കൊട്ടാരക്കര: ഭാര്യയെ തീകൊളുത്തി കൊലപ്പെടുത്തിയ കേസില്‍ ഭര്‍ത്താവിന് ജീവപര്യന്തം കഠിന തടവും 2 ലക്ഷം രൂപ പിഴയും. കോട്ടാത്തല മൂഴിക്കോട് ചരുവിള പടിഞ്ഞാറ്റതില്‍ വീട്ടില്‍ രാജനെ(65) ആണ് കൊട്ടാരക്കര അഡീഷണല്‍ സെഷന്‍സ് കോടതി ശിക്ഷിച്ചത്.കൊട്ടാരക്കര പോലീസ് രജിസ്ടര്‍ ചെയ്ത കേസില്‍ കൊട്ടാരക്കര അഡീഷണല്‍ സെഷന്‍സ് കോടതി ജഡ്ജ് ടി.ആര്‍.റീന ദാസാണ് ശിക്ഷ വിധിച്ചത്.
2019 ഏപ്രില്‍ 17-നാണ് ഭാര്യ മായ (46)യെ പ്രതിയായ രാജന്‍ കൊലപ്പെടുത്തിയത്. സ്ഥിരമായി മദ്യപിച്ചെത്തുന്നത് ചോദ്യം ചെയ്തത്തില്‍ വൈരാഗ്യം മൂലം മായയെ മണ്ണെണ്ണയൊഴിച്ചു തീകൊളുത്തി കൊലപ്പെടുത്തുകയായിരുന്നു.
എസ്.ഐ. മണിയന്‍പിള്ള രജിസ്റ്റര്‍ ചെയ്ത കേസില്‍ സിഐ ന്യൂ മാനും സിഐ ശിവപ്രകാശുമാണ് അന്വേഷണം പൂര്‍ത്തിയാക്കി ചാര്‍ജ്ജ്ഷീറ്റ് സമര്‍പ്പിച്ചത്. 26 സാക്ഷികള്‍ ഉണ്ടായിരുന്ന കേസില്‍ പ്രധാന സാക്ഷികളായ ബന്ധുക്കള്‍ ഉള്‍പ്പടെ കൂറുമാറിയിരുന്നു. പരിസരവാസിയും ദൃക്സാക്ഷിയായ മൂന്നാം സാക്ഷിയുടെ മൊഴിയും ആശുപത്രിയില്‍ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥന്‍ മൊബൈലില്‍ പകര്‍ത്തിയ ദൃശ്യങ്ങളും ഡോക്ടര്‍മാരോട് മായ പറഞ്ഞ മൊഴികളും കേസില്‍ നിര്‍ണായകമായി. 23 രേഖകളും അഞ്ച് തൊണ്ടിമുതലും പ്രോസിക്യൂഷന്‍ ഹാജരാക്കി. പ്രോസിക്യൂഷനുവേണ്ടി അഡീഷണല്‍ ഗവണ്‍മെന്റ് പ്ലീഡര്‍ ഡി.എസ്.സോനു ഹാജരായി. എഎസ്‌ഐ അഞ്ചുവാണ് പ്രോസിക്യൂഷന്‍ നടപടികള്‍ ഏകോപിപ്പിച്ചത്.

ശാസ്താംകോട്ട:കടപുഴ പാലത്തിൽ നിന്നും കല്ലടയാറ്റിൽ ചാടിയ വ്യക്തിയെ കണ്ടെത്താനായില്ല.ഇന്ന് വൈകിട്ടാണ് ഒരാൾ പാലത്തിൽ നിന്നും ചാടുന്നത് നാട്ടുകാരുടെ ശ്രദ്ധയിൽപ്പെട്ടത്.മടന്തകോട് സ്വദേശി ബാബു പിള്ളയാണ് ചാടിയതെന്നാണ് സൂചന.ഇദ്ദേഹത്തിന്റെ മൊബൈൽഫോണും ആശുപത്രിയിൽ ചികിത്സ തേടിയതിന്റെ ഒ.പി ടിക്കറ്റും  പാലത്തിന്റെ കൈവരിയിൽ നിന്നും കണ്ടെടുത്തിട്ടുണ്ട്.സംഭവമറിഞ്ഞ് സ്ഥലത്തെത്തിയ ശാസ്താംകോട്ട,കുണ്ടറ ഫയർഫോഴ്സിന്റെ നേതൃത്വത്തിൽ തിരച്ചിൽ നടത്തിയെങ്കിലും  കണ്ടെത്താനായില്ല.വെളിച്ചക്കുറവ് മൂലം ആറരയുടെ തിരച്ചിൽ അവസാനിപ്പിച്ച്  ഫയർഫോഴ്സ് സംഘം മടങ്ങി.കിഴക്കേ കല്ലട പോലീസും സ്ഥലത്തെത്തിയിരുന്നു.

കൊല്ലം: പള്ളിത്തോട്ടം പോലീസ് സ്റ്റേഷന് നേരെ കല്ലെറിഞ്ഞ പ്രതി പോലീസ് പിടിയിലായി. കൊല്ലം വെസ്റ്റ് പള്ളിത്തോട്ടം ചേരിയില്‍ ഗലീലിയോ നഗര്‍-3ല്‍ കിളിസിബിന്‍ എന്നറിയപ്പെടുന്ന സിബിന്‍ (32) ആണ് പിടിയിലായത്. ഇക്കഴിഞ്ഞ 25ന് രാത്രി പോര്‍ട്ട് കൊല്ലം ജംഗ്ഷന് സമീപം പ്രതി സുഹൃത്തുക്കളോടൊപ്പം റോഡ് കയ്യേറി മദ്യപിക്കാന്‍ ശ്രമിച്ചത് പോലീസ് തടഞ്ഞതിലുള്ള വിരോധം നിമിത്തമാണ് പോലീസ് സ്റ്റേഷന് നേരെ ഇയാള്‍ കല്ലെറിഞ്ഞത്.
സിബിന്‍ കല്ലെറിഞ്ഞതിനെത്തുടര്‍ന്ന് പോലീസ് സ്റ്റേഷന്റെ മുന്നിലായി പാര്‍ക്ക് ചെയ്തിരുന്ന പോലീസ് വാഹനത്തിന്റെ ബീക്കണ്‍ ലൈറ്റ് പൊട്ടുകയും വാഹനത്തിന് കേടുപാടുകള്‍ സംഭവിക്കുകയും ചെയ്തിട്ടുണ്ട്. പ്രതിക്കെതിരെ പൊതുമുതല്‍ നശിപ്പിച്ചതിന് കേസ് രജിസ്റ്റര്‍ ചെയ്ത് അറസ്റ്റ് ചെയ്യുകയായിരുന്നു.