര്പേഴ്സണ് പി. സതീദേവി. സ്ത്രീകള്ക്കും കുട്ടികള്ക്കുമെതിരെയുള്ള നീതിനിഷേധങ്ങള്ക്ക് പരിഹാരംകാണുന്നതിനായി ജവഹര് ബാലഭവനില് നടത്തിയ മഹിളാ ജന് സുന്വായി പരാതി പരിഹാര ‘മെഗാഅദാലത്തില് സംസാരിക്കുകയായിരുന്നു ചെയര്പേഴ്സണ്.
സ്ത്രീകള്ക്കെതിരെയുള്ള അക്രമപരാതികളില് പോലീസ് കൂടുതല് ജാഗ്രതയോടെ നടപടിയെടുക്കണം. ജാഗ്രത സമിതികള് ഇടപെടേണ്ട പരാതികളില് പരിഹാരം കാണുന്നുണ്ട്. കൂടുതല് പരാതി ലഭിക്കുന്ന തിരുവനന്തപുരം, എറണാകുളം, വയനാട്, മലപ്പുറം ജില്ലകളില് ഈ മാസം മെഗാഅദാലത്ത് സംഘടിപ്പിക്കുമെന്നും അറിയിച്ചു.
പരിഗണിച്ച 150 കേസുകളില് 15 എണ്ണം തീര്പ്പാക്കി. 20 കേസുകള് റിപ്പോര്ട്ടിനയച്ചു. 115 കേസുകള് അടുത്ത സിറ്റിങിലേക്ക് മാറ്റി. പുതിയതായി ഒരു പരാതി ലഭിച്ചു. കുടുംബപ്രശ്നങ്ങള്, അയല് തര്ക്കങ്ങള് തുടങ്ങിയ കേസുകളാണ് കൂടുതലും പരിഗണിച്ചത്. അന്താരാഷ്ട്ര വനിതാ ദിനാചരണത്തോടനുബന്ധിച്ച് ദേശീയ വനിതാ കമ്മീഷന്റെ നിര്ദ്ദേശത്തോടെ ജില്ലാ ലീഗല് സര്വീസ് അതോറിറ്റിയുമായി ചേര്ന്നാണ് അദാലത്ത് നടത്തിയത്.
അംഗങ്ങളായ അഡ്വ. ഇന്ദിര രവീന്ദ്രന്, അഡ്വ. എലിസബത്ത് മാമ്മന് മത്തായി, വി ആര് മഹിളാമണി, അഡ്വ. പി കുഞ്ഞായിഷ, ഡയറക്ടര് ഷാജി സുഗുണന്, വനിതാ കമ്മീഷന് മെമ്പര് സെക്രട്ടറി കെ.ഹരികുമാര്, അഭിഭാഷകരായ എസ് ഹേമ ശങ്കര്, സീനത്ത് ബീഗം, ശ്രീകുമാര് പള്ളിമണ്, മനു ജയപ്രകാശ്, സര്ക്കിള് ഇന്സ്പെക്ടര് ജോസ് കുര്യന്, കൗണ്സിലര് സിസ്റ്റര് സംഗീത, ജില്ലാ ലീഗല് സര്വീസ് അതോറിറ്റി ജുഡീഷ്യല് ഓഫീസര് എസ്.ഇന്ദുകല, വനിതാ സെല് എസ് ഐ കെ.ബദറുനിസ, സിപിഒ മാരായ ആര്.ദീപ നായര്, എസ്.ആശ ഷൈന്, വനിതാ സെല് എസ് ഐ ഇന് ചാര്ജ് യു. സ്വാതി, ഇത്തിക്കര സിഡിപിഒ പി.ആര് കവിത തുടങ്ങിയവര് പങ്കെടുത്തു.
