കരുനാഗപ്പള്ളി.എഴുത്തുകാരനും, സാമൂഹിക പരിഷ്ക്കർത്താവുമായിരുന്ന സി.എസ്.സുബ്രഹ്മണ്യൻ പോറ്റിയുടെ സ്മരണാർത്ഥം സി.എസ്.സുബ്രഹ്മണ്യൻ പോറ്റി ലൈബ്രറിയും, കരുനാഗപ്പള്ളി ടൗൺ ക്ലബ്ബും ചേർന്ന് ഏർപ്പെടുത്തിയിട്ടുള്ള സി.എസ്.സുബ്രഹ്മണ്യൻ പോറ്റി സ്മാരക പുരസ്ക്കാരം 2025 എൻ.എസ്.സുമേഷ് കൃഷ്ണൻ്റെ ‘എൻ്റെയും നിങ്ങളുടേയും മഴകൾ ‘ എന്ന കവിതാ സമാഹാരം അർഹമായി. പതിനയ്യായിരം രൂപയും ഫലകവും, പ്രശസ്തിപത്രവും അടങ്ങുന്നതാണ് പുരസ്ക്കാരം.
പ്രൊഫ.സി.ശശിധരക്കുറുപ്പ് ,ഡോ. ക്ലാപ്പന പത്മകുമാർ, ഡോ.സുരേഷ് മാധവ് എന്നിവരടങ്ങുന്ന ജഡ്ജിംഗ് കമ്മിറ്റിയാണ് അവാർഡിന് അർഹമായ കൃതി തെരഞ്ഞെടുത്തത്.
തിരുവനന്തപുരം നെയ്യാറ്റിൻകര ആറാലുംമൂട് സ്വദേശിയാണ് എൻ.എസ്.സുമേഷ് കൃഷ്ണൻ.
നവംബർ 24 ന് കരുനാഗപ്പള്ളി ടൗൺ ക്ലബ്ബിൽ ചേരുന്ന സി.എസ്.സുബ്രഹ്മണ്യൻ പോറ്റി അനുസ്മരണത്തിൽ പുരസ്ക്കാരം സമർപ്പിക്കുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു.
അഡ്വ.എൻ.രാജൻപിള്ള, എ.ഷാജഹാൻ, പ്രൊഫ.ആർ.അരുൺകുമാർ, ഇടക്കുളങ്ങര ഗോപൻ, എസ്.ശിവകുമാർ ,എൻ.എസ്.അജയകുമാർ, ബി.ജയചന്ദ്രൻ ,എൻ.അജികുമാർ, എം.ടി.ഹരികുമാർ ,സജീദ് എന്നിവർ സംബന്ധിച്ചു.
