കോഴിക്കോട്: യുഡിഎഫ് അധികാരത്തില് വന്നാല് കേരളത്തെ ഇന്ത്യയിലെ ഒന്നാമത്തെ സംസ്ഥാനമാക്കി മാറ്റുമെന്ന് പ്രതിപക്ഷ നേതാവ് വിഡി സതീശന്. കോഴിക്കോട് കടപ്പുറത്ത് നടന്ന യുഡിഎഫ് മഹാറാലിയില് സംസാരിക്കുകയായിരുന്നു അദ്ദേഹം. രാഹുല് ഗാന്ധി പ്രഖ്യാപിച്ച അഞ്ച് ഗ്യാരന്റികള് നടപ്പാക്കാനുള്ള ആര്ജ്ജവവും പദ്ധതികളും യുഡിഎഫിനുണ്ടെന്ന് അദ്ദേഹം വ്യക്തമാക്കി.
പദ്ധതികള് നടപ്പിലാക്കുന്നതിനായി ഖജനാവില് പണം നിറയ്ക്കാനുള്ള ഉത്തരവാദിത്വം യുഡിഎഫ് ഏറ്റെടുക്കുമെന്നും അദ്ദേഹം പറഞ്ഞു. കെഎസ്ആര്ടിസി ബസുകളില് സ്ത്രീകള്ക്ക് ഇനി സൗജന്യമായി യാത്ര ചെയ്യാം. കോളജില് പഠിക്കുന്ന പെണ്കുട്ടികള്ക്ക് പ്രതിമാസം 1000 രൂപ വീതം നല്കും. നിലവില് ചികിത്സാ ചെലവ് കൂടുതലുള്ള കേരളത്തില്, ഒന്നാം ഘട്ടത്തില് തന്നെ ഇത് പകുതിയായി കുറയ്ക്കും. ഇതിനായി രാജസ്ഥാനില് അശോക് ഗെലോട്ട് സര്ക്കാര് നടപ്പിലാക്കിയ മാതൃകയിലുള്ള ഇന്ഷുറന്സ് പദ്ധതി കേരളത്തിലും കൊണ്ടുവരും.
കേരളത്തിലെ യുവാക്കള്ക്ക് വിദേശത്തേക്ക് പോകേണ്ടി വരാത്ത രീതിയില് മികച്ച വിദ്യാഭ്യാസ സ്ഥാപനങ്ങളും ആഗോള തൊഴില് സാഹചര്യങ്ങള്ക്കനുസരിച്ചുള്ള മാറ്റങ്ങളും ഇവിടെത്തന്നെ ഒരുക്കും. ആധികാരികമായ ചര്ച്ചകള്ക്ക് ശേഷമാണ് യുഡിഎഫും കോണ്ഗ്രസ് നേതൃത്വവും ഈ ഗ്യാരന്റികള് പ്രഖ്യാപിച്ചതെന്നും സതീശന് പറഞ്ഞു.
