തൊഴിൽപരമായ ഉത്തരവാദിത്തങ്ങളും ഒരു മനുഷ്യന്റെ വ്യക്തിപരമായ കാര്യങ്ങളും സന്തുലിതാവസ്ഥയിൽ നിലനിർത്തുന്നതിനെയാണ് വർക്ക് ലൈഫ് ബാലൻസ് എന്നതുകൊണ്ട് ഉദ്ദേശിക്കുന്നത്. വർക്ക് ലൈഫ് ബാലൻസ് ഉണ്ടെങ്കിൽ മാത്രമേ നിങ്ങളുടെ മാനസികാരോഗ്യം മെച്ചപ്പെടുത്താനും ഉത്പാദനക്ഷമത വർധിപ്പിക്കാനും സാധിക്കുകയുള്ളു. പ്രധാനമായും രണ്ട് രീതിയിൽ നിങ്ങൾക്ക് വർക്ക് ലൈഫ് ബാലൻസ് ചെയ്യാൻ കഴിയും. ഒന്ന് ജോലിയും വ്യക്തിപരമായ ജീവിതവും വേർതിരിച്ച് കൊണ്ടുപോകുക, രണ്ടാമത്തേത് ഇവ രണ്ടും സംയോജിപ്പിച്ച് മുന്നോട്ട് പോകുക. ഓരോരുത്തരുടെയും സാഹചര്യത്തിന് അനുസരിച്ച് ഇത് തെരഞ്ഞെടുക്കാവുന്നതാണ്.
വർക്ക് ലൈഫ് ബാലൻസിന്റെ പ്രാധാന്യത്തെ കുറിച്ച് അറിയാം
മാനസികാരോഗ്യം മെച്ചപ്പെടുത്തുന്നു
വർക്ക് ലൈഫ് ബാലൻസ് ഉണ്ടാകുന്നതിലൂടെ സമ്മർദ്ദം കുറയ്ക്കാനും ക്ഷീണം ഒഴിവാക്കാനും സാധിക്കും. ഇത് നിങ്ങളുടെ മാനസികാരോഗ്യം മെച്ചപ്പെടുത്താൻ സഹായിക്കുന്നു.
ഉത്പാദനക്ഷമത വർധിക്കുന്നു
വർക്ക് ലൈഫ് ബാലൻസ് നിലനിർത്തുന്നതിലൂടെ ജോലിയിൽ കൂടുതൽ ശ്രദ്ധിക്കാനും കാര്യക്ഷമതയും ഉത്പാദനക്ഷമതയും വർദ്ധിപ്പിക്കാനും സാധിക്കും.
ശാരീരിക ആരോഗ്യം
ശാരീരിക ആരോഗ്യം മെച്ചപ്പെടുത്താനും വർക്ക് ലൈഫ് ബാലൻസ് നിലനിർത്തുന്നതിലൂടെ സാധിക്കും. ഇത് മുടക്കമില്ലാതെ വ്യായാമങ്ങൾ ചെയ്യാനും ആരോഗ്യകരമായ ഭക്ഷണങ്ങൾ കഴിക്കാൻ സമയം കണ്ടെത്താനും നിങ്ങളെ സഹായിക്കുന്നു.
ബന്ധങ്ങൾ ദൃഢമാക്കുന്നു
വർക്ക് ലൈഫ് ബാലൻസ് നിലനിർത്തുന്നതിലൂടെ കുടുംബാംഗങ്ങൾക്കൊപ്പവും സുഹൃത്തുക്കൾക്കൊപ്പവും സമയം ചിലവഴിക്കാൻ സാധിക്കും. ഇത് ബന്ധങ്ങളെ കൂടുതൽ ദൃഢമുള്ളതാക്കുന്നു.
തൊഴിൽ സംതൃപ്തി
ജോലിയോടുള്ള താല്പര്യവും സംതൃപ്തിയും വർധിപ്പിക്കാൻ വർക്ക് ലൈഫ് ബാലൻസ് നിലനിർത്തുന്നതിലൂടെ സാധിക്കും.
വർക്ക് ലൈഫ് ബാലൻസ് മെച്ചപ്പെടുത്താൻ പ്രധാനമായും ശ്രദ്ധിക്കേണ്ട കാര്യങ്ങൾ
പ്ലാൻ വേണം
വ്യക്തിപരമായ സമയങ്ങൾ ഒരിക്കലും ജോലിക്ക് വേണ്ടി മാറ്റിവെയ്ക്കരുത്. കൃത്യമായ സമയത്തിനുള്ളിൽ ജോലികൾ ചെയ്തു തീർക്കാൻ ശ്രദ്ധിക്കണം. ജോലി സമയം, പുറത്തുപോകുന്ന സമയം എന്നിവ കൃത്യമായി പ്ലാൻ ചെയ്യണം.
ശ്രദ്ധ കേന്ദ്രീകരിക്കാം
ജോലി സമയങ്ങളിൽ ജോലിയിൽ മാത്രം ശ്രദ്ധ കേന്ദ്രീകരിക്കാൻ ശ്രദ്ധിക്കണം. ഇത് നിങ്ങളുടെ ജോലികൾ വേഗത്തിൽ തീർക്കാൻ സഹായിക്കുന്നു. രാത്രിയിലും വീക്കെൻഡിലും ജോലി ചെയ്യുന്ന ശീലം ഒഴിവാക്കാം.
ഒന്നിൽകൂടുതൽ ജോലികൾ ചെയ്യരുത്
ഒരേസമയം ഒന്നിൽകൂടുതൽ ജോലികൾ ചെയ്യരുത്. ജോലികൾ ചെയ്യാൻ ഒരു സമയവും മീറ്റിംഗുകൾക്ക് മറ്റൊരു സമയവും സെറ്റ് ചെയ്യാൻ ശ്രദ്ധിക്കണം. ഇത് നിങ്ങൾക്ക് കൂടുതൽ ശ്രദ്ധ കേന്ദ്രീകരിക്കാനും, ക്ഷീണം അകറ്റാനും, കാര്യക്ഷമത കൂട്ടാനും സഹായിക്കുന്നു.
വിശ്രമം എടുക്കണം
ദിവസം മുഴുവനും ജോലിയിൽ ആയിപ്പോകരുത്. ഇടയ്ക്കിടെ വിശ്രമം എടുക്കാനും പ്രത്യേകം ശ്രദ്ധിക്കേണ്ടതുണ്ട്. ഇത് നിങ്ങൾക്ക് കൂടുതൽ ഉന്മേഷം ലഭിക്കാൻ സഹായിക്കുന്നു.
മാറിനിൽക്കാം
അവധിയുള്ള ദിവസങ്ങളിൽ ജോലിക്കാര്യങ്ങളിൽ നിന്നും മാറിനിൽക്കാൻ ശ്രദ്ധിക്കണം. ഈ സമയങ്ങൾ വ്യക്തിപരമായ ജീവിതത്തിന് മാറ്റി വയ്ക്കാം.
ഇഷ്ടമുള്ള കാര്യങ്ങൾ ചെയ്യാം
ദിവസം മുഴുവനും ജോലിഭാരങ്ങളും ജോലിക്കാര്യങ്ങളും ഓർത്തിരിക്കേണ്ടതില്ല. ജോലി സംബന്ധമായ വിഷയങ്ങൾ ഓഫിസിൽ തന്നെ തീർക്കുക. വീടെത്തിയാൽ അവിടത്തെ കാര്യങ്ങളിൽ മാത്രം ശ്രദ്ധ കേന്ദ്രീകരിക്കാം.
