അവധിക്കാല ഉല്ലാസയാത്രകള്‍ എന്ന പേരില്‍ കെഎസ്ആര്‍ടിസി ആവിഷ്‌കരിച്ച ബജറ്റ് ടൂറിസം യാത്രകള്‍ ഏപ്രില്‍ മാസത്തില്‍ ഇതുവരെ നേടിയത് 22 ലക്ഷം രൂപ. മുന്‍വര്‍ഷത്തേക്കാള്‍ ട്രിപ്പുകളുടെ എണ്ണത്തിലും കളക്ഷനിലും ഇരട്ടിയിലധികം വര്‍ദ്ധനവാണ് ഉണ്ടായത്. അവധിക്കാല യാത്രകള്‍ വന്‍ വിജയത്തില്‍ ആയതോടെ കൂടുതല്‍ ട്രിപ്പുകള്‍ ഉള്‍പ്പെടുത്തി കൊല്ലം ബജറ്റ് ടൂറിസം മെയ് മാസ കലണ്ടര്‍ പ്രഖ്യാപിച്ചു.
മെയ് ഒന്നിന് വാഗമണ്‍, റോസ്മല എന്നീ യാത്രകളോടെയാണ് ഉല്ലാസ യാത്രകള്‍ ആരംഭിക്കും. ഉച്ചഭക്ഷണവും യാത്രക്കൂലിയും ഉള്‍പ്പെടെ 1020 രൂപയാണ് നിരക്ക്. റോസ്മല, തെ•ല, പാലരുവി എന്നീ വിനോദസഞ്ചാര കേന്ദ്രങ്ങള്‍ ഉള്‍പ്പെടുത്തിയുള്ള റോസ്മലയാത്രയ്ക്ക് 770 രൂപയാണ് നിരക്ക്. ഒന്നാം തീയതി കൂടാതെ മെയ് 18,31 എന്നീ ദിവസങ്ങളിലും വാഗമണ്‍ യാത്ര ഉണ്ടായിരിക്കും. മെയ് മൂന്നിനും 24 നും ചാര്‍ട്ട് ചെയ്തിട്ടുള്ള ഇല്ലിക്കല്‍ കല്ല്- ഇലവീഴാപൂഞ്ചിറ യാത്ര രാവിലെ അഞ്ചുമണിക്ക് ആരംഭിച്ച രാത്രി 10.30 ന് മടങ്ങിയെത്തും. 820 രൂപയാണ് നിരക്ക്. മെയ് നാലിന് നെഫര്‍റ്റിറ്റി കപ്പല്‍ യാത്ര, മലയാറ്റൂര്‍ തീര്‍ത്ഥാടനം എന്നിവ ഉണ്ടായിരിക്കും. അഞ്ചുമണിക്കൂര്‍ അറബിക്കടലില്‍ ചുറ്റി കറങ്ങാനുള്ള അവസരം ഒരുക്കുന്ന യാത്രക്ക് കപ്പല്‍ എന്‍ട്രി ഫീ, ഗാനമേള, പലതരം ഗെയിമുകള്‍, ബുഫൈ ഡിന്നര്‍, മറ്റ് ആക്ടിവിറ്റീസ്, കെഎസ്ആര്‍ടിസി ബസ് ഫെയര്‍ എന്നിവ ഉള്‍പ്പെടെ 4240 രൂപയാണ് ചാര്‍ജ്. 5-10 വയസ്സിനിടയിലുള്ള കുട്ടികള്‍ക്ക് 1950 രൂപ ആണ് നിരക്ക്. മെയ് നാല് കൂടാതെ മെയ് 25നും കപ്പല്‍ യാത്ര ഉണ്ടായിരിക്കും..
ഭരണങ്ങാനം അല്‍ഫോന്‍സാമ്മ കബറിടം, വഴി മലയാറ്റൂറിന് പോകുന്ന തീര്‍ത്ഥാടന യാത്ര രാവിലെ അഞ്ചുമണിക്ക് ആരംഭിച്ച് പത്തുമണിക്ക് മടങ്ങിയെത്തും 850 രൂപയാണ് നിരക്ക്. മെയ് ഏഴ്, 23 എന്നീ ദിവസങ്ങളില്‍ ഗവി ട്രിപ്പ് ഉണ്ടായിരിക്കും ബോട്ടിംഗ്, പ്രവേശനഫീസുകള്‍, ഗവി ഗൈഡ് ഫീസ്, ഉച്ചഭക്ഷണം എന്നിവ ഉള്‍പ്പെടെ 1750 രൂപയാണ് നിരക്ക്.
മെയ് ഏഴിന് വൈകിട്ട് ഏഴിന് കണ്ണൂര്‍ കാഴ്ചകള്‍ എന്ന പേരിട്ടിരിക്കുന്ന കണ്ണൂര്‍ – കോഴിക്കോട് യാത്ര ആരംഭിക്കും. പാപ്പിനിശ്ശേരി, പൈതല്‍മല, പാലക്കയം തട്ട്, പെറ്റ് സ്റ്റേഷന്‍, പയ്യാമ്പലം, തെയ്യക്കാഴ്ചകള്‍, ബേപ്പൂര്‍ ബീച്ച് മിട്ടായിത്തെരുവ് എന്നിവ ഉള്‍പ്പെടുന്ന യാത്രയ്ക്ക് 2800 രൂപയാണ് നിരക്ക്.
മെയ് 10ന് മൂന്ന് യാത്രകള്‍ ഉണ്ടായിരിക്കും മാംഗോ മെഡോസ്, രാമക്കല്‍മേട്, പൊ•ുടി. ലോകത്തിലെ ഏറ്റവും വലിയ അഗ്രോ തീം പാര്‍ക്ക് എന്ന് അറിയപ്പെടുന്ന മാന്‍ഗോ മെഡോസ് യാത്രയ്ക്ക് 1790 രൂപയാണ് നിരക്ക്. രണ്ടു നേരത്തെ ഭക്ഷണം, പാര്‍ക്ക് എന്‍ട്രി ഫീ, പാര്‍ക്കിലെ ബോട്ടിംഗ്, ത്രീഡി തിയേറ്റര്‍ ഉള്‍പ്പെടെയുള്ള എല്ലാ റൈഡുകളുടെയും എന്‍ട്രി ഫീ എന്നിവ ഉള്‍പ്പെടുന്ന യാത്ര രാവിലെ 5.30ന് കൊല്ലത്ത് നിന്ന് ആരംഭിക്കും.. രാമക്കല്‍മേട് യാത്രക്ക് 1030 രൂപയാണ് നിരക്ക്. രാവിലെ അഞ്ചുമണിക്ക് പുറപ്പെടുന്ന യാത്ര അയ്യപ്പന്‍കോവില്‍ തൂക്കുപാലം, കാല്‍വരി മൗണ്ട് രാമക്കല്‍മേട് എന്നിവിടങ്ങള്‍ സന്ദര്‍ശിക്കും. മെയ് 11 മൂന്നാര്‍ യാത്രയ്ക്ക് 2380 രൂപയാണ് നിരക്ക്. എസി ഡോര്‍മെറ്ററി താമസം, ജീപ്പ് സഫാരി, ഒരുനേരത്തെ ഉച്ചഭക്ഷണം എന്നിവ പാക്കേജില്‍ ഉള്‍പ്പെടും. മെയ് 11 ന്റെ സ്നോ പാര്‍ക്ക് ട്രിപ്പ് യാത്രികര്‍ക്ക് ഒരു പുതിയ അനുഭവമാകും. പാര്‍ക്ക് എന്‍ട്രി, ഉച്ചഭക്ഷണം എന്നിവ ഉള്‍പ്പെടെ 2520 രൂപയാണ് നിരക്ക്
മെയ് 11ന്റെ ശിവക്ഷേത്രങ്ങള്‍ രാവിലെ അഞ്ചിന് ആരംഭിച്ച് 10 മണിക്ക് മടങ്ങി എത്തും. ആലുവ ശിവ ക്ഷേത്രം, ഏറ്റുമാനൂര്‍, വൈക്കം, കടുത്തുരുത്തി, തിരുനക്കര, ചെങ്ങന്നൂര്‍ ശിവക്ഷേത്രങ്ങള്‍ എന്നിവിടങ്ങള്‍ ആണ് സന്ദര്‍ശിക്കുക. മെയ് 15ന്റെ സൈലന്റ് വാലി രാത്രി 10ന് പുറപ്പെട്ട് 17ന് രാത്രി മടങ്ങിയെത്തും സൈലന്റ് വാലി കൂടാതെ മലമ്പുഴ, കല്‍പ്പാത്തി, പാലക്കാട് കോട്ട, വരിക്കാശ്ശേരി മന, കുഞ്ഞന്‍ നമ്പ്യാര്‍ സ്മാരകം എന്നിവിടങ്ങളും സന്ദര്‍ശിക്കും. നിരക്ക് 3080 രൂപ. അന്വേഷണങ്ങള്‍ക്ക് : 9747969768, 9995554409, 7592928817

മാറിയ കേരളം എന്ന വിഷയത്തില്‍ ചുറ്റുംകണ്ട, അനുഭവിച്ചറിഞ്ഞ നാടിന്റെ വികസനകാഴ്ചകള്‍, കാഴ്ചക്കാരിലേക്ക് രസകരമായി എത്തിക്കുന്ന പരമാവധി ഒരു മിനുട്ട് ദൈര്‍ഘ്യമുള്ള റീല്‍സ് തയ്യാറാക്കി സമ്മാനങ്ങള്‍ നേടാന്‍ ജില്ലാ ഇന്‍ഫര്‍മേഷന്‍ ഓഫീസ് അവസരം ഒരുക്കുന്നു. സംസ്ഥാന മന്ത്രിസഭയുടെ നാലാം വാര്‍ഷികാഘോഷത്തിന്റെ ഭാഗമായി ഇന്‍സ്റ്റഗ്രം തുടങ്ങിയ മാധ്യമങ്ങളില്‍ ഉള്‍ക്കൊള്ളിക്കാനാകും വിധത്തിലുള്ള, നിലവാരമുള്ളവയാണ് നിര്‍മിക്കേണ്ടത്. ഇതിനകം പുറത്തിറങ്ങിയിട്ടുള്ള ആശയങ്ങളുടെ പകര്‍പ്പാകരുത്. മൗലികമായ സൃഷ്ടികളാണ് സമര്‍പിക്കേണ്ടത്. സ്വന്തം ക്യാമറയില്‍ (ഫോണ്‍/വിഡിയോ ക്യാമറ) ചിത്രീകരിച്ചവയാകണം. ഫയല്‍ ഫുട്ടേജുകള്‍ ഉപയോഗിക്കരുത്. പരസ്യചലച്ചിത്രങ്ങളുടെ മാതൃകയിലും റീലുകള്‍ തയ്യാറാക്കാം. ഒരാള്‍ ഒന്നുമാത്രമാണ് അയക്കേണ്ടത്. ഏതുപ്രായക്കാര്‍ക്കും മത്സരത്തില്‍ പങ്കെടുക്കാം.
വിജയികള്‍ക്ക് ആകര്‍ഷകമായ സമ്മാനങ്ങള്‍ നല്‍കും. റീലുകള്‍ reelkeralaprd2025@gmail.com ഇ-മെയിലിലേക്ക് വി-ട്രാന്‍സ്ഫര്‍ മുഖേന അയക്കണം. അവസാന തീയതി മെയ് രണ്ട്.

പത്തനാപുരം: നടപ്പാലം തകര്‍ന്ന് വീണ് തൊഴിലുറപ്പ് തൊഴിലാളികള്‍ക്ക് പരിക്കേറ്റു. പിറവന്തൂര്‍ പഞ്ചായത്തില്‍ കിഴക്കേമുറി വാര്‍ഡില്‍ നാരാങ്ങാപ്പുറത്ത് ഏലാ തോടിന് കുറുകെയുള്ള ചെറിയ പാലമാണ് തകര്‍ന്നത്. വെള്ളിയാഴ്ച രാവിലെ പത്തിനാണ് സംഭവം.
തോടിന്റെ നവീകരണപ്രവര്‍ത്തികള്‍ നടന്നുവരികയായിരുന്നു. ഇതിനിടെ മറുകരയിലേക്ക് പോകാനായി തൊഴിലാളികള്‍ പാലത്തിലേക്ക് കയറി.ഒരുമിച്ച് ആളുകള്‍ കയറിയതോടെ പാലം തകര്‍ന്നു. ആറ് തൊഴിലാളികള്‍ തോട്ടിലേക്ക് വീണ് പരിക്കേറ്റു. ഓടികൂടിയ മറ്റ് തൊഴിലാളികളും നാട്ടുകാരും ചേര്‍ന്നാണ് തോട്ടില്‍ വീണു കിടന്നവരെ രക്ഷപ്പെടുത്തിയത്.കിഴക്കേമുറി സ്വദേശികളായ രാജി (33), അമ്പിളി (43), ബിന്ദു (45), സത്യഭാമ (65), ബിന്ദു മുളവക്കുളം (45), ഉഷ (45) എന്നിവര്‍ക്കാണ് പരിക്കേറ്റത്. ഇവരെ പുനലൂര്‍ താലൂക്ക് ആശുപത്രിയില്‍ പ്രവേശിപ്പിച്ചു.

കൊല്ലം: വടക്കേവിള വലിയ കൂനമ്പായിക്കുളം ക്ഷേത്രത്തില്‍ നടക്കുന്ന നക്ഷത്ര സത്ര ഇഷ്ടി യാഗത്തിന് ഇന്നലെ ഭക്തിനിര്‍ഭരമായ തുടക്കമായി. ശ്രീ രാമചന്ദ്ര വൈദിക പീ
ഢത്തിന്റെ ആഭിമുഖ്യത്തില്‍ മെയ് മൂന്നുവരെയാണ് യാഗം നടക്കുന്നത്.
മുടപ്പിലാപ്പിള്ളമഠം വാസുദേവ സോമയാജിപ്പാടിന്റെ മഠത്തില്‍ നിത്യം അഗ്നി ജ്വലിക്കുന്ന ഹോമകുണ്ഡത്തില്‍നിന്ന് മുഖ്യ ഋതിക് ഗണേഷ് ഗോകലേക്കര്‍ യാഗാഗ്നി തയ്യാറാക്കി ഹോമകുണ്ഡത്തിലേയ്ക്ക് പകര്‍ന്നതൊടെ യാഗത്തിന് തുടക്കമായി. 27 നക്ഷത്രങ്ങളെ അടിസ്ഥാനമാക്കി നടക്കുന്ന യാഗമാണ് ഇത്. മുടപ്പിലാപ്പിള്ളി മഠം വാസുദേവ സോമയാജിപ്പാടും, സ്മിത പത്തനാടിയുമാണ് യാഗ യജമാനന്മാര്‍. ഗോകര്‍ണ്ണം നിശ്വനാഥ് ശര്‍മ്മ, മന്ദര്‍ശര്‍മ്മ, രവി ശര്‍മ്മ, ചൈതന്യ ശര്‍മ്മ, ഗണപതി ശര്‍മ്മ എന്നിവര്‍ ഉപഋതുക്കളുമാണ്.

കൊല്ലം: കുണ്ടറ പോലീസ് സ്റ്റേഷന്‍ പരിധിയില്‍ വീട്ടമ്മയെ കൊലപ്പെടുത്തിയ കേസിലെ പ്രോസിക്യൂഷന്‍ ഭാഗം തെളിവെടുപ്പ് പൂര്‍ത്തിയായി. കേരളപുരം കരിമ്പിന്‍ കരയില്‍ വീട്ടിലെ ഷാജില (42) യെ ആണ് അനീഷ്‌കുട്ടി എന്നയാള്‍ കുത്തിക്കൊലപ്പെടുത്തിയത്.
ഷാജിലയുടെ മകനെയും രണ്ട് സര്‍ക്കിള്‍ ഇന്‍സ്‌പെക്ടര്‍മാരെയും ഉള്‍പ്പെടെ 40 സാക്ഷികളെ പ്രോസിക്യൂഷന്‍ ഭാഗത്തേക്ക് വിസ്തരിച്ചു. 2019 ഡിസംബറിലാണ് കേസിനാസ്പദമായ സംഭവം. സ്‌കൂള്‍ ബസില്‍ മകളെ കയറ്റിവിട്ട ശേഷം തിരികെ വീട്ടിലേക്ക് നടന്നുവരവെ പ്രതി ഷാജിലയെ തടഞ്ഞ് നിര്‍ത്തി കത്തികൊണ്ട് കുത്തി കൊലപ്പെടുത്തുകയായിരുന്നു. പ്രതിയെ സംഭവസ്ഥലത്തു നിന്ന് കസ്റ്റഡിയില്‍ എടുത്തിരുന്നു. പ്രോസിക്യൂഷന്‍ ഭാഗത്തേക്ക് 40 സാക്ഷികളെ വിസ്തരിച്ചു. 68 രേഖകളും 13 തൊണ്ടിമുതലുകളും കോടതിയില്‍ ഹാജരാക്കി.
കേസില്‍ പ്രതിയുടെ മൊഴി രേഖപ്പെടുത്തിയ ശേഷം പ്രതിഭാഗം തെളിവിനായി കേസ് അവധി വെച്ചിരിക്കുകയാണ്. വിസ്താരം 29ന് പൂര്‍ത്തിയാകും.
കൊല്ലം 5 അഡിഷണല്‍ സെഷന്‍സ് കോടതിയിലാണ് വിചാരണ നടക്കുന്നത്. പ്രോസിക്യൂഷന്‍ ഭാഗത്തേക്ക് മുന്‍ജില്ലാ ഗവണ്‍മെന്റ് പ്ലീഡര്‍ അഡ്വ. ആര്‍ സേതുനാഥും പബ്ലിക് പ്രോസിക്യൂട്ടര്‍ ജയകമലാസനനുമാണ് ഹാജരാകുന്നത്.