കണ്ണൂര്‍. മനു തോമസിൻ്റെ കത്ത് പുറത്ത്, കണ്ണൂരിലെ ഡിവൈഎഫ്ഐ മുൻ നേതാവ് മനു തോമസ് പാർട്ടി സെക്രട്ടറിക്ക് നൽകിയ കത്ത് പുറത്ത് വന്നു. യുവജന കമ്മീഷൻ ചെയർമാൻ എം ഷാജറിനെതിരായ പരാതി ഉള്ള കത്താണ് ഇത്. എം ഷാജർ കൊട്ടേഷൻ സംഘവുമായി ചേർന്ന് ഗൂഢാലോചന നടത്തിയെന്നും തെളിവായി ശബ്ദരേഖ ലഭിച്ചതായി പരാതിയിൽ പറയുന്നു. ശബ്ദരേഖ വന്നത് ആകാശ് തില്ലങ്കേരിയുടെ വാട്സ്ആപ്പ് ഗ്രൂപ്പിൽ. പാർട്ടി സംസ്ഥാന സെക്രട്ടറിക്ക് നൽകിയ പരാതിയാണ് പുറത്തുവന്നത്.

അര്‍ജുന്‍ ആയങ്കി, ആകാശ് തില്ലങ്കേരി തുടങ്ങിയ സ്വര്‍ണ കടത്തുകാരുടെ രക്ഷകര്‍ സിപിഎമ്മിലെ ചില ഉന്നത നേതാക്കളാണെന്നായിരുന്നു മനു തോമസിന്റെ ആരോപണം.

സ്വര്‍ണ്ണക്കടത്ത്, ക്വട്ടേഷന്‍ സംഘങ്ങളുമായി പാര്‍ട്ടിയിലെ ചില നേതാക്കള്‍ക്ക് ഇപ്പോഴും ബന്ധമുണ്ടെന്നായിരുന്നു സിപിഎമ്മില്‍ നിന്നും ഒഴിവായതിനു ശേഷം മനു തോമസിന്റെ ആരോപണം. ഇത്തരം ബന്ധങ്ങള്‍ ആദ്യം പാര്‍ട്ടിയില്‍ ചൂണ്ടിക്കാട്ടിയത് താനാണെന്നായിരുന്നു മനു തോമസിന്റെ വെളിപ്പെടുത്തല്‍. പാര്‍ട്ടിയെ മറയാക്കി തെറ്റായ കാര്യങ്ങള്‍ ചെയ്യുന്നവരെ കുറിച്ചും ഇവര്‍ക്ക് സംരക്ഷണം നല്‍കുന്ന നേതാക്കളെ കുറിച്ചും സംസ്ഥാന കമ്മിറ്റിയിലും ജില്ലാ നേതൃയോഗങ്ങളിലും താന്‍ പരാതി നല്‍കിയിരുന്നു. പാര്‍ട്ടിക്കുള്ളില്‍ തിരുത്തല്‍ വേണമെന്ന് ആവശ്യപ്പെട്ടിരുന്നുവെങ്കിലും നേതൃത്വം നിസാര വല്‍ക്കരിച്ചുവെന്നാണ് മനുവിന്റെ ആരോപണം.

.