ശാസ്‌താംകോട്ട:ഐസ് വാട്ടർ പോലെ തണുതണുത്ത വെള്ളത്തിൽ നീന്തി കുളിക്കാനും ആർത്തുല്ലസിക്കാനും താല്പര്യമുള്ളവരെ മാടി വിളിക്കുകയാണ് ആനയടിയിലെ കണ്ണാടിക്കുളം (പാറക്കുളം).പേര് സൂചിപ്പിക്കുന്ന പോലെ തന്നെ തെളിനീര് പോലെ തെളിഞ്ഞ വെള്ളമാണ് ഇവിടത്തെ പ്രത്യേകത.ആഴം കുറഞ്ഞ കുളത്തിൻ്റെ അടിത്തട്ടുവരെ കണ്ണാടി പോലെ കാണാൻ കഴിയും.പാറകൾക്കിടയിലെ ഉറവകൾക്കിടയിൽ നിന്ന് ഉത്ഭവിക്കുന്നത് ആയത് കൊണ്ട് തന്നെ വെള്ളത്തിൽ അഴുക്കിന്റെ സാന്നിധ്യം കുറവാണ്.വേനൽകാലമായതിനാൽ കുട്ടികളടക്കം നാടിൻ്റെ നാനാഭാഗങ്ങളിൽ നിന്നും നിരവധി പേരാണ് കണ്ണാടിക്കുളത്തിൽ നീരാടാൻ എത്തുന്നത്.

കുളത്തിൽ വെള്ളം കെട്ടികിടക്കുന്നില്ല എന്നതും ഇവിടത്തെ മറ്റൊരു പ്രത്യേകതയാണ്.പാറയിൽ നിന്ന് ഉത്ഭവിക്കുന്ന വെള്ളം തത്കാലികമായി മാത്രമേ നിൽക്കുകയുള്ളു.അത് കുളത്തിൽ നിന്ന് നേരെ ഒരു ചാലു പോലെ പുറത്തേക്കു പോകുന്നു.ഇത് കുളത്തിന്റെ വൃത്തിക്കും തെളിച്ചത്തിനും കാരണമാകുന്നു.കഠിനമായ ചൂടാണെങ്കിലും പാറയിൽ നിന്ന് ഉത്ഭവിക്കുന്ന വെള്ളത്തിലേക്ക് ഇറങ്ങുമ്പോൾ കിടുകിടെ വിറയ്ക്കുമത്രേ.അവധി ദിവസങ്ങളിൽ പൊതുവെ നല്ല തിരക്കാണ് അനുഭവപ്പെടുന്നത്.നീന്തൽ പരിശീലകരും കുറവല്ല.ആനയടി പഴയിടം നരസിംഹ സ്വാമി ക്ഷേത്രത്തിനു അടുത്ത് നിന്ന് ഒന്നരകിലോമീറ്റർ മാത്രം അകലെയാണ് ഈ കുളം സ്ഥിതി ചെയുന്നത്.

ശാസ്താംകോട്ട:സംസ്ഥാന സർക്കാർ തദ്ദേശ സ്വയം ഭരണ സ്ഥാപനങ്ങളുടെ നേതൃത്വത്തിൽ ഏറ്റെടുത്തു നടപ്പിലാക്കി വരുന്ന മാലിന്യ മുക്തം നവകേരളം ജനകീയ ക്യാമ്പയിന്റെ ഭാഗമായി ശാസ്താംകോട്ട ബ്ലോക്ക് പഞ്ചായത്തിനെ മാലിന്യമുക്ത ബ്ലോക്ക് പഞ്ചായത്തായി
പ്രഖ്യാപിച്ചു.സിനിമപറമ്പ് ജംഗ്ഷനിൽ നിന്നും വിളംബര ഘോഷയാത്രയോടെ
ഉത്സവാന്തരീക്ഷത്തിൽ നടന്ന ചടങ്ങിൽ കോവൂർ കുഞ്ഞുമോൻ എംഎൽഎ പ്രഖ്യാപനം നടത്തി.ബ്ലോക്ക് പഞ്ചായത്ത് പ്രസിഡൻറ് ആർ.സുന്ദരേശൻ അധ്യക്ഷത വഹിച്ചു.വൈസ് പ്രസിഡൻ്റ് പി.പുഷ്പകുമാരി സ്വാഗതവും സെക്രട്ടറി കെ.ചന്ദ്രബാബു നന്ദിയും പറഞ്ഞു.ക്യാമ്പയിന്റെ ഭാഗമായി പൊതുസ്ഥലങ്ങളിൽ 56 ബോട്ടിൽ ബൂത്തുകൾ,ഘടക സ്ഥാപനങ്ങൾക്ക് ജൈവ അജൈവ മാലിന്യ ബിന്നുകൾ,192 അങ്കണവാടികൾക്ക് ബയോബിന്നുകൾ, ബ്ലോക്ക്‌ പരിധിയിലെ വിവിധ സ്ഥാപനങ്ങളിലായി 5 തുമ്പൂർമൂഴി കമ്പോസ്റ്റിംഗ് യൂണിറ്റുകൾ,വിദ്യാർഥികൾക്ക് മെനുസ്ട്രൽ കപ്പ് വിതരണം,ഘടക സ്ഥാപനങ്ങളിൽ ഇൻസിനെററ്ററുകൾ എന്നീ പദ്ധതികൾ ഏറ്റെടുത്തു നടപ്പിലാക്കിയും പൊതുജന ബോധവത്കര്ണത്തിനായി സിനിമപ്പറമ്പ് ജംഗ്ഷൻ കേന്ദ്രീകരിച്ചുള്ള ശുചീകരണ യജ്‌ഞം,മാലിന്യ കൂനകൾ നീക്കം ചെയ്യൽ,ബ്ലോക്ക്‌ പരിധിയിലെ ഗ്രാമപഞ്ചായത്തുകളിൽ അവബോധ കലജാഥ,നോട്ടീസ് വിതരണം,മൈക്ക് അന്നൗൺസ്‌മെന്റ്,പ്രദർശനം, ചുവരെഴുത്തുകൾ എന്നിവയും നടപ്പിലാക്കിയാണ് ബ്ലോക്ക്‌ പഞ്ചായത്ത് ശുചിത്വ പദവി കൈവരിച്ചത്.ബ്ലോക്ക്‌ തലത്തിൽ ഏറ്റവും മികച്ച പ്രവർത്തനങ്ങൾ കാഴ്ചവച്ച ഗ്രാമപഞ്ചായത്തിനുള്ള പുരസ്‌കാരം ശൂരനാട് സൗത്ത് കരസ്ഥമാക്കി.മികച്ച ഹരിതകർമസേനയായി ശാസ്താംകോട്ട ഗ്രാമപഞ്ചായത്ത് ഹരിതകർമസേനയും, മികച്ച ഹരിതവിദ്യാലയമായി മൈനാഗപ്പള്ളി ഗ്രാമപഞ്ചായത്തിലെ ചിത്തിര വിലാസം സ്കൂളുംപോരുവഴി എസ്.കെ.വി എൽ.പി സ്കൂളും,മികച്ച സി.ഡി.എസ് ആയി ശാസ്താംകോട്ട, മൈനാഗപ്പള്ളി,ശൂരനാട് തെക്ക് സിഡിഎസുകളും,മികച്ച ഹരിത പൊതുഇടമായി കുന്നത്തൂർ കീച്ചപ്പള്ളിയും,മികച്ച ഹരിത ടൗൺ ആയി മൈനാഗപ്പള്ളി പുത്തൻചന്തയും,മികച്ച ഹരിത വായനശാലയായി ശൂരനാട്സൗത്ത് എസ്.കെ.വി. ജ്ഞാനസംവർദ്ധിനി ഗ്രന്ഥശാലയും, ഹരിത റെസിഡൻസ് അസോസിയേഷൻ ആയി പോരുവഴി സത്യചിത്ര റെസിഡൻസ് അസോസിയേഷനും, മികച്ച ഹരിത സർക്കാർ സ്ഥാപനമായി പി.എച്ച്.സി ശൂരനാട് തെക്കും, മികച്ച സ്വകാര്യ സ്ഥാപനമായി ഇന്ദ്രപ്രസ്ഥ ശൂരനാട് വടക്കും,മികച്ച വ്യാപാര സ്ഥാപനമായി യെസ് മാർട്ട് ശൂരനാട് തെക്കും അവാർഡുകൾ കരസ്ഥമാക്കി.ചടങ്ങിനോട് അനുബന്ധിച്ച് ബ്ലോക്ക്‌ പരിധിയിലെ 192 അങ്കണവാടികൾക്ക് ജൈവ മാലിന്യ സംസ്കരണ ഉപാധി വിതരണം ചെയ്തു.

ശാസ്താംകോട്ട:കുറഞ്ഞ നിരക്കിൽ ഗുണമേന്മയുള്ള കുടിവെള്ളം പൊതുജനങ്ങൾക്ക് ലഭ്യമാക്കുക എന്ന ലക്ഷ്യത്തോടെ ശാസ്താംകോട്ട ബ്ലോക്ക് പഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി നടപ്പിലാക്കുന്ന വാട്ടർ എടിഎം പദ്ധതി പോരുവഴി മലനടയിൽ സ്ഥാപിച്ചു.10 ലക്ഷം രൂപ വിനിയോഗിച്ച് ബ്ലോക്ക്‌ പഞ്ചായത്ത് രണ്ട് വാട്ടർ എടിഎമ്മാണ് സ്ഥാപിച്ചത്.ആദ്യത്തെ എടിഎം കഴിഞ്ഞ നവംബറിൽ ശാസ്താംകോട്ട ടേക്ക് എ ബ്രേക്ക്‌ കേന്ദ്രത്തിനു സമീപമാണ് സ്ഥാപിച്ചത് പദ്ധതിയുടെ ഭാഗമായി രണ്ടാമത്തെ എടിഎമ്മാണ് മലനട ക്ഷേത്രത്തിനോട് ചേർന്നു പി.എച്ച്.സി കോമ്പൗണ്ടിൽ സ്ഥാപിച്ചത്.എടിഎം വെൻഡിങ് മെഷീനിൽ ഒരു രൂപ നിക്ഷേപിച്ചാൽ ഒരു ലിറ്റർ ശീതീകരിച്ച വെള്ളവും അഞ്ച് രൂപ നിക്ഷേപിച്ചാൽ അഞ്ചു ലിറ്റർ വെള്ളവും ലഭിക്കുന്ന രീതിയിലാണ് പ്രവർത്തനം.ബ്ലോക്ക് പഞ്ചായത്ത് പ്രസിഡന്റ് ആർ.സുന്ദരേശൻ വാട്ടർ എടിഎം നാടിനു സമർപ്പിച്ചു.വൈസ് പ്രസിഡന്റ് പി.പുഷ്പകുമാരി അധ്യക്ഷത വഹിച്ചു.ചടങ്ങിൽ പോരുവഴി ഗ്രാമപഞ്ചായത്ത് പ്രസിഡന്റ് ബിനു മംഗലത്ത്,ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്മാരായ വി.രതീഷ്,എസ്.ഷീജ,കെ.സനിൽകുമാർ,ഗ്രാമപഞ്ചായത്ത് സ്ഥിരം സമിതി അധ്യക്ഷൻ രാജേഷ് വരവിള, ബ്ലോക്ക് പഞ്ചായത്ത് അംഗങ്ങളായ തുണ്ടിൽ നൗഷാദ്,ലതാ രവി,പി.ഗീതാകുമാരി,രാജി.ആർ,എസ്.
ശശികല,ബ്ലോക്ക് പഞ്ചായത്ത് സെക്രട്ടറി ചന്ദ്രബാബു, ബ്ലോക്ക്പഞ്ചായത്ത് ജീവനക്കാർ എന്നിവർ പങ്കെടുത്തു.