ശാസ്താംകോട്ട : രാജഗിരി ബ്രൂക്ക് ഇന്റർനാഷണൽ സ്കൂളിലെ സ്പോർട്സ് ഡേ ആഘോഷമായി നടന്നു. ശാസ്താം കോട്ടജംഗ്ഷനിൽ നിന്നും ബ്രൂക്ക് ഡയറക്ടർ ഫാദർ. ഡോ. ജി. എബ്രഹാം തലോത്തിൽ കൊളുത്തിവിട്ട ദീപശിഖയുമായി സ്കൂളിലെ നാലു ഹൌസുകളിലെ കുട്ടികൾ ബാൻഡ് സെറ്റിന്റെയും എൻ. സി. സി. യുടെയും അകമ്പടിയോടെ പ്രയാണമാരംഭിച്ചതോടെ ആഘോഷങ്ങൾക്ക് തുടക്കമായി. സ്കൂളിൽ നടന്ന കായികദിനത്തിന്റെ ഔദ്യോഗിക ഉദ്ഘാടനം കുട്ടികളുടെ മാർച്ച്‌ ഫാസ്റ്റിന്റെ സല്യൂട്ട് സ്വീകരിച്ചുകൊണ്ട് ശാസ്താംകോട്ട ഡി വൈ. എസ്. പി.ശ്രീ ജലീൽ തോട്ടത്തിൽ നിർവ്വഹിച്ചു. വിവിധ ഇനങ്ങളിലായി ഓട്ടമത്സരങ്ങൾ, ഷോട്ട് പുട്ട്, ലോംഗ്ജമ്പ്, വടംവലി ഉൾപ്പെടെ നിരവധി കായിക ഇനങ്ങളിലായി നടന്ന കായിക മാമാങ്കത്തിൽ റെഡ് ഹൗസ് ചാമ്പ്യൻമാരായി. ബ്രൂക്ക് ഡയറക്ടർ ഫാദർ. ഡോ. ജി. എബ്രഹാം തലോത്തിൽ സമ്മാനദാനം നിർവ്വഹിച്ചു.

ശാസ്താംകോട്ട:കല്ലടയാറ്റിൽ കുന്നത്തൂർ പഞ്ചായത്ത് കേന്ദ്രീകരിച്ച് നടക്കുന്ന അനധികൃത മണൽ വാരലിനെതിരെ നടപടി സ്വീകരിക്കുന്നതിന് കുന്നത്തൂർ താലൂക്ക് വികസന സമിതി യോഗം തീരുമാനിച്ചു.താലൂക്ക് കോൺഫറൻസ് ഹാളിൽ നടന്ന യോഗത്തിലാണ് തീരുമാനം.താലൂക്കില പഞ്ചായത്തുകളിൽ ടേക്ക് എ ബ്രേക്ക് കെട്ടിടങ്ങൾ ഉടൻ തുറന്ന് പ്രവർത്തിപ്പിക്കുന്നതിന് എല്ലാ പഞ്ചായത്ത് സെക്രട്ടിറിമാർക്കും,ആഞ്ഞിലിമൂട് പള്ളിക്ക് സമീപം അപകടഭീഷണിയായി നില്ക്കുന്ന മരങ്ങൾ അടിയന്തിരമായി മുറിച്ചുമാറ്റുന്നതിന് ശാസ്താംകോട്ട സെക്രട്ടറിക്കും നിർദ്ദേശം നല്കി.കുന്നത്തൂർ സബ് ആർറ്റിഒ ഓഫീസിന് സ്ഥലം കൈമാറുന്ന വിഷയം ഒക്ടോബർ 19ന് എംഎൽഎയുടെ നേതൃത്വത്തിൽ ജില്ലാ കളക്ടറുമായി ചർച്ച ചെയ്യും.തകർന്ന് കിടക്കുന്ന
ശാസ്താംകോട്ട റെയിൽവെ സ്റ്റേഷൻ-കുറ്റിയിൽമുക്ക്-കോട്ടയ്ക്കകത്ത് മുക്ക്- കിഴക്കടത്ത് മുക്ക് റോഡ് നിർമ്മാണത്തിന് ഒരു കോടി രൂപ അനുവദിച്ചതായി എംഎൽഎ അറിയിച്ചു.കരുനാഗപ്പള്ളിയിൽ നിന്നും രാത്രി 7.30 കഴിഞ്ഞ് കുന്നത്തൂർ മേഖലയിലേക്ക് ബസ് സർവ്വീസ് ഇല്ലാത്തതിനാൽ കെഎസ്ആർടിസി
ബസ് സർവ്വീസ് ആരംഭിക്കുന്നതിന് ഗതാഗതവകുപ്പ് മന്ത്രിയുമായി കൂടികാഴ്ച്ച നടത്തുന്നതിന് തീരുമാനിച്ചു.മൈനാഗപ്പള്ളി റെയിൽവെ ഓവർ ബ്രിഡ്‌ജ് നിർമ്മാണ പ്രവർത്തനങ്ങൾ വേഗത്തിലാക്കണമെന്ന് വികസന സമിതിയിൽ ആവശ്യം ഉയർന്നു.താലൂക്കിലെ പട്ടയ അപേക്ഷകളിൽ അടിയന്തിരമായി റിപ്പോർട്ട് സമർപ്പിക്കുന്നതിന് പഞ്ചായത്ത് സെക്രട്ടറിമാർക്ക് നിർദ്ദേശം നല്കി.
പോരുവഴി പട്ടികജാതി ഉന്നതി ഗ്രാമത്തിൽ താമസ്സിക്കുന്ന ജനറൽ വിഭാഗത്തിന് പട്ടയം നല്കുന്ന വിഷയം സർക്കാരിൻ്റെ ശ്രദ്ധയിൽപ്പെടുത്തുന്നതിനും യോഗം തീരുമാനിച്ചു.ചക്കുവള്ളി ചന്തയില രൂക്ഷമായ മാലിന്യ പ്രശ്നം പരിഹരിക്കുന്നതിന് പോരുവഴി ഗ്രാമപഞ്ചായത്ത് സെക്രട്ടറിയെ ചുമതലപ്പെടുത്തി.ഭരണിക്കാവിലെ സിഗ്നൽ ലൈറ്റ് ട്രഫിക്ക് റഗുലേറ്ററി കമ്മിറ്റി യോഗം കൂടി ഉടൻ പ്രവർത്തിപ്പിക്കുന്നതിനും,താലൂക്കിലെ റോഡ് നിർമ്മാണം പൂർത്തിയാക്കുന്നതിന് ജലജീവൻ മിഷൻ,കിഫ്ബി,എൻ.എച്ച്, പിഡബ്ലൂഡി എന്നിവരുമായി മീറ്റിംഗ് നടത്തുന്നതിന് തീരുമാനിച്ചു.ശാസ്താംകോട്ട മുതൽ ആഞ്ഞിലിമൂട് വരെയുള്ള പാതയോരത്തെ അനധികൃത കച്ചവടങ്ങൾ ഒഴിപ്പിക്കുന്നതിന് പിഡബ്ല്യൂഡി,പോലീസ്,പഞ്ചായത്ത്
എന്നിവരെ ചുമതലപ്പെടുത്തി.കോവൂർ കുഞ്ഞുമോൻ എംഎൽഎ അധ്യക്ഷത വഹിച്ചു.ബ്ലോക്ക് പഞ്ചായത്ത് പ്രസിഡൻ്റ്
ആർ.സുന്ദരേശൻ,ഗ്രാമപഞ്ചായത്ത് പ്രസിഡൻ്റുമാരായ ബിനു മംഗലത്ത് (പോരുവഴി),ഡോ.സി ഉണ്ണികൃഷ്ണൻ(പടിഞ്ഞാറെ കല്ലട),വർഗ്ഗീസ് തരകൻ (മൈനാഗപ്പള്ളി), വൽസലകുമാരി (കുന്നത്തൂർ),വിവിധ രാഷ്ട്രീയപാർട്ടി പ്രതിനിധികളായ തുണ്ടിൽ നഷാദ്,പ്രൊഫ.എസ്.അജയൻ,കാരാളി വൈ.എ സമദ്,സാബു ചക്കുവള്ളി,പുത്തൂർ സനിൽ,ഗ്രിഗറി യോഹന്നാൻ,ബിജു മൈനാഗപ്പള്ളി വിവിധ വകുപ്പു മേലധികാരികൾ,കൊല്ലം ഡെപ്യൂട്ടി കളക്ടർ(എൽ.ആർ) തഹസിൽദാർ,ഭൂരേഖ തഹസിൽദാർ എന്നിവർ പങ്കെടുത്തു.ശാസ്താംകോട്ട താലൂക്ക് ആശുപത്രി വികസനത്തിന് 80 സെൻ്റ് റവന്യൂ ഭൂമി ലഭ്യമാക്കാൻ പരിശ്രമം നടത്തിയ കോവൂർ കുഞ്ഞുമോൻ എംഎൽഎയെ ബ്ലോക്ക് പഞ്ചായത്ത് പ്രസിഡൻ്റ് ആർ.സുന്ദരേശൻ,ബ്ലോക്ക് പഞ്ചായത്ത് അംഗം തുണ്ടിൽ നൗഷാദ് എന്നിവർ യോഗത്തിൽ അനുമോദിച്ചു.

ശാസ്താംകോട്ട:പുതുതായി ആരംഭിക്കുന്ന കൊല്ലം – എറണാകുളം മെമ്മു സർവീസിന് മൺറോതുരുത്തിലും പെരിനാടും സ്റ്റോപ്പ് അനുവദിച്ചതായി കൊടിക്കുന്നിൽ സുരേഷ് എംപി അറിയിച്ചു.ആദ്യഘട്ടത്തിൽ സ്റ്റോപ്പുകൾ പ്രഖ്യാപിച്ചപ്പോൾ ഇരു സ്റ്റേഷനുകളിലും സ്റ്റോപ്പ് അനുവദിച്ചിരുന്നില്ല.ഹാൾട്ട് സ്റ്റേഷനിൽ കൂടി സ്റ്റോപ്പ് അനുവദിക്കണമെന്ന് ആവശ്യപ്പെട്ട് നിരവധി സ്ഥിരം യാത്രക്കാർ എം.പിയെ സമീപിച്ചിരുന്നു.ദക്ഷിണ റെയിൽവേയുടെ ചീഫ് പാസഞ്ചർ ട്രാൻസ്പോർട്ട് മാനേജരുമായി എം.പി നടത്തിയ ചർച്ചയിൽ വേണാട് എക്സ്പ്രസ് നിർത്താത്തതും യാത്രക്കാരുടെ എണ്ണം കൂടുതൽ ഉള്ളതായ സ്റ്റേഷനുകളിൽ കൂടി നിർത്തണമെന്ന് ശക്തമായി ആവശ്യപ്പെടുകയായിരുന്നു.തുടർന്ന് രാവിലെ 6.15ന് പകരം 5:55 ആയി ട്രെയിൻ പുറപ്പെടുന്ന സമയം ക്രമീകരിച്ച് മൺറോതുരുത്തിലും പെരിനാടും സ്റ്റോപ്പ് അനുവദിക്കുകയായിരുന്നു.