ശാസ്താംകോട്ട:വിവിധ ആവശ്യങ്ങൾ ഉന്നയിച്ച് പൊതുമേഖലാ സ്ഥാപനങ്ങളായ കശുവണ്ടി വികസന കോർപ്പറേഷൻ്റെയും കാപ്പക്സിൻ്റെയും ഹെഡ് ഓഫീസുകൾ ഉപരോധിക്കുവാൻ സൗത്ത് ഇന്ത്യൻ കാഷ്യൂ വർക്കേഴ്സ് കോൺഗ്രസ് (ഐഎൻടിയുസി) സംസ്ഥാന നിർവാഹക സമിതി യോഗം തീരുമാനിച്ചു.കശുവണ്ടി വ്യവസായത്തിലെ സ്റ്റാഫ് അംഗങ്ങളുടെ ദീർഘകാല കരാർ അടിസ്ഥാനത്തിലുള്ള ശമ്പള വർദ്ധനവ് ഉടൻ നടപ്പിലാക്കുക,കോർപ്പറേഷൻ ഫാക്ടറി ജീവനക്കാർക്ക് നിയമാനുസരണം അനുവദനീയമായിട്ടുള്ള ലീവ് ആനുകൂല്യങ്ങൾ നൽകുക,കശുവണ്ടി വികസന കോർപ്പറേഷനിൽ നടന്ന സ്ഥലംമാറ്റ ഉത്തരവിലും തിരുത്തിയ ഉത്തരവിലും നടന്ന രാഷ്ട്രീയ പകപോക്കലും സ്വജനപക്ഷപാതവും അവസാനിപ്പിക്കുക,കാഷ്യൂ കോർപ്പറേഷനിലെ ഹെഡ് ഓഫീസ് ജീവനക്കാരുടെ പ്രമോഷനിൽ മാനദണ്ഡങ്ങൾ മറികടന്ന് രാഷ്ട്രീയ ലക്ഷ്യത്തോടെത്തോടെ സിഐടിയു യൂണിയൻ അംഗങ്ങൾക്ക് മാത്രം നൽകിവരുന്ന അനധികൃത പ്രമോഷൻ നിർത്തലാക്കുക,ഐആർസി മാനദണ്ഡങ്ങൾ പാലിക്കാതെ തൊഴിലാളികളിൽ നിന്നും നൽകിയ ബോണസ് തിരികെ പിടിക്കുന്നത് അവസാനിപ്പിക്കുക, കശുവണ്ടി വികസന കോർപ്പറേഷൻ,കാപ്പക്സ് എന്നീ സ്ഥാപനങ്ങളിൽ ജീവനക്കാർക്ക് നൽകാനുള്ള മുടങ്ങിക്കിടക്കുന്ന ഗ്രാറ്റുവിറ്റി ഉടൻ വിതരണം ചെയ്യുക, തൊഴിലാളികൾക്ക് ഇഎസ്ഐ ആനുകൂല്യം ലഭിക്കുന്നതിനുള്ള ഹാജർനില 78 എന്നത് മാറ്റി 6 മാസ കോൺട്രിബൂഷൻ പീരീഡിലേതു 45 ആക്കിയും ഒരു വർഷ കോൺട്രിബൂഷൻ പീരീഡിലേതു 90 ആയും പുതുക്കി നിച്ഛയിക്കുക.കശുവണ്ടി വ്യവസായ മേഖലയിൽ തൊഴിലാളികൾക്ക് ആശ്വാസധനം നൽകുക എന്നീ ആവശ്യങ്ങൾ ഉന്നയിച്ചു കൊണ്ടാണ് സമര രംഗത്തേക്ക് എത്തുന്നത്.ഭരണിക്കാവ് കോൺഗ്രസ് ഭവനിൽ ചേർന്ന യോഗത്തിൽ യൂണിയൻ പ്രസിഡന്റ് അഡ്വ.ശൂരനാട് ശ്രീകുമാർ അധ്യക്ഷത വഹിച്ചു. യൂണിയൻ വർക്കിംഗ് പ്രസിഡന്റ് പെരിനാട് മുരളി,ജനറൽ സെക്രട്ടറിമാരായ ഒ.ബി രാജേഷ്,പി.മോഹൻലാൽ,ചന്ദ്രൻ കല്ലട, അയത്തിൽ വിക്രമൻ,കായംകുളം മേഖലാ സെക്രട്ടറി എരുവ വിജയകുമാർ,കരുനാഗപ്പള്ളി മേഖല സെക്രട്ടറി ശിവപ്രസാദ്,ചിറ്റുമല മേഖലാ സെക്രട്ടറി വിനോദ് വില്യത്ത്,ഇരവിപുരം മേഖലാ സെക്രട്ടറി മുനീർ ബാനു, കൊട്ടാരക്കര മേഖല സെക്രട്ടറി ചെങ്ങമനാട് വിജയൻപിളള,യൂണിയൻ സംസ്ഥാന സമിതി അംഗങ്ങളായ സരസചന്ദ്രൻപിള്ള,കാട്ടിൽ ബാബു,നജീം കണ്ണനല്ലൂർ,കൊട്ടിയം സന്തോഷ്,ചാത്തന്നൂർ ബാബുക്കുട്ടൻ,സുരേഷ് ഇടമുളക്കൽ, കുണ്ടറ ഷറഫ്,ഭരണിക്കാവ് ശിവൻ പിള്ള,കുന്നത്തൂർ അജി,ഷാജി പുത്തൂർ,സിന്ധു അയത്തിൽ,ഷംല, പാൽകുളങ്ങര ഗീത,അമ്പിളി തുടങ്ങിയർ സംസാരിച്ചു.
