മിക്ക ആളുകളും കാലുകള്ക്ക് അനുഭവപ്പെടുന്ന ഒരു തരിപ്പും മരവിപ്പും നിസ്സാരമായി തള്ളിക്കളയാറുണ്ട്. എന്നാല് ഈ അവസ്ഥ എപ്പോഴും അത്ര നിസ്സാരമാകണമെന്നില്ല. കാലുകളിലെ രക്തയോട്ടം കുറയുന്നതോ നാഡികള്ക്ക് ഏല്ക്കുന്ന സമ്മര്ദ്ദമോ ആണ് ഇതിന് പിന്നിലെ പ്രധാന വില്ലന്.
രക്തത്തിലെ പഞ്ചസാരയുടെ അളവ് വര്ദ്ധിക്കുന്നത് വഴി ഞരമ്പുകള്ക്കുണ്ടാകുന്ന ‘ഡയബറ്റിക് ന്യൂറോപ്പതി’ എന്ന അവസ്ഥയും, നാഡികളുടെ പ്രവര്ത്തനത്തെ ബാധിക്കുന്ന വിറ്റാമിന് ബി 12-ന്റെ കുറവും ഇതിന് കാരണമാകാറുണ്ട്. കൂടാതെ, ഇടുങ്ങിയ ഷൂസുകള് ധരിക്കുന്നതോ തെറ്റായ രീതിയില് ഇരിക്കുന്നതോ മൂലം രക്തയോട്ടം തടസ്സപ്പെടുന്നതും മരവിപ്പിലേക്ക് നയിക്കാം.
കാലിലെ മരവിപ്പ് മാറ്റാന് വീട്ടില് തന്നെ പരീക്ഷിക്കാവുന്ന ചില സിമ്പിള് വഴികള് ഇവയാണ്
എപ്സം സാള്ട്ട് ബാത്ത്: ചെറുചൂടുവെള്ളത്തില് അല്പം എപ്സം സാള്ട്ട് ഇട്ട് പാദങ്ങള് മുക്കിവയ്ക്കുന്നത് രക്തചംക്രമണം മെച്ചപ്പെടുത്താന് സഹായിക്കും. ഇത് പേശികളിലെ സമ്മര്ദ്ദം കുറയ്ക്കുകയും വേദനയ്ക്ക് ആശ്വാസം നല്കുകയും ചെയ്യുന്നു.
കാലുകള് ഉയര്ത്തി വയ്ക്കുക: ദിവസവും 10-15 മിനിറ്റ് നേരം ഹൃദയത്തിന്റെ നിരപ്പിനേക്കാള് അല്പം ഉയരത്തില് കാലുകള് വച്ച് കിടക്കുന്നത് ഞരമ്പുകളിലെ സമ്മര്ദ്ദം കുറയ്ക്കാന് സഹായിക്കും.
എണ്ണ മസാജ്: ഒലിവ് ഓയിലോ വെളിച്ചെണ്ണയോ ഉപയോഗിച്ച് പാദങ്ങള് മൃദുവായി മസാജ് ചെയ്യുന്നത് രക്തയോട്ടം വര്ദ്ധിപ്പിക്കാനും മരവിപ്പ് വേഗത്തില് മാറ്റാനും ഉത്തമമാണ്.
ഭക്ഷണത്തില് ശ്രദ്ധിക്കുക: വിറ്റാമിന് B12 ധാരാളമായി അടങ്ങിയ മുട്ട, പാല്, ധാന്യങ്ങള് എന്നിവ നിത്യഭക്ഷണത്തില് ഉള്പ്പെടുത്തുന്നത് നാഡികളുടെ ആരോഗ്യം സംരക്ഷിക്കും.
ലളിതമായ വ്യായാമങ്ങള്: ദീര്ഘനേരം ഇരിക്കുമ്പോഴോ നില്ക്കുമ്പോഴോ കാല്വിരലുകള് ഇടയ്ക്കിടെ ചലിപ്പിക്കുക. പാദങ്ങള് വട്ടത്തില് കറക്കുന്നത് പേശികള്ക്ക് അയവ് നല്കും.
ധാരാളം വെള്ളം കുടിക്കുക: ശരീരത്തിലെ വിഷാംശങ്ങള് പുറന്തള്ളാനും പേശീവലിവ് കുറയ്ക്കാനും ധാരാളം വെള്ളം കുടിക്കേണ്ടത് അത്യാവശ്യമാണ്.
മരവിപ്പ് ദീര്ഘനേരം നിലനില്ക്കുകയോ വിട്ടുമാറാതെ വരികയോ ചെയ്താല് അത് പ്രമേഹത്തിന്റെയോ മറ്റോ ലക്ഷണമാകാം. അത്തരം സാഹചര്യങ്ങളില് ഒരു ഡോക്ടറുടെ നിര്ദ്ദേശം തേടാന് മടിക്കരുത്
