കോട്ടയം: ഓണാഘോഷത്തില് പങ്കെടുത്ത് വീട്ടിലെത്തിയ പൊലീസ് ഉദ്യോഗസ്ഥൻ കുഴഞ്ഞ് വീണു മരിച്ചു. കോട്ടയം ഈസ്റ്റ് പൊലീസ് സ്റ്റേഷനിലെ സിവില് പൊലീസ് ഓഫിസർ പതിനാറില്ചിറ കൊച്ചുതറവീട്ടില് സതീഷ് ചന്ദ്രനാണ് അപ്രതീക്ഷിതമായി കുഴഞ്ഞ് വീണ് മരിച്ചത്.
ചൊവ്വാഴ്ച ഈസ്റ്റ് സ്റ്റേഷനില് സംഘടിപ്പിച്ച ഓണാഘോഷത്തിനിടെ സഹപ്രവർത്തകർക്കൊപ്പം സജീവമായി പങ്കെടുത്ത ശേഷമാണ് 42കാരനായ സതീഷ് ചന്ദ്രൻ തിരികെ വീട്ടിലെത്തിയത്. ഓണാഘോഷ പരിപാടിക്കിടെ മധുരിക്കും ഓർമകളേ, മലർമഞ്ചല് കൊണ്ടുവരൂ, കൊണ്ടുപോകൂ ഞങ്ങളെയാ മാഞ്ചുവട്ടില്… മാഞ്ചുവട്ടില് എന്ന ഗാനം പാടി മണിക്കൂറുകള്ക്കുള്ളിലാണ് സതീഷിന്റെ വേർപാട്. ഓണാഘോഷത്തിനു ശേഷം വീട്ടില് തിരിച്ചെത്തിയ സതീഷ് രാത്രി 9.30നു കുഴഞ്ഞുവീഴുകയായിരുന്നു.
വീട്ടുകാർ ഉടനടി സതീഷിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഹൃദയാഘാതമാണു മരണകാരണമെന്നു പൊലീസ് വിശദമാക്കുന്നത്. സ്റ്റേഷനിലെ ഉദ്യോഗസ്ഥരുടെ ജോലി ക്രമീകരിച്ചിരുന്ന സ്റ്റേഷൻ അസിസ്റ്റന്റ് റൈറ്ററായിരുന്നു സതീഷ്. അതിനാല് തന്നെ സ്റ്റേഷനിലെ സഹപ്രവർത്തകർക്ക് പ്രിയങ്കരനായിരുന്നു സതീഷ്. ഒരാഴ്ച മുൻപു പൊലീസ് ക്വാർട്ടേഴ്സിലെ കുട്ടികളുടെ ഓണാഘോഷച്ചടങ്ങ് സംഘടിപ്പിക്കാൻ മുന്നില് നിന്നതും സതീഷായിരുന്നു. ഭാര്യ: സവിത. മക്കള്: അഭിനവ്, അശ്വിന്ത്, അഭിനന്ദ്.
